1. Kuzê ki nu krê fla óras ki nu ta uza palavra “verdadi”?

“MODI ki bu prende verdadi?” “Bu nase na verdadi?” “Kantu ténpu dja bu ten na verdadi?” Talvês dja bu fazedu kes pergunta li ô dja bu faze-s pa otus algen. Kuzê ki nu krê fla óras ki nu ta uza palavra “verdadi”? Txeu bês nu ta uza-l óras ki nu sta pâpia di kuzas ki nu ta kridita na el, di nos manera di adora Deus i nos manera di vive. Kes algen ki sta ‘na verdadi’ sabe kuzê ki Bíblia ta inxina i es ta sigi se prinsípius na ses vida. Pur isu, es ta liberta di kes ensinu falsu di relijion i es ta ten kel midjór vida ki un algen inperfetu pode ten. — João 8:32.

2. Sima sta na João 13:34, 35, kuzê ki pode poi un algen ta krê prende verdadi?

² Kuzê ki pô-u ta krê prende verdadi? Talvês foi kel bon konportamentu di povu di Jeová. (1 Ped. 2:12) Ô pode ser amor ki es ta mostra pa kunpanheru. Txeu algen ki bai runion pa primeru bês repara kel-li i es ta lenbra di kel amor más di ki kalker kuza ki fladu na runion. Kel-li ka ta spanta-nu, pamodi Jizus dja flaba ma se disiplus ta sérba konxedu pa amor ki es ten pa kunpanheru. (Lé João 13:34, 35.) Má sô amor ka ta txiga pa nu ten un fé fórti. Ten otus kuza ki nu meste faze.

3. Kuzê ki pode kontise si nos fé na Deus é sô ku bazi na amor ki irmons ten pa kunpanheru?

³ Nos fé ka pode ser sô ku bazi na amor ki povu di Deus ten pa kunpanheru. Pamodi? Imajina ma un irmon, ti mésmu un ansion ô un pioneru faze un pekadu gravi. Ô ma un irmon ô un irman magua-u. Ô talvês un irmon  bandona i fika kóntra organizason di Jeová i el fika ta fla ma nu ka tene verdadi. Si kes kuza li kontise, bu ta tropesaba i bu ta paraba di sirbi Jeová? Kuzê ki nu ta prende? Si bu fé na Deus é ka pamodi bu amizadi ku Jeová, má pamodi kuzas ki otus algen ta faze, nton bu fé é ka fórti. Sima nu ka ta uza material fraku pa faze un kaza, tanbê nos fé ka debe ser ku bazi na kuzas fraku, sima sentimentus. Má, nos fé meste ten bazi na material fórti. Pa kel-la nu meste studa i faze piskiza pa nu ten sertéza ma kel ki nu sta prende é verdadi. Nu debe prova nos kabésa ma kel ki Bíblia ta fla sobri Jeová é verdadi. — Rom. 12:2.

4. Sima sta na Mateus 13:3-6, 20, 21, kuzê ki alguns algen ta faze óras ki ses fé pasa pa próva?

⁴ Jizus fla ma alguns ta setaba verdadi ‘ku alegria’, má es ta perdeba ses fé óras ki es pasaba pa próvas. (Lé Mateus 13:3-6, 20, 21.) Talvês es ka ntende ma kes algen ki ta sigi Jizus ta pasaba pa prublémas. (Mat. 16:24) Ô talvês es ta pensaba ma ken ki ta sigiba Jizus ta tinha un vida rei di sábi, sô bensons, sen ninhun prubléma. Má na es mundu di oji, nos tudu ta ten prublémas. Alguns kuza ki ta kontise pode muda nos vida i pô-nu ta perde alegria duránti algun ténpu. — Sal. 6:6; Ecl. 9:11.

5. Kuzê ki ta mostra ma kuazi tudu irmons ku irmans ten sertéza ma es tene verdadi?

⁵ Kuazi tudu irmons ku irmans ten sertéza ma es tene verdadi. Pamodi ki nu pode fla kel-li? Pamodi ka ten nada ki ta kaba ku ses fé, sikrê un irmon magua-s ô konporta mariadu. (Sal. 119:165) Kada bês ki es pasa pa un prubléma, envês di ses fé bira más fraku, ses fé ta fika más fórti. (Tia. 1:2-4) Kuzê ki pode djuda-u ten un fé fórti di kel manera li?

