STUDU 30
Bira bu amor pa Jeová i pa otus más fórti
“Pamodi amor, nu kria na tudu kuza.” — EFÉZIUS 4:15.
KÁNTIKU 2 Bu nómi é Jeová
KUZÊ KI NU STA BEN STUDA a
1. Ki verdadis ki bu prende kantu bu kumesa ta studa Bíblia?
BU TA lenbra kantu bu kumesa ta studa Bíblia? Talvês bu fika dimiradu di diskubri ma Deus ten un nómi. Ô bu fika aliviadu kantu bu diskubri ma Deus ka ta tortura algen na inférnu. I talvês bu fika dimiradu di prende ma bu pode ben odja otu bês kes algen ki bu ta ama ki dja móre i vive djuntu ku es na un paraízu na téra.
2. Alén di prende kes verdadi di Bíblia, ki prugrésu ki bu faze? (Efézius 5:1, 2)
2 Sima bu studa Palavra di Deus más txeu, bu amor pa Jeová bira más fórti. Kel amor li pô-u ta sigi kuzê ki bu prende. Bu toma kes midjór disizon ku bazi na prinsípius di Bíblia. Bu midjora bu atitudi i bu manera di konporta pamodi bu krê agradaba Deus. Sima un mininu ta imita se pai ki ta ama-l, bu staba ta imita bu Pai na séu. — Lé Efézius 5:1, 2.
3. Ki perguntas ki nu pode faze?
3 Nu pode pensa na kes pergunta li: ‘Nha amor pa Jeová gósi é más fórti di ki kantu N batiza? Désdi ki N batiza, nha manera di pensa i di aji sta ta parse más ku kel di Jeová, prinsipalmenti na mostra amor pa nhas irmon ku irmans?’ Si ‘kel amor ki bu tinha na komésu’ fria un bokadinhu, ka bu fika dizanimadu. É un kuza kuazi sima kel-li ki kontise ku kes irmons na ténpu di apóstlus. Má Jizus ka dizisti di es, i nen el ka ta dizisti di nos. (Apo. 2:4, 7) El sabe ma nu pode rekupera kel amor ki nu xinti na komésu kantu nu prende verdadi.
4. Kuzê ki nu ta ben odja na kel studu li?
4 Na kel studu li, nu ta ben odja modi ki nu pode bira nos amor pa Jeová i pa otus algen más fórti. Dipôs, nu ta ben odja alguns benson ki nu ta resebe óras ki nu ta ama Jeová i nos irmons más txeu.
BIRA BU AMOR PA JEOVÁ MÁS FÓRTI
5-6. Ki prublémas apóstlu Paulu pasa pa el na se trabadju di pregason, má kuzê ki motiva-l kontinua ta sirbi Jeová?
5 Apóstlu Paulu staba kontenti ta sirbi Jeová, má el pasa pa txeu prubléma. Txeu bês, Paulu viaja pa lugaris lonji, i viaja kel bês ka éra fásil. Na kes viajen ki Paulu ta fazeba, alvês el staba “na prigu pamodi rius” i “na prigu pamodi ladrons”. Tanbê alguns bês, se inimigus ti sota-l. (2 Kor. 11:23-27) I nen sénpri irmons ka ta mostraba Paulu ma es ta daba valor pa sforsu ki el faze pa djuda-s. — 2 Kor. 10:10; Fil. 4:15.
6 Kuzê ki djuda Paulu kontinua ta sirbi Jeová? Paulu prende txeu sobri manera di ser di Jeová através di Skrituras i di kes kuza ki el pasa pa el. Paulu fika ku serteza ma Jeová ta amaba el. (Rom. 8:38, 39; Efé. 2:4, 5) I el bira ta ama Jeová txeu. Paulu mostra se amor pa Jeová kantu el ‘sirbi kes santu i el kontinua ta sirbi-s.’ — Ebr. 6:10.
7. Kal ki é un manera ki nu pode bira nos amor pa Jeová más fórti?
7 Nu pode bira nos amor pa Deus más fórti óras ki nu ta studa se Palavra dretu. Óras ki bu ta lé Bíblia, tenta intende kuzê ki kada párti ta inxina-u sobri Jeová. Faze kes pergunta li: ‘Modi ki kel stória li ta mostra ma Jeová ta ama-m? Kuzê ki N prende ki ta pô-m ta ama Jeová?’
