STUDU 1
KÁNTIKU 2 Bu nómi é Jeová
Da Jeová glória
NOS TESTU DI ANU PA 2025: ‘Nhos da Jeová kel glória ki se nómi merese’. — SALMO 96:8.
ASUNTU PRINSIPAL
Prende modi ki nu pode da Jeová kel glória ki se nómi merese.
1. Kuzê ki txeu algen ta preokupa ku el oji?
TALVÊS dja bu da kónta ma txeu algen oji ta preokupa más ku ses kabésa di ki ku otus algen. Pur izénplu, alguns algen ta uza redi sosial pa txoma atenson pa ses kabésa i pa kes kuza dretu ki es konsigi faze. Má poku algen oji sta ta da glória pa Jeová Deus. Na kel studu li, nu ta ben odja kuzê ki da Jeová glória krê fla i kuzê ki debe pô-nu ta faze kel-li. Tanbê nu ta ben odja modi ki nu pode da Deus kel glória ki el merese i modi ki ka ta dura el ta ben da se nómi glória.
KUZÊ KI DA JEOVÁ GLÓRIA KRÊ FLA?
2. Modi ki Jeová mostra se glória na monti Sinai? (Odja dizenhu na kapa.)
2 Kuzê ki é glória? Na Bíblia, palavra “glória” pode krê fla kalker kuza ki ta poi un algen ta fika dimiradu. Jeová mostra se glória poku ténpu dipôs ki nason di Israel libertadu di skravidon na Ijitu. Imajina milhons di israelita djuntu, pértu di monti Sinai ta obi kuzê ki Deus tinha pa flaba es. Un núven sukuru kubri kel montanha. Dirapenti, kontise un grandi tremor di téra, talvês djuntu ku un erupson di vulkon. Tanbê tinha relánpagu, strubada i un son altu dimás di un buzina. (Ézu. 19:16-18; 24:17; Sal. 68:8) Imajina modi ki kes israelita fika dimiradu kantu Jeová mostra-s se glória di manera poderozu.
Jeová mostra israelitas se glória na monti Sinai (Odja parágrafu 2.)
3. Modi ki nu pode da Jeová glória?
3 I nos? Nu ta pode da Jeová glória? Nu ta pode sin. Un manera di nu da Jeová glória é óras ki nu ta pâpia ku otus algen sobri se grandi puder i se kualidadis bunitu. Tanbê, nu ta da Deus glória óras ki nu ta da-l ónra pa tudu kes kuza ki el djuda-nu faze. (Isa. 26:12) Rei Davidi é un bon izénplu di algen ki da Jeová glória. Na un orason ki Davidi faze na frenti di israelitas, el fla Deus: ‘Ó Jeová, abo é grandi, bu ten puder i glória, abo é bunitu dimás i bu merese ónra; pamodi tudu kuza ki sta na séu ku na téra é di bo.’ Dipôs ki Davidi tirmina se orason, ‘tudu kongregason lova Jeová’. — 1 Cró. 29:11, 20.
4. Modi ki Jizus da Jeová glória?
4 Kantu Jizus staba na téra, el da se Pai glória kantu el rekonhese ma é Jeová ki daba el puder pa faze kes milagri. (Mar. 5:18-20) Tanbê, Jizus da Jeová glória pa manera ki el ta papiaba sobri se Pai i pa manera ki el ta trataba otus algen. Un bês, Jizus staba ta inxina na un sinagóga, i un di kes algen ki staba ta obi éra un mudjer ki dja tinha 18 anu ku un dimóni. Kel dimóni poi se korpu ta fika inkrokadu i el ka ta konsigi fikaba ku se korpu rétu. Fórti tristi! Ku konpaxon, Jizus txiga na kel mudjer i el pâpia ku el ku bondadi. El fla-l: “Mudjer, bu sta livri di bu duénsa.” Jizus poi mô riba di kel mudjer i kel óra kel mudjer poi di pé, el fika rétu i “el kumesa ta lova Deus.” El fika txeu gratu pamodi Jeová da-l se saúdi otu bês! (Luk. 13:10-13) Kel mudjer tinha bons motivu pa da Jeová glória i nos tanbê nu ten bons motivu pa faze kel-li.
KUZÊ KI TA PÔ-NU TA DA JEOVÁ GLÓRIA?
