1. Pamodi ki é inportanti sta priparadu pa un disgrasa?

 STA priparadu pode salva nos vida. Pur izénplu, kes algen ki ta pripara pa un disgrasa ta ten más xansi di salva ses vida i di djuda otus óras ki kel-li kontise. Un organizason na Europa ki ta tenta djuda algen fla: “Un bon priparason pode salva vida.”

2. Pamodi ki nu debe sta priparadu pa grandi tribulason? (Mateus 24:44)

² “Grandi tribulason” ta ben kumesa dirapenti. (Mat. 24:21) Má, grandi tribulason ta ser diferenti di txeu otus disgrasa pamodi nu sabe ma el ta ben kontise. Dja ten uns 2 mil anu ki Jizus aviza se sigidoris pa pripara pa kel dia li. (Lé Mateus 24:44.) Si nu pripara, ta ser más fásil aguenta kel ténpu difísil li i djuda otus faze mésmu kuza. — Luk. 21:36.

3. Modi ki kapasidadi di aguenta firmi, konpaxon i amor ta djuda-nu sta priparadu pa grandi tribulason?

³ Nu ben odja três kualidadi ki pode djuda-nu sta priparadu pa grandi tribulason. Modi ki nu ta reaji si nu pididu pa prega un mensajen fórti di julgamentu i nu pirsigidu? (Apo. 16:21) Nu meste aguenta firmi pa obi ku Jeová i ten kunfiansa ma el ta ben proteje-nu. Kuzê ki nu ta faze si nos irmons perde algun kuza ô tudu kuza ki es ten? (Hab. 3:17, 18) Nu meste mostra konpaxon i da-s kel ajuda ki es meste. Modi ki nu ta reaji si un grupu di nasons ataka-nu i pa algun ténpu nu ten ki vive djuntu ku irmons i irmans na un lugar pikinoti? (Eze. 38:10-12) Nu meste ten un amor fórti pa nos irmons pa nu konsigi aguenta kel ténpu difísil li.

4. Modi ki Bíblia ta mostra ma nu debe kontinua ta dizenvolve kapasidadi di aguenta firmi, konpaxon i amor?

⁴ Palavra di Deus ta insentiva-nu pa nu kontinua ta dizenvolve kapasidadi di aguenta firmi, konpaxon i amor.  Lukas 21:19 ta fla: “É pamodi nhos kapasidadi di aguenta firmi, ki nhos ta salva nhos vida.” Kolosensis 3:12 ta fla: “Nhos bisti di konpaxon”. I 1 Tesalonisensis 4:9, 10 ta fla: “Deus sta ta inxina nhos ama kunpanheru. Má irmons, nu krê inkoraja nhos, pa nhos kontinua ta faze-l kada bês más.” Tudu kes palavra li skrebedu pa kes irmon ki dja staba ta mostra kapasidadi di aguenta firmi, konpaxon i amor. Má es tinha ki kontinua ta mostraba kes kualidadi li. Nu meste faze mésmu kuza. Pa djuda-nu, nu ben odja modi ki kes kriston na ténpu di apóstlus mostra kada un di kes kualidadi li. Dipôs, nu ta ben odja modi ki nu pode imita kes disiplu li i asi, mostra ma nu sta prontu pa grandi tribulason.

5. Modi ki kes kriston na ténpu di apóstlus aguenta firmi kantu es pasa pa prublémas?

⁵ Kes kriston na ténpu di apóstlus meste aguentaba firmi. (Ebr. 10:36) Es tinha kes mésmu prubléma ki maioria di algen ki ta viveba na kel ténpu tinha. Má tanbê, es tinha otus prubléma pamodi es éra sigidoris di Jizus. Txeu di es pirsigidu ka sô pa xéfis di relijion di judeus i autoridadis di Roma, má tanbê pa ses própi família. (Mat. 10:21) I es tinha ki tomaba kuidadu pa kes ensinu falsu di kes ki bandona Jeová i ki staba ta tenta dividi kongregason ka ta influensiaba es. (Atus 20:29, 30) Má kes irmon aguenta firmi. (Apo. 2:3) Modi ki es faze kel-li? Es ta pensaba ku kuidadu na izénplu di kes algen ki aguenta firmi ki sta na Skrituras, sima Jó. (Tia. 5:10, 11) Es ta fazeba orason ta pidi forsa. (Atus 4:29-31) I es ta konsentraba na kes bon rezultadu pamodi es aguenta firmi. — Atus 5:41.

