1, 2. (a) Pamodi ki é midjór fika di ladu di Jeová? (b) Kuzê ki nu sta ben odja na es studu?

SKODJE ladu di Jeová é midjór disizon ki nu pode toma. Ka ten ningen ki ten más puder, sabedoria i amor ki nos Deus. Ken ki ka ta krê fikaba di se ladu? (Sal. 96:4-6) Má simé, alguns sérvu di Jeová fadja na mostra ma es sta di se ladu.

² Na kel studu li, nu sta ben odja izénplu di pesoas ki flaba ma es staba di ladu di Jeová. Má es faze kuza mariadu. Kes izénplu ta ben djuda-nu kontinua lial pa Jeová.

3. Pamodi ki Jeová tenta djuda Kain i kuzê ki El fla-l?

³ Pensa na izénplu di Kain. El ka ta adoraba ninhun otu deus, sô Jeová. Má simé Jeová ka seta se adorason. Pamodi? Jeová odja ma simentis di maldadi staba ta kria na se korason. (1 João 3:12 ) Jeová aviza Kain: ‘Si bu pasa ta faze kel ki é dretu bu ka ta torna ten nha benson? Má,  si bu ka volta pa faze kel ki é dretu, pekadu sta ta spreta-u na pórta i el tene vontadi di domina-u; má bu ta konsigi vense-l?’ (Gén. 4:6, 7) Éra sima ki Jeová sta ta flaba Kain: ‘Si bu rapende i bu fika di nha ladu, ami tanbê N ta fika di bu ladu.’

4. Jeová da Kain xansi di fika di se ladu, má kuzê ki el faze?

⁴ Si Kain mudaba se manera di pensa Jeová ta setaba se adorason. Má Kain ka obi konsedju. El dexa pensamentus i dizejus mariadu pô-l ta peka kóntra Jeová. (Tia. 1:14, 15) Talvês, kantu Kain éra jóven nunka el ka pensaba na fika kóntra Jeová. Má el faze un kuza ki nunka el ka ta imajinaba, el rabela kóntra Jeová i el mata se própi irmon!

5. Ki tipu di pensamentus pode pô-nu ta perde nos amizadi ku Jeová?

⁵ Kuza ki kontise ku Kain pode kontise ku nos oji. Un kriston pode fla ma el ta adora Deus, má el pode sta ta faze kuza ki Jeová ka gosta. (Judas 11 ) Pur izénplu, kel kriston pode ser un algen ki ten zelu na pregason i el ta bai tudu runion. Má si el dexa pensamentus sobri séksu, ganánsia ô ódiu pa otu irmon toma kónta di el, el sta na prigu di faze un pekadu gravi. (1 João 2:15-17; 3:15 ) Otus algen pode ka sabe tudu kuza ki nu ta pensa i ki nu ta faze. Má Jeová ta odja tudu kuza i el sabe di ki ladu ki nos korason sta. — Lé Jeremias 17:9, 10.

6. Modi ki Jeová ta djuda-nu vense nos frakéza?

⁶ Mésmu óras ki nu fadja, Jeová ka ta dizisti faxi di nos. Óras ki el da kónta ma un algen sta ta bai pa un kaminhu mariadu, Jeová ta aviza-l: ‘Nhos volta pa mi, i N ta volta pa nhos’. (Mal. 3:7) Jeová sabe ma nos tudu sta ta luta kóntra nos frakéza. Má el krê pa nu fika kóntra kes kuza ki é mariadu. (Isa. 55:7) Si nu faze si, el ta promete ma el ta djuda-nu i el ta da-nu forsa ki nu meste pa nu vense nos dizeju mariadu. — Gén. 4:7.

