1-2. Di ki manera un sérvu di Jeová é sima un prédiu grandi? (1 Koríntius 15:58)

 NA ANU di 1978, un prédiu ku 60 andar kumesa ta fazedu na Tókiu, na Japon. Kes algen ki staba ta odja konstruson pergunta modi ki kel prédiu ta konsigi aguentaba kes tremor di téra ki ta kontise sénpri na kel sidadi. Modi ki el ta aguentaba? Kes injinheru faze-l ku kapasidadi di treme, má pa ka kai. Sérvus di Jeová é sima kel prédiu grandi la. Di ki manera?

² Un sérvu di Jeová meste ten ikilíbriu i ser firmi. El meste ser fórti i firmi óras ki el ta difende i el ta vive di akordu ku leis di Jeová. (Lé 1 Koríntius 15:58.) El sta ‘prontu pa obidese’ i el ka ta dexa nada pô-l ta muda di ideia. Má tanbê, el meste ser ‘ikilibradu’ sénpri ki ta da. (Tia. 3:17) Un sérvu di Jeová ki prende ten kel ikilíbriu li ka ta ser duru dimás, má tanbê el ka ta seta tudu kuza. Na kel artigu li, nu ta ben prende modi ki nu pode ser firmi i lial. Tanbê, nu ta ben odja sinku manera ki Satanás ta uza pa tenta frakise nos disizon di obi ku Jeová i modi ki nu pode kontinua firmi.

3. Ki leis di Jeová nu ta atxa na Atus 15:28, 29?

³ É Jeová ki ten direitu di da-nu lei, i se leis é fásil di intende. (Isa. 33:22) Pur izénplu, Grupu Enkaregadu di Óbra na ténpu di apóstlus mostra três manera ki sérvus di Jeová debe kontinua firmi: (1) fuji di idolatria i  adora sô Jeová, (2) sigi lei di Jeová ki ta fla ma sangi é sagradu i (3) obi ku órdi di Skrituras di ka seta konportamentu seksual mariadu. (Lé Atus 15:28, 29.) Modi ki sérvus di Jeová oji pode mante firmi na kes três asuntu li?

4. Modi ki nu ta mostra ma nu ta adora sô Jeová? (Apokalipse 4:11)

⁴ Nu ta fuji di idolatria i nu ta adora sô Jeová. El manda israelitas pa es adora sô el. (Deut. 5:6-10) I kantu Diabu tenta Jizus, Jizus fla klaru ma nu debe adora sô Jeová. (Mat. 4:8-10) Pur isu, nu ka ta adora imajen. Tanbê nu ka ta adora algen. Pur izénplu, nu ka ta trata ninhun xéfi di relijion, pulítiku ô kalker algen famozu sima un deus. Nu ta toma nos puzison na ladu di Jeová i nu ta adora sô kel ki ‘kria tudu kuza’. — Lé Apokalipse 4:11.

5. Pamodi ki nu ta apoia lei di Jeová ki ta fla ma vida i sangi é sagradu?

⁵ Nu ta apoia lei di Jeová ki ta fla ma vida i sangi é sagradu. Pamodi? Pamodi Jeová fla ma sangi ta reprizenta vida, ki é un prezenti di txeu valor ki el da-nu. (Lev. 17:14) Kantu Jeová dexa algen kume karni di animal pa primeru bês, el fla-s pa es ka kume sangi. (Gén. 9:4) Kantu el da Lei di Muizés pa Israel, el ripiti kel órdi li. (Lev. 17:10) I Jeová orienta Grupu Enkaregadu di Óbra na ténpu di apóstlus pa fla kes irmon pa “ka seta sangi”. (Atus 15:28, 29) Nu ta obi ku kel órdi li di manera firmi óras ki nu ta toma disizons ki ten aver ku tratamentu di saúdi. b

6. Kuzê ki nu debe faze pa nu obi ku órdi di Jeová di ka seta faze konportamentu seksual mariadu?

⁶ Nu ta obi ku órdi di Jeová di ka seta konportamentu seksual mariadu. (Ebr. 13:4) Apóstlu Paulu fla pa nu poi ménbrus di nos korpu ta fika mortu ô pa nu faze di tudu pa nu kaba ku kalker dizeju mariadu. Nu ta ivita odja i faze kalker kuza ki pode pô-nu ta faze konportamentu seksual mariadu. (Kol. 3:5; Jó 31:1) Óras ki nu xinti tentadu na faze algun kuza mariadu, lógu nu ta ivita pensa ô faze kalker kuza ki pode prujudika nos amizadi ku Jeová.

