STUDU 4
Jeová ta abênsua nos sforsu pa sisti Komemorason
‘Nhos kontinua ta faze kel-li pa nhos lenbra di mi.’ — LUCAS 22:19.
KÁNTIKU 19 Komemorason di mórti di Kristu
KUZÊ KI NU STA BEN STUDA a
1-2. Pamodi ki nu ta sisti Komemorason tudu anu?
DJA ten kuazi 2 mil anu, ki Jizus da se vida pa nos pa nu pode ten vida pa tudu ténpu. Na kel noti antis di el móre, Jizus fla se sigidoris pa es faze un komemorason sinplis, pa es uza pon ku vinhu pa lenbra di kel sakrifisiu ki el faze pa es ku amor. — 1 Cor. 11:23-26.
2 Nu ta obi ku órdi ki Jizus da pamodi nu ta ama-l txeu. (João 14:15) Tudu anu na kes simana antis i dipôs di Komemorason, nu ta mostra nos gratidon pa kuzê ki Jizus faze pa nos óras ki nu ta midita ku orason sobri kuzê ki se mórti siginifika pa nos. Tanbê, nu ta fika txeu kontenti di faze más na pregason i konvida txeu algen pa sta ku nos na kel runion spesial. I nu ka ta dexa nada inpidi-nu di sisti Komemorason.
3. Kuzê ki nu sta ben odja na kel studu li?
3 Na kel studu li, nu sta ben odja três kuza ki ta mostra pamodi ki povu di Jeová ta faze txeu sforsu pa sisti Komemorason di mórti di Jizus: (1) es ta faze Komemorason sima Jizus manda pa faze, (2) es ta konvida otus algen pa sisti Komemorason i (3) es ta sisti Komemorason sikrê na situasons difísil.
SIMA JIZUS MANDA PA FAZE
4. Ki perguntas ta respondedu tudu anu na Komemorason i pamodi ki sabe respósta di kes pergunta é inportanti pa nos? (Lucas 22:19, 20)
4 Tudu anu na Komemorason nu ta obi un diskursu ku bazi na Bíblia ki ta responde alguns pergunta di manera klaru. Nu ta prende pamodi ki nu meste di un resgati i modi ki mórti di un ómi pode paga pekadus di tudu algen. Tanbê nu ta lenbradu di kuzê ki pon ku vinhu ta reprizenta i kenha ki pode kume pon i bebe vinhu. (Lé Lucas 22:19, 20.) I nu ta midita na kel futuru rei di sábi pa kes algen ki ta ben vive pa tudu ténpu li na téra. (Isa. 35:5, 6; 65:17, 21-23) É txeu inportanti nu da valor pa kes verdadi li. Txeu algen ka ta ntende kes kuza li i es ka ta valor pa sakrifisiu di Jizus. Tanbê txeu algen ka ta komemora se mórti di manera ki el inxina se sigidoris pa faze.
5. Dipôs ki maioria di kes apóstlu di Jizus móre, modi ki txeu algen kumesa ta komemora mórti di Jizus?
5 Poku ténpu dipôs ki maioria di apóstlus di Jizus móre, kristons falsu entra na kongregason. (Mat. 13:24-27, 37-39) Es pâpia ‘kuzas ki ka é verdadi, pa es disvia disiplus pa bai ses tras.’ (Atos 20:29, 30) Un di kes ‘kuzas ki ka é verdadi’ ki kes kriston falsu kumesa ta inxina sobri Jizus é ma el ka oferese se korpu ‘un bês sô, pa kaba ku pekadu di txeu algen’, sima Bíblia ta fla. I es ta fla ma se sakrifisiu debe fazedu sénpri. (Heb. 9:27, 28) Oji txeu algen ki é sinseru ta kridita na kel ensinu falsu li. Es ta bai igreja tudu simana, i alvês tudu dia pa komemora sakrifisiu di Jizus, ki na Igreja Katólika ta txomadu di “Sakrifisiu di Misa.” b Otus relijion ta lenbra di mórti di Jizus más poku, i txeu algen di kes relijion li ka sabe kuzê ki mórti di Jizus siginifika. Alguns algen talvês ta pergunta: ‘Mórti di Jizus krê fla ma nos pekadu pode purduadu?’ Pamodi ki es ta faze kel pergunta li? Pamodi otus algen konvense-s ma mórti di Jizus ka ta purdua-nu nos pekadu. Modi ki kes ki ta sigi Jizus di verdadi ta djuda kes algen li ntende kuzê ki sakrifisiu di Jizus krê fla, i kal ki é manera sértu di komemora mórti di Jizus?