6. Fé di kes primeru kriston tinha bazi na kuzê?

⁶ Kes primeru kriston dizenvolve ses fé ku bazi na konhisimentu di Skrituras i ensinus di Jizus Kristu, ki é ‘verdadi di kes notísia sábi’. (Gál. 2:5) Kel verdadi li é tudu kuza ki kristons ta kridita, ti mésmu kes próva sobri sakrifisiu di resgati di Jizus i se resureison. Apóstlu Polu tinha sertéza ma kes ensinu li éra verdadi. Pamodi? Pamodi el ta uzaba Skrituras pa prova ‘ku bazi na kel ki staba skrebedu, ma Kristu tinha ki sufreba i labantadu di meiu di mortus.’ (Atos 17:2, 3 ) Kes primeru kriston ta setaba kes ensinu i es ta kunfiaba ma spritu santu ta djudaba es ntende Palavra di Deus. Es prova ses kabésa ma kes ensinu tinha bazi na Skrituras. (Atos 17:11, 12; Heb. 5:14) Ses fé ka éra sô ku bazi na sentimentus, i es ka ta sirbiba Jeová sô pamodi es ta xintiba sábi di sta djuntu ku ses irmons. Má, ses fé tinha bazi na ‘konhisimentu izatu di Deus.’ — Col. 1:9, 10.

7. Fé na kes verdadi di Bíblia ta pô-nu faze kuzê?

⁷ Kes verdadi di Palavra di Deus nunka ka ta muda. (Sal. 119:160) Pur izénplu, si un algen na kongregason ofende-nu ô faze un pekadu gravi, kes verdadi ta kontinua kel mê. Tanbê, nen es ka ta muda óras ki prublémas kontise ku nos. Pur isu, nu meste konxe dretu kes kuza ki Bíblia ta inxina i ten sertéza ma es é verdadi. Nos fé firmi na kes verdadi di Bíblia, ta djuda-nu aguenta firmi sima un ánkura ta djuda un barku mante firmi duránti  un tenpistadi fórti. Modi ki bu pode ten sertéza ma bu tene verdadi?

8. Sima 2 Timóteo 3:14, 15 ta mostra, kuzê ki djuda Timótiu ten sertéza ma kes kuza ki el prende éra verdadi?

⁸ Timótiu tinha sertéza ma kes kuza ki el prende éra verdadi. Pamodi ki el tinha kel sertéza li? (Lé 2 Timóteo 3:14, 15.) Kes primeru algen ki inxina-l ‘skrituras sagradu’ éra se mai ku se avó. Má di sertéza, el tanbê el gasta ténpu i forsa pa studa kes skritura. Pamodi kel-li, el fika ‘konvensidu’ i el ‘kridita’ ma kes skritura éra verdadi. Dipôs, Timótiu, se mai i se avó prende sobri ensinus di Kristu. Di sertéza Timótiu fika dimiradu ku amor ki sigidoris di Jizus ta mostraba, i el tinha gana di staba djuntu ku se irmons di kongregason i djudaba es. (Fil. 2:19, 20) Má, kuzê ki djuda Timótiu ten un fé fórti, ka éra kuzê ki el ta xintiba pa pesoas, má éra kes verdadi di skrituras ki djuda-l ser amigu di Jeová. Abo tanbê, bu debe studa Bíblia pa bu pode ten sertéza ma kes kuza ki el ta inxina sobri Jeová é verdadi.

9. Di ki três verdadi inportanti bu meste ten sertéza?

⁹ Pa kumesa, bu meste ten sertéza di peloménus três verdadi inportanti. Primeru, bu meste ten sertéza ma é Jeová Deus ki kria tudu kuza. (Êxo. 3:14, 15; Heb. 3:4; Apo. 4:11) Sugundu, bu meste ten sertéza ma Bíblia é mensaji di Deus pa nos. (2 Tim. 3:16, 17) I tirseru, bu meste ten sertéza ma Jeová ten un grupu di pesoas organizadu ki ta adora-l i el ta uza Jizus Kristu pa orienta-s. Kel grupu é Tistimunhas di Jeová. (Isa. 43:10-12; João 14:6; Atos 15:14 ) Pa bu ten sertéza di kes verdadi inportanti li, bu ka meste sabe tudu kuza sobri Bíblia. Bu obijetivu debe ser uza bu ‘kapasidadi di pensa’ pa bu ten más sertéza inda ma bu tene verdadi. — Rom. 12:1.

