Jeová krê pa kes algen ki kaza ser filís i ten un kazamentu fórti i ki ta dura. (Mat. 19:4-6) Si é kel-li ki é bu dizeju, modi ki bu pode atxa un algen ki bu pode kaza ku el? Jeová é nos Kriador, pur isu el sabe kuzê ki nu meste pa nu ten un namoru i un kazamentu filís. Nton si nu sigi kes konsedju ki el ta da-nu, nu ta ser filís di verdadi. Nu ben odja alguns di kes konsedju.

Primeru, nu meste ntende kel-li sobri nos kabésa: ‘Korason ta trai algen más di ki kalker otu kuza i el sta dizusperadu.’ (Jer. 17:9) Óras ki dôs algen ki krê kaza konxe i kumesa ta namora, kel sentimentu ki es ta xinti pa kunpanheru ta ba ta bira kada bês más fórti. I óras ki kel-li ta kontise, é difísil pensa di manera klaru. Óras ki pesoas sta toma disizon sobri kazamentu, prinsipalmenti ku bazi na kel ki es ta xinti, normalmenti es ta kaba pa ten prubléma. (Pro. 28:26) Pur isu, é ka bon pa dôs algen ki inda nen ka konxe dretu, pâpia di kes sentimentu más fórti ki es ten pa kunpanheru ô faze kunpanheru promésas. Tanbê ta sérba bon pa es ten un konpromisu sériu, sô dipôs ki es konxe kunpanheru dretu.

Provérbios 22:3 ta fla: ‘Algen prudenti ta odja prigu i el ta sukundi, má kes ki ka ten spiriénsa ta kontinua ta bai i es ta kai na prublémas.’ Kal ki é prigu di uza sites ô aplikativus di namoru? É tristi pamodi alguns algen pasa pa un situason kasábi kantu es da kónta ma kes algen ki es konxe pa internet staba ta ngana-s. Tanbê ten kes algen dizonéstu ki ta kria kóntas falsu na internet pa ngana pesoas i pa furta-s ses dinheru. Kes algen li é mintirozu i ti es ta txiga di fla ma es é Tistimunha di Jeová.

Odja otu prigu. Alguns site di namoru ta uza prugramas di konputador pa odja si dôs algen ta da dretu ô nau. Má ka ten nada ki ta prova ma kel-li ta da sértu. Pensa na kel-li: kazamentu é un kuza txeu inportanti. Bu ta atxa ma bu debe kunfia na prugramas di konputador ki ómis faze pa djuda-u disidi ku kenha ki bu ta kaza? Kes prugrama di konputador li ta konpara ku prinsípius di Bíblia? — Pro. 1:7; 3:5-7.

 Na Provérbios 14:15 nu ta atxa un bon konsedju. El ta fla: ‘Algen nosenti ta kridita na tudu palavra, má ken ki é prudenti ta pensa antis di el da kada pasu.’ Pa bu sabe si un algen ta ser un bon maridu ô un bon mudjer, bu meste konxe-l primeru. É difísil faze kel-li pa internet. Sikrê nhos pode odja informason di kunpanheru i nhos pode pasa txeu ténpu ta pâpia na internet, bu ta atxa ma kel-li ta txiga pa bu fla ma nhos konxe kunpanheru dretu? Alguns ki ta pensaba ma es atxa amor di ses vida, fika spantadu kantu es nkontra kara-kara pa primeru bês ku kel algen.

Un skritor di Salmo fla: ‘N ka ta konvive ku ómis mintirozu, i N ta ivita kes ki ta sukundi kel ki es é.’ (Sal. 26:4) Txeu algen ta atxa ma é normal konta mintira na ses kónta, na kes site ô aplikativus di namoru, pa poi otus algen ta gosta di es más txeu. Es ta tenta sukundi ken ki es é di verdadi óras ki es ta troka mensájen ku otus algen. É txeu inportanti nu faze kes pergunta li: Sikrê un algen fla ma el é Tistimunha di Jeová, el é un kriston batizadu mê? El ten un amizadi fórti ku Jeová? El é un algen ruspetadu na kongregason? Ô el é un mau izénplu ô ti un ‘mau koléga’? (1 Cor. 15:33; 2 Tim. 2:20, 21) El sta livri pa kaza, di akordu ku prinsípius di Bíblia? Pa bu sabe kes respósta li, bu meste pâpia ku un Tistimunha di Jeová ki konxe dretu kel algen ki bu sta interesadu na el. (Pro. 15:22) É klaru ki un sérvu lial di Jeová nunka ka ta pensa na kaza ku un algen diskrenti, i fika na un ‘union dizigual’. — 2 Cor. 6:14; 1 Cor. 7:39.

Sima nu odja, uza kes site ô aplikativus di namoru é prigozu. Má ten txeu manera mutu más midjór di konxe un algen ki bu krê kaza ku el. Nton, undi ki bu pode atxa un bon algen pa bu kaza ku el? Óras ki nu ta konsigi sta djuntu ku kunpanheru, Tistimunhas di Jeová ta kustuma nkontra pesoalmenti na runions di kongregason, asenbleias i kongrésus.

Óras ki nu ka ta konsigi faze runions pa públiku, sima pur izénplu, duránti es duénsa di COVID-19, nu ta faze runion pa internet. Na kes runion li, irmons ku irmans solteru ten xansi di konxe kunpanheru. Tanbê es ta pode odja modi ki kada un ta faze ses párti i diskursus i modi ki es ta mostra ses fé através di komentárius ki es ta da. (1 Tim. 6:11, 12) Tanbê ta da pa es pâpia ku kunpanheru na kes sala siparadu dipôs di runion. Óras ki bu ta sta djuntu ku otus Tistimunha di Jeová pa internet, bu ta konsigi odja modi ki kel algen ki bu sta interesadu na el ta trata otus. Kel-li ta djuda-u sabe ken ki el é di verdadi. (1 Ped. 3:4) Ku ténpu, óras ki nhos pasa ta konxe kunpanheru más midjór, nhos ta konsigi sabe si nhos ten mésmu obijetivu i si nhos dôs ta da dretu ku kunpanheru.

Óras ki solterus ta dexa konsedjus di Bíblia djuda-s toma disizons sobri kazamentu, es ten más xansi di ten un vida filís. É sima Provérbios 18:22 ta fla: ‘Ken ki atxa un bon mudjer [ô un bon maridu] atxa un kuza bon, i Jeová ta fika kontenti ku el.’