6. Na 1872, kuzê ki un grupu di studantis di Bíblia ntende?
6 Na 1870, Charles Russell i un grupu di studantis di Bíblia kumesa ta studa Bíblia más txeu. Es krê sabeba kal ki é valor di sakrifisiu di Jizus i modi ki es ta komemoraba se mórti. Na 1872, es ntende ku bazi na Bíblia ma Jizus da se vida pa salva tudu algen. Es ka fika ku kes verdadi ki es prende sô pa es. Má es spadja-s através di livrus, jornal i revistas. Poku dipôs es kumesa ta faze Komemorason di mórti di Jizus un bês pa anu, sima kes kriston na ténpu di apóstlus ta fazeba.
7. Modi ki piskiza ki kes studanti di Bíblia faze na komésu sta ta djuda-nu?
7 Kes kuza ki kes studanti di Bíblia diskubri dja ten txeu anu, ta djuda-nu oji. Di ki manera? Jeová djuda-nu ntende kal ki é valor di sakrifisiu di Jizus i kuzê ki el ta ben faze pa tudu algen na téra. (1 João 2:1, 2) Tanbê, nu prende ma Bíblia ta da dôs speransa pa kes algen ki sirbi Deus: vida pa tudu ténpu na séu pa alguns algen i vida pa tudu ténpu li na téra pa milhons di otus algen. Nu ta bira más amigu di Jeová óras ki nu ta analiza modi ki Jeová ta ama-nu i modi ki sakrifisiu di Jizus ta djuda-nu. (1 Ped. 3:18; 1 João 4:9) Nton sima nos irmons na pasadu, nu ta konvida otus algen pa sisti Komemorason, sima Jizus inxina se disiplus pa faze.
POVU DI JEOVÁ TA KONVIDA OTUS PA KOMEMORASON
Kuzê ki bu pode faze pa partisipa más txeu na kanpanha pa konvida algen pa Komemorason? (Odja parágrafus 8 ti 10.) e
8. Kuzê ki povu di Jeová ta faze pa konvida otus pa sisti Komemorason? (Odja fotus.)
8 Dja ten txeu anu ki povu di Jeová ta konvida otus algen pa Komemorason. Na 1881, Sentinéla tinha un avizu pa konvida irmons ku irmans na Mérka pa sisti kel runion spesial li na kaza di un irmon na Allegheny, Pensilvánia. Dipôs, kada kongregason kumesa ta faze se Komemorason. Na marsu di 1940, irmons fladu ma es pode konvidaba kalker algen na ses tiritóriu ki mostraba interesi. I na 1960, pa primeru bês, Betel manda kongregasons konviti inprimidu. Di la pa dianti, distribuidu bilhons di konviti pa Komemorason. Pamodi ki nu ta faze txeu sforsu pa konvida otus algen?
9-10. Kenha ki nu ta djuda óras ki nu ta sforsa pa konvida otus pa sisti Komemorason? (João 3:16)
9 Un di kes kuza ki ta pô-nu ta konvida otus algen pa Komemorason, é pamodi nu krê pa kes algen ki ta sisti pa primeru bês prende kuzê ki Jeová i Jizus faze pa nos. (Lé João 3:16.) Nu ta spéra ma kel ki es ta odja i kel ki es ta obi na Komemorason, ta pô-s ku gana di prende más i ma es ta bira sérvu di Jeová. Má Komemorason ta djuda otus algen tanbê.