7. Pamodi ki Salumon dexa di ser amigu di Jeová?

⁷ Nu pode prende txeu ku izénplu di Rei Salumon. Kantu el éra jóven, sénpri el ta pidiba orientason di Jeová. Pur isu, Deus da-l txeu sabedoria i tanbê xansi di faze un ténplu bunitu na Jiruzalen. Má Salumon dexa di ser amigu di Jeová. (1 Reis 3:12; 11:1, 2 ) Lei di Deus ta flaba klaru ma un rei ka debe tomaba ‘un monti mudjer pa el, pa se korason ka disvia’. (Deut. 17:17) Salumon ka obi ku kel lei li. El kaza ku 700 mudjer i el tinha más 300 konkubina. (1 Reis 11:3 ) Tanbê, txeu di kes mudjer ka éra israelitas i es ta adoraba deus falsu. Pur isu, kantu Salumon kaza ku kes mudjer el ka obi ku un otu lei di Deus, ki ta flaba ma es ka debe kazaba ku mudjer stranjeru. — Deut. 7:3, 4.

8. Ki pekadu gravi Salumon faze?

⁸ Poku-poku Salumon ba ta perde se amor pa leis di Jeová i pur isu, el faze kuzas gravi. El faze un altar pa deus falsu Astoreti i más un altar pa otu deus falsu Kemós. Salumon ta  adoraba kes deus falsu na kes altar djuntu ku se mudjeris. Ku tantu lugar pa faze kes altar, el skodje un monti ki ta fikaba frenti di Jiruzalen. Na kel lugar ki el faze ténplu di Jeová. (1 Reis 11:5-8; 2 Reis 23:13 ) Talvês Salumon pensa: ‘Si N kontinua ta oferese sakrifisius na ténplu, Jeová ka ta liga kuzê ki N sta faze.’

9. Kuzê ki kontise kantu Salumon ka obi ku Jeová?

⁹ Má Jeová nunka ka ta fitxa odju pa kuza ki é mariadu. Bíblia ta fla: ‘Jeová fika xatiadu ku Salumon, pamodi se korason disvia di Jeová, ki dja parseba pa el dôs bês i ki dja avizaba el sobri kel-li, ma el ka debe sigi otus deus. Má, Salumon ka obi ku órdi di Jeová.’ Pur isu, Salumon perde apoiu i benson di Jeová. I kes rei ki ben dipôs di Salumon, es fika ta governa sô un párti di Israel i es tevi ki lida ku txeu prubléma, un tras di kel otu. — 1 Reis 11:9-13.

10. Kuzê ki pode poi na prigu nos amizadi ku Jeová?

¹⁰ Sima kontise ku Salumon, un di kes kuza ki ta poi nos amizadi ku Jeová na próva, é ser amigu di algen ki ka ta ntende ô ki ka ta ruspeta leis di Jeová. Alguns di es pode ser irmons na kongregason ki ka ten un amizadi fórti ku Jeová. Ô pode ser família, vizinhus, kolégas di trabadju ô di skóla ki ka ta adora Jeová. Si nu ten un amizadi fórti ku kes algen ki ka ta ruspeta leis di Jeová, poku-poku es pode distrui nos amizadi ku Jeová.

11. Kuzê ki pode djuda-nu skodje nos amigus?

¹¹ Lé 1 Coríntios 15:33. Kuazi tudu algen ten algun kualidadi bon na el. I kes ki ka ta adora Jeová, é ka tudu óra ki es ta faze kuzas mariadu. Talvês bu konxe alguns algen ki é si. Má kel-li krê fla ma es é bons koléga? Pergunta bu kabésa: ‘Es ta djuda-m kontinua amigu di Jeová? Kuzê ki é más inportanti pa es? Di kuzê ki es ta pâpia? Ses konbérsu é sobri móda, dinheru, konputador, telemóvel, tablet i otus kuza? Es é algen ki gosta di kritika otus? Es ta konta piadas mariadu?’ Jizus aviza: ‘Bóka ta pâpia di kel ki korason sta xeiu.’ (Mat. 12:34) Si bu da kónta ma bus amigu sta ta straga bu amizadi ku Jeová, toma medida! Poi limiti na ténpu ki bu ta pasa ku es i si meste, kaba ku amizadi. — Prov. 13:20.

12. (a) Kuzê ki Jeová fla kes israelita ki sai di Ijitu? (b) Kuzê ki israelitas fla kantu Jeová pidi-s pa es adora sô el?

¹² Tanbê nu pode prende kuzê ki kontise kantu Jeová liberta israelitas di Ijitu. Povu djunta frenti di Monti Sinai i Jeová mostra se puder di un manera ki ningen ka sta ta speraba. Es odja un núven prétu, fumu, raiu na séu, es obi strubada i un son altu sima son di buzina. (Êxo. 19:16-19) Dipôs, es obi Jeová ta fla ma el é un Deus ki ta iziji pa adora sô el. I el promete ma el ta ser lial pa kes ki ta ama-l i ki ta obi ku el. (Lé Êxodo 20:1-6.) Éra sima ki Jeová staba ta fla israelitas: ‘Si nhos fika di nha ladu, N ta fika di nhos ladu.’ Si bu staba djuntu ku israelitas, kuzê ki bu ta respondeba? Talvês bu ta flaba mésmu kuza ki es. Es fla: ‘Nu sta prontu pa faze tudu kuza ki Jeová fla.’ (Êxo. 24:3) Má poku ténpu dipôs, kontise un kuza ki poi lialdadi di israelitas na próva.

13. Kuzê ki kontise ki poi lialdadi di israelitas na próva?

¹³ Israelitas fika ku medu kantu es odja kes núven prétu, raiu na séu i otus kuza ki Jeová faze. Nton es pidi Muizes pa ser ses pórta-vós. El subi na Monti Sinai pa bai pâpia ku Jeová. (Êxo. 20:18-21) Má Muizes dura ki dixi di monti. Pur isu, israelitas fika ta xinti sima ki es staba prézu na dizértu, sen algen pa orienta-s. Ta parse ma povu tinha fé sô óras ki Muizes ta staba djuntu ku es. Kuzê ki es faze? Es fika preokupadu dimás i es fla Aron: ‘Faze-nu un deus ki ta bai nos dianti, pamodi nu ka sabe kuzê ki kontise ku kel Muizes, kel ómi ki tra-nu di téra di Ijitu.’ — Êxo. 32:1, 2.

14. (a) Ki pensamentu mariadu israelitas tinha? (b) I kuzê ki Jeová faze?

¹⁴ Povu sabia ma adora imaji éra un pekadu gravi kóntra Jeová. (Êxo. 20:3-5) Má lógu es kumesa ta adora un bixéru di oru. I mésmu dipôs ki es faze pekadu gravi, inda es fika ta pensa ma es staba di ladu di Jeová. Ti Aron txoma kel adorason di bixéru di ‘un fésta pa Jeová’! Kuzê ki Jeová faze? El fla Muizes ma povu sta ta faze kel ki é mau, i es disvia di kaminhu ki el manda pa es sigi. Jeová fika uma xatiadu ki el pensa na kaba ku tudu kel povu. — Êxo. 32:5-10.

15, 16. Modi ki Muizes ku Aron mostra ma es staba di ladu di Jeová? (Odja dizenhu na komésu di studu.)

¹⁵ Jeová é un Deus di mizerikórdia. El disidi ka distrui se povu má el da-s xansi di mostra di ki ladu ki es krê fika. (Êxo. 32:14) Kantu Muizes odja povu ta grita, ta kanta i ta badja frenti di kel imaji, el distrui kel bixéru di oru. Dipôs el fla: ‘Ken ki sta di ladu di Jeová? Ben pa mi!’ Nton, ‘tudu kes levita fika na vólta’ di Muizes. — Êxo. 32:17-20, 26.

¹⁶ Nbóra Aron faze kel bixéru di oru, el rapende. El fika na ladu di Jeová djuntu ku kes levita. Es mostra klaru ma es staba di ladu di Jeová i es krê fikaba siparadu di kes ki peka. Es toma un bon disizon, pamodi na kel mésmu dia un monti di algen móre. Má, Jeová promete ma el ta abensuaba tudu kes ki fikaba di se ladu. — Êxo. 32:27-29.

