Próvas ta mostra ma Jizus bira Saserdóti Prinsipal kantu el batiza, na anu 29. Modi ki nu sabe kel-li? Kantu Jizus batiza, el mostra ma el da se vida sima un sakrifisiu na altar di ‘vontadi’ di Deus. Kel-li krê fla ma el krê fazeba vontadi di se Pai i da se vida pa salva-nu. (Gál. 1:4; Heb. 10:5-10) Kel altar kumesa ta izisti kantu Jizus batiza. Na ténpu antigu, altar éra un párti inportanti di ténplu. Pur isu, nu pode fla ma kel grandi ténplu spritual sô kumesa ta izisti kantu Jizus batiza. Kel ténplu ta reprizenta tudu kuza ki Jeová sta ta faze ku bazi na sakrifisiu di Jizus, pa nu pode adora-l sima el ta krê. — Mat. 3:16, 17; Heb. 5:4-6.

Na ténpu antigu, ténplu ta mesteba di un saserdóti prinsipal, di mésmu manera kel grandi ténplu spritual tanbê ta mesteba di un saserdóti prinsipal. Pur isu, Jeová skodje Jizus ku “Spritu Santu i ku puder” pa ser Saserdóti Prinsipal. (Atus 10:37, 38, BPK; Mar. 1:9-11) Má, modi ki nu pode ten sertéza ma Jizus skodjedu pa ser Saserdóti Prinsipal kantu el batiza, antis di el móre i di se resureison? Izénplu di Aron i ku kes otu saserdóti prinsipal ki ben dipôs di el, ta djuda-nu atxa respósta di kel pergunta li.

Kel Lei ki Jeová daba Muizés, ta flaba ma éra sô saserdóti prinsipal ki podia entraba na kel Lugar rei di Santu na tabernákulu i dipôs na kel Lugar rei di Santu di ténplu. Tinha un kurtina ki ta siparaba Lugar rei di Santu di Lugar Santu. Kel saserdóti prinsipal ta pasaba pa kel kurtina sô na Dia di Spiason. (Heb. 9:1-3, 6, 7) Aron ku kes otu ómi fiel ki fika na se lugar, skodjedu pa ser saserdóti prinsipal antis di es pasa ‘através di kel kurtina’ i entra na kel Lugar rei di Santu. Di mésmu manera, Jizus tinha ki sérba skodjedu pa ser Saserdóti Prinsipal na grandi ténplu spritual di Jeová, antis di el moreba. Asi, el ta pasaba ‘através di kel kurtina, ki krê fla, se karni’ i entra na Séu. (Heb. 10:20) É pur isu ki apóstlu Polu fla sobri Jizus: ‘Kómu saserdóti prinsipal, el entra na kel ténda más grandi i más perfetu, ki ka fazedu ku mô di ómi,’ i na ‘própi na Séu’. — Heb. 9:11, 24.

Ka ten ninhun diferénsa entri ténpu ki kel novu kontratu legalizadu i ténpu ki el kumesa ta funsiona. Pamodi? Kantu Jizus volta pa Séu i el oferese Deus valor di se vida perfetu ki el da pa nos, el da kel sugundu di kes três pasu ki mesteba pa legalizaba kel novu kontratu. Kes três pasu li tanbê poi kel novu kontratu ta funsiona. Má kal ki é kes pasu?

Primeru, Jizus aprizenta se kabésa dianti di Jeová. Sugundu, Jizus oferese Jeová valor di se sakrifisiu. Tirseru, Jeová seta valor di sangi di Jizus. Kel novu kontratu kumesa ta funsiona sô dipôs ki dadu kes três pasu.

Bíblia ka fla klaru na ki ténpu ki Jeová seta valor di sakrifisiu di Jizus. Nton, nu ka pode fla un data sértu ki kel novu kontratu legalizadu i ki el kumesa ta funsiona. Má, nu ten sertéza ma Jizus bai pa Séu 10 dia antis di Pentikósti. (Atos 1:3) Na algun momentu di kel poku ténpu li, Jizus aprizenta valor di se sakrifisiu i Jeová seta. (Heb. 9:12) Un próva klaru ma kel kontratu novu dja kumesaba ta funsiona é kuzê ki kontise na Pentikósti di anu 33. (Atos 2:1-4, 32, 33) Di sertéza, kel novu kontratu dja staba ta funsiona.

Rezumu: kel novu kontratu legalizadu i el kumesa ta funsiona kantu Jeová seta valor di sangi di Jizus i el poi kes skodjedu ku spritu santu na kel kontratu novu tanbê. Na kel momentu, kumesa ta funsiona kel novu kontratu ki se Mediador é Jizus, ki é Saserdóti Prinsipal. — Heb. 7:25; 8:1-3, 6; 9:13-15.