STUDU 28
KÁNTIKU 123 Ser lial i obi ku organizason di Jeová
Bu konxe verdadi?
“Nhos mante firmi, ku sintu di verdadi ben pertadu na sintura”. — EFÉZIUS 6:14.
ASUNTU PRINSIPAL
Prende modi ki nu pode odja kal ki é diferénsa entri verdadi ki Jeová ta inxina-nu i kes mintira ki Satanás ta spadja através di nos inimigus.
1. Kuzê ki bu ta xinti pa verdadi?
POVU di Jeová ta ama kes verdadi ki sta na Palavra di Deus. Nu dizenvolve nos fé através di es. (Rom. 10:17) Nu fika konvensidu ma Jeová ta uza kongregason pa ser “kel pilar ki ta apoia i ki ta difende verdadi.” (1 Tim. 3:15) I nu ta fika kontenti di obi ku ‘kes ki ta orienta-nu’ i ki ta splika-nu verdadis di Bíblia, i ki ta da-nu orientasons ki ta djuda-nu faze vontadi di Deus. — Ebr. 13:17.
2. Di akordu ku Tiagu 5:19, kuzê ki pode kontise ku nos, mésmu dipôs ki nu prende verdadi?
2 Mésmu dipôs ki nu seta verdadi i nu seta ma nu meste sigi orientasons di organizason di Jeová, nu pode disvia. (Lé Tiagu 5:19.) Satanás ta fikaba kontenti di pô-nu ta para di kunfia na Bíblia ô na kes orientason ki ta ben di organizason di Jeová. — Efé. 4:14.
3. Pamodi ki nu debe obi ku verdadi? (Efézius 6:13, 14)
3 Lé Efézius 6:13, 14. Ka ta dura Satanás ta ben uza mintiras pa konvense tudu nasons pa fika kóntra Jeová. (Apo. 16:13, 14) Tanbê nu sabe ma Satanás ta ben sforsa inda más txeu pa ingana povu di Jeová. (Apo. 12:9) Pamodi kel-li, é inportanti nu trena pa nu odja diferénsa entri verdadi i mintira i pa nu obi ku verdadi. (Rom. 6:17; 1 Ped. 1:22) Kel-li é txeu inportanti pa nu pode salva na grandi tribulason!
4. Kuzê ki nu ta ben pâpia sobri el na kel studu li?
4 Na kel studu li, nu ta ben odja dôs kualidadi ki nu meste ten pa nu pode rekonhese kes verdadi ki sta na Bíblia i seta kes orientason ki ta ben di organizason di Deus. Dipôs nu ta ben pâpia sobri três kuza ki nu meste faze pa nu pode kontinua firmi na verdadi.
KUALIDADIS KI NU MESTE TEN PA NU REKONHESE VERDADI
5. Modi ki ruspetu pa Jeová ta djuda-nu rekonhese verdadi?
5 Grandi ruspetu pa Jeová. Óras ki nu ta dizenvolve un grandi ruspetu pa Jeová, nu ta ama-l di tal manera ki nunka nu ka ta krê faze nada pa dizagrada-l. Nu ta tene gana di prende kal ki é diferénsa entri kuzê ki é dretu i mariadu, i entri verdadi i mintira, asi pa nu pode ganha aprovason di Jeová. (Pro. 2:3-6; Ebr. 5:14) Nunka nu ka debe dexa medu di ómi ser más grandi di ki nos amor pa Jeová, dja ki faze kel ki ta agrada ómis ta dizagrada Jeová.
6. Modi ki medu di ómi poi kes 10 xéfi di tribu di israelitas ta muda verdadi?
6 Si nu kumesa ta ten más medu di ómi di ki ruspetu pa Deus, nu pode disvia di verdadi. Odja izénplu di kes 12 xéfi di tribu ki bai spia kel téra ki Jeová promete daba kes israelita. 10 di kes spion xinti más medu di kes kananeu di ki amor pa Jeová. Es flaba kes otu israelita: ‘Nu ka ta konsigi luta kóntra kel povu, pamodi es é más fórti ki nos.’ (Núm. 13:27-31) É verdadi ki pa kel ki ómis ta odja, kes kananeu éra más fórti ki kes israelita. Má, kalker algen ki flaba ma kes israelita ka ta konsigi ganhaba ses inimigu, ka staba ta pensa na Jeová. Kes 10 spion debe konsentraba na kuzê ki Jeová kreba pa israelitas fazeba. Tanbê, es debe lenbraba di kes kuza ki dja tinha poku ténpu ki Jeová fazeba pa es. Asi es ta daba kónta ma forsa ki kes kananeu tinha ka éra nada konparadu ku tudu puder ki Jeová ten. Diferenti di kes spion ki ka éra fiel, Juzué ku Kalebi kreba aprovason di Jeová. Es flaba kes israelita: ‘Si Jeová sta kontenti ku nos, di serteza el ta leba-nu pa kel téra i el ta da-nu el.’ — Núm. 14:6-9.
7. Modi ki nu pode bira nos ruspetu pa Jeová más fórti? (Odja dizenhu.)
7 Pa nu bira nos ruspetu pa Jeová más fórti, nu meste pensa na kuzê ki ta dexa-l kontenti na tudu disizons ki nu ta toma. (Sal. 16:8) Óras ki bu ta lé stórias di Bíblia, pensa na kel pergunta li: ‘Si N staba na kel situason, ki disizon ki N ta tomaba?’ Pur izénplu, imajina ma bu staba la ta obi kes 10 xéfi di tribu di israelitas ta fla ma israelitas ka ta konsigi ganhaba kes kananeu. Bu ta kriditaba na kes informason i dexaba medu di ómi tomaba kónta di bo, ô bu ta dexaba bu amor pa Jeová i bu dizeju di agrada-l ser más fórti di ki bu medu? Nason di Israel interu fadja pamodi es ka rekonhese ma Juzué ku Kalebi staba ta pâpia verdadi. Pamodi kel-li, es perde oportunidadi di entra na kel téra ki Deus prometeba es. — Núm. 14:10, 22, 23.
Na kenha ki bu debe kridita? (Odja parágrafu 7.)
8. Ki kualidadi nu meste sforsa pa nu dizenvolve i pamodi?
8 Umildadi. Jeová ta mostra verdadi pa kes algen ki é umildi. (Mat. 11:25) Nos tudu, nu mostra ma nos éra umildi kantu nu seta ajuda pa prende verdadi. (Atus 8:30, 31) Má simé, nu meste toma kuidadu pa nu ka bira orgulhozu. Si nu bira orgulhozu, talvês nu ta kumesa ta atxa ma nos opinion ten mésmu valor ki kes prinsípiu ki sta na Bíblia i ku kes orientason ki nu ta resebe di organizason di Jeová.
9. Modi ki nu pode kontinua umildi?
9 Pa nu kontinua umildi, nu meste lenbra ma nos é pikinoti konparadu ku Jeová. (Sal. 8:3, 4) Tanbê nu pode pidi Jeová na orason pa djuda-nu ser más umildi i sta prontu pa prende. Jeová ta djuda-nu da más valor pa se pensamentus, ki nu ta prende através di Bíblia i di se organizason, envês di nos pensamentus. Na bu leitura di Bíblia, djobe kuzas ki ta prova ma Jeová ta ama umildadi i ma el ta ôdiu orgulhu. I sforsa pa kontinua umildi óras ki bu resebe un diziginason ki ta da-u más autoridadi i ki ta poi otus algen ta repara na bo más txeu.