17. Kuzê ki nu ta prende di kuza ki Polu skrebe sobri bixéru di oru?

 ¹⁷ Apóstlu Polu uza kel ki kontise ku israelitas pa da-nu un avizu. El fla: ‘Kes kuza li bira un izénplu pa nos’, nton nunka nu ka debe ‘bira adorador di imaji’. Polu splika ma alguns di kes kuza ‘skrebedu pa sirbi di avizu pa nos, pa kenha ki fin di es sistéma dja txiga. Pur isu, ken ki pensa ma el sta di pé el debe toma kuidadu pa el ka kai.’ (1 Cor. 10:6, 7, 11, 12) Sima Polu fla, mésmu sérvus di Jeová pode nvolve na kuzas mariadu. Kes algen li pode ngana ses kabésa, pamodi es ta atxa ma es ta kontinua di ladu di Jeová. Má sô krê ser amigu di Jeová ô fla ma bo é lial pa Jeová, ka siginifika ma Jeová é bu amigu. — 1 Cor. 10:1-5.

18. Ki tipu di pensamentus pode pô-nu ta bandona Jeová i ki prigu nu pode kai na el?

¹⁸ Kantu Muizes dura ki dixi di Monti Sinai, kes israelita fika fadigadu i es perde paxénxa. Mésmu kuza pode kontise ku nos oji. Talvês nu pode perde paxénxa pamodi dia di Jeová sta ta dura i kel mundu novu inda ka txiga. Nton nu pode kumesa ta pensa ma kel-li inda ta dura. Ô nu pode pensa ma kes promésa pa futuru é bon dimás pa ser verdadi. Si nu pensa si, nu sta na prigu di konsentra sô na kel ki nu krê, envês di kel ki Jeová krê. Ku ténpu nu pode ti bandona Jeová i kumesa ta faze kuzas ki nunka nu ka ta fazeba si nos amizadi ku Jeová staba dretu.

19. Di kuzê ki nunka nu ka debe skese i pamodi?

¹⁹ Nunka nu ka debe skese ma Jeová ta spéra ma nu ta obidese i adora sô el. (Êxo. 20:5) Pamodi ki Jeová ta spéra kel-li di nos? Pamodi el ta ama-nu. Si nu ka faze kel ki Jeová krê, nu sta faze kel ki Satanás krê, i el ta da-nu sô prubléma. Pur isu, Polu fla: ‘Nhos ka pode bebe kópu di Jeová i kópu di dimónis; nhos ka pode kume na méza di Jeová i na méza di dimónis.’ — 1 Cor. 10:21.

20. Modi ki Jeová ta djuda-nu mésmu óras ki nu faze un kuza mariadu?

²⁰ Bíblia ta fla ma Kain, Salumon i israelitas tinha xansi di rapende i muda ses konportamentu. (Atos 3:19 ) Kel-li ta mostra klaru ma Jeová ka ta dizisti faxi di kes ki faze kuzas mariadu. Pur izénplu, Jeová púrdua Aron. Oji Jeová ta da-nu avizus di monti manera. El ta uza Bíblia, publikasons ô irmons na kongregason. Óras ki nu ta obi ku kes avizu ki Jeová ta da-nu, nu pode ten sertéza ma el ta trata-nu ku mizerikórdia.

21. Kuzê ki nu debe faze óras ki nos lialdadi pa Jeová sta na próva?

²¹ Kel bondadi di Jeová ki nu ka merese ten un obijetivu. (2 Cor. 6:1) El ta da-nu xansi ‘pa nu nega kuzas mariadu i dizejus di mundu’. (Lé Tito 2:11-14.) Timenti nu sta vive na es mundu, nu ten ki lida ku situasons ki ta poi nos lialdadi pa Jeová na próva. Má sta disididu na fika na ladu di Jeová i ka bu skese ma é ‘Jeová bu Deus ki bu debe ruspeta, é el ki bu debe sirbi’ i ‘é el ki bu debe pega’! — Deut. 10:20.