10. Dipôs ki dja nu ten sertéza sobri verdadi, kuzê ki nu meste faze?

¹⁰ Dipôs ki bu ten sertéza di kes três verdadi inportanti sobri Deus, Bíblia i povu di Deus, bu meste sabe uza Bíblia pa prova kes verdadi li pa otus algen. Pamodi? Dja ki nos é disiplus di Kristu, nu ten responsabilidadi di inxina kes verdadi ki nu prende pa ken ki krê obi. * (1 Tim. 4:16) I óras ki nu ta tenta djuda otus kridita na kes verdadi di Bíblia, nos fé na kes verdadi ta fika más fórti.

11. Modi ki nu pode imita apóstlu Polu óras ki nu ta inxina otus algen?

¹¹ Kantu apóstlu Polu ta inxinaba pesoas, el ta ‘konvenseba es pa es kriditaba na Jizus através di lei di Muizes i di livrus di profétas.’ (Atus 28:23, Bíblia Na Prugrésu Di Traduson Pa Lingua Kabuverdianu, PBK ) Modi ki nu pode imita Polu óras ki nu ta inxina otus algen verdadi? Nu debe faze más di ki sô fla-s kuzê ki Bíblia ta inxina. Nu debe djuda nos studantis di Bíblia sabe studa i pensa txeu na kuzê ki es sta ta prende. Nu ka krê pa es seta verdadi sô pamodi es gosta di nos. Má nu krê pa es prova ses kabésa ma tudu kuza ki es sta ta prende sobri nos Deus, ki ta ama-nu, é verdadi.

12-13. Modi ki pai ku mai pode djuda ses fidju kontinua na verdadi?

¹² Di sertéza ken ki é pai ô mai krê pa ses fidju kontinua na verdadi. Talvês, bu ta atxa ma si bus fidju ten bons amigu na kongregason, kel-la ta djuda-s ten un fé fórti. Má, si bu krê pa bus fidju ten sertéza ma es tene verdadi, sô bons amigu ka ta txiga. Es meste ten ses própi amizadi ku Deus i ten sertéza ma kuzê ki Bíblia ta inxina é verdadi.

¹³ Si pai ku mai krê inxina ses fidju verdadi sobri Deus, es meste ser un bon studanti di Bíblia pa es pode da-s un bon izénplu. Pai ku mai debe tra ténpu pa es pensa txeu na kuzê ki es prende. Asi es ta pode inxina ses fidju faze mésmu kuza. Es meste inxina ses fidju uza kes feraménta di studa Bíblia, sima es ta faze ku ses studanti. Asi, es ta djuda ses fidju ama Jeová i tanbê kunfia na ‘skravu fiel i prudenti’ ki el ta uza pa djuda-nu ntende Bíblia. (Mat. 24:45-47) Pai ku mai, ka nhos inxina nhos fidju sô kes verdadi más sinplis di Bíblia. Má tanbê, nhos inxina-s ‘kes kuza más profundu di Deus’ sima es ta pode, di akordu ku ses idadi i kapasidadi. — 1 Cor. 2:10.

14. Pamodi ki nu debe studa kes profesia di Bíblia? (Tanbê odja kuadru “ Bu sabe splika kes profesia li?”)

¹⁴ Kes profesia di Bíblia é un párti inportanti di Palavra di Deus. Es ta djuda-nu ten un fé kada bês más fórti na Jeová. Ki profesias djuda-u ten un fé más fórti? Talvês bu pensa na kes profesia di ‘ténpu di fin’. (2 Tim. 3:1-5; Mat. 24:3, 7) Má ki otus profesia ki kunpri pode djuda-u ten un fé más fórti? Pur izénplu, bu sabe splika modi ki profesias ki sta na Daniel kapítlu 2 ô na Daniel kapítlu 11 dja kunpri i sta ta kunpri? * Óras ki bu fé ten bazi na Bíblia, ka ten nada ki ta kaba ku el. Pensa na izénplu di nos irmons ki sufri txeu pirsigison na Alimanha duránti Sugundu Géra na Mundu Interu. Es ka ta ntendeba tudu kes profesia di Bíblia sobri ténpu di fin, má simé es tinha txeu fé na Palavra di Deus.