6. Ki lison bu ta prende ku kuzê ki Merita faze pa aguenta firmi kantu el pasa pa opozison?

⁶ Nos tanbê nu pode aguenta firmi si nu studa sénpri i nu midita na izénplus di kes algen ki aguenta firmi, ki sta na Palavra di Deus i na nos publikasons. É kel-li ki djuda un irman di Albánia, ki txoma Merita, aguenta opozison ku violénsia di se família. El fla: “Stória di Jó ki sta na Bíblia, mexe txeu ku mi. El sufri txeu i enbóra el ka sabia kenha ki teneba el ta sufri, el fla: ‘Ti N móre, N ta mante nha lialdadi!’ (Jó 27:5) I N pensa na modi ki prublémas di Jó éra mutu más difísil ki di meu. Enbóra Jó ka sabia kenha ki pô-l ta sufri, ami N sabia kenha ki éra kulpadu pa nhas prubléma.”

7. Sikrê nu ka sta ta pasa pa un prubléma difísil, kuzê ki nu debe prende faze gósi?

⁷ Tanbê nu pode bira nos kapasidadi di aguenta firmi más fórti, óras ki nu ta faze orason pa Jeová txeu bês i di korason nu ta fla-l kuzê ki nu sta preokupadu ku el. (Fil. 4:6; 1 Tes. 5:17) Talvês bu ka sta pasa pa un provason difísil gósi. Má simé, bu ta djobe orientason di Jeová óras ki bu sta xatiadu, konfuzu ô dizorientadu? Si sénpri bu ta pidi ajuda di Deus pa lida ku prublémas di dia-dia gósi, bu ta xinti avontádi pa faze kel-li óras ki bu ben pasa pa prublémas más difísil na futuru. Nton bu ta kunfia ma Jeová sabe dretu ki óra i modi ki el ta djuda-u. — Sal. 27:1, 3.

8. Modi ki izénplu di Mira ta mostra ma aguenta prublémas gósi pode djuda-nu aguenta kes prubléma ki sta pa ben? (Tiagu 1:2-4) (Odja fotu.)

⁸ Si nu konsigi aguenta firmi gósi, ta ser más fásil nu faze kel-li na grandi tribulason. (Rom. 5:3) Pamodi ki nu pode fla kel-li? Txeu irmon ku irmans ta fla ma kada  bês ki es aguenta un situason difísil, kel-li ta djuda-s aguenta firmi si es pasa pa un otu prubléma. Óras ki es aguenta firmi ku ajuda di Jeová, es ta ten más fé ma el krê djuda-s. I pamodi es ten fé na Jeová, es ta pode aguenta firmi óras ki parse otu prubléma. (Lé Tiagu 1:2-4.) É kel-li ki kontise ku un pionera na Albánia, ki txoma Mira. El diskubri ma aguenta prublémas na pasadu djuda-l kontinua ta aguenta prublémas ki el tene gósi. El fla ma alvês el ta xinti ma é sô el ki tene txeu prubléma. Má dipôs, el ta lenbra di tudu kuza ki Jeová dja faze pa el na kes últimu 20 anu pa djuda-l, i el ta fla se kabésa: ‘Kontinua fiel. Ka bu para di sirbi Jeová gósi dipôs ki el djuda-u aguenta firmi txeu difikuldadi.’ Abo tanbê bu pode midita na modi ki Jeová dja djuda-u aguenta firmi. Ten serteza ma el ta da kónta di tudu bês ki bu ta aguenta firmi óras ki bu ta pasa pa un prubléma i el ta ben rekonpensa-u. (Mat. 5:10-12) Nton óras ki grandi tribulason kumesa, bu ta sta prontu pa aguenta firmi i bu ta sta más disididu na kontinua ta faze kel-li.

9. Modi ki kongregason na Antiokia di Síria mostra konpaxon?

⁹ Repara kuzê ki kontise kantu kes irmon na Judea pasa pa un grandi fómi. Dipôs ki kongregason na Antiokia di Síria obi sobri kel fómi, di serteza es xinti konpaxon pa ses irmon na Judea. Má dipôs es mostra konpaxon pamodi es aji. “Sima kada un ta podeba, disiplus disidi manda ajuda pa irmons ki ta moraba na Judea.” (Atus 11:27-30) Enbóra irmons ki staba ta sufri pamodi fómi ta moraba lonji, kes irmon na Antiokia staba disididu na djuda-s. — 1 Juan 3:17, 18.