10 Tanbê nu ta konvida kes ki ka sta sirbi Jeová más. Nu ta faze kel-li pa lenbra-s ma inda Deus ta ama-s. Txeu di es ta seta nos konviti i nu ta fika kontenti di odja-s. Sisti Komemorason ta lenbra-s di modi ki es gostaba di sirbi Jeová na pasadu. Odja izénplu di Mónika. c El kumesa ta prega otu bês duránti COVID-19. Dipôs ki el sisti Komemorason na 2021, el fla: “Kel Komemorason li foi txeu spesial pa mi. Pa primeru bês na 20 anu, N konsigi da tistimunhu pa otus algen i konvida-s pa Komemorason. N faze tudu kel ki N pode pa konvida otus pamodi N ten txeu gratidon pa kuzê ki Jeová i Jizus faze pa mi.” (Sal. 103:1-4) Ka ta nporta si otus algen ta seta nos konviti ô nau, nu ta faze nos midjór pa konvida otus pa Komemorason pamodi nu sabe ma Jeová ta da valor pa sforsu ki nu ta faze.
11. Modi ki Jeova sta ta abênsua sforsu ki nu sta ta faze pa konvida algen pa sisti Komemorason? (Ageu 2:7)
11 Jeová sta ta abênsua sforsu ki nu sta ta faze pa konvida otus algen pa sisti Komemorason. Na 2021, nbóra nu ka konsigi faze txeu kuza pamodi COVID-19, pa primeru bês, nu tevi 21.367.603 algen ta sisti. Kel-li é kuazi dôs bês i meiu más txeu di ki nunbru di Tistimunhas di Jeová na mundu interu! É klaru ki Jeová ka sta preokupadu sô ku kantu algen ki ta sisti, má el sta preokupadu ku kada algen ki ta sisti. (Luc. 15:7; 1 Tim. 2:3, 4) Nu pode ten sertéza ma óras ki nu ta konvida otus algen, Jeová sta ta djuda-nu atxa kes ki ten bon korason. — Lé Ageu 2:7.
POVU DI JEOVÁ TA SISTI KOMEMORASON SIKRÊ KU PRUBLÉMAS
Jeová ta abênsua sforsu ki nu ta faze pa sisti Komemorason. (Odja parágrafu 12.) f
12. Pamodi ki pode ser difísil sisti Komemorason? (Odja fotu.)
12 Jizus dja flaba ma na ténpu di fin, nu ta pasaba pa txeu situason difísil, sima opozison na família, pirsigison, géra, duénsas ki ta spadja i otus kuza. (Mat. 10:36; Mar. 13:9; Luc. 21:10, 11) Alvês ta fika difísil nu faze Komemorason di mórti di Jizus pamodi kes kuza li. Kuzê ki nos irmons ku irmans ta faze pa vense kes prubléma li i modi ki Jeová djuda-s?
13. Modi ki Jeová abênsua koraji i disizon di Arten di faze Komemorason kantu el staba prézu?
13 Sikrê nu podu prézu. Kes irmon ki sta prézu pamodi ses fé, ta faze kel ki es ta pode pa komemora mórti di Jizus. Odja izénplu di irmon Arten. Na kes simana antis i dipôs di Komemorason di 2020, el staba na un séla pikinoti ki tinha kuatu ô sinku prézu. Nbóra el staba prézu, el konsigi djunta alguns kuza ki el tinha pa reprizenta pon ku vinhu di Komemorason i el disidi faze diskursu di Komemorason pa el. Má kes ómi ki staba na kel séla ta fumaba i ta uzaba maus palavra. Kuzê ki el faze? El pidi-s pa es ka fuma i pa es ka fla maus palavra sô duránti un óra. Arten fika dimiradu pamodi es konkorda. El fla: “N fla-s ma N ta papiaba ku es sobri Komemorason.” Nbóra es fla ma es ka krê obiba, dipôs ki es odja i es obi Arten ta faze Komemorason es faze-l txeu pergunta.
