1. Sima sta na 3 João 3, 4, kuzê ki ta da-nu alegria?

APÓSTLU Juan djuda txeu algen konxe verdadi. Pa el, kes kriston éra sima se fidjus. Nbóra es pasa pa txeu prubléma, apóstlu Juan ta sforsaba txeu pa djudaba se irmons ten un fé más fórti. Bu ta konsigi imajina modi ki apóstlu Juan fika kontenti di odja-s ta kontinua lial pa Jeová? Oji, nu ta xinti mésmu alegria óras ki nu ta odja nos fidjus ô kes algen ki nu djuda prende verdadi, ta da ses vida pa Jeová i ta kontinua ta sirbi-l. — Lé 3 João 3, 4.

2. Kal ki éra obijetivu di kes karta di Juan?

² Na anu 98 D.J., talvês Juan staba ta viveba na Éfezu ô pértu di la. Pode ser ki el bai pa la dipôs ki el sai di prizon na ilha di Pátmus. Más ô ménus na kel ténpu, spritu santu di Jeová pô-l ta skrebe três karta. Obijetivu di kes karta éra pa djudaba kes kriston lial ka perdeba ses fé na Jizus i kontinuaba ta anda na verdadi.

3. Ki perguntas nu sta ben responde na kel studu li?

³ Juan éra kel últimu apóstlu ki staba bibu, i el staba preokupadu ku influénsia mariadu di kes instrutor falsu ki staba déntu di kongregason. * (1 João 2:18, 19, 26 ) Kes ki fika kóntra ensinus di Kristu ta flaba ma es konxeba Deus, má es ka ta obiba ku leis di Jeová. Nu ben odja konsedju ki Jeová uza Juan pa skrebe. Na kel studu li, nu sta ben responde três pergunta: Kuzê ki siginifika anda na verdadi? Kuzê ki pode ka dexa-nu anda na verdadi?  I modi ki nu pode djuda kunpanheru kontinua na verdadi?

4. Sima sta na 1 João 2:3-6 i 2 João 4, 6, kuzê ki nu meste faze pa nu anda na verdadi?

⁴ Pa nu anda na verdadi, nu meste konxe verdadi ki sta na Bíblia, ki é Palavra di Deus. Tanbê, nu ten ki obi ku kes mandamentu di Jeová. (Lé 1 João 2:3-6; 2 João 4, 6.) Jizus dexa un izénplu perfetu di algen ki obi ku Jeová. Pur isu, un manera inportanti di nu obi ku Jeová é óras ki nu ta sigi izénplu di Jizus na tudu kuza ki nu ta pode. — João 8:29; 1 Ped. 2:21.

5. Di kuzê ki nu debe ten sertéza?

⁵ Pa nu kontinua ta anda na verdadi, nu debe ten sertéza ma Jeová é Deus di verdadi, i ma tudu kuza ki el ta fla-nu na Bíblia, ki é se Palavra é verdadi. Tanbê, nu debe ten sertéza ma Jizus é kel Misías ki staba pa binha. Txeu algen oji ka ten sertéza si Jizus é kel algen ki Jeová skodje pa ser Rei di Reinu di Deus. Juan dja flaba ma ta tinha txeu algen ki pode nganaba kes ki ka staba priparadu pa difende verdadi sobri Jeová ku Jizus. (2 João 7-11 ) Juan skrebe: ‘Ken ki é mintirozu, si é ka kel ki ta nega ma Jizus é Kristu?’ (1 João 2:22 ) Úniku manera di nu ka ser nganadu é óras ki nu ta studa Palavra di Deus. É sô si ki nu ta konxe Jeová ku Jizus. (João 17:3 ) I é sô di kel manera li ki nu ta ten sertéza ma nu tene verdadi.

6. Kuzê ki pode ka dexa jóvens anda na verdadi?

⁶ Tudu ken ki ta sirbi Jeová debe sta sienti pa es ka nganadu ku filozofia di ómi. (1 João 2:26 ) Inda más jóvens, meste toma kuidadu pa es ka kai na kel armadilha la. Alésia, * ki é un irman di Fransa ki ten 25 anu, fla: “Kantu mi éra más jóven, N ta fikaba baradjadu ku kes kuza ki mundu ta inxina, sima ensinu di ivoluson i filozofia di ómi. Alvês, N ta gostaba di alguns di kes ideia. Má N xinti ma ka éra justu fikaba sô ta obi kes kuza ki es ta inxinaba na skóla i ka daba Jeová ninhun xansi di pâpia.” Alésia studa kel livru  A Vida — Qual a Sua Origem? A Evolução ou a Criação?. Alguns simana dipôs, el ka tinha ninhun dúvida más. Alésia fla: “N prova nha kabésa ma kel ki Bíblia ta fla é verdadi. I N da kónta ma vive sima el ta fla ta da-m alegria i pas.”

7. Nu meste toma kuidadu pa nu ka faze kuzê, i pamodi?

⁷ Tudu kes ki ta sirbi Jeová, jóvens ku algen grandi, debe toma kuidadu pa es ka kai na tentason di finji ma es ta sirbi Jeová i omésmu ténpu faze kuzas mariadu. Juan dexa klaru ma nu ka pode anda na verdadi i omésmu ténpu leba un vida mariadu. (1 João 1:6 ) Si nu krê pa Jeová fika kontenti ku nos gósi i na futuru, nu meste lenbra sénpri ma el ta odja tudu kuza ki nu ta faze. Na verdadi, ka ten ninhun pekadu ki ta fika sukundidu, pamodi tudu kuza sta klaru dianti di odju di Jeová. — Heb. 4:13.

8. Kuzê ki nu ka debe pensa?

⁸ Nu ka debe pensa sobri pekadu móda mundu ta pensa. Apóstlu Juan skrebe: ‘Si nu fla: “Nu ka ten pekadu”, nu sta ta ngana nos kabésa.’ (1 João 1:8 ) Na ténpu di Juan, kes algen ki bira kóntra verdadi ta flaba ma un algen podia fazeba pekadu i kontinua ta ser amigu di Deus. Oji, nu sta ta vive na meiu di pesoas ki ta pensa di mésmu manera. Txeu algen ta fla ma es ta kridita na Deus, má es ka ta konkorda ku kuzê ki Jeová ta fla sobri pekadu, inda más óras ki asuntu é sobri séksu. Kes kuza ki Jeová ta fla ma é pekadu, es ta fla ma kel-la é disizon di kada algen, ô un stilu di vida diferenti.

9. Pamodi ki é bon óras ki jóvens ta faze kel ki Bíblia ta fla ma é dretu?

⁹ Pode ser más difísil inda pa jóvens sigi kel ki Bíblia ta fla sobri séksu, óras ki ses koléga di skóla ô di trabadju ta krê  pô-s ta pensa sima es. É kel-li ki kontise ku Aleksandar. El ta lenbra: “Alguns minina na skóla ta insistiba ku mi pa N fazeba séksu ku es. Es ta flaba ma dja ki N ka tinha namorada, nton ami é gay.” Si bu sta ta pasa pa mésmu prubléma, lenbra ma si bu faze kel ki Bíblia ta fla ma é dretu, bu ta xinti dretu ku bu kabésa, bu ta proteje bu saúdi, bu ta ivita disgostu i bu ta kontinua ta ser amigu di Jeová. I kada bês ki bu nega faze un kuza mariadu, bu ta ten más koraji di faze kel ki é dretu. Tanbê lenbra, ma kel manera mariadu ki mundu ta pensa sobri séksu ta ben di Satanás. Pur isu, tudu bês ki bu nega pensa sima algen di mundu, bu ta ‘vense kel Malvadu.’ — 1 João 2:14.

10. Modi ki 1 João 1:9 ta djuda-nu sirbi Jeová ku un konsénsia linpu?

¹⁰ Nu sabe ma é Jeová ki ten direitu di fla kuzê ki é pekadu i kuzê ki é ka pekadu. I nu ta faze nos midjór pa nu ka faze un pekadu. Má óras ki nu peka, nu ta konfesa nos pekadu pa Jeová na orason. (Lé 1 João 1:9.) I si nu faze un pekadu gravi nu ta djobe ajuda di ansions, ki Jeová skodje pa kuida di nos. (Tia. 5:14-16) Má, nu ka debe fika sénpri ta kulpa nos kabésa pa pekadus ki nu fazeba. Pamodi? Pamodi nos Pai, ki ta ama-nu, da-nu resgati di se Fidju pa nos pekadu pode purduadu. Óras ki Jeová fla ma el ta púrdua kes ki rapende di korason, el ta púrdua própi. Pur isu, nu pode sirbi Jeová ku un konsénsia linpu. — 1 João 2:1, 2, 12; 3:19, 20.

11. Modi ki nu ta proteje nos menti di kes ensinu ki pode prujudika nos fé?

¹¹ Nu ka debe seta ninhun ensinu ki é kóntra nos organizason. Désdi komésu di kongregason di sigidoris di Jizus, Diabu sta tenta lansa simenti di dúvida na  menti di sérvus di Deus. Pur isu, nu meste ntende modi ki nu ta sabe si un kuza é verdadi ô mintira. * Nos inimigu pode uza internet ô redi sosial pa tenta frakise nos fé na Jeová i nos amor pa irmons. Ka bu skese ma é Satanás ki sta kontrola tudu kes kuza li i ka bu seta ninhun di kes mintira! — 1 João 4:1, 6; Apo. 12:9.

12. Pamodi ki nu debe bira nos fé kada bês más fórti?

¹² Pa nu luta kóntra kes kuza ki Satanás ta faze, nu meste bira nos fé na Jizus más fórti i kunfia na manera ki Jeová sta ta uza-l pa faze Se vontadi. Tanbê nu meste kunfia na kes ki Jeová sta ta uza pa orienta se organizason oji. (Mat. 24:45-47) Nos fé ta bira más fórti óras ki nu ta studa Palavra di Deus sénpri. Asi, nos fé ta fika sima un arvi ki tene raís ben finkadu na txon. Polu skrebe un kuza sima kel-li pa irmons na kongregason di Kolosus. El fla: ‘Sima nhos seta Kristu Jizus, kel Sinhor, nhos kontinua ta anda unidu ku el, pa nhos fika ku raís finkadu i ta kria na el, i firmi na fé.’ (Col. 2:6, 7) Si nu sforsa pa nu ten un fé fórti, nen Satanás nen kes ki el ta uza, ka ta pode para-nu di kontinua ta anda na verdadi. — 2 João 8, 9.