MODI KI NU PODE KONTINUA TA OBI KU VERDADI
10. Kenha ki Jeová uza pa da instruson i orientason pa se povu?
10 Kontinua ta kunfia na orientasons ki ta ben di organizason di Jeová. Na ténpu di Israel antigu, Jeová uza Muizés i dipôs Juzué pa da Se povu orientasons. (Jos. 1:16, 17) Kantu kes israelita ta rekonheseba ma kes ómi éra reprizentantis di Jeová Deus, es ta resebeba txeu bensons. Senténas di anus dipôs, kantu kongregason di kristons formadu, kes 12 apóstlu ta daba kongregasons orientason. (Atus 8:14, 15) Dipôs, ansions na Jiruzalen pasa ta faze párti di kel grupu. Pamodi es sigi kes orientason di kes ómi fiel la, “kes kongregason ba ta fika más fórti na fé i es ba ta omenta kada dia.” (Atus 16:4, 5) Na nos ténpu, nu ta ser abensuadu tanbê óras ki nu ta sigi orientasons ki ta ben di organizason di Jeová. Má, modi ki Jeová ta xinti si nu ka rekonhese kes ki el ta skodje pa toma kónta di se organizason? Pa responde kel pergunta li, nu ta ben odja kuzê ki kontise kantu kes israelita staba ta bai pa kel téra ki Jeová prometeba es.
11. Kuzê ki kontise na ténpu di Israel antigu ku kes algen ki ka ruspeta Muizés, ki éra kel ki Jeová skodje pa toma kónta di se povu? (Odja dizenhu.)
11 Duránti kel ténpu ki kes israelita staba ta bai pa kel téra ki Jeová prometeba es, alguns ómi dizafia Muizés i kel diziginason ki Jeová daba el. I es fla: ‘Asenbleia interu [ka sô Muizés] é santu, es tudu, i Jeová sta na ses meiu.’ (Núm. 16:1-3) Enbóra é verdadi ma pa Jeová ‘asenbleia interu’ éra santu, Jeová skodjeba Muizés pa tomaba kónta di Se povu. (Núm. 16:28) Kantu kes ómi ki rabela kritika Muizés, na verdadi es staba ta kritika Jeová. Es ka konsentra na kuzê ki Jeová kreba, má na kuzê ki es kreba, ki éra tinha más puder i fama. Deus distrui kes ómi ki rabela i tanbê kes ómi di apoia-s. (Núm. 16:30-35, 41, 49) Oji tanbê nu pode ten serteza ma Jeová ta kondena kes ki ka ta ruspeta kes orientason ki ta ben di se organizason.
Kenha ki bu debe apoia? (Odja parágrafu 11.)
12. Pamodi ki nu pode kontinua ta kunfia na organizason di Jeová?
12 Nu pode kontinua ta kunfia na organizason di Jeová. Óras ki fika klaru ma nu meste muda kuzê ki nu ta intendeba sobri un verdadi di Bíblia ô algun kuza sobri manera ki nu ta sirbi Jeová, kes ki ta toma kónta di organizason ka ta xinti medu di faze kes mudansa ki meste. (Pro. 4:18) Es ta faze kel-li pamodi kuza más inportanti pa es, é agrada Jeová. Tanbê es ta faze ses midjór pa toma disizons ku bazi na Palavra di Deus, ki é kel modelu ki tudu sérvu di Jeová debe sigi.
13. Kuzê ki é “kel modelu di bons palavra”, i kuzê ki nu meste faze ku el?
13 “Kontinua ta pega na kel modelu di bons palavra”. (2 Tim. 1:13) “Kel modelu di bons palavra” é kes ensinu ki sta na Bíblia. (Juan 17:17) Tudu kes ensinu é bazi di kes kuza ki nu ta kridita na el. Organizason di Jeová ta insentiva-nu pa nu pega riju na kes ensinu. Si nu faze si, nu ta ser abensuadu.
