STUDU 5
KÁNTIKU 108 Amor lial di Deus
Modi ki amor di Deus ta djuda-nu?
“Kristu Jizus ben mundu pa salva kes ki é pekador.” — 1 TIMÓTIU 1:15.
ASUNTU PRINSIPAL
Modi ki resgati pode djuda-nu i modi ki nu pode mostra nos gratidon pa Jeová.
1. Kuzê ki nu pode faze pa dexa Jeová filís?
IMAJINA ma bu da un algen ki bu gosta un prezenti spesial ki é bunitu i ki el staba ta meste. Bu ta fikaba tristi si kel algen guardaba el i el ka pensa más na el. Má bu ta fikaba kontenti si kel algen uza kel prezenti i mostra se gratidon pa el. Kuzê ki nu ta prende ku kel-li? Jeová da-nu se Fidju pa móre pa nos. Di mésmu manera, Jeová ta fika txeu kontenti óras ki nu ta mostra nos gratidon pa kel prezenti di txeu valor i pa se amor ki pô-l ta da-nu se Fidju pa móre pa nos! — Juan 3:16; Rom. 5:7, 8.
2. Kuzê ki nu ta ben odja na kel studu li?
2 Sima ténpu ta ba ta pasa, nu pode kumesa ta da poku valor pa kel prezenti di resgati. É sima si nu sta ta guarda kel prezenti ki Deus da-nu. Nu sta kontenti di ten kel prezenti li, má kuazi nunka nu ka ta pensa na el. Pa kel-li ka kontise, sénpri nu debe pensa na tudu kel ki Deus i Jizus faze pa nos. Kel studu li pode djuda-nu faze kel-li. Nu ta ben odja modi ki resgati pode djuda-nu gósi i na futuru. Tanbê nu ta ben odja modi ki nu pode mostra nos gratidon pa amor di Jeová, prinsipalmenti na es ténpu di Komemorason.
MODI KI RESGATI TA DJUDA-NU GÓSI?
3. Kal ki é un manera ki resgati ta djuda-nu gósi?
3 Désdi gósi, sakrifisiu di resgati di Kristu sta ta djuda-nu. Pur izénplu, pamodi resgati, Jeová ta púrdua nos pekadu. El é ka obrigadu pa purdua-nu, má el krê faze kel-li. Salmista mostra se gratidon pa perdon di Jeová kantu el fla: ‘Pamodi abo Jeová, bo é bon i bu sta sénpri prontu pa púrdua’. — Sal. 86:5; 103:3, 10-13.
4. Pa kenha ki Jeová da resgati? (Lukas 5:32; 1 Timótiu 1:15)
4 Alguns algen ta xinti ma es ka merese pa Jeová purdua-s. Na verdadi, ninhun di nos ka merese. Apóstlu Paulu fla ma el “ka merese pa [el] txomadu di apóstlu”. Tanbê el fla: “Má pamodi kel grandi bondadi di Deus ami é kel ki mi é.” (1 Kor. 15:9, 10) Óras ki nu ta rapende di nos pekadu, Jeová ta purdua-nu. Pamodi? É ka pamodi nu ta merese-l má é pamodi el ta ama-nu. Si bu sta xinti ma bu ka merese pa Jeová purdua-u lenbra ma resgati é ka pa kes algen ki ka ten pekadu, má é pa kes pekador ki rapende. — Lé Lukas 5:32; 1 Timótiu 1:15.
5. Algun di nos debe atxa ma nu ten direitu di resebe mizerikórdia di Jeová? Splika.
5 Ninhun di nos ka debe atxa ma nu ten direitu di resebe mizerikórdia di Jeová, sikrê dja nu ten txeu ténpu ta sirbi-l. É klaru ki Jeová ta da valor pa tudu kuza ki dja nu faze pa el. (Ebr. 6:10) Jeová di livri vontadi da-nu se Fidju, ki é un prezenti, má el ka da-nu el pa paga kes kuza dretu ki nu ta faze pa el. Si nu flaba ma nu merese resebe mizerikórdia ô nu merese ser tratadu di un manera spesial, na verdadi, nu sta ta fla ma Kristu móre atoa. — Konpara ku Gálatas 2:21.
6. Pamodi ki Paulu trabadja duru na sirvisu pa Jeová?
6 Paulu sabia ma el ka mereseba aprovason di Deus. Nton, pamodi ki el trabadja duru na sirvisu pa Jeová? El ka faze kel-li pa mostra ma el ta mereseba, má pa mostra ma el ta daba valor pa kel grandi bondadi di Jeová. (Efé. 3:7) Sima Paulu, nu ta kontinua ta sirbi Jeová ku zelu, ka pa ganha se mizerikórdia, má pa mostra nos gratidon pa el.