8. Modi ki orason pode djuda nos amor pa Deus bira más fórti?
8 Un otu manera ki nu pode bira nos amor pa Jeová más fórti é óras ki sénpri nu ta abri nos korason pa el na orason. (Sal. 25:4, 5) I Jeová ta responde nos orason. (1 Juan 3:21, 22) Un irman na Ázia, ki txoma Kaila, fla: “Na komésu, nha amor pa Jeová tinha bazi na konhisimentu. Má kel amor li bira más fórti kantu N odja modi ki el responde nhas orason. Kel-li pô-m ta krê faze kuzas ki ta agrada-l.” b
BIRA BU AMOR PA OTUS MÁS FÓRTI
9. Modi ki Timótiu mostra ma el staba ta bira se amor pa se irmons ku irmans más fórti?
9 Dipôs ki Paulu bira kriston, el konxe Timótiu ki éra un jóven dretu. Timótiu ta amaba Jeová i el ta amaba pesoas. Paulu fla kes irmon na Filipus: “N ka ten ningen ku atitudi sima di sel, [Timótiu] ki ta ba kuida di nhos di verdadi.” (Fil. 2:20) Paulu ka staba ta pâpia sobri kapasidadi ki Timótiu tinha di tomaba kónta ô di fazeba diskursu. Má Paulu pode odjaba ma Timótiu ta amaba irmons ku irmans txeu. Di serteza, kes kongregason ki Timótiu ta vizitaba ta tinha gana pa el ba vizitaba es. — 1 Kor. 4:17.
10. Modi ki Ana ku se maridu mostra kel amor ki es ta xintiba pa ses irmons ku irmans?
10 Anos tanbê nu pode djobe maneras di djuda nos irmons ku irmans. (Ebr. 13:16) Odja izénplu di Ana, ki nu papiaba di el na kel otu studu. Dipôs di un tenporal fórti, el ku se maridu ba vizita kaza di un família ki é Tistimunha di Jeová i es diskubri ma tétu di kaza di kel família fika distruídu. Pamodi kel-li, kel família ka tinha ropa linpu. Ana fla: “Nu toma ses ropa nu bai laba-s i nu da-s es lizadu i dobradu. Pa nos, kel-la foi un kuza pikinoti ki nu faze. Má pamodi kel-li, nu kria un amizadi ki ta kontinua fórti ti oji.” Amor ki Ana i se maridu ta xinti pa irmons ku irmans motiva-s pa djuda-s na kel ki es meste. — 1 Juan 3:17, 18.
11. (a) Txeu bês, modi ki otus algen ta xinti óras ki nu ta mostra-s amor? (b) Sima sta na Provérbios 19:17, kuzê ki Jeová ta faze óras ki nu ta mostra amor?
11 Óras ki nu ta mostra amor i bondadi pa otus, txeu bês es ta odja ma nu sta tenta imita Jeová. I talvês nen nu ka ta imajina modi ki es ta da valor pa nos bondadi. Kaila, ki dja nu papiaba di el antis, ta lenbra ku amor di kes ki djuda-l. El fla: “N ten txeu gratidon pa tudu kes irman ki N krê txeu ki leba-m pa pregason. Es ta ba atxaba mi na nha kaza, es ta konvidaba mi pa ba kume algun kuza ku es i dipôs, es ta djudaba mi txiga kaza dretu. Gósi N ta da kónta ma kel-la ta izijiba txeu sforsu i es faze-l ku amor.” É klaru ki é ka tudu algen ki ta agradese-nu pa kuzê ki nu faze pa es. Kaila fla kel-li sobri kes algen ki djuda-l: “N ta gostaba di faze algun kuza pa tudu kes bondadi ki es mostra-m, má N ka sabe undi ki tudu es ta mora. Má Jeová sabe i N ta ora pa el rekonpensa-s.” Kaila ten razon. Jeová ta odja tudu kel bondadi ki nu ta faze pa otus, sikrê é poku. Pa el, kel bondadi ki nu ta faze pa otus é sima un sakrifisiu ki ten valor i sima un dívida ki el ta ben paga. — Lé Provérbios 19:17.
Óras ki un algen ta faze prugrésu, el ta djobe maneras di djuda otus. (Odja parágrafu 12.)
12. Modi ki irmons pode mostra ses amor pa kongregason? (Odja fotus.)
12 Si bo é un irmon, modi ki bu pode mostra amor pa otus i faze kuzas pa djuda-s? Un irmon jóven ki txoma Jurdon, pergunta un ansion kuzê ki el pode fazeba pa djudaba kongregason más txeu. Kel ansion ilojia-l pa prugrésu ki dja el fazeba i dipôs el da-l alguns konsedju sobri modi ki el pode djudaba más. Pur izénplu, el fla Jurdon pa txiga Salon di Reinu más sédu, pa el fla otus mantenha, pa el da komentáriu na runion, pa el sai na pregason sénpri ku se grupu pa pregason i pa el pensa na modi ki el pode djudaba otus. Kantu Jurdon faze kes kuza li, el prende faze alguns kuza novu i tanbê se amor pa irmons ku irmans bira más fórti. Jurdon prende ma óras ki un irmon bira un ajudanti di kongregason el ka ta kumesa ta djuda otus, má, el ta kontinua ta djuda-s. — 1 Tim. 3:8-10, 13.
13. Modi ki amor motiva Kristianu pa ser ansion otu bês?
13 Má i si antis bo éra ajudanti di kongregason ô ansion? Jeová ta lenbra di kes kuza ki bu faze na pasadu i di amor ki pô-u ta faze-s. (1 Kor. 15:58) Tanbê el ta odja amor ki bu sta kontinua ta mostra. Un irmon ki txoma Kristianu, fika diziludidu kantu el perde priviléjiu di ser ansion. Má el fla: “N disidi faze tudu kel ki N pode pa N sirbi Jeová ku amor sikrê mi éra ansion ô nau.” Ku ténpu, el diziginadu ansion otu bês. Kristianu fla: “N tinha un bokadinhu di medu di ser ansion otu bês. Má N disidi ma si Jeová, na se mizerikórdia, dexa-m ser ansion otu bês, N ta faze kel-li pamodi nha amor pa el i pa nhas irmon ku irmans.”
