1. Pamodi ki Jeová konpara se kabésa ku un mai?

‘UN MUDJER pode skese di se bebé?’ Kel-li é un pergunta ki Jeová faze na ténpu di proféta Izaías. Jeová fla se povu: ‘Sikrê kes mudjer skese, ami nunka N ka ta skeseba di bo.’ (Isa. 49:15) É ka sénpri ki Jeová ta konpara se kabésa ku un mai. Má, el faze kel-la na kel situason li. Jeová konpara amor ki un mai ta xinti pa se fidju, ku kel amor fórti ki el ta xinti pa se sérvus. Kuazi tudu mai ta konkorda ku kuzê ki un irman ki txoma Jasmin fla: “Óras ki bu ten un fidju, bu ta kria un amor fórti pa el ki ta dura pa tudu ténpu di bu vida.”

2. Modi ki Jeová ta xinti óras ki un di se fidjus ta afasta di el?

² Jeová sabe óras ki un di se fidjus ta dexa di bai runion i sai na pregason. Nton, pensa na dór ki el ta xinti óras ki el ta odja milharis di se sérvus ta fika inativu * tudu anu.

3. Kuzê ki Jeová krê?

³ Txeu di kes irmon ku irmans ki nu ta ama i ki bira inativu, ta volta pa kongregason i nu ta resebe-s di brasu abértu! Jeová krê pa es volta, i nos tanbê. (1 Ped. 2:25) Modi ki nu pode djuda-s volta? Antis di nu responde es pergunta, é bon nu sabe pamodi ki alguns di es para di bai runion i sai na pregason.

4. Kuzê ki ta kontise ku alguns irmon pamodi ses trabadju?

⁴ Alguns irmon dexa ses trabadju bira kel kuza más inportanti na ses vida. Un irmon ki txoma Ugu, * ki ta vive na Ázia, fla: “N ta trabadjaba txeu dimás. Má, kel-la pô-m ta kai na un armadilha. N ta pensaba ma si N ganhaba txeu dinheru, N ta sirbiba Jeová más midjór. Nton, N fika ta trabadja más ténpu. N kumesa ta falta runion un tras di kel otu, ti ki N dexa di bai runion. Ta parse ma kel mundu li fazedu pa afasta pesoas di Deus poku-poku.”

5. Modi ki un irman reaji ku tudu kes prubléma ki el pasa na vida?

⁵ Alguns irmon ku irmans ta fika dizanimadu dimás pamodi prublémas. Un irman di Inglatéra, ki txoma Ana, ten sinku fidju. El fla: “Un di nhas fidju nase ku prublémas gravi. Ku ténpu, un di nhas fidju-fémia dizasosiadu i nha fidju matxu panha un prubléma gravi di saúdi, i el ta mesteba txeu ajuda. N fika txeu dizanimadu ki N dexa di bai runion i sai na pregason. Pur isu, N bira inativu.” Ta due-nu txeu sabe ma Ana ku se família i tanbê otus irmon ta lida ku prublémas difísil!

6. Pamodi ki un algen pode afasta di povu di Jeová, si el ka sigi konsedju ki sta na Colossenses 3:13 ?

⁶ Lé Colossenses 3:13. Alguns sérvu di Jeová ta fika maguadu pamodi kuzê ki un irmon faze-l. Apóstlu Polu sabeba ma alvês nu pode ten algun razon di ‘kexa kóntra’ un irmon ô un irman. I pode ser ki nu tratadu ku injustisa. Má si nu ka toma kuidadu, nu pode kumesa ta guarda mágua. I ku ténpu, kel mágua pode poi un algen ta afasta di povu di Jeová. Odja kuzê ki kontise ku un irmon di Mérka di Sul, ki txoma Pablu. Nbóra el ka tinha kulpa, un algen fla ma el faze un kuza mariadu ki el ka faze. Pur isu, el perde priviléjiu na kongregason. Modi ki el reaji? El fla: “N fika uma xatiadu, i poku-poku N ba ta afasta di kongregason.”

7. Kuzê ki pode kontise ku un algen ki sta ku konsénsia pizadu?

⁷ Alguns irmon fika ku un konsénsia pizadu pamodi es fazeba un pekadu gravi. Es ta atxa ma es ka merese amor di Deus. Sikrê es rapende i es purduadu, es pode xinti ma es ka merese faze párti di povu di Deus. É si ki un irmon ki txoma Fransisku xinti. El fla: “N dadu reprenson pamodi N faze konportamentu seksual mariadu. Na komésu, N kontinua ta bai runion, má N fika dizanimadu. N xinti ma N ka merese staba djuntu ku povu di Jeová. Nha konsénsia fika ta kulpa-m i N tinha sertéza ma Jeová ka purduaba mi. Ku ténpu N dexa di bai runion.” Modi ki bu ta xinti óras ki irmons ku irmans ta pasa pa situasons sima kes-li? Bu ta konsigi poi na ses lugar? I más inportanti inda, kuzê ki Jeová ta pensa di es?

8. Jeová ta skese di kes algen ki sirbi-l? Splika.

⁸ Jeová ka ta skese di kes algen ki sirbi-l i ki afasta pa un ténpu. Nen el ka ta skese di trabadju ki es faze pa el. (Heb. 6:10) Proféta Izaías skrebe  un izénplu bunitu pa mostra modi ki Jeová ta preokupa ku se povu. Izaías skrebe: ‘Sima un pastor el ta kuida di se ribanhu. Ku se brasu el ta djunta se ovelhas i el ta karega-s na mô.’ (Isa. 40:11) Modi ki Jeová, kel Pastor más grandi, ta xinti óras ki un di se ovelhas ta afasta di ribanhu? Jizus mostra modi ki Jeová ta xinti kantu el pergunta se disiplus: ‘Kuzê ki nhos ta atxa? Si un ómi ten 100 ovelha i un di es perde, el ka ta dexa kes 99 na monti i el ta ba djobe kel ki perde? I si el atxa-l, N ta fla nhos ku tudu sertéza ma el ta fika más kontenti ku el di ki ku kes 99 ki ka perde.’ — Mat. 18:12, 13.

9. Modi ki un bon pastor di ténpu ki Bíblia skrebedu ta trataba se ovelhas? (Odja dizenhu na kapa.)

⁹ Pamodi ki nu pode konpara Jeová ku un pastor? Pamodi un bon pastor di ténpu ki Bíblia skrebedu ta preokupaba txeu ku se ovelhas. Pur izénplu, Davidi luta ku un lion i un ursu pa el proteje se ribanhu. (1 Sam. 17:34, 35) Un bon pastor di sertéza ta daba kónta si sta faltaba ti mésmu un di se ovelhas. (João 10:3, 14 ) Kel pastor ta dexaba kes 99 ovelha na un lugar suguru ô el ta pidiba otus pastor pa kuidaba di es i el ta ba djobeba kel un ki staba perdedu. Jizus konta kel stória li pa inxina-nu un verdadi inportanti. El fla: ‘Nha Pai ki sta na Séu, ka krê pa perde nen un di kes pikinoti li.’ — Mat. 18:14.

10. Sima sta na Ezequiel 34:11-16, kuzê ki Jeová promete ma el ta faze pa se ovelhas ki perde?

¹⁰ Jeová ta ama kada un di nos, ti ‘kes pikinoti’ ki afasta di se ribanhu. Através di proféta Ezekiel, Jeová promete ma el ta ba djobeba se ovelhas ki perde i ma el ta djudaba es rekupera ses amizadi ku el. Tanbê, el fla kuzê ki el ta fