N nase na anu 1954, na sidadi Saint Paul, na Minnesota, na Mérka. Nha pai ku nha mai ka éra riku nen póbri, i es éra katóliku. Ami é kel sugundu di sinku fidju. Kantu mi éra pikinoti, N ta studaba na un skóla katóliku, i N ta djudaba padri na altar. Má simé, N ka sabia kuazi nada di Bíblia. Nbóra N ta kriditaba ma tinha un Deus ki kria tudu kuza, N perde tudu fé na igreja.

Duránti nha primeru anu na universidadi ta studa direitu, un kazal di Tistimunha di Jeová bai nha kaza. N staba sô ta laba ropa, pur isu N pidi-s pa es pasa otu dia, i es konkorda sen ninhun prubléma. Kantu es volta, N tinha dôs pergunta: “Pamodi ki ta kontise kuzas mariadu ku kes algen dretu?” i “Kuzê ki nu meste faze pa nu ser filís?” N seta livru A Verdade Que Conduz à Vida Eterna i un Tradução do Novo Mundo das Escrituras Sagradas, ki tinha un kapa verdi ki ta txomaba atenson. Tanbê N seta un studu di Bíblia. Kel-li djuda-m prende txeu kuza. N fika kontenti di sabe  ma é sô Reinu di Deus ki pode rezolve prublémas di tudu algen. N da kónta ma govérnu di ómi fadja, i kel-la poi mundu ta bira un lugar xeiu di dór, sufrimentu, injustisa i disgrasa.

N da nha vida pa Jeová na komésu di anu 1982, i N batiza alguns mês dipôs, na kongrésu “A Verdade do Reino” ki fazedu na un prédiu grandi na sidadi di Saint Paul. Na kel otu simana, N torna bai pa kel prédiu pa N ba faze un izami pa N pode biraba adivogadu. Na komésu di otubru, N fika ta sabe ma N pasa na kel izami i N podia trabadjaba sima adivogadu.

Duránti kel kongrésu “A Verdade do Reino”, N konxe Mike Richardson. El ta trabadjaba na Betel di Brooklyn i el splika-m ma es sta ba kriaba un dipartamentu di leis na sédi mundial. N lenbra di kes palavra di kel ómi di Itiópia ki sta na Atos 8:36, i N pergunta nha kabésa: ‘Kuzê ki sta inpidi-m di trabadja na Dipartamentu di leis?’ Nton, N prenxe un pitison pa Betel.

Nha pai ku nha mai ka fika mutu kontenti pamodi N bira un Tistimunha di Jeová. Nha pai pergunta-m si nha trabadju na Betel ta djudaba mi di algun manera na nha karera di adivogadu. N splika-l ma nha trabadju éra voluntáriu i ma N ta ba resebeba 75 dóla pa mês, ki éra ajuda ki tudu betelitas ta resebeba na fin di mês.

Dipôs ki N kunpri nha kontratu di trabadju, N kumesa nha sirvisu na Betel di Brooklyn, na Nova York, na anu 1984. N diziginadu pa Dipartamentu di leis. Kel spiriénsa ki N ganha na nha trabadju pripara-m pa kel ki staba pa binha.

Kel Salon di Stanlei ki ta fika na sidadi di Jersey, na Nova Jersey, kunpradu na novénbru di 1983. Irmons pidi lisénsa pa es fazeba mudansa na instalason di lus i na kanalizason di agu. Kantu ki es bai nkontra ku kes autoridadi di kel lugar, nos irmons splika-s ma Tistimunhas di Jeová krê uzaba salon di Stanlei pa fazeba runions. Má kel-li kria un prubléma. Lei di sidadi di Jersey sobri modi ki prédius debe uzadu, ta flaba ma prédius pa adorason debe fika sô na kes lugar ki algen ta mora. Má salon di Stanlei ta fikaba na séntru di un zóna di komérsiu. Pur isu, kes autoridadi ka da lisénsa pa trabadja. Irmons pidi autoridadis di kel lugar  pa torna djobe kel asuntu, má es ka muda di ideia.

Duránti nha primeru simana na Betel, organizason leba kel kazu pa tribunal. Dja ki tinha poku ténpu ki N findaba nha stájiu na un tribunal na Saint Paul, na Minnesota, N konxeba kes kazu la dretu. Un di nos adivogadu fla ma kel salon di Stanlei dja kustuma uzadu pa faze txeu tipu di atividadis pa públiku, sima mostra filmis i ti pa faze spetáklu di rock. Nton, pamodi ki éra ilegal faze atividadis di relijion la? Kel tribunal analiza kel asuntu i el disidi ma sidadi di Jersey viola liberdadi ki tudu relijion ten. Tribunal manda pa kel sidadi da irmons lisénsa ki es mesteba. N kumesa ta odja ma Jeová staba ta abênsua trabadju di Dipartamentu di leis di organizason. N fika txeu kontenti di partisipa na es trabadju.

Irmons kumesa un grandi prujétu pa konpo kel lugar. Ménus di un anu dipôs ki kumesa kel trabadju, na dia 8 di setenbru di 1985, fazedu formatura di Jiliádi di turma nunbru 79 na Stanlei. N fika txeu kontenti di djuda na es trabadju pa Jeová. Faze kel-li da-m mutu más alegria di ki kes trabadju ki N ta fazeba antis di N binha pa Betel. N ka sabeba ma Jeová ta ben uzaba mi pa kuida di monti kazu na tribunal.

Na anus 80, éra normal pa dotoris ku ospital ka ruspetaba óras ki un Tistimunha di Jeová ta pidiba pa faze un tratamentu sen sangi. Prubléma éra más txeu inda, pa kes mudjer grávida, pamodi kes juís txeu bês ta atxaba ma mudjer ka tinha direitu di nega toma sangi. Es ta flaba ma ka éra justu un mininu fika sen se mai sô pamodi el nega toma sangi.

Na dia 29 di dizénbru di 1988, irman Denise Nicoleau perde txeu sangi dipôs ki el ten fidju. Se imoglobina dixi pa ménus di 5, i se dotor pidi-l autorizason pa el pode pô-l sangi. Irman Denise ka dexa. Na kel otu dia, ospital tenta konsigi un órdi di tribunal ki ta autorizaba kes dotor pa daba el sangi ki el mesteba. Juís ka da nen irman Denise nen se maridu xansi pa es da ses opinion i nen el ka fla-s ma el da ospital autorizason pa pô-l sangi.

Na sésta-fera, 30 di dizénbru, ekipa di ospital poi irman Denise sangi. Es faze kel-la sikrê se maridu i otus família ki staba na ladu di se kama dexa klaru ma es ka ta setaba sangi. Na kel noti, txeu família di irman Denise i alguns ansion podu prézu.  Es akuzadu di fika na vólta di kama di Denise talvês pa es ka dexaba dotor pô-l sangi. Na sábadu di sédu, 31 di dizénbru, dja saíba na notísia di Nova York i Long Island ma kes irmon podu prézu.

Na sugunda-fera di sédu, N pâpia ku Milton Mollen ki éra un juís di tribunal más altu. N konta-l tudu kuza, i N fla-l ma kel juís ki da autorizason pa poi sangi, ka papiaba nen ku Denise i nen ku se maridu. Mollen pidi-m pa N torna pasa na se skritóriu más tardi, pa nu papiaba midjór sobri kel asuntu i sobri leis ki ta aplikaba na kel kazu. Di noti, mi ku nha enkaregadu ki txoma Philip Brumley, nu bai skritóriu di juís Mollen. Tanbê kel juís konvidaba kel adivogadu di ospital pa ba partisipa na kel asuntu. Kel konbérsu kumesa ta sai di kontrolu. Pur isu, irmon Philip skrebe-m un nóta ki ta flaba: “Kalma.” Kel-li foi un bon konsedju, pamodi dja N staba ta fikaba xatiadu na tenta mostra kel adivogadu di ospital ma kuza ki el staba ta fla éra mariadu.

Dipôs di más ô ménus un óra, kel juís Mollen fla ma kel kazu, ta sérba kel primeru kuza ki el ta poba na se lista na kel otu dia. Timenti nu staba ta sai di se skritóriu, el fla: “Kel adivogadu di ospital ta ba ten un grandi prubléma manhan.” Kel-li krê fla ma kel adivogadu ta ba tinha txeu trabadju pa splikaba ma ospital tinha direitu di obrigaba irman Denise tomaba sangi. Na kel óra, N xinti ma Jeová staba ta fla-m ma nu tinha txeu xansi di ganhaba kel kazu. N fika dimiradu di odja modi ki Jeová staba ta uza-nu pa faze se vontadi.

Nu trabadja ti tardi sô ta pripara kuzê ki nu sta ba flaba. Dja ki kel tribunal ta fikaba pértu di Betel di Brooklyn, kuazi tudu irmons di nos dipartamentu bai apé ti la. Dipôs ki kes kuatu juís obi-nu, es disidi ma ospital ka devia daba irman Denise sangi. Es fla ma kel primeru juís ka podia daba un órdi ki ta obrigaba un algen toma sangi. Tanbê es fla ma si dadu un órdi sen pâpia primeru ku kes algen ki sta nvolvidu ô txoma-s, bu sta ta viola ses direitu ki sta na lei.

Poku ténpu dipôs, kel tribunal más altu di Nova York tanbê disidi ma irman Denise  tinha direitu di fazeba tratamentu sen sangi. Dipôs di se kazu, N tevi priviléjiu di partisipa na más três kazu ki nu ganha. Tudu es tinha aver ku sangi i es julgadu na kes tribunal más altu na diferentis stadu na Mérka. (Djobe kuadru “ Vitórias na kes Tribunal Más Altu na Mérka”.) Tanbê N partisipa na otus kazu djuntu ku adivogadus di Betel, sima asuntus ki ta nvolve ken ki ta fika ku fidjus, divórsiu i modi ki ta uzadu prédius ô txon.

Kantu N konxe Dawn, nha mudjer, el staba divorsiadu. El ta kuidaba di três fidju, el ta trabadjaba i el éra pionera. El pasa pa txeu prubléma na vida, i N fika dimiradu dimás pamodi el staba disididu na sirbi Jeová. Na anu 1992, nu sisti kongrésu ku téma: “Portadores de Luz”, i N pidi-l na namoru. Un anu dipôs, nu kaza. El é un prezenti di Jeová pa mi. El ta poi Jeová sénpri na primeru lugar i sénpri el ta sta kontenti. N pode fla ma el rekonpensa-m ku bondadi tudu dia di nos vida djuntu. — Pro. 31:12.

Kantu nu kaza, se fidjus tinha 11, 13 i 16 anu. N krê sérba un bon pai pa es. Pur isu, N studa ku kuidadu tudu kuza ki nos publikasons ta fla sobri ser un padrastu. Sima ténpu ba ta pasa, nu lida ku alguns prubléma, má N fika kontenti di odja ma kes minís pasa ta odja-m sima un amigu di kunfiansa i sima un pai ki krê-s txeu. Tanbê, pórta di nos kaza ta staba sénpri abértu pa amigus di nos fidjus, i nu ta fikaba kontenti pamodi nu tinha kes jóven pértu di nos.

Na anu 2013, mi ku Dawn nu muda pa Wisconsin pa ba kuidaba di nos pai ku nos mai ki dja staba grandi. N fika dimiradu, pamodi N kontinua ta trabadja ku Betel. N konvidadu pa N kontinua ta djuda nos organizason na txeu asuntu ki ten aver ku lei.

Na setenbru di 2018, N repara ma N ta linpaba garganta txeu bês antis di N papiaba. Nha dotor djobe-m, má el ka konsigi sabe kal ki éra prubléma. Dipôs, na janeru di 2019, un otu dotor fla-m ma talvês N tene un duénsa gravi ki pode prujudikaba nha korpu interu.

Três dia dipôs, timenti N staba ta patina na jélu, N kebra mô. Sénpri N ta fazeba kel-la i mi éra bon na el. Nton, N da kónta ma N staba ta perde kapasidadi di kontrola nhas movimentu. Dipôs di kel-la, nha duénsa ba ta fika kada bês más piór. N fika ka ta pode pâpia dretu, anda i nen inguli.

N sta txeu kontenti ku priviléjiu ki N tevi di sirbi sima adivogadu pa djuda interesis di Reinu. I N tevi priviléjiu di skrebe txeu artigu pa revistas ki dotoris, adivogadus i juízis ta lé. Tanbê, N faze paléstra na txeu párti di mundu pa difende direitu ki povu di Jeová ten di skodje faze tratamentu i operason sen sangi. Má simé, N ta konkorda ku kel ki Lucas 17:10, ta fla: ‘Ami é skravu ki ka ta sirbi. Kel ki N faze é kel ki N debe fazeba.’