14. Kuzê ki bu prende ku spiriénsia di un irman di Jiórjia?
14 Kes algen ki ta sirbi Jeová tanbê ta mostra ses amor pa kes otu algen. (Mat. 22:37-39) Pur izénplu, Elena, ki é un irman di un país ki txoma Jiórjia, fla: “Na komésu, úniku kuza ki ta motivaba mi ba pregason, éra nha amor pa Jeová. Má sima nha amor pa nha Pai ki sta na séu bira más fórti, nha amor pa pesoas tanbê bira más fórti. N ta tenta imajinaba ki prublémas ki es ta pasaba pa el i ki asuntus ki es ta krê papiaba di el. Óras ki N ta pensaba txeu di es manera li, N ta krê djudaba es más txeu.” — Rom. 10:13-15.
JEOVÁ TA REKONPENSA-NU ÓRAS KI NU TA MOSTRA AMOR PA OTUS
Un kuza ki nu ta faze pa mostra amor pode djuda txeu algen. (Odja parágrafus 15 i 16.)
15-16. Sima sta na fotus, kuzê ki ta kontise óras ki nu ta mostra amor pa otus?
15 Óras ki nu ta mostra amor pa nos irmons é ka sô es ki ta ganha. Dipôs ki COVID-19 kumesa, un irmon ki txoma Paulu i se mudjer, djuda txeu irmans ki dja sta algen grandi prende uza ses aparelhu iletróniku pa da tistimunhu. Na komésu, un irman atxa difísil uza se aparelhu iletróniku, má dipôs el konsigi. El uza se aparelhu iletróniku pa konvida kes algen di se família pa Komemorason di mórti di Jizus. I 60 algen di se família sisti Komemorason através di xamada ku vídiu! Kel sforsu ki Paulu i se mudjer faze, djuda kel irman i kes algen di se família. Dipôs, kel irman skrebe Paulu: “Obrigadu pamodi bu djuda-nu, nos ki dja sta algen grandi. Nunka N ka ta skese di modi ki Jeová ta preokupa ku nos i di sforsu ki nhos faze pa djuda-nu.”
16 Spiriénsia sima kel-li, inxina Paulu un kuza inportanti. Kel-li lenbra-l ma amor é más inportanti di ki konhisimentu ô kapasidadi ki nu ten. El fla: “Antis, mi éra enkaregadu di grupu di kongregason. Gósi, N da kónta ma enbóra irmons talvês dja skese di kes diskursu ki N faze, inda es ta lenbra di ajuda ki N da-s.”
17. Kenha más ki ta ganha óras ki nu ta mostra amor?
17 Óras ki nu ta mostra amor pa otus, nos tanbê nu ta ganha di maneras ki nu ka sta spera. Jonatan, ki ta mora na Nova Zilándia, xinti kel-li. Un bês, el odja un pioneru ta prega el sô na un sábadu di tardi ki staba txeu kalor. Jonatan disidi sai ku kel pioneru na pregason na kes otu sábadu di tardi. Na kel ténpu, el ka da kónta modi ki kel bondadi li ta djudaba el txeu. Jonatan fla: “Na kel ténpu, N ka gostaba txeu di pregason. Má dipôs ki N odja modi ki kel pioneru ta inxinaba i kes bon rezultadu di se pregason, N kumesa ta gosta di pregason más txeu. I kel pioneru bira nha grandi amigu. El djuda-m gosta más txeu di pregason i N bira más amigu di Jeová.”
18. Kuzê ki Jeová krê pa nu faze?
18 Jeová krê pa nos tudu bira nos amor pa el i pa otus más fórti. Sima nu prende, nu pode bira nos amor pa Jeová más fórti óras ki nu ta lé se Palavra, nu ta midita na el i nu ta pâpia ku el sénpri na orason. Nu pode bira nos amor más fórti pa nos irmons ku irmans óras ki nu ta djuda-s na kuzas ki es meste. Óras ki nos amor ta bira más fórti, nu ta bira más amigu di Jeová i di nos irmons ku irmans. I nu ta ser amigu di Jeová i di nos irmons pa tudu ténpu!
KÁNTIKU 109 Nu ama kunpanheru di korason
a Sikrê nos é novu na verdadi ô dja nu ten txeu anu ta sirbi Jeová, nos tudu nu pode kontinua ta faze prugrésu. Na kel studu li, nu ta ben odja un manera inportanti ki nu pode faze kel-li, ki é bira nos amor pa Jeová i pa otus más fórti. Sima bu ta ba ta midita na kel studu li, pensa na ki prugrésu ki dja bu faze i na modi ki bu pode faze más prugrésu.
b Mudadu alguns nómi.