7. Kuzê ki nu sta disididu na faze i pamodi?

⁷ Jeová ta spera pa nu ser “obidienti di korason”. (Rom. 6:17) Kuzê ki el ta fla-nu é sénpri midjór pa nos i nu ka pode muda se leis. (Isa. 48:17, 18; 1 Kor. 6:9, 10) Nu ta sforsa pa agrada Jeová i mostra mésmu atitudi di kel salmista ki fla: ‘N disidi obi ku bus lei na tudu situason, ti fin.’ (Sal. 119:112) Má Satanás ta tenta frakise nos disizon. Kuzê ki el ta uza pa faze kel-li?

8. Modi ki Satanás ta uza pirsigison pa tenta frakise nos disizon?

⁸ Pirsigison. Diabu ta uza violénsia i preson pa tenta frakise nos disizon. Se obijetivu é “satadja-nu”, ô kaba ku nos amizadi ku Jeová. (1 Ped. 5:8) Kes irmon na ténpu di apóstlus amiasadu, sotadu i matadu pamodi es staba disididu na kontinua firmi. (Atus 5:27, 28, 40; 7:54-60) Ti inda Satanás sta kontinua ta uza pirsigison. Nu ta odja kel-li klaru na manera ki nos irmons i  irmans ta maltratadu di manera kruel na Rúsia i na otus país ki nos irmons ku irmans ta pirsigidu di un manera ô di otu.

9. Da un izénplu ki ta mostra ma nu debe toma kuidadu ku preson.

⁹ Preson. Alén di pirsigison Satanás ta uza “armadilha”. (Efé. 6:11) Odja izénplu di un irmon ki txoma Bob, ki staba internadu pa faze un operason grandi. El fla kes dotor ma el ka ta setaba transfuzon di sangi di ninhun manera. Kel dotor ki sta ba operaba el fla ma el ta ruspetaba se disizon. Má na kel noti antis di operason, otu dotor ba djobe Bob dipôs ki família di Bob bai kaza. El fla Bob ma talvês es ka ta poba el sangi. Má es ta teneba sangi la pa es uza sô si es odja ma es mesteba el. Talvês kel dotor pensa ma Bob ta mudaba di ideia dja ki se família ka staba la. Má Bob kontinua firmi i el fla ma ka ta inporta kuzê ki kontise el ka ta tomaba sangi.

10. Pamodi ki manera di pensa di mundu é prigozu? (1 Koríntius 3:19, 20)

¹⁰ Manera di pensa di mundu. Si nu pensa di mésmu manera ki kes algen ki ka ta ruspeta leis di Jeová, nu pode kumesa ta bandona Jeová i se leis. (Lé 1 Koríntius 3:19, 20.) “Sabedoria di es mundu” txeu bês ta poi algen ka ta obi ku Deus. Alguns irmon na Pérgamu i na Tiatira dexa kes ki ta fazeba konportamentu mariadu i ki ta adoraba imajen influensia-s. Jizus da kes dôs kongregason li un konsedju sériu pamodi es staba ta seta konportamentu seksual mariadu. (Apo. 2:14, 20) Gósi nu ta fazedu txeu preson pa nu seta ideias mariadu. Nos família i otus algen ki nu konxe pode tenta mexe ku kuzê ki nu ta xinti i fla-nu pa nu ka obi ku Jeová. Pur izénplu, es pode fla ma é ka inportanti nu kontinua ta obi ku leis di Jeová sobri séksu i ma kuzê ki Bíblia ta fla é ka pa nos ténpu.