7. Di ki otu manera resgati pode djuda-nu gósi? (Romanus 5:1; Tiagu 2:23)
7 Un otu manera ki resgati ta djuda-nu gósi, é ki el ta da-nu oportunidadi di ten un amizadi fórti ku Jeová. a Sima nu odja na kel otu studu, kantu nu nase nu ka tinha un amizadi ku Deus. Má pamodi resgati nu pode ten “pas ku Deus” i ser se amigu. — Lé Romanus 5:1; Tiagu 2:23.
8. Pamodi ki nu debe ser gratu pa Jeová pa priviléjiu di faze orason?
8 Pensa na un otu kuza ki ten aver ku nos amizadi ku Jeová, ki é priviléjiu di faze orason. Alén di obi kes orason ki se povu ta faze óras ki es sta na runion, Jeová tanbê ta obi kes orason ki kada un di nos ta faze óras ki nu sta nos sô. Orason pode poi nos korason ta xinti kalmu i da-nu kel pas déntu nos. Má el é más di ki sô un bon terapia. El pode bira nos amizadi ku Deus más fórti. (Sal. 65:2; Tia. 4:8; 1 Juan 5:14) Kantu Jizus staba na téra, el ta fazeba txeu orason pamodi el sabia ma Jeová staba ta obi-l i ma orason ta poba se amizadi ku se Pai ta bira más fórti. (Luk. 5:16) Nu ten txeu gratidon pa sakrifisiu di Jizus, pamodi nu ta pode ser amigu di Jeová i pâpia ku El na orason!
MODI KI RESGATI TA DJUDA-NU NA FUTURU?
9. Modi ki resgati ta ben djuda kes algen ki ta adora Jeová di manera fiel, na futuru?
9 Modi ki resgati ta ben djuda kes algen ki ta adora Jeová di manera fiel, na futuru? Es ta ben ten vida pa tudu ténpu. Txeu algen ta pensa ma kel-li ka ta kontise pamodi dja ten milharis di anu ki algen ta móre. Má, vontadi di Jeová désdi komésu é pa pesoas vive pa tudu ténpu. Si Adon ka pekaba, ningen ka ta pensaba ma vida pa tudu ténpu é bon dimás pa ser verdadi. Nu pode kridita ma nu ta ben ten vida pa tudu ténpu pamodi nu sabe ma Jeová paga un présu altu, ki é vida di se própi Fidju, pa kel-li pode kontise. — Rom. 8:32.
10. Kal ki é rekonpensa pa kes skodjedu ku spritu santu i pa kes otu ovelha?
10 Enbóra vida pa tudu ténpu é un benson ki nu ta ben ten na futuru, Jeová krê pa nu pensa na el désdi gósi. Kes kriston skodjedu ku spritu santu ten vontadi di ba vive na séu i pa es ba governa téra djuntu ku Kristu. (Apo. 20:6) Kes otu ovelha sta ku vontadi di vive na Paraízu li na téra livri di dór i tristéza. (Apo. 21:3, 4) Abo é un di kes otu ovelha ki ten speransa di vive pa tudu ténpu na téra? Kel-li é ka un rekonpénsa ménus inportanti di ki kel vida na séu. Nu kriadu pa vive na téra. Vida na téra ta ben dexa-nu filís di verdadi.
11-12. Ki bensons nu tene vontadi di resebe na Paraízu? (Odja dizenhus.)
11 Imajina modi ki ta ben ser bu vida na Paraízu na téra. Nunka más bu ka ta fika preokupadu ku duénsa ô mórti. (Isa. 25:8; 33:24) Jeová ta ben da-u tudu kes kuza ki bu krê. Kuzê ki bu ta gostaba di prende? Bu ta gostaba di prende más sobri animal? Bu tene vontadi di prende toka un instrumentu ô di dizenha? Di serteza nu ta ben meste di arkitétus, pesoas pa faze kaza i agrikultoris. Tanbê nu ta ben meste di pesoas pa planta i pripara kumida, pa faze feraménta i pa planta jardins i kuida di es. (Isa. 35:1; 65:21) Óras ki bu ben vive pa tudu ténpu, bu ta ten ténpu pa faze tudu kes kuza li i mutu más.
12 Nu ta ben xinti txeu alegria di resebe kes algen ki ta ben ser resusitadu! (Atus 24:15) Imajina tanbê, modi ki bu ta ben xinti txeu kontenti di prende más sobri Jeová óras ki bu prende más kuza sobri se kriason. (Sal. 104:24; Isa. 11:9) I más sábi inda, é adora Jeová sen ninhun sentimentu di kulpa! Bu ta trokaba kes benson li ki nu ta ben resebe na futuru, pa bu “goza pa poku ténpu kes sabura di pekadu”? (Ebr. 11:25) É klaru ki nau! Bale péna faze kalker sakrifisiu gósi pa nu ganha kes benson li. Lenbra ma Paraízu na téra ka ta ben ser sénpri un speransa pa futuru. Ta txiga un dia ki el ta ben ser nos rialidadi. Tudu kes kuza li é posível pamodi Jeová ama-nu txeu dimás ki el da se Fidju pa móre pa nos!