14. Modi ki kes kriston dexa di pega na “kel modelu di bons palavra”?
14 Kuzê ki pode kontise si nu dexa di pega na “kel modelu di bons palavra”? Nu ben odja un izénplu. Na ténpu di kes apóstlu, alguns kriston staba ta spadja mintira ma dia di Jeová dja txigaba. Talvês tinha un karta ki pesoas ta atxaba ma éra apóstlu Paulu ki skrebe ta flaba kel-li. Alguns kriston na Tesalónika kridita na kel mintira i es kumesa ta spadja-l sen para pa djobe si kel informason éra verdadi. Es ka ta sérba inganadu si es lenbraba di kuzas ki Paulu inxinaba es kantu inda el staba ku es. (2 Tes. 2:1-5) Paulu fla se irmons pa ka kridita na tudu kuza ki es ta obi. I pa djuda-s na futuru, Paulu tirmina se sugundu karta pa kes irmon na Tesalónika ku kes palavra li: “Ami Paulu, N sta skrebe es mantenha ku nha própi mô. El é un sinal na tudu kes karta. É si ki N ta skrebe.” — 2 Tes. 3:17.
15. Modi ki nu pode proteje di kes kuza falsu ki ta parse ma é verdadi? Da un izénplu. (Odja fotus.)
15 Kuzê ki nu pode prende ku kes palavra di Paulu pa irmons na Tesalónika? Óras ki nu ta obi algun kuza ki ka sta di akordu ku kel ki nu prende na Bíblia, ô óras ki nu obi un stória ki ta poi algen ta fika dimiradu, nu meste uza sabedoria. Na antigu Union Suviétika, nos inimigus un bês da un karta pa irmons ki ta parseba ma binha di Sédi Mundial. Kel karta ta insentivaba alguns irmon pa forma un organizason siparadu i ki ta tomaba disizons di es pa es. Kel karta ta parseba ma éra di verdadi. Má kes irmon ki éra fiel ka foi inganadu. Es da kónta ma mensajen di kel karta ka staba di akordu ku kuzas ki es prendeba. Oji tanbê nos inimigus alvês ta uza tekinolojia pa tenta konfundi-nu i dividi-nu. Envês di nu “perde faxi [nos] bon juís”, nu pode proteje óras ki nu ta analiza dretu si kuzê ki nu obi i nu lé sta di akordu ku kes verdadi ki dja nu prende. — 2 Tes. 2:2; 1 Juan 4:1.
Ka bu dexa ser inganadu pa kes kuza falsu ki ta parse ma é verdadi (Odja parágrafu 15.) a
16. Di akordu ku Romanus 16:17, 18, kuzê ki nu debe faze si alguns algen disvia di verdadi?
16 Kontinua unidu ku kes ki é lial pa Jeová. Deus krê pa nu sta unidu na nos adorason. Nu ta kontinua unidu timenti nu ta pega na kel verdadi. Kalker algen ki ta disvia di verdadi ta kria divizon déntu kongregason, pur isu Deus sta aviza-nu pa nu “ivita-s.” Si nu ka faze asi, nos mê nu pode afasta di verdadi. — Lé Romanus 16:17, 18.
17. Ki bensons nu ta resebe si nu rekonhese verdadi i nu pega riju na el?
17 Óras ki nu ta rekonhese verdadi i nu ta pega riju na el, nu ta kontinua amigu di Jeová i nos fé ta fika fórti. (Efé. 4:15, 16) Nu ta fika protejedu di kes ensinu falsu i di publisidadi di Satanás, nu ta kontinua suguru i Jeová ta kuida di nos duránti grandi tribulason. Nu kontinua ta pega riju na kel ki é verdadi, “i kel Deus di pas ta sta ku [nos].” — Flp. 4:8, 9.
KÁNTIKU 122 Nu mante firmi!
a SPLIKASON DI FOTUS: Un séna ki ta mostra irmons na antigu Union Suviétika ki resebe un karta ki ta parseba ma binha di Sédi Mundial, má ki na verdadi éra di nos inimigus. Na nos ténpu, nos inimigus talvês ta uza internet pa spadja kuzas sobri organizason di Jeová pa ingana-nu.