13. Kuzê ki nu ten ki spéra, i pamodi?

¹³ Nu ten ki spéra ma mundu ta odia-nu. (1 João 3:13 ) Juan lenbra-nu ma ‘mundu interu sta na puder di Malvadu.’ (1 João 5:19 ) Sima nu sta txiga más pértu di fin, Satanás sta ku más raiba inda. (Apo. 12:12) Alvês el ta ataka-nu di manera ki nu ka ta da kónta. Pur izénplu, el pode bota iska pa pô-nu faze konportamentu seksual mariadu ô kridita na mintira di kes algen ki bandona i fika kóntra nos organizason. Má tanbê el pode ataka-nu klaru, sima óras ki el ta uza pirsigison fórti. Satanás sabe ma el tene poku ténpu pa el tenta para nos trabadju di pregason ô frakise nos fé. Pur isu, nu ka ta fika spantadu óras ki ta proibidu alguns ô tudu nos trabadju na alguns país. Má simé, nos irmons ku irmans ki ta vive na kes país, sta kontinua ta mante firmi. Es sta ta mostra ma ka ta nporta kuzê ki kel Malvadu sta faze kóntra nos, nu pode ganha!

14. Kal ki é un di kes manera ki nu pode djuda nos irmons ku irmans kontinua na verdadi?

¹⁴ Pa nu djuda nos irmons kontinua na verdadi, nu debe mostra-s konpaxon. (1 João 3:10, 11, 16-18 ) Nu meste ama kunpanheru ka sô óras ki tudu kuza sta dretu, má tanbê óras ki kontise prublémas. Pur izénplu, bu konxe un irmon ki more-l un algen ki el ta ama i ki meste konsolu ô algun tipu di ajuda? Bu fika ta sabe ma irmons sta ta sufri pamodi dizastri na naturéza i ma es meste ajuda pa faze ses Salons di Reinu ô ses kaza? Nu ta mostra ma nu gosta txeu di nos irmons ku irmans i ma nu ten konpaxon di es, ka sô na kuzas ki nu ta fla, má más inportanti inda na kuzas ki nu ta faze.

15. Sima sta na 1 João 4:7, 8, kuzê ki nu meste faze?

¹⁵ Nu ta imita nos Pai na Séu óras ki nu ta mostra amor pa kunpanheru. (Lé 1 João 4:7, 8.) Un manera inportanti ki nu ta mostra amor é óras ki nu ta púrdua kunpanheru. Pur izénplu, un algen  pode faze algun kuza ki magua-nu, má dipôs el ta pidi diskulpa. Nu ta mostra amor óras ki nu ta purdua-l i skese kuzê ki el faze-nu. (Col. 3:13) Un irmon ki txoma Aldu, pasa pa kel situason li kantu el obi ma un irmon ki el ta ruspetaba, fla un kuza mariadu sobri kes algen di se kultura. Aldu fla: “N faze orason txeu bês ta pidi Jeová pa djuda-m ka pensa mal di kel irmon.” Má Aldu faze más otu kuza. El disidi konvida kel irmon pa es sai na pregason. Timenti es staba ta prega djuntu, Aldu splika-l modi ki el fika tristi ku kuza ki kel irmon fla. Aldu fla: “Kantu kel irmon obi modi ki N xinti ku kuza ki el fla, el pidi-m diskulpa. Na se ton di vós, N repara modi ki el rapende di kuzê ki el fla. Nu faze pas i nu skese kel asuntu.”

16-17. Kuzê ki nu debe sta disididu na faze?

¹⁶ Apóstlu Juan gostaba txeu di se irmons i el kreba pa es tinha un fé fórti. Kel-li fika klaru na konsedjus ki el da na se três karta ki el skrebe ku orientason di spritu santu. É bon sabe ma kes ómi ku mudjer, ki skodjedu pa ba governa ku Kristu, ta ama-nu i ta preokupa ku nos sima Juan! — 1 João 2:27.

¹⁷ Nu debe leba asériu kes konsedju ki nu resebe na kel studu li. Nu krê kontinua ta anda na verdadi, i ta obi ku Jeová na tudu kuza ki nu ta faze. Studa se Palavra i kunfia na el. Bira bu fé na Jizus más fórti. Ka bu seta kes filozofia di ómi i ensinu di kes ki bandona i fika kóntra nos organizason. Nunka ka bu kai na tentason di finji ma bu sta sirbi Jeová i omésmu ténpu faze kuzas mariadu. Vive sima leis di Jeová ta fla. I óras ki nu ta púrdua kes ki magua-nu i djuda kes ki meste, nu sta ta djuda-s kontinua fórti. Asi, sikrê ku prublémas ki nu ta pasa, nu ta kontinua ta anda na verdadi.