STUDU 30
KÁNTIKU 36 Nu proteje nos korason
Kuzê ki nu pode prende ku kes rei di Israel
‘Nhos ta torna ben odja diferénsa entri un algen justu i un algen mau, entri ken ki ta sirbi Deus i ken ki ka ta sirbi-l.’ — MALAQUIAS 3:18.
ASUNTU PRINSIPAL
Prende sobri kes rei di Israel pode djuda-nu sabe kuzê ki nu meste faze pa nu agrada Jeová.
1-2. Kuzê ki Bíblia ta fla-nu sobri alguns rei di Israel?
BÍBLIA ta pâpia di más di 40 ómi ki governa Israel. a Tanbê el ta pâpia di manera sinseru sobri alguns kuza ki es faze. Pur izénplu, ti mésmu kes rei ki éra bon faze alguns kuza mariadu. Odja izénplu di rei Davidi. Jeová fla: ‘Nha sérvu Davidi sirbi-m di tudu se korason, i el faze sô kel ki N ta atxaba ma éra dretu.’ (1 Reis 14:8) Má, kel ómi li faze konportamentu seksual mariadu ku un mudjer ki éra kazadu i el faze planu pa maridu di kel mudjer matadu na un géra. — 2 Sam. 11:4, 14, 15.
2 Bíblia tanbê ta fla ma txeu rei ki éra infiel faze alguns kuza dretu. Odja izénplu di Rubuon. Pa odjus di Jeová, el ‘faze kuzas mariadu’. (2 Cró. 12:14) Má, Rubuon faze alguns kuza dretu. Pur izénplu, el obi ku Jeová kantu Jeová fla-l pa el ka géra kóntra kes 10 tribu di Israel i pa el dexa-s skodje otu rei. Tanbê el bira txeu sidadi fórti na se reinu pa proteje povu di Deus di ses inimigus. — 1 Reis 12:21-24; 2 Cró. 11:5-12.
3. Ki pergunta inportanti nu pode faze, i kuzê ki nu ta ben odja na kel studu li?
3 Si kes rei di Israel faze kuzas dretu i mariadu, modi ki Jeová ta disidiba si un rei éra fiel pa El ô nau? Respósta pa kel pergunta li ta djuda-nu intende kuzê ki Jeová ta djobe na nos. Nu ta ben odja três kuza ki djuda Jeová disidi si un rei éra bon ô nau. Primeru, nu ta ben odja si kel rei ta amaba Jeová di tudu se korason. Sugundu, nu ta ben odja si kel rei rapende di korason kantu ki el faze kuza mariadu. Tirseru, nu ta ben odja si kel rei kontinua ta adora Jeová di un manera ki el ta seta.
ES TA AMABA JEOVÁ DI TUDU KORASON
4. Kal ki éra diferénsa entri kes rei ki foi fiel i kes rei ki ka foi fiel?
4 Kes rei ki agrada Jeová ta adoraba el di tudu korason. b Jeozafá, ki éra un rei bon, ‘buska Jeová di tudu se korason.’ (2 Cró. 22:9) Óras ki Bíblia ta pâpia di Juzias, el ta fla: ‘Ka tevi ninhun rei sima el, ki volta pa Jeová di tudu se korason’. (2 Reis 23:25) I Salumon, ki dipôs di alguns anu faze kuzas mariadu? ‘Se korason ka staba konplétu pa Jeová’. (1 Reis 11:4) I sobri Abion, ki éra un rei mau, Bíblia ta fla: ‘Se korason ka staba konplétu pa Jeová’. — 1 Reis 15:3.
5. Splika kuzê ki sirbi Jeová di tudu korason krê fla.
5 Kuzê ki sirbi Jeová di tudu korason krê fla? Un algen ki ten un korason konplétu ka ta adora Jeová sô pamodi el sabe ma el debe adora-l. Envês di kel-li, el ta sirbi-l pamodi el ta ama-l di tudu korason i el ta ruspeta-l.
6. Modi ki nu pode kontinua ta ama Jeová di tudu korason? (Provérbios 4:23; Mateus 5:29, 30)
6 Modi ki nu pode imita kes rei ki éra fiel i ki ama Jeová di tudu korason? Nu debe ivita kalker kuza ki pode frakise nos amor pa Jeová. Pur izénplu, nu meste toma kuidadu ku kuzas ki nu ta odja i ki nu ta faze pa nu divirti. Tanbê nu meste toma kuidadu i skodje amigus dretu, asi pa nu ka kumesa ta pensa ma dinheru é kuza más inportanti na vida. Si nu da kónta ma algun kuza kumesa ta frakise nos amor pa Jeová, nu debe aji faxi pa kaba ku el. — Lé Provérbios 4:23; Mateus 5:29, 30.