5. Ki motivus nu ten pa ruspeta Jeová?
5 Nu ta da Jeová glória pamodi nu ten grandi ruspetu pa el. Nu ten txeu motivu pa ruspeta-l. Jeová é Tudu-Poderozu i se puder ka ten limiti. (Sal. 96:4-7) Na kes kuza ki el faze, nu ta konsigi odja klaru se grandi sabedoria. El da-nu vida i tudu kes kuza ki nu meste pa nu sta bibu. (Apo. 4:11) El é lial. (Apo. 15:4) Tudu kuza ki el ta faze ta ten bons rezultadu i tudu kuza ki el promete el ta kunpri. (Jos. 23:14) Pur isu, proféta Jeremias fla sobri Jeová: ‘Entri tudu kes algen di nasons ki ten sabedoria i entri tudu ses reinu, ka ten ningen sima bo’! (Jer. 10:6, 7) Di serteza nu ten bons motivu pa ruspeta nos Pai ki sta na séu. Alén di merese nos ruspetu, se kualidadis bunitu ta pô-nu ta ama-l.
6. Pamodi ki nu ta ama Jeová?
6 Nu ta da Jeová glória pamodi nu ta ama-l txeu. Odja alguns kualidadi di Jeová ki ta pô-nu ta ama-l. El ten mizerikórdia i konpaxon. (Sal. 103:13; Isa. 49:15) Óras ki nu ta xinti tristi, el ta xinti tristi tanbê. (Zac. 2:8) El ta djuda-nu konxe-l i bira se amigu. (Sal. 25:14; Atus 17:27) El é umildi. ‘El ta inbaxa pa el odja séu ku téra, el ta labanta algen umildi di téra.’ (Sal. 113:6, 7) Pamodi tudu kes motivu li, nu krê da glória pa nos Deus ki é grandi. — Sal. 86:12.
7. Ki oportunidadi spesial nu ten?
7 Nu ta da Jeová glória pamodi nu krê pa otus algen konxe-l. Txeu algen ka konxe verdadi sobri Jeová. Pamodi? É pamodi Satanás sta ta sega ses menti óras ki el ta spadja mintiras gravi sobri Jeová. (2 Kor. 4:4) Satanás ta konvense pesoas ma Jeová é un Deus ki ta vinga, ki ka ta inporta ku pesoas i ma el é kulpadu pa txeu sufrimentu na mundu. Má nu sabe verdadi sobri nos Deus! Nu ten oportunidadi di fla otus algen ki tipu di Deus el é i di da Jeová glória tanbê. (Isa. 43:10) Asuntu prinsipal di Salmo 96 é da Jeová glória. Timenti nu ta pâpia di alguns vérsu di kel salmu li, pensa na maneras ki bu pode da Jeová kel glória ki el merese.
MODI KI NU PODE DA JEOVÁ KEL GLÓRIA KI EL MERESE?
8. Kal ki é un manera ki nu pode da Jeová glória? (Salmo 96:1-3)
8 Lé Salmo 96:1-3. Nu pode da Jeová glória através di kuzas ki nu ta fla sobri el. Na kes vérsu li, povu di Jeová ta konvidadu pa ‘kanta pa Jeová,’ pa ‘lova se nómi’, i pa ‘pâpia di kes notísia sábi di se salvason,’ i pa ‘pâpia di se glória na meiu di nasons.’ Tudu kes-li é maneras ki nu pode da glória pa nos Pai na séu. Kes judeu fiel i kes kriston na ténpu di apóstlus, gostaba txeu di pâpia ku otus algen sobri kes bons kuza ki Jeová dja fazeba pa es i pa difende se nómi. (Dan. 3:16-18; Atus 4:29) Modi ki nu pode faze mésmu kuza?
9-10. Kuzê ki bu prende ku izénplu di Anjelina? (Odja fotu.)
9 Odja izénplu di un irman ki txoma Anjelina, a ki ta mora na Mérka. Ku koraji, el difende nómi di Jeová na kel inpréza undi el ta trabadjaba. Dja ki Anjelina éra nova na kel inpréza, el konvidadu pa sisti un runion djuntu ku kes algen ki dja tinha poku ténpu ta trabadja na kel inpréza tanbê. Na kel runion, tudu algen tevi oportunidadi di konta algun kuza sobri se vida. Anjelina disidi mostra alguns fotu ki ta mostraba se alegria di ser un Tistimunha di Jeová. Má antis di Anjelina kumesa ta pâpia, se koléga di trabadju fla ma el kriadu na un família di Tistimunhas di Jeová. El kumesa ta faze trósa di nos krénsa. Anjelina fla: “Nha korason kumesa ta bate fórti. Má N pensa: ‘N sta ben dexa algen konta mintira sobri Jeová? Ô N sta ben difende-l?’”
