Talvês, sima txeu di nos, bu ta atxa difísil lenbra di kes kuza ki bu studa. Má dja bu repara modi ki é fásil lenbra di kes ilustrason di Jizus? Bu ta konsigi imajina-s i kel-li ta djuda-u lenbra di es. Di mésmu manera, bu ta konsigi lenbra más txeu di kes kuza ki bu studa óras ki bu ta imajina-s. Modi ki bu pode faze kel-li? Faze dizenhu óras ki bu ta studa.

Kes algen ki ta dizenha kes kuza novu ki es prende, normalmenti ta lenbra di es midjór. Es da kónta ma dizenha ta djuda-s intende midjór ka sô palavras má tanbê ideias i kuzas ki nu ka ta konsigi odja. Ses dizenhu é ka óbras di arti, má es é sbosu sinplis i kurtu. Próvas ta mostra ma kel téknika li ta djuda prinsipalmenti kes algen di más idadi.

Na prósimu bês ki bu ta studa, talvês bu pode tenta faze alguns dizenhu di kes kuza ki bu prende. Bu pode fika spantadu ku kantu kuza ki bu ta konsigi lenbra!