STUDU 2
KÁNTIKU 132 Nos é un sô
Maridu, onra bu mudjer
“Abo maridu, ... da-l ónra”. — 1 PEDRU 3:7.
ASUNTU PRINSIPAL
Modi ki un maridu pode da se mudjer ónra na kuzas ki el ta fla i na kuzas ki el ta faze.
1. Kal ki é un di kes razon ki poi Jeová ta kria kazamentu?
JEOVÁ é “kel Deus filís” i el krê pa nu ser filís tanbê. (1 Tim. 1:11) El da-nu txeu prezenti pa djuda-nu ten un vida filís. (Tia. 1:17) Un di kes prezenti é kazamentu. Óras ki un ómi i un mudjer kaza, es ta promete ama, ruspeta i kuida di kunpanheru. Óras ki maridu ku mudjer ta mante ses amor fórti pa kunpanheru es pode ten txeu alegria. — Pro. 5:18.
2. Modi ki txeu maridu oji ta trata ses mudjer?
2 Má é tristi di odja ma txeu maridu ku mudjer na mundu oji skese di kel promésa ki es faze na dia di ses kazamentu. Pur isu, es é ka filís. Ka dura li un rilatóriu di Organizason Mundial di Saúdi fla ma txeu maridu ta sota ses mudjer, ta fla kuzas ki ta máguas-s ô ta maltrata-s di otus manera. Un maridu ki ta faze kel-li pode trata se mudjer ku ruspetu na frenti di otus algen, má el ta maltrata-l na kaza. Txeu kazamentu tanbê ta ten prubléma óras ki maridu ta odja pornografia.
3. Pamodi ki alguns maridu ta abuza di ses mudjer?
3 Kuzê ki pode poi alguns maridu ta maltrata ses mudjer? Talvês es tevi un pai ki éra violéntu, pur isu, es ta pensa ma kel konportamentu li é normal. Otus pamodi ses kultura, es é influensiadu pa kel ideia mariadu ma un “ómi di verdadi” meste uza forsa pa mostra se mudjer kenha ki ta manda. Otus ómi ka inxinadu kontrola ses sentimentu i kel-li ta inklui raiba ki es ta xinti. Alguns ómi ki ta odja pornografia ta kria ideia mariadu sobri mudjer i sobri séksu. Alén di kel-li, alguns rilatóriu ta mostra ma duránti COVID-19, txeu maridu kumesa ta abuza di ses mudjer. É klaru ki ninhun di kes kuza li é ka motivu pa un maridu abuza di se mudjer.
4. Ku kuzê ki kes maridu ki ta sirbi Jeová debe toma kuidadu i pamodi?
4 Kes maridu ki ta sirbi Jeová meste toma kuidadu pa es ka dizenvolve un ideia mariadu sobri mudjer. a Pamodi? Un di kes razon é pamodi é kel ki nu ta pensa ki nu ta faze. Apóstlu Paulu aviza kes kriston skodjedu ku spritu na Roma pa “para di ser influensiadu pa es mundu li”. (Rom. 12:1, 2) Kantu Paulu skrebe pa kel kongregason, dja tinha txeu anu ki es éra kriston. Má kuzê ki Paulu fla ta mostra ma alguns algen na kongregason inda staba ta ser influensiadu pa kes kustumu i pa manera di pensa di mundu. É pamodi kel-li ki el konsedja-s pa es muda ses manera di pensa i ses konportamentu. É klaru ki kel konsedju ta aplika na kes maridu ki ta sirbi Jeová oji. Má é tristi pamodi alguns di es influensiadu pa manera di pensa di es mundu i ti es ta abuza di ses mudjer. b Modi ki Jeová ta spera ma un maridu ta trata se mudjer? Nu ta atxa respósta na testu ki tradu téma di es studu.
5. Di akordu ku 1 Pedru 3:7, modi ki un maridu debe trata se mudjer?
5 Lé 1 Pedru 3:7. Jeová fla maridu pa da se mudjer ónra. Da ónra é manera ki nu ta trata un algen ki nu ta ruspeta. Un maridu ki ta onra se mudjer ta trata-l ku bondadi i amor. Na kel studu li, nu ta ben odja modi ki un maridu pode da se mudjer ónra. Má primeru, nu ta ben odja ki konportamentu ki ta mostra falta di amor i ruspetu pa mudjer.