10 Kantu se koléga tirmina, Anjelina faze un orason faxi déntu di el. Nton ku bondadi, el fla: “N kriadu sima bo. Ami tanbê N kriadu na un família di Tistimunhas di Jeová i N kontinua ti oji.” Enbóra anbienti fika pizadu, Anjelina kontinua kalmu. El mostra fotu di sel i di se amigus ta sirbi Jeová ku alegria i ku ruspetu, el splika-s se krénsa. (1 Ped. 3:15) Kal ki foi rezultadu? Kantu Anjelina tirmina di pâpia, kel ómi staba kalmu. Ti mésmu el fla ma el tinha bons lenbransa di kantu el staba ta kria na un família di Tistimunhas di Jeová. Anjelina fla: “Jeová merese pa nu difende-l. É un ónra pâpia verdadi sobri el.” Pa nos tanbê é un ónra lova Jeová i da-l glória mésmu óras ki otus ka ta ruspeta-l.
Nu pode da Jeová glória através di kuzas ki nu ta fla, nos kuzas di valor i nos konportamentu. (Odja parágrafus 9-10) b
11. Modi ki adoradoris verdaderu sénpri mostra ma es ta sigi kel prinsípiu ki sta na Salmo 96:8?
11 Lé Salmo 96:8. Nu pode da Jeová glória ku nos kuzas di valor. Adoradoris verdaderu sénpri da Jeová glória di kel manera li. (Pro. 3:9) Pur izénplu, kes israelita da dinheru i kuzas di valor pa djuda na faze ténplu i kuida di el. (2 Reis 12:4, 5; 1 Cró. 29:3-9) Alguns disiplu di Jizus da “kes kuza ki es tinha”, asi pa Jizus i se apóstlus pode tinha kuzê ki es mesteba. (Luk. 8:1-3) Tanbê na ténpu di apóstlus, kes kriston djuda ses irmons ku irmans na ténpu di frónta. (Atus 11:27-29) Nos tanbê oji, nu pode da Jeová glória óras ki nu ta faze kontribuison di livri vontadi.
12. Modi ki nos kontribuison ta da Jeová glória? (Odja fotu.)
12 Odja más un izénplu ki ta mostra modi ki nos kontribuison ta da Jeová glória. Un rilatóriu di 2020 pâpia di rezultadu di séka ki dura pa txeu ténpu na Zinbábue. Txeu algen staba na prigu di móre di fómi pamodi es ka tinha ninhun kumida, ti mésmu un irman ki txoma Prisila. Sikrê ku séka, Prisila kontinua ta ba pregason tudu kuarta-fera i sésta-fera, mésmu duránti ténpu di simentera. Se vizinhus ta fazeba el trósa pamodi el ta baba pregason envês di trabadja na se txon. Es fika ta fla-l: “Bu ta ben pasa fómi.” Prisila ta respondeba es ku kunfiansa: “Jeová nunka ka ta bandona se sérvus.” Poku ténpu dipôs el resebe ajuda di nos organizason. El resebe kes ajuda li pamodi nos kontribuison. Kes vizinhu di Prisila fika dimiradu i es fla: “Deus nunka ka bandona-u, pur isu nu krê prende más sobri el.” Seti vizinhu di sel kumesa ta sisti runion.
Nu pode da Jeová glória ku nos kuzas di valor (Odja parágrafu 12.) c
13. Modi ki nos konportamentu pode da Jeová glória? (Salmo 96:9)
13 Lé Salmo 96:9. Nu pode da Jeová glória pa manera ki nu ta konporta. Kes saserdóti ki ta sirbiba na ténplu di Jeová meste staba linpu. (Ézu. 40:30-32) Má más inportanti di ki tene nos korpu linpu, é mante un konportamentu linpu. (Sal. 24:3, 4; 1 Ped. 1:15, 16) Bíblia ta fla ma nu debe sforsa pa nu duspi di “kel manera di ser bédju” i bisti di “kel manera di ser novu”. Kel-li krê fla ma nu debe faze tudu kel ki nu ta pode pa nu ivita pensa i faze kuzas ki ta dexa Jeová tristi. Envês di kel-li, nu debe pensa i aji di manera ki ta mostra ma nu ta imita Jeová i kes kualidadi bunitu ki el ten. (Kol. 3:9, 10) Ku ajuda di Jeová, ti mésmu kes algen ki ta faze kuzas mariadu dimás i kes algen violéntu pode muda i bisti di kel manera di ser novu.