11. Enbóra nu debe ser firmi, kuzê ki nu ka debe faze?

¹¹ Alvês nu pode pensa ma orientason ki Jeová ta da-nu é ka mutu klaru. Nu pode xinti tentadu na “pasa di kes kuza ki sta skrebedu”. (1 Kor. 4:6) Kes xéfi di relijion na ténpu di Jizus ta fazeba kel pekadu li. Es ta poba ses régra na lei i ta fikaba difísil dimás pa povu obiba ku el. (Mat. 23:4) Jeová ta da-nu orientason klaru através di se Palavra i di se organizason. Nu ka ten ninhun motivu pa poi otu régra na kel orientason ki el ta da-nu. (Pro. 3:5-7) Pur isu, nu ka ta pasa di kes kuza ki sta skrebedu na Bíblia i nu ka ta kria régra sobri kes asuntu ki kada irmon debe disidi.

12. Modi ki Satanás ta uza “ideias falsu”?

¹² Ideias falsu. Satanás ta uza “ideias falsu” i “kuzas di mundu” pa ingana i dividi algen. (Kol. 2:8) Na ténpu di apóstlus, kel-li ta inkluiba filozofias ku bazi na ideias di ómi, kes kuza ki judeus ta inxinaba ki ka tinha bazi na Skrituras i kel ensinu ma sigidoris di Jizus debe obiba ku Lei di Muizés. Kes ideia li ta inganaba algen pamodi es ta afastaba es di Jeová, ki é Fonti di sabedoria di verdadi. Oji, Satanás ta uza notísias i redi sosial pa spadja kes ideia di konspirason i kes notísia falsu ki xéfis di pulítika ta krê pa algen sabe. Kel-li kontise  txeu duránti COVID-19. c Txeu algen fika preokupadu dimás pamodi kes informason falsu li. Má kes Tistimunha di Jeová ki sigi orientason ki organizason da, ka tevi kel prubléma li. — Mat. 24:45.

13. Pamodi ki nu debe toma kuidadu pa nu ka fika distraídu?

¹³ Kuzas ki ta distrai-nu. Nu debe sta konsentradu na “kuzê ki é más inportanti”. (Fil. 1:9, 10) Óras ki nu sta distraídu nu ta perde txeu ténpu i forsa na kuzas ki ka bale péna. Kuzas ki nu ta kustuma faze sima kume, bebe, divirti i trabadja pode distrai-nu si nu dexa-s bira más inportanti na nos vida. (Luk. 21:34, 35) Tanbê, tudu dia nu ta obi txeu notísia sobri manifestason i asuntus di pulítika. Nu debe toma kuidadu pa nu ka dexa kes kuza li distrai-nu. Pamodi nu pode kumesa ta apoia un ladu na nos manera di pensa i na nos korason. Satanás ta uza tudu kes kuza li ki dja nu pâpia di el pa frakise nos disizon di faze kel ki é dretu. Nu ben odja modi ki nu pode luta kóntra kes kuza li i kontinua firmi.

14. Kuzê ki pode djuda-nu kontinua firmi ta apoia ladu di Jeová?

¹⁴ Pensa na pamodi ki bu da bu vida pa Jeová i bu batiza. Bu faze kel-li pamodi bu krê apoiaba ladu di Jeová. Lenbra di kuzê ki djuda-u ten serteza ma bu atxa verdadi. Bu prende sobri Jeová i bu kumesa ta ruspeta-l i ta ama-l sima bu Pai na séu. Bu dizenvolve fé i bu rapende di kes kuza mariadu ki bu fazeba. Bu xinti motivadu na para di faze kes kuza mariadu i vive sima Deus ta krê. Bu xinti aliviadu kantu bu da kónta ma Deus purdua-u. (Sal. 32:1, 2) Bu sisti runion i bu kumesa ta pâpia ku otus algen sobri kes kuza sábi ki bu prende. Gósi ki dja bu da bu vida pa Jeová i dja bu batiza,  bu sta ta anda na strada ki ta leba pa vida i bu sta disididu na faze bu midjór pa kontinua na el. — Mat. 7:13, 14.