14. Modi ki povu di Jeová sisti Komemorason sikrê ku COVID-19?
14 Sikrê ku COVID-19. Kantu COVID-19 kumesa, povu di Jeová ka konsigi sisti Komemorason tudu djuntu na mésmu lugar. Má kel-li ka inpidi-s di faze Komemorason. d Kes kongregason ki tinha internet faze Komemorason através di prugramas sima Zoom. Má i kes milhon di algen ki ka tinha internet? Na alguns país, filial organiza pa Komemorason dadu na tilivizon ô na rádiu. Tanbê alguns betel grava diskursu di Komemorason na más di 500 língua. Asi, ti kes algen ki ta moraba na kes zóna más lonji pode sistiba Komemorason. I irmons ntrega kes gravason pa kes algen ki mesteba.
15. Kuzê ki bu prende ku izénplu di un studanti di Bíblia ki txoma Sue?
15 Sikrê ku opozison na família. Pa alguns algen, prubléma más grandi pa sisti Komemorason é opozison na família. Odja izénplu di un studanti di Bíblia ki txoma Sue. Un dia antis di Komemorason di 2021, Sue fla kel irman ki ta fazeba el studu ma el ka ta konsigi sistiba Komemorason pamodi opozison di se família. Nton, kel irman lé Lucas 22:44. Dipôs, el splika-l ma óras ki nu ta pasa pa situasons difísil nu debe sigi izénplu di Jizus, faze orason pa Jeová i dexa kuzas na se mô. Na kel otu dia, Sue pripara pon ku vinhu i el sisti kel prugrama spesial di Adorason di palmanhan na jw.org. Kel dia di noti, kantu el staba el sô na se kuartu el sisti Komemorason pa tilifóni. Dipôs, Sue skrebe pa kel irman ki ta fazeba el studu: “Onti bu nkoraja-m txeu. N faze tudu kel ki N pode pa sisti Komemorason i Jeová faze kel otu párti. Ta falta-m palavras pa N fla modi ki N sta kontenti i ku txeu gratidon!” Bu ta atxa ma Jeová pode djuda-u si bu sta pasa pa un situason sima kel-li?
16. Pamodi ki nu ten sertéza ma Jeová ta abênsua sforsu ki nu ta faze pa sisti Komemorason? (Romanos 8:31, 32)
16 Jeová ta da txeu valor pa sforsu ki nu ta faze pa sisti Komemorason di mórti di Jizus. Nu pode ten sertéza ma Jeová ta abensua-nu óras ki nu ta mostra gratidon pa kel ki el faze pa nos. (Lé Romanos 8:31, 32.) Pur isu, nu debe sta disididu na sisti Komemorason di kel anu li i duránti kes simana antis i dipôs di Komemorason nu krê faze más pa Jeová.
KÁNTIKU 18 Obrigadu pa resgati
a Na térsa-fera, 4 di abril di 2023, milhons di algen na mundu interu ta ben sisti Komemorason di mórti di Jizus. I txeu algen ta ben sisti-l pa primeru bês. I kes ki dexa di sirbi Jeová i ki pa txeu anu ka sisti Komemorason, ta sta la tanbê. Alguns ta pasa pa txeu difikuldadi, má simé es ta sisti. Ka ta nporta kal ki é bu situason, bu pode ten sertéza ma Jeová ta fika kontenti ku sforsu ki bu ta faze pa sisti Komemorason.
b Kes algen li ta kridita ma duránti kel misa, pon i vinhu ta bira korpu i sangi di Jizus. Es ta pensa ma tudu bês ki es partisipa na kel serimónia li korpu i sangi di Jizus ta sakrifikadu.
c Mudadu alguns nómi.
d Tanbê odja artigus na site ku téma “Komemorason di 2021”.