14. Kuzê ki nu ta prende ku spiriénsia di Jack? (Odja fotu.)
14 Odja izénplu di Jack ki éra un ómi violéntu i ki es ta txomaba el di dimóni. Pamodi kes krimi ki el faze Jack dadu senténsa di mórti. Má timenti el staba ta spera pa el matadu, el konkorda studa Bíblia ku un irmon ki ta pregaba na kel kadia undi ki Jack staba prézu. Enbóra Jack faze txeu kuza mariadu, el duspi di kel manera di ser bédju i ku ténpu el batiza. Jack muda txeu ki na dia ki el ta ba matadu alguns guarda di kadia tinha lágua na odju timenti es ta dispidi di el. Un sarjentu ki ta trabadjaba na kel kadia fla: “Jack éra kel piór prézu ki tinha li, gósi el é un di kes midjór.” Na kel simana dipôs ki Jack matadu, kel irmon ki ta ba fazeba runion tudu simana na kadia inkontra un prézu ki ba sisti runion pa primeru bês. Kuzê ki pô-l ta ba sisti runion? El fika dimiradu ku modi ki Jack muda se konportamentu i el krê sabeba kuzê ki el meste fazeba pa adora Jeová. Kel-li ta mostra klaru ma nos konportamentu pode traze glória pa nos Pai na séu! — 1 Ped. 2:12.
Nu pode da Jeová glória através di nos konportamentu (Odja parágrafu 14.) d
MODI KI JÁ-JÁ JEOVÁ TA BEN DA GLÓRIA PA SE NÓMI?
15. Modi ki já-já Jeová ta ben da glória pa se nómi pa tudu ténpu?(Salmo 96:10-13)
15 Lé Salmo 96:10-13. Kes últimu vérsu li di Salmo 96 ta mostra ma Jeová é un Rei i Juís justu. Modi ki já-já Jeová ta ben da glória pa se nómi? El ta faze kel-li óras ki el ben faze justisa. Ka ta dura el ta ben distrui Babilónia Grandi ki sta ta mantxa se nómi ki é santu. (Apo. 17:5, 16; 19:1, 2) Óras ki Babilónia Grandi distruídu alguns algen pode disidi ben sirbi Jeová djuntu ku nos. Na fin, na Armajedon, Jeová ta distrui kel mundu mau li i Satanás. El ta ben kaba ku tudu kes algen ki é kóntra el i ki ta mantxa se nómi. Má el ta salva tudu kes algen ki ta ama-l, ki ta obi ku el i ki ten orgulhu di da-l glória. (Mar. 8:38; 2 Tes. 1:6-10) Dipôs di próva final, ki ta kontise na fin di govérnu di Kristu di mil anu, Jeová ta ben linpa se nómi pa tudu ténpu. (Apo. 20:7-10) Na kel ténpu, ‘téra ta ben intxi di konhisimentu di glória di Jeová, sima agu ta kubri mar.’ — Hab. 2:14.
16. Kuzê ki bu sta disididu na faze? (Odja dizenhu.)
16 Ta ben ser sábi dimás óras ki tudu algen ben da Jeová glória ki se nómi merese! Má timenti nu sta ta spera kel dia txiga, nu krê faze nos párti pa nu da nos Deus glória na tudu oportunidadi. Pa djuda-nu konsentra na kel responsabilidadi inportanti li, Grupu Enkaregadu di Óbra skodje Salmo 96:8 pa ser testu di anu pa 2025. El ta fla: ‘Nhos da Jeová kel glória ki se nómi merese’.
Na futuru, tudu algen ta ben da Jeová glória ki se nómi merese! (Odja parágrafu 16.)
KÁNTIKU 12 Nos Deus Jeová é grandi
a Mudadu alguns nómi.