10. Di ki maneras nu pode mostra konpaxon óras ki nos irmons ta sufri pamodi un dizastri na naturéza? (Odja fotu.)

¹⁰ Nos tanbê oji, nu ta mostra konpaxon pa nos irmons ku irmans, óras ki nu ta fika ta sabe ma es sta ta sufri pamodi un dizastri na naturéza. Nu ta aji rápidu. Pur izénplu, talvês nu ta pergunta ansions si nu pode djuda na un prujétu, nu ta faze kontribuisons pa trabadju ki ta fazedu na mundu interu ô nu ta ora pa kes irmon ki sta ta sufri pamodi un dizastri na naturéza. b (Pro. 17:17) Pur izénplu, na 2020 kriadu más di 950 Kumison di ajuda na ténpu di dizastri na mundu interu pa kuida di kes irmon ki sufri pamodi COVID-19. Nu ta agradese txeu kes irmon ku irmans ki ta trabadja na kes Kumison pa djuda. Pamodi konpaxon, kes irmon ku irmans li ta leba kes kuza ki irmons meste, ta djuda-s kontinua ta sirbi Jeová i na alguns situason, es ta konpo ô torna faze ses kaza i lugaris di adorason. — Konpara ku 2 Koríntius 8:1-4.

11. Modi ki mostra konpaxon ta da ónra pa nos Pai na séu?

¹¹ Óras ki nu ta mostra konpaxon dipôs di un dizastri na naturéza, otus algen ta repara kes sakrifisiu ki nu ta faze. Pur izénplu, na 2019 furakon Dorian distrui un Salon di Reinu na Baamas. Timenti kel Salon di Reinu staba ta fazedu otu bês, kes irmon pidi un algen di un inpréza, ki ka éra Tistimunha di Jeová, pa fla-s kantu ki el ta kobraba pa faze alguns trabadju. El fla kes irmon: ‘N krê pa nhos uza kes ekipamentu i kes material di grasa. I N ka ta kobra nhos pa faze kes trabadju. N krê  faze kel-li pa nhos organizason. N fika dimiradu di odja kuzê ki nhos ta faze pa nhos amigus.’ Maioria di algen na mundu ka konxe Jeová. Má txeu di es ta odja kuzê ki Tistimunhas di Jeová ta faze pa djuda otus. Nu ta fika kontenti di odja ma óras ki nu ta mostra konpaxon, kel-li pode poi otus algen ta krê prende más sobri Jeová, ki é kel Deus “ki ten txeu mizerikórdia”! — Efé. 2:4.

12. Modi ki dizenvolve konpaxon oji ta pripara-nu pa grandi tribulason? (Apokalipse 13:16, 17)

¹² Pamodi ki nu ta ben meste mostra konpaxon duránti grandi tribulason? Bíblia ta mostra ma kes algen ki ka ta apoia govérnus di kel mundu li, ta ben pasa pa prublémas gósi i duránti grandi tribulason. (Lé Apokalipse 13:16, 17.) Nos irmons ku irmans pode ben meste di ajuda pa ten kes kuza ki es meste pa es vive. Óras ki nos Rei, Jizus Kristu, ben pa faze julgamentu, nu krê pa el atxa-nu ta mostra konpaxon i pa el konvida-nu pa “erda Reinu”. — Mat. 25:34-40.

13. Sima sta na Romanus 15:7, modi ki kes kriston na ténpu di apóstlus bira ses amor pa kunpanheru más fórti?

¹³ Tudu algen sabia ma kristons na ténpu di apóstlus ta mostraba amor pa kunpanheru. Má éra fásil es mostraba amor? Repara modi ki irmons na kongregason na Roma éra diferenti di kunpanheru. Alguns di es éra judeus ki inxinadu obi ku Lei di Muizés. Má kes otu éra di otus nason ki kriadu di manera diferenti. Alguns irmon talvês éra skravu, otus ka éra skravu i talvês ti otus éra dónu di skravu. Modi ki kes irmon vense kes diferénsa li i bira ses amor pa kunpanheru más fórti? Apóstlu Paulu insentiva-s: “Nhos resebe kunpanheru dretu”. (Lé Romanus 15:7.) Kuzê ki el krê flaba? Palavra gregu ki traduzidu pa “resebe” ta da ideia di resebe un algen ku bondadi, ô di manera dretu, sima óras ki algen ta resebe otus na se kaza, ô bira ses amigu i pasa ténpu ku es. Pur izénplu, Paulu fla Filemon pa “resebe dretu” Onézimu, se skravu ki fuji. (Filem. 17) Ákila ku Prisila tanbê resebe Apolu dretu. Es “leba-l” pa ses kaza i es splika-l más dretu sobri kes kuza ki Jizus inxina. (Atus 18:26) Kes irmon li ka dexa diferénsa dividi-s, má envês di kel-li, es resebe kunpanheru dretu.