7. Pamodi ki é inportanti nu ivita kes kuza ki pode frakise nos amor pa Jeová?
7 Nu meste toma kuidadu pa nos korason ka fika divididu. Si nu ka toma kuidadu, nu pode pensa ma si nu sta okupadu ta sirbi Jeová, pensamentus mariadu ka ta prujudika-nu. Imajina ma bu linpa bu kaza i dipôs bu abri pórtas ku janélas i entra tudu kes puera i sujidadi. Nu pode konpara kel-li ku nos amizadi ku Jeová. Nu meste faze más di ki kuzas bon ki ta pô-nu ta bira más amigu di Jeová, sima nu ka ta gostaba pa entra sujidadi na nos kaza, nu meste ivita kalker kuza ki ta ben di es mundu ki pode frakise nos amor pa Jeová i poi nos korason ta fika divididu. — Efé. 2:2.
ES RAPENDE DI KORASON DI SES PEKADU
8-9. Modi ki rei Davidi i rei Ezekias reaji kantu es fladu modi ki Jeová staba ta xinti ku ses pekadu? (Odja dizenhus.)
8 Sima nu odja na primeru parágrafu, rei Davidi faze pekadus gravi. Má kantu proféta Natan pâpia ku el sobri se pekadu, ku umildadi Davidi rapende. (2 Sam. 12:13) Kes palavra ki Davidi skrebe na Salmo 51 ta mostra-nu ma el rapende di verdadi di kes kuza ki el faze. Davidi ka finji ma el rapende sô pa el inganaba Natan ô pa el ka sérba kastigadu. — Sal. 51:3, 4, 17, kabesalhu.
9 Rei Ezekias tanbê peka kóntra Jeová. Bíblia ta fla: ‘Se korason fika orgulhozu. Pur isu Deus fika xatiadu ku el, ku Judá i ku Jiruzalen.’ (2 Cró. 32:25) Pamodi ki Ezekias fika orgulhozu? Talvês el xinti midjór di ki otus algen pamodi se rikézas, se vitória kóntra gentis di Asíria ô pamodi kel milagri ki fazedu pa kuraba se duénsa. Kel razon ki talvês pô-l ta mostra gentis di Babilónia se rikézas é pamodi el éra orgulhozu. Proféta Isaías tevi ki fla-l ma Jeová staba xatiadu ku el. (2 Reis 20:12-18) Má sima Davidi, ku umildadi Ezekias rapende. (2 Cró. 32:26) Pamodi kel-li, kuzê ki Jeová fika ta pensa di Ezekias? El ta atxaba ma el éra un rei fiel ki ‘ta fazeba kel ki éra dretu’. — 2 Reis 18:3.
Ku umildadi, rei Davidi i rei Ezekias rapende dipôs ki es korijidu pamodi ses pekadu (Odja parágrafus 8 i 9.)
10. Modi ki rei Amazias reaji kantu el korijidu?
10 Diferenti di rei Davidi i rei Ezekias, Amazias ki éra rei di Judá, faze kel ki éra dretu, ‘má ka di tudu se korason.’ (2 Cró. 25:2) Kuzê ki el faze di mariadu? Dipôs ki Jeová djuda-l vense kes edomita, Amazias kumesa ta adora kes deus falsu. c Kantu proféta di Jeová ba pâpia ku el, el ka krê obiba proféta di Jeová i el manda-l bai se kaminhu. — 2 Cró. 25:14-16.
11. Sima sta na 2 Koríntius 7:9, 11, kuzê ki nu meste faze pa Jeová purdua-nu nos pekadus? (Odja fotus.)
11 Kuzê ki nu ta prende ku kes izénplu li? Nu meste rapende di nos pekadus i faze tudu kel ki nu ta pode pa nu ka faze-s otu bês. I si nu resebe un konsedju di ansions di kongregason, sikrê é na un kuza pikinoti? Nu ka debe xinti ma Jeová ka ta ama-nu ô ma ansions sta kóntra nos. Ti mésmu kes rei di Israel ki éra bon mesteba di konsedju i koreson. (Ebr. 12:6) Óras ki nu ta resebe koreson, nu debe (1) ser umildi, (2) faze kes mudansa ki meste i (3) kontinua ta sirbi Jeová di tudu korason. Si nu rapende di nos pekadus, Jeová ta purdua-nu. — Lé 2 Koríntius 7:9, 11.
Óras ki nu ta resebe koreson, nu debe (1) ser umildi, (2) faze kes mudansa ki meste i (3) kontinua ta sirbi Jeová di tudu korason. (Odja parágrafu 11.) f
ADORA JEOVÁ DI MANERA KI EL TA KRÊ
12. Kal ki éra kel diferénsa prinsipal entri kes rei ki éra fiel i kes rei ki ka éra fiel?
12 Kes rei ki Jeová ta atxaba ma éra fiel ta adoraba el di manera ki el ta krê. I es insentiva povu di Jeová pa faze mésmu kuza. I sima dja nu odja, é klaru ki es faze alguns kuza mariadu. Má es ta adoraba sô Jeová i es sforsa pa kaba ku imajens na Israel. d
13. Pamodi ki Jeová ta atxaba ma rei Akabi ka éra fiel?
13 Pamodi ki Jeová ta atxaba ma alguns rei ka éra fiel? É klaru ki nen tudu kuza ki es faze ka foi mariadu. Pur izénplu, dipôs ki Akabi, ki éra un rei mau, obi ta fladu ma Nabóti matadu pamodi el, el mostra un bokadinhu di umildadi i tristéza. (1 Reis 21:27-29) Tanbê el faze sidadis i el djuda Israel ganha géras. (1 Reis 20:21, 29; 22:39) Má ten un kuza ki Nabóti faze ki éra txeu mariadu. Pamodi influénsia di se mudjer, el spadja adorason falsu na Israel. Nunka el ka rapende di kel-li. — 1 Reis 21:25, 26.
14. (a) Pamodi ki Jeová ta atxaba ma rei Rubuon ka éra fiel? (b) Ki kuza mariadu maioria di kes rei ki ka éra fiel faze?
14 Odja izénplu di Rubuon, otu rei ki ka foi fiel. Sima nu odja na parágrafu 2, el faze txeu kuza mariadu kantu el staba ta governa. Má dipôs ki se govérnu bira fórti, el para di obi ku lei di Jeová i el kumesa ta adora deus falsu. (2 Cró. 12:1) Dipôs di kel-li, el fika divididu entri adorason verdaderu i adorason falsu. (1 Reis 14:21-24) Rubuon i Akabi ka foi kes úniku rei ki para di adora Jeová di manera ki el ta krê. Na verdadi, maioria di kes rei ki ka éra fiel adora deus falsu i es insentiva otus algen pa faze mésmu kuza. Kel-li ta mostra klaru ma pa Jeová, adora-l di manera ki el ta krê éra kel motivu prinsipal pa el disidi si un rei éra bon ô mau.
15. Pamodi ki adora Jeová di manera dretu é inportanti pa el?
15 Pamodi ki adorason éra un kuza inportanti pa Jeová? Un motivu é pamodi kes rei tinha responsabilidadi di djuda povu di Jeová adora-l di manera dretu. Tanbê óras ki pesoas ta adora deus falsu, kel-li ta pô-s ta faze pekadus gravi i trata otus algen di manera mariadu. (Ose. 4:1, 2) Alén di kel-li, kes rei di Israel i kes israelita éra didikadu pa Jeová. Pur isu, óras ki es ka éra fiel i es ta adoraba deus falsu, Bíblia ta fla ma éra sima si es fazeba adultériu. (Jer. 3:8, 9) Óras ki un algen ta faze adultériu, el ka sta ta ser fiel pa kel algen ki el debe ser fiel pa el i el ta magua-l txeu. Di mésmu manera, un sérvu di Jeová ki é didikadu, ki ka mante fiel, ta magua-L txeu. e — Deut. 4:23, 24.
16. Pa Jeová, kal ki é prinsipal diferénsa entri un algen justu i un algen mau?
16 Kuzê ki nu pode prende? Nu meste sta disididu na ivita kalker kuza ki sta ligadu ku relijion falsu. Má tanbê nu debe sénpri adora Jeová di manera ki el ta krê i kontinua okupadu na se sirvisu. Proféta Malakias splika klaru kal ki é diferénsa entri un algen bon i un algen mau. El fla: ‘Nhos ta torna ben odja diferénsa entri un algen justu i un algen mau, entri ken ki ta sirbi Deus i ken ki ka ta sirbi-l.’ (Mal. 3:18) Pur isu nu ta toma kuidadu pa ka dexa nada, nen mésmu nos inperfeison i nos éru, pô-nu ta para di sirbi Jeová. Para di sirbi Jeová é un pekadu gravi.
17. Modi ki kel algen ki nu ta skodje pa kaza ku el pode afeta nos adorason pa Jeová?
17 Si bo é solteru i bo sta ta pensa na kaza, kuzê ki Malakias fla pode djuda-u skodje un bon algen pa bu kaza ku el. Pensa na kel-li: Talvês kel algen pode ten bons kualidadi, má si el ka ta sirbi Deus, el é un algen justu pa Jeová? (2 Kor. 6:14) Si bu kaza ku kel algen, el ta djuda-u kontinua fiel pa Jeová? Lenbra di kel-li: Kes mudjer di rei Salumon talvês tinha bons kualidadi. Má es ka ta adoraba Jeová, i poku-poku es konvense Salumon pa adora kes deus falsu. — 1 Reis 11:1, 4.
18. Kuzê ki pai ku mai debe inxina se fidjus?
18 Pai ku mai, nhos pode uza izénplu di kes rei ki Bíblia ta pâpia di es, pa djuda nhos fidju kria dizeju di sirbi Jeová. Djuda-s intende ma kes rei ki Jeová ta aprovaba éra kes ki ta adoraba Jeová i ki ta insentivaba otus algen pa adoraba el tanbê. Inxina bus fidjus através di kuzas ki bu ta fla i ki bu ta faze ma kuzas ki ta djuda-u bira más amigu di Jeová, sima studa Bíblia, sisti runion i bai pregason, é kes kuza más inportanti na bu vida. (Mat. 6:33) Sinon, bus fidjus pode atxa ma ser un Tistimunha di Jeová é sô faze párti di “relijion di ses família.” Pamodi kel-li, es pode atxa ma adorason verdaderu é ka inportanti ô es pode para di adora Jeová.
19. Ki speransa ten pa kalker algen ki para di sirbi Jeová? (Odja kuadru “ Bu pode volta pa Jeová!”)
19 Si un algen para di sirbi Jeová, kel-li krê fla ma nunka más el ka ta bira amigu di Jeová otu bês? Nau, pamodi el pode rapende i volta pa Jeová. Pa faze kel-li, el meste ser umildi i seta ajuda di ansions di kongregason. (Tia. 5:14) Má bale pena tudu sforsu ki el ta faze pa bira amigu di Jeová otu bês!
20. Kuzê ki Jeová ta pensa di nos si nu imita kes rei ki éra fiel?
20 Kuzê ki nu ta prende di kes rei di Israel? Nu pode ser sima kes rei fiel si nu kontinua ta sirbi Jeová di tudu nos korason. Nu ta prende ku nos érus, nu ta rapende i nu ta faze kes mudansa ki nu meste. I é inportanti nu lenbra ma nu debe kontinua ta adora Jeová, ki é kel úniku Deus verdaderu. Si bu kontinua fiel pa Jeová, el ta kontinua ta atxa ma bo é un algen justu.
KÁNTIKU 45 Pensamentus di nha korason
a Na kel artigu li, óras ki nu atxa “reis di Israel”, el sta ta pâpia di tudu kes rei ki governa povu di Jeová, ka ta inporta si es governa kes dôs tribu di Judá, kes 10 tribu di Israel, ô tudu kes 12 tribu.
b MÁS SPLIKASON: Txeu bês Bíblia ta uza palavra “korason” pa pâpia di kel algen ki nos é di pa déntu. Kel-li ta inklui nos dizejus i pensamentu, nos atitudi, nos motivason pa faze algun kuza, i métas ki nu krê alkansa.
c Na kel ténpu, kes rei ki ka éra israelita, txeu bês ta adoraba kes deus di kes nason ki es ganhaba géra kóntra es.
d Rei Aza faze pekadus gravi. (2 Cró. 16:7, 10) Má, Bíblia ta fla ma Aza faze kel ki éra dretu pa Jeová. Kantu proféta di Jeová koriji-l, na komésu el ka seta, má talvês dipôs el rapende. Jeová odja más kuzas bon na el di ki kuzas mariadu. Aza adora sô Jeová i el tenta distrui kes imajen ki tinha na se reinu. — 1 Reis 15:11-13; 2 Cró. 14:2-5.
e Nu pode odja ma adorason é un kuza txeu inportanti pa Jeová, pamodi kes dôs primeru mandamentu di Lei di Muizés ta proíbi adora kalker algen ô kuza ki ka é Jeová. — Êxo. 20:1-6.
f SPLIKASON DI DIZENHU: Un ansion jóven sta ta pâpia ku un irmon pamodi kel irmon sta ta bebe txeu. Kel irmon seta kel konsedju di manera umildi, el faze kes mudansa ki mesteba i el kontinua ta sirbi Jeová di manera fiel.