Ki bensons más bu tene vontadi di odja na Paraízu? (Odja parágrafus 11-12.)
MOSTRA GRATIDON PA AMOR DI JEOVÁ
13. Modi ki nu pode mostra gratidon pa amor di Jeová? (2 Koríntius 6:1)
13 Modi ki nu pode mostra gratidon pa kel resgati ki Jeová da-nu? Nu ta faze kel-li óras ki nu ta poi se trabadju na primeru lugar na nos vida. (Mat. 6:33) Jizus móre “asi pa kes ki vive ka kontinua ta vive pa ses kabésa, má pa kel ki móre pa es i ki resusitadu.” (2 Kor. 5:15) Di serteza nu ka krê skese obijetivu di kel grandi bondadi di Jeová. — Lé 2 Koríntius 6:1.
14. Modi ki nu pode mostra ma nu ta kunfia na orientasons di Jeová?
14 Tanbê nu pode mostra gratidon pa amor di Jeová óras ki nu ta kunfia na se orientason. Modi? Óras ki nu ten ki toma disizons, sima óras ki nu ta disidi si nu ta bai universidadi ô nau, ô ki tipu di trabadju ki nu debe seta, nu debe djobe kuzê ki Jeová krê pa nu faze. (1 Kor. 10:31; 2 Kor. 5:7) Óras ki nu ta toma disizon ku bazi na nos fé na Jeová, nos fé na el i nos amizadi ku el ta fika más fórti. Nos speransa di vive pa tudu ténpu tanbê ta fika más fórti. — Rom. 5:3-5; Tia. 2:21, 22.
15. Modi ki nu pode mostra nos gratidon na ténpu di Komemorason?
15 Má inda ten otu manera ki nu pode mostra gratidon pa amor di Jeová. Nu pode pruveta kel ténpu di Komemorason li, pa nu mostra Jeová nos gratidon pa resgati. Alén di nu faze planus pa nu sisti Komemorason, tanbê nu pode konvida otus algen pa ba sisti. (1 Tim. 2:4) Splika kes algen ki bu sta ba konvida kuzê ki ta kontise na Komemorason. Kes vídiu Pamodi ki Jizus móre? i Lenbra di mórti di Jizus ki sta na jw.org, pode djuda-u. Ansions debe konvida kes algen inativu. Imajina alegria ki ta ba ten na séu i na téra si alguns di kes ovelha di Jeová ki perde volta pa se ribanhu! (Luk. 15:4-7) Na Komemorason, alén di kunprimenta nos irmons, tanbê nu krê kunprimenta prinsipalmenti kes algen ki sta bai pa primeru bês i kes ki dja ten txeu ténpu ki ka sisti Komemorason. Nu krê pa es xinti ma es resebedu dretu! — Rom. 12:13.
16. Pamodi ki nu debe partisipa más txeu na pregason duránti ténpu di Komemorason?
16 Bu ta pode faze más na sirvisu pa Jeová duránti ténpu di Komemorason? Faze kel-li é un bon manera di mostra gratidon pa tudu kel ki Deus i Jizus faze pa nos. Kantu más nu partisipa na pregason, más nu ta xinti Jeová ta djuda-nu i pamodi kel-li nos kunfiansa na el ta fika más fórti. (1 Kor. 3:9) Tanbê, nu debe sforsa pa faze leitura di Bíblia pa Komemorason ki nu ta atxa na Izamina testu di dia ô na kel kuadru di folhetu di studu pa runion. Bu pode skodje kes testu di Bíblia li pa bu faze un prujétu di studu.
17. Kuzê ki ta dexa Jeová kontenti? (Odja kuadru “ Maneras di mostra gratidon pa amor di Jeová”.)
17 Pode ser ki bu situason ka ta dexa-u faze tudu kuza ki kel studu li pâpia di el. Má lenbra ma Jeová ka ta konpara kel ki bu ta da ku kel ki otus algen ta da. El ta odja kuzê ki ten na bu korason. El ta fika kontenti óras ki el ta odja gratidon ki bu ten pa kel prezenti di grandi valor ki é resgati. — 1 Sam. 16:7; Mar. 12:41-44.
18. Pamodi ki nu debe mostra gratidon pa Jeová i pa Jizus?
18 É sô pamodi resgati ki nu ta purduadu nos pekadu, nu ta pode ten un amizadi ku Jeová i nu ten speransa di vive pa tudu ténpu. Pur isu, sénpri nu debe mostra nos gratidon pa amor di Jeová ki pô-l ta da-nu kes benson li. (1 Juan 4:19) Tanbê, nu debe mostra nos gratidon pa Jizus ki mostra txeu amor pa nos kantu el da se vida pa salva-nu! — Juan 15:13.
KÁNTIKU 154 Amor ki ka ta kaba