14. Modi ki Ana i se maridu mostra amor?

¹⁴ Nos tanbê nu pode mostra amor pa nos irmons ku irmans óras ki nu ta bira ses amigu i nu ta pasa ténpu ku es. Kel-li txeu bês ta pô-s ta mostra amor pa nos tanbê. (2 Kor. 6:11-13) Odja spiriénsia di Ana i di se maridu. Poku ténpu dipôs ki es muda pa ses novu diziginason di misionáriu na Áfrika, COVID-19 kumesa. Pamodi kel-li, es ka pode staba djuntu ku ses kongregason i ka éra fásil konxeba irmons ku irmans. Kuzê ki kel kazal li faze pa mostra amor? Es ta fazeba xamada ku vídiu pa pâpia ku irmons i irmans i fla-s ma es tinha gana di konxe-s midjór. Kes família mostra gratidon pa amor ki kes misionáriu mostra-s, i txeu bês es kumesa ta txoma-s i ta manda-s mensajen. Pamodi ki kes misionáriu tenta konxe kes irmon ku irmans? Ana fla: “Nunka N ka ta skese di kes irmon ku irmans ki mostra amor pa mi i pa nha família na kes momentu sábi i na kes momentu kasábi. Ses izénplu motiva-m pa N mostra amor.”

15. Kuzê ki bu prende ku izénplu di Vanesa sobri ama tudu irmon ku irmans? (Odja fotu.)

¹⁵ Txeu di nos ta sta na kongregasons ki  ten irmons i irmans ki é diferenti di nos i ki ten manera di ser diferenti. Nu pode bira nos amor pa tudu es más fórti óras ki nu ta konsentra na ses bons kualidadi. Un irman ki txoma Vanesa, ki ta mora na Nova Zilándia, ta atxaba difísil da dretu ku alguns irmon na se kongregason. Má el disidi ma envês di tenta ivita alguns algen ki tinha manera di ser ki ta iritaba el, el debe pasaba más ténpu ku es. Kel-li djuda-l odja kuzê ki Jeová ta ama na kes irmon. El fla: “Pamodi nha maridu bira enkaregadu di grupu di kongregason, nu ta pasa ténpu ku txeu irmon i irmans ki ten manera di ser diferenti. I pa mi é más fásil da dretu ku es. Gósi N gosta di algen diferenti. É klaru ki Jeová tanbê gosta di kel-li, pamodi kes algen ki el ta atrai pa se organizason é diferenti di kunpanheru.” Óras ki nu ta prende odja otus algen sima Jeová ta odja-s, nu ta prova ma nu ta ama-s. — 2 Kor. 8:24.

16. Pamodi ki amor ta ben ser inportanti na grandi tribulason? (Odja fotu.)

¹⁶ Amor ta ben ser inportanti na grandi tribulason. Óras ki grandi tribulason kumesa, na undi ki nu ta atxa proteson? Odja kuzê ki Jeová fla se povu pa faze kantu Babilónia na ténpu antigu atakadu: ‘Nhos bai, nha povu, nhos entra na nhos kuartu i nhos fitxa pórta nhos tras. Nhos sukundi pa poku ténpu, ti ki kel raiba pasa.’ (Isa. 26:20) Talvês nu ten ki ben sigi kes mésmu orientason li duránti grandi tribulason. ‘Kuartu’ pode krê fla nos kongregason. Na grandi tribulason nu ta atxa kel proteson ki Jeová promete si nu kontinua unidu ku nos irmons. Pur isu, nu debe sforsa txeu gósi, ka sô pa aguenta nos irmons ku irmans, má tanbê pa ama-s. Nos salvason pode dipende di kel-li!

17. Si nu pripara gósi, kuzê ki nu ta ben pode faze na grandi tribulason?

¹⁷ ‘Kel grandi dia di Jeová’ ta ben ser un ténpu txeu difísil pa tudu algen. (Sof. 1:14, 15) Povu di Jeová tanbê ta ben sufri. Má si nu pripara gósi, nu ta konsigi kontinua kalmu i djuda otus. Nu ta konsigi aguenta firmi óras ki nu ben pasa pa kalker prubléma. Óras ki nos irmons ku irmans ben sufri, nu ta faze nos midjór pa djuda-s i asi, mostra-s konpaxon i da-s kes kuza ki es meste. I si nu prende ama nos irmons ku irmans gósi, nu ta ben mostra-s amor na futuru. Nton, Jeová ta ben rekonpensa-nu ku vida pa tudu ténpu na un mundu ki tudu disgrasa i prublémas ka ta ben lenbradu di es más. — Isa. 65:17.