15-17. Modi ki studa Bíblia djuda nos irmons aguenta firmi kantu kes nazista staba ta pirsigi-s?

¹⁵ Kantu kes nazista ta mandaba na Alimanha, milharis di nos irmon mandadu pa kanpus di konsentrason. Hitler ku Heinrich Himmler, ki éra un xéfi di trópas na Alimanha, ta odiaba Tistimunhas di Jeová. Un irman konta ma Himmler fla pa un grupu di irmans ki staba na un kanpu di konsentrason: “Nhos Jeová pode manda na Séu, má li na Téra é nos ki ta manda! Nu ta ben mostra nhos ken ki ta aguenta más, anhos ô nos!” Kuzê ki djuda povu di Jeová kontinua fiel?

¹⁶ Kes studanti di Bíblia sabeba ma Reinu di Deus kumesa ta governa na 1914. Es ka fika spantadu pamodi pirsigison ki es staba ta sufri. Má, es tinha sertéza ma ninhun govérnu di ómi ka ta pode paraba Jeová di faze kuzê ki el kreba. Hitler nunka ka ta kababa ku adorason verdaderu, nen kriaba un govérnu más fórti di ki Reinu di Deus. Nos irmons tinha sertéza ma di un  manera ô di otu, govérnu di Hitler ta kababa.

¹⁷ Kuzê ki kes irmon ta kriditaba éra verdadi. Poku ténpu dipôs, govérnu nazista kaba. Heinrich Himmler, ki éra kel ómi ki flaba ma “li na Téra é nos ki ta manda”, tevi ki fuji pa salva se vida. Timenti el staba ta fuji, el nkontra ku irmon Lübke ki baba kadia i el sabeba ma el éra un Tistimunha di Jeová. Himmler, ki staba dizanimadu, pergunta irmon Lübke: “Studanti di Bíblia, kuzê ki ta kontise gósi?” Irmon Lübke splika-l ma Tistimunhas di Jeová tinha sertéza ma govérnu nazista ta kababa i ma es ta sérba libertadu. Himmler, ki dja flaba txeu kuza mariadu kóntra Tistimunha di Jeová, fika sen sabe kuzê ki el ta fla. Poku ténpu dipôs ki el nkontra ku kel irmon, el mata kabésa. Kuzê ki nu ta prende? Studa Bíblia i tanbê kes profesia, pode djuda-nu ten un fé fórti na Deus i aguenta firmi mésmu óras ki nu pirsigidu. — 2 Ped. 1:19-21.

18. Sima sta na João 6:67, 68, pamodi ki nu meste ten ‘konhisimentu izatu i ku tudu disirnimentu’?

¹⁸ Kada un di nos debe mostra amor, pa nu pode prova ma nos é kristons verdaderu. Má tanbê, nu meste ten ‘konhisimentu izatu i ku tudu disirnimentu’. (Fil. 1:9) Si nu ka ten kes kuza li, nu pode ‘lebadu pa li i pa la pa tudu béntu di ensinus, pa spertéza di ómis’, ti mésmu di kes ki bandona i fika kóntra organizason di Jeová. (Efé. 4:14) Na ténpu di apóstlus, kantu txeu disiplu para di sigi Jizus, apóstlu Pedru fla ku tudu sertéza ma Jizus tinha ‘palavras di vida pa tudu ténpu.’ (Lé João 6:67, 68.) Sikrê el ka ta ntendeba tudu kes palavra li, Pedru kontinua lial pamodi el ta ntendeba verdadi sobri Kristu. Pur isu, ten kada bês más sertéza ma kes kuza ki Bíblia ta inxina é verdadi. Di kel manera li, bu fé ta pode aguenta kalker prubléma, i bu ta pode djuda otus ten un fé más fórti. — 2 João 1, 2.