KA BU FAZE NADA KI TA MÁGUA BU MUDJER
6. Kuzê ki Jeová ta atxa di un ómi ki ta sota se mudjer? (Kolosensis 3:19)
6 Un maridu ka debe sota se mudjer. Jeová ta ôdia kes algen ki é violéntu. (Sal. 11:5) Jeová ta ôdia prinsipalmenti óras ki maridu é violéntu ku se mudjer. (Mal. 2:16; Lé Kolosensis 3:19 i nóta di rodapé.) Di akordu ku 1 Pedru 3:7, ki é testu ki tradu téma di kel studu li, si un maridu ka ta trata se mudjer dretu, el ta prujudika se amizadi ku Deus. Jeová pode ka obi se orason.
7. Di akordu ku Efézius 4:31, 32, ki tipu di konbérsu un maridu debe ivita? (Odja “Más splikason”.)
7 Un maridu ka debe grita ku se mudjer ô fla-l kuzas ki ta magua-l. Alguns maridu ta pâpia ku ses mudjer di manera ki ta mostra txeu raiba i es ta fla-s kuzas ki ta mágua-s txeu. Má Jeová ta ôdia “fúria, raiba, gritaria i palavras ki ta ofende”. c (Lé Efézius 4:31, 32.) Jeová ta obi tudu kuza. Jeová ta inporta ku manera ki maridu ta pâpia ku se mudjer sikrê es sta es sô na kaza. Un maridu ki ta pâpia di manera duru ku se mudjer ta prujudika ka sô se kazamentu má tanbê se amizadi ku Deus. — Tia. 1:26.
8. Kuzê ki Jeová ta xinti sobri pornografia i pamodi?
8 Un maridu ka debe odja pornografia. Kuzê ki Jeová ta xinti sobri pornografia? El ta ôdia-l. Un maridu ki ta odja imajens indisenti ta straga se amizadi ku Jeová i el ta mostra falta di ruspetu pa se mudjer. d Jeová ta spera ma un maridu ta kontinua lial pa se mudjer ka sô na kuzas ki el ta faze ma tanbê na se pensamentu. Jizus fla ma si un ómi paxona pa un otu mudjer “dja el faze adultériu na se korason.” e — Mat. 5:28, 29.
9. Pamodi ki Jeová ta ôdia óras ki un maridu ta obriga se mudjer faze algun kuza ki el ka krê óras ki es ta ten relason seksual?
9 Un maridu ka debe obriga se mudjer faze algun kuza ki el ka krê óras ki es ta ten relason seksual. Alguns maridu ta obriga ses mudjer ten alguns tipu di relason seksual ki ta poi kel mudjer ta xinti umilhadu, suju i ma el ka ta amadu. Jeová ta ôdia kel tipu di konportamentu li ki ta mostra falta di amor i ki ta mostra ma kel algen ta pensa sô na se kabésa. El ta spera ma un maridu ta ama se mudjer, ta trata-l ku bondadi i ma el ta ruspeta se konsénsia. (Efé. 5:28, 29) Má, i si un maridu ki é Tistimunha di Jeová ta obriga se mudjer faze kes kuza li ô el ta odja pornografia? Modi ki el pode muda se manera di pensa i di aji?
MODI KI UN MARIDU PODE PARA DI MOSTRA FALTA DI RUSPETU?
10. Modi ki izénplu di Jizus pode djuda kes ki é maridu?
10 Kuzê ki pode djuda un maridu para di maltrata i umilha se mudjer? El pode sforsa pa imita Jizus. Enbóra Jizus nunka ka kaza, má manera ki el ta trataba se disiplus é un bon izénplu di modi ki un maridu debe trata se mudjer. (Efé. 5:25) Pur izénplu, nu ben odja kuzê ki maridu pode prende di manera ki Jizus ta trataba ses apóstlu i manera ki el ta papiaba ku es.
11. Modi ki Jizus ta trataba ses apóstlu?
11 Jizus sénpri ta trataba ses apóstlu ku bondadi i ku ruspetu. El ka éra duru ku es nen el ka ta mandaba na es. Enbóra Jizus éra ses Sinhor i Instrutor nunka el ka ta uzaba se puder pa rabaxa-s ô pa poba es ku medu. Envês di kel-li el sirbi-s ku umildadi. (Juan 13:12-17) El fla ses disiplu: “Nhos prende ku mi, pamodi ami é mansu i umildi di korason, i nhos ta xinti aliviadu.” (Mat. 11:28-30) Repara ma Jizus fla ma el éra mansu. Un algen mansu é ka fraku. Envês di kel-li el meste ser un algen fórti pa el pode kontrola se kabésa. Óras ki el ta provokadu, el ta mante kalmu i el ta kontrola ses sentimentu.