15. Pamodi ki studa i midita ta djuda-nu?

¹⁵ Studa Palavra di Deus i midita na el. Un arvi pode kontinua fórti si el tene raís ben finkadu. Nos tanbê nu pode mante firmi si nos fé sta ben finkadu na Palavra di Deus. Sima un arvi ta ba ta kria se raís ta bira más fundu i ta spadja pa más lonji. Óras ki nu ta studa i nu ta midita, nos fé ta bira más fórti i nu ta ten más serteza ma kel ki Deus ta pidi-nu é midjór pa nos. (Kol. 2:6, 7) Pensa na modi ki orientason, konsedju i proteson di Jeová djuda se sérvus na pasadu. Pur izénplu, Ezekiel tevi un vizon di un ténplu i el presta txeu atenson kantu un anju midi kel ténplu ku kuidadu. Kel vizon li da Ezekiel forsa i el ta inxina-nu modi ki nu pode apoia leis di Jeová sobri adorason puru. d (Eze. 40:1-4; 43:10-12) Tra ténpu pa studa i midita na kes kuza más difísil di Palavra di Deus ta djuda-nu.

16. Modi ki ten un korason firmi proteje Bob? (Salmo 112:7)

¹⁶ Bira bu korason firmi. Rei Davidi fla ma nunka el ka ta perdeba se amor pa Jeová kantu el kanta: ‘Ó Deus, nha korason sta firmi.’ (Sal. 57:7) Nos tanbê nu pode ten un korason firmi ki ta kunfia konpletamenti na Jeová. (Lé Salmo 112:7.) Odja modi ki kel-li djuda Bob, ki dja nu papiaba di el antis. Kantu es fla-l ma es ta teneba sangi la pa es uza sô si es odja ma es mesteba el, el fla-s lógu ma si tinha algun xansi di es poba el sangi, el ta saíba di ospital kel óra. Dipôs, Bob fla: “Nunka N ka tevi dúvida di kuzê ki N ta fazeba i N ka staba preokupadu ku kuzê ki pode kontiseba.”

17. Kuzê ki nu pode prende ku spiriénsia di Bob? (Odja dizenhu ku fotu.)

¹⁷ Bob staba firmi pamodi antis di el bai ospital, dja el tomaba se disizon.  Primeru, el krê pa Jeová fikaba kontenti ku el. Sugundu, el studa dretu kuzê ki Bíblia i nos publikasons ku bazi na Bíblia ta fla sobri vida i sangi. Tirseru, el tinha serteza ma Jeová ta ben rekonpensaba el pamodi disizon ki el toma di sigi se lei. Nos tanbê, nu pode ten un korason firmi ka ta inporta ki prublémas ki nu pode pasa pa el.

18. Modi ki izénplu di Baraki ta inxina-nu kunfia na Jeová? (Odja dizenhu na kapa.)

¹⁸ Kunfia na Jeová. Odja modi ki Baraki tevi bons rezultadu pamodi el kunfia na orientason di Jeová. Enbóra na kel ténpu povu na Israel ka tinha nen skudu nen lansa, Jeová fla Baraki pa bai briga kóntra kes trópa di Kanan ki staba ben priparadu pa géra. Ses xéfi éra Sízera. (Juí. 5:8) Profetiza Débura fla Baraki pa el dixiba pa un lugar planu i pa el ba brigaba ku Sízera i 900 karu di géra. Sikrê kes karu ta daba kes trópa vantaji na un lugar planu, Baraki bai simé. Timenti kes trópa staba ta dixi di Monti Tabor, Jeová manda un txuba fórti di séu. Kes karu di Sízera fika prézu na lama i Jeová poi Baraki ta ganha géra. (Juí. 4:1-7, 10, 13-16) Di mésmu manera, Jeová ta da-nu vitória si nu kunfia na el i na orientason ki el ta da-nu através di se organizason. — Deut. 31:6.

19. Pamodi ki bu krê kontinua firmi?

¹⁹ Timenti nu ta vive na kel mundu li nu ten ki luta pa kontinua firmi. (1 Tim. 6:11, 12; 2 Ped. 3:17) Nu debe sta disididu na ka dexa pirsigison, preson, manera di pensa di mundu, ideias falsu i kuzas ki ta distrai-nu frakise nos disizon di kontinua firmi. (Efé. 4:14) Envês di kel-li, nu debe kontinua firmi ta adora Jeová i ta obi ku se leis di manera lial. Má tanbê nu meste ser ikilibradu. Na kel otu studu, nu ta ben odja modi ki Jeová i Jizus é izénplu perfeitu na ser ikilibradu.