1. Ki mudansas sta ta kontise na alguns país?

PA MILHARIS di anu, kuazi tudu algen na mundu tinha algun relijion. Má, dja ten alguns anu ki situason muda. Kes algen ki ka ten relijion sta ta bira kada bês más txeu. Na alguns país, kuazi tudu algen ta fla ma es ka ten ninhun relijion. * — Mat. 24:12.

2. Talvês, pamodi ki txeu algen ka ten relijion?

² Pamodi ki nunbru di pesoas ki ta fla ma es ka ten relijion * sta ta bira kada bês más txeu? Talvês alguns sta ta pensa sô na pasa sábi ô na ses prubléma. (Luc. 8:14) Otus dexa di kridita na Deus. Tanbê, ten otus ki ta kridita na Deus, má es ta atxa ma relijion é un kuza antigu, sen inportánsia, ki ka sta di akordu ku siênsia i ku rasusinu klaru. Talvês es ta obi amigus, profesoris ô kes algen famozu ta fla ma vida kumesa através di ivoluson. Má kuazi nunka es ka obi bons motivu pa kridita na Deus. Otus ka krê sabe di relijion pamodi es ta odja xéfis di relijion ta faze di tudu pa ten dinheru ku puder. I na alguns país, govérnus ten leis ki ta da poku liberdadi pa atividadis di relijion.

3. Kal ki é obijetivu di kel studu li?

³ Jizus manda-nu pa nu ‘faze disiplus di algen di tudu nasons’. (Mat. 28:19) Modi ki nu pode djuda kes algen ki ka ten relijion, prende ama Deus i bira disiplus di Kristu? Nu meste rekonhise ma manera ki un algen ta reaji óras ki nu  ta pâpia ku el sobri nos mensaji, ta dipende di lugar undi ki el kria. Pur izénplu, pesoas di Europa ka ta reaji di mésmu manera ki pesoas di Ázia. Pamodi? Na Europa, txeu algen sabe algun kuza sobri Bíblia i dja es obi ta fladu ma Deus kria tudu kuza. Má na Ázia, kuazi tudu algen sabe poku kuza ô kuazi nada sobri Bíblia, i talvês es ka ta kridita ma é Deus ki kria tudu kuza. Pur isu, obijetivu di kel studu li é djuda-nu toka korason di tudu kes ki nu ta atxa na pregason, ka ta nporta di undi ki es ben ô na kuzê ki es ta kridita.

4. Pamodi ki nu pode ten un atitudi puzitivu?

⁴ Ser puzitivu. Tudu anu, pesoas ki antis ka tinha relijion, ta bira Tistimunhas di Jeová. Txeu di es dja tinha un bon konportamentu i es ta xintiba tristi ku finjimentu di relijion. Otus ka tinha un bon konportamentu i txeu di es tinha ábitus mariadu ki es meste bandonaba. Ku ajuda di Jeová, nu pode ten sertéza ma nu ta atxa kes algen ki ten ‘bon inklinason pa vive pa tudu ténpu’. — Atos 13:48; 1 Tim. 2:3, 4.

5. Kuzê ki txeu bês ta poi pesoas ta reaji dretu pa nos mensaji?

⁵ Mostra bondadi i pâpia ku jetu. Txeu bês, pesoas ta obi dretu nos mensaji, ka pamodi kuzê ki nu ta fla, má pamodi manera ki nu ta fla-s. Es gosta óras ki nu ta mostra-s bondadi i nu ta pâpia ku es ku jetu, i óras ki nu ta nporta ku es di korason. Nu ka ta obriga-s obi kuzê ki nu sta fla. Má, nu ta tenta ntende kuzê ki es ta pensa di relijion i pamodi ki es ta pensa si. Pur izénplu, alguns algen ka gosta di pâpia di relijion ku algen ki es ka konxe. Otus ta atxa ma é falta di ruspetu pergunta un algen kuzê ki el ta pensa sobri Deus. I ten otus ki ta xinti vergónha óras ki es ta odjadu ta lé Bíblia, inda más ku un Tistimunha di Jeová. Ka ta nporta kal ki é situason, nu ta tenta ntende ses sentimentu. — 2 Tim. 2:24, nóta di rodapé.

6. Ki mudansas apóstlu Polu ta fazeba na se manera di pâpia ku otus, i modi ki nu pode imita-l?

⁶ Kuzê ki nu pode faze si un algen ka gosta óras ki nu ta uza palavras sima “Bíblia”, “kriason”, “Deus” ô “relijion”? Nu pode imita apóstlu Polu i muda nos manera di pâpia ku es. Kantu Polu ta papiaba ku judeus, el ta uzaba Skrituras pa rasusinaba ku es. Má, kantu el pâpia ku filózofus di Grésia na Areópagu, el prifiri ka pâpia sobri Palavra di Deus di manera dirétu. (Atos 17:2, 3, 22-31 ) Modi ki nu pode imita izénplu di Polu? Si bu atxa un algen na pregason ki ka ta kridita na Bíblia, talvês é midjór bu ka pâpia di Bíblia di manera dirétu, óras ki bu ta rasusina ku el. Si bu da kónta ma un algen ka gosta pa otus algen odja-l ta lé Bíblia ku bo, tenta mostra-l testus di Bíblia di un manera ki ka ta txoma atenson, sima na un telemóvel ô tablet.

7. Kuzê ki talvês nu ten ki faze pa nu imita izénplu di apóstlu Polu, ki sta na 1 Coríntios 9:20-23 ?

⁷ Tenta ntende-s i obi-s. Óras ki kes algen ki nu ta prega fla-nu algun kuza, nu debe tenta ntende pamodi ki es ta pensa ô ta xinti si. (Pro. 20:5) Nu odja otu bês izénplu di Polu. El kria na meiu di judeus. Di sertéza, el tevi ki muda se manera di prega pa kes algen ki ka éra judeu, pamodi es sabia poku kuza ô kuazi nada sobri Jeová i sobri Skrituras. Di mésmu manera, pa nu ntende dretu kuzê ki pesoas na nos tiritóriu ta pensa ô ta xinti, talvês nu ten ki faze alguns piskiza ô pidi ajuda na  kes publikador ki ten más spiriénsa. — Lé 1 Coríntios 9:20-23.

8. Kal ki é un manera di nu kumesa ta pâpia sobri Bíblia?

⁸ Nos obijetivu é atxa kes ‘algen ki merese’. (Mat. 10:11) Pa kel-li, nu meste pergunta pesoas ses opinion i obi ku atenson kuzê ki es ta fla. Un irmon na Inglatéra ta pergunta pesoas ses opinion sobri modi ki es pode ten un kazamentu filís, modi ki es ta kria fidjus ô modi ki es ta lida ku injustisa. Dipôs di el obi ses respósta, el ta pergunta: “Kuzê ki bu ta atxa di kel konsedju li, ki skrebedu dja ten uns 2 mil anu?” Dipôs, sen fla palavra “Bíblia”, el ta mostra alguns testu interesanti na se telemóvel.

9. Modi ki nu pode djuda kes algen ki ka ta krê pâpia sobri Deus?

⁹ Nu pode toka korason di kes algen ki ka ta krê pâpia sobri Deus, óras ki nu ta fla-s sobri algun asuntu di ses dia-dia. Pur izénplu, txeu algen ta fika dimiradu ku naturéza. Nton, nu pode fla: “Talvês bu sabe ma txeu kuza ta izisti pamodi ómis kopia-s na kuzas ki dja izistiba na naturéza. Pur izénplu, kes algen ki ta faze mikrofónis ta studa obidu i kes algen ki ta faze mákinas di tra fotu ku filma ta studa odju. Na bu opinion, kuzê ki é naturéza? Bu ta atxa ma el é un forsa, el é un pesoa ô otu kuza?” Dipôs di nu obi ku atenson, nu pode pergunta-s tanbê: “Ku kenha ki kes enjinheru sta ta prende óras ki es ta studa modi ki obidu i odju ta funsiona? N gosta txeu di kuzê ki un proféta antigu skrebe: ‘Kel ki faze obidu, el ka ta pode obi? Kel ki faze odju, el ka ta pode odja? É el ki ta da konhisimentu pa pesoas!’ Alguns sientista txiga kel mésmu konkluzon li.” (Sal. 94:9, 10) Dipôs, nu pode mostra un vídiu na jw.org^® na “Entrevistas e Experiências ” na párti “Pontos de Vista Sobre a Origem da Vida ”. (Bai na PUBLICAÇÕES > VÍDEOS.) Ô nu pode oferese-s bruxura A Vida — Teve um Criador? ô bruxura A Origem da Vida — Cinco Perguntas Que Merecem Resposta.

10. Modi ki nu pode kumesa un konbérsu ku un algen ki ka ta krê pâpia sobri Deus?

¹⁰ Kuazi tudu algen ta krê ten un futuru midjór. Má, txeu di es ten medu ma Téra ta distruídu ô ma nu ka ta konsigi vive na el más. Un enkaregadu di grupu di  kongregason na Noruega fla ma pesoas ki ka ta krê pâpia sobri Deus, txeu bês es gosta di pâpia sobri kuzas ki sta kontise na mundu. Dipôs di kunprimenta pesoas, el ta kustuma fla: “Ken ki bu ta atxa ma pode da-nu un futuru midjór? Pulítikus, sientistas ô otu algen?” Dipôs di obi-s ku atenson, el ta lé ô el ta pâpia di un testu di Bíblia ki ta mostra un futuru midjór. Alguns ta fika kontenti di sabe ma Bíblia promete ma Téra nunka ka ta ben ser distruídu i ma kes algen dretu ta ben vive na el pa tudu ténpu. — Sal. 37:29; Ecl. 1:4.

11. Pamodi ki nu debe tenta uza maneras diferenti di prega pa pesoas, i modi ki nu pode imita izénplu di Polu ki sta na Romanos 1:14-16 ?

¹¹ Sénpri é bon nu uza maneras diferenti di prega pa pesoas. Pamodi? Pamodi kada algen é un algen. Un kuza pode interesa un algen, má talvês otu pode ka krê obi-l. Alguns ka ta nporta di pâpia sobri Deus ô di Bíblia, má ten otus ki ta reaji midjór si primeru nu pâpia ku es sobri otus asuntu. Na tudu kes situason li, nu debe pruveta pa nu pâpia ku tudu tipu di algen. (Lé Romanos 1:14-16.) Tanbê, nu ka debe skese ma é Jeová ki ta poi verdadi ta kria na korason di kes algen ki gosta di faze kel ki é dretu. — 1 Cor. 3:6, 7.

12. Kuzê ki nu pode faze pa pâpia ku pesoas di Ázia ki nunka ka para pa pensa si ten un Kriador?

¹² Na mundu interu, txeu publikador ta nkontra ku pesoas ki ben di Ázia. Alguns di es ben di país undi govérnus ta da poku liberdadi pa atividadis di relijion. Na alguns país di Ázia, un monti di algen nunka ka para pa pensa si ta izisti un Kriador ô nau. Alguns ta fika kuriozu i es ta seta lógu un studu di Bíblia. Má otus ka ten interesi na prende informasons ki es ka sta kustumadu ku obi. Modi ki nu pode djuda-s? Alguns publikador ki ten más spiriénsa, da kónta ma un bon manera di da-s tistimunhu é kumesa un konbérsu normal i mostra interesi di korason pa kel algen. Tanbê si da, nu pode konta-l modi ki prinsípius di Bíblia djuda-nu midjora nos vida.