12. Modi ki Jizus ta papiaba ku otus algen?
12 Jizus ta papiaba di manera ki ta konsolaba i inkorajaba otus algen. El ka ta papiaba di manera duru ku kes algen ki ta sigiba el. (Luk. 8:47, 48) Mésmu kantu ses inimigu ta insultaba el i ta tenta provokaba el, “el ka ta insultaba tanbê.” (1 Ped. 2:21-23) Alvês, Jizus ti ta skodje fikaba kaladu envês di responde di manera duru. (Mat. 27:12-14) Kel-li é un bon izénplu pa kes maridu ki é Tistimunhas di Jeová!
13. Sima sta na Mateus 19:4-6 modi ki un maridu pode “djunta ku se mudjer”? (Odja fotu.)
13 Jizus fla pa maridu kontinua lial pa se mudjer. El fla ma maridu debe “djunta ku se mudjer”. Kel-li é mésmu kuza ki se Pai dja flaba. (Lé Mateus 19:4-6.) Na gregu kel vérbu ki traduzidu pa “djunta ku” krê fla “kola”. Nton, kel union entri maridu i mudjer debe ser fórti sima si es sta koladu na kunpanheru. Si un di es faze algun kuza ki mágua kel otu es tudu dôs ta sufri. Un maridu ki ten amor fórti pa se mudjer ka ta odja ninhun tipu di pornografia. El ta disvia ses odju faxi di ‘odja pa kuzas ki ka ten valor’. (Sal. 119:37) Na verdadi, el ta faze un kontratu ku ses odju pa el ka odja di manera paxonadu pa kalker otu mudjer ki es é ka kazadu. — Jó 31:1.
Un maridu ki é lial ka ta odja pornografia (Odja parágrafu 13.) g
14. Kuzê ki un maridu ki ta maltrata se mudjer debe faze pa el rekupera se amizadi ku Jeová i ku se mudjer?
14 Un maridu ki ta sota se mudjer ô ki ta fla-l kuzas ki ta mágua-l, meste faze alguns kuza pa el rekupera se amizadi ku Jeová i ku se mudjer. Ki kuzas ki el meste faze? Primeru, el debe intende ma el tene un prubléma gravi. Nada ka sta sukundidu di odjus di Jeová. (Sal. 44:21; Ecl. 12:14; Ebr. 4:13) Sugundu, el debe para di abuza di se mudjer i muda se konportamentu. (Pro. 28:13) Tirseru, el debe pidi se mudjer i Jeová perdon i djobe manera pa es purdua-l. (Atus 3:19) Tanbê el debe pidi Jeová pa djuda-l ten dizeju di muda, i pa djuda-l kontrola kuzas ki el ta pensa, kuzas ki el ta pâpia i kuzas ki el ta faze. (Sal. 51:10-12; 2 Kor. 10:5; Flp. 2:13) Kuartu, el debe aji di akordu ku se orason i faze tudu kel ki el ta pode pa el prende ôdia tudu tipu di violénsia i konbérsu mariadu. (Sal. 97:10) Kintu, el debe djobe ajuda faxi di kes pastor amorozu na kongregason. (Tia. 5:14-16) Sestu, el debe faze un planu ki ta djuda-l ivita tudu kes tipu di konportamentu li na futuru. Un maridu ki ta odja pornografia debe faze kes mésmu kuza li. Jeová ta abênsua se sforsu di muda se konportamentu. (Sal. 37:5) Má sô para di faze kes kuza ki pode magua se mudjer ka ta txiga. Tanbê el meste prende modi ki el ta da se mudjer ónra. Modi ki el pode faze kel-li?
MODI KI BU PODE DA BU MUDJER ÓNRA
15. Modi ki un maridu pode mostra ma el ta ama se mudjer?
15 Mostra ma bu ta ama-l. Alguns maridu ki é filís na kazamentu ten ábitu di faze algun kuza tudu dia pa mostra ses mudjer modi ki es ta ama-s. (1 Juan 3:18) Un maridu pode mostra ma el ta ama se mudjer na kuzas pikinoti, sima pega-l na mô ô da-l un abrasu. El pode manda-l un mensajen i fla-l: “N tene sodadi di bo.” Ô pergunta-l: “Modi ki bu dia bai?” Di vês en kuandu el pode skrebe-l un karton i fla-l modi ki el ta ama-l. Óras ki un maridu ta faze kes kuza li el ta da se mudjer ónra i ses kazamentu ta fika fórti.
16. Pamodi ki un maridu debe fla se mudjer kuzê ki el gosta na el?
16 Fla-l ma el é inportanti pa bo. Un maridu ki ta da se mudjer ónra ta dexa-l sabe pamodi ki el ta da-l valor i el ta pô-l ta xinti sábi ku el mê. Un manera ki el ta faze kel-li, é óras ki el ta agradese-l pa tudu kuza ki el ta faze pa djuda-l. (Kol. 3:15) Óras ki un maridu ta fla se mudjer kuzê ki el gosta na el, el ta pô-l ta xinti suguru, amadu i ruspetadu. — Pro. 31:28.
17. Modi ki un maridu pode mostra ruspetu pa se mudjer?
17 Mostra bondadi i ruspetu. Un maridu ki ta ama se mudjer ta da-l valor i el ta kuida di el. El ta rekonhese ma se mudjer é un prezenti di Jeová. (Pro. 18:22; 31:10) Pamodi kel-li, el ta trata-l ku bondadi i ruspetu ti mésmu óras ki es ta ten relason seksual. El ka ta faze-l preson pa el faze algun kuza ki ta pô-l ta xinti umilhadu, ki ta inkomoda se konsénsia ô ki ta pô-l ta xinti ma el sta ta abuza di el. f Tanbê el ta sforsa pa mante un konsénsia linpu dianti di Jeová. — Atus 24:16.
18. Kuzê ki un maridu debe sta disididu na faze? (Odja kuadru “ Kuatu manera ki un maridu pode mostra ruspetu pa se mudjer”.)
18 Maridu, bu pode ten serteza ma Jeová ta odja i el ta da valor pa sforsu ki bu ta faze pa bu da bu mudjer ónra na tudu kuza ki bu ta fla i ki bu ta faze. Sta disididu na da-l ónra óras ki bu ta ivita faze kalker kuza ki ta mágua-l i trata-l ku bondadi, ruspetu i karinhu. Óras ki bu faze si, bu ta mostra ma bu ta ama-l i ma bu ta da-l valor. Si bu da bu mudjer ónra, bu ta proteje kel amizadi más inportanti ki ten ki é bu amizadi ku Jeová. — Sal. 25:14.
KÁNTIKU 131 ‘Kel ki Deus djunta’
a Maridus pode atxa txeu ajuda na kel artigu “Bu ta trata mudjer sima Jeová ta trata-s?”, na Sentinéla di janeru di 2024.
b Kel artigu “Ajuda pa kes algen ki sta sufri violénsia na família” pode djuda kes algen ki sta sufri violénsia na família. Bu ta atxa-l na “Otus asuntu”, na grupus di artigus, na jw.org ô na JW Library®.
c MÁS SPLIKASON: “Palavras ki ta ofende” ta inklui fla kuzas mariadu pa un algen pa insulta-l i faze-l xinti mal ku el mê. Kel-li ta inklui tanbê sta sénpri ta fla un algen kuzê ki bu ka gosta na el. Nton, kalker kuza ki un maridu ta fla pa mágua ô insulta se mudjer é palavras ki ta ofende.
d Odja artigu “Pornografia pode kaba ku bu kazamentu”, na jw.org i na JW Library.
e Un mudjer ki se maridu ta odja pornografia pode atxa ajuda na artigu “Kuzê ki bu pode faze si bu maridu ta odja pornografia”, na Sentinéla di agostu di 2023.
f Bíblia ka ta fla ki tipu di relason seksual é dretu i mariadu entri un ómi i un mudjer kazadu. Un kazal ki é Tistimunha di Jeová debe toma disizons ki ta da ónra pa Jeová, ki ta dexa kunpanheru kontenti i ki ta dexa-s ku konsénsia linpu. Normalmenti, un kazal ka ta pâpia ku otus algen sobri intimidadi di ses kazamentu.
g SPLIKASON DI FOTU: Alguns koléga di trabadju ki é ka Tistimunha di Jeová sta ta tenta mostra un irmon un revista ki ten pornografia.