13. Kuzê ki pode djuda pesoas ten interesi na Bíblia? (Odja fotu na kapa.)

¹³ Un kuza ki ta poi txeu algen ta mostra interesi na Bíblia, é kes bon konsedju ki el ta da pa dia-dia. (Ecl. 7:12) Un irman na Nova York, ki ta vizita pesoas di Xina ki ta pâpia mandarin, fla: “N ta tenta mostra interesi na pesoas i obi kuzê ki es ten pa fla. Si ka ten txeu ténpu ki es ben di otu país, N ta pergunta-s: ‘Modi ki bu sta lida ku mudansa? Dja bu atxa trabadju? Pesoas di li sta trata-u dretu?’” Alvês kel-li ta djuda kumesa un konbérsu sobri Bíblia. Óras ki da, kel irman ta pergunta: “Na bu opinion, kal ki é segredu pa nu ten bons amizadi? N pode mostra-u un provérbiu ki sta na Bíblia? El ta fla si: ‘Kumesa un briga é sima abri pórta di un baraji; pur isu sai di la antis di diskuson kumesa.’ Bu ta atxa ma es konsedju pode djuda-nu faze bons amizadi?” (Pro. 17:14) Kes tipu di konbérsu li pode djuda-nu sabe si kel algen krê pa nu kontinua ta vizita-l.

14. Modi ki un irmon na Orienti ta djuda pesoas ki ta fla ma es ka ta kridita na Deus?

¹⁴ I kes algen ki ta fla ma es ka ta kridita na Deus? Un irmon ki ten txeu spiriénsa na prega pa pesoas ki ka ten relijion na Orienti, splika: “Txeu bês óras ki un algen ta fla: ‘N ka ta kridita na Deus’, el krê fla ma el ka ta kridita na kes deus ki  pesoas di kel lugar ta adora. Nton kuazi sénpri N ta konkorda i N ta fla ma kuazi tudu kes deus é ka rial, má é ómis ki faze-s. Txeu bês N ta lé Jeremias 16:20 : ‘Ómi ta pode faze deuzis pa el ki, na verdadi, é ka deuzis?’ Nton N ta pergunta: ‘Modi ki nu ta sabe si un deus é rial ô si é ómi ki faze?’ N ta obi ku atenson ses opinion i dipôs N ta lé Isaías 41:23 : ‘Fla-nu kuzê ki ta ben kontise na futuru, pa nu pode sabe ma anhos é deus.’ Dipôs N ta mostra un izénplu di un profesia ki Jeová faze i ki kunpri.”

15. Kuzê ki nu pode prende ku izénplu di un irmon na Ázia?

¹⁵ Un irmon na Ázia fla modi ki el ta kustuma faze revizitas: “N ta mostra-s izénplus i sabedoria di vida, profesias di Bíblia ki kunpri i leis ki ta kontrola Séu ku Téra. Dipôs N ta fla-s ma tudu kel-li ta prova ma ten un Kriador ki ten txeu sabedoria. Óras ki un algen kumesa ta pensa ma Deus izisti, N ta mostra-l kuzê ki Bíblia ta fla sobri Jeová.”

16. Di akordu ku Hebreus 11:6, pamodi ki studantis meste ten fé na Deus i na Bíblia? I modi ki nu pode djuda-s dizenvolve fé?

¹⁶ Óras ki nu ta studa Bíblia ku un algen ki ka ten relijion, nu meste sénpri djuda-l kridita ma Deus ta izisti. (Lé Hebreus 11:6.) Tanbê nu meste djuda-l ten fé na Bíblia. Kel-li krê fla ma talvês nu meste pâpia di alguns asuntu txeu bês. Tudu bês ki nu ta studa ku el, talvês nu meste mostra-l kuzas ki ta prova ma Bíblia é Palavra di Deus. Pur izénplu, mostra-l modi ki profesias di Bíblia kunpri, modi ki Bíblia é izatu óras ki el ta pâpia sobri asuntus di siênsia ô stória i modi ki el ta djuda-nu na nos dia-dia.

17. Kal ki é rezultadu óras ki nu ta mostra amor pa pesoas?

¹⁷ Nu ta djuda pesoas bira disiplus di Kristu, óras ki nu ta mostra-s amor, ka ta nporta si es ten relijion ô nau. (1 Cor. 13:1) Nos obijetivu é mostra-s ma Deus ta ama-s i el krê pa nu ama-l. Tudu anu, milharis di pesoas ki antis tinha poku ô ninhun interesi na relijion, batiza pamodi es prende ama Deus. Pur isu, ten un atitudi puzitivu i mostra interesi di korason pa tudu tipu di algen. Obi-s ku atenson. Tenta ntende-s. Ku bu izénplu, inxina-s bira disiplus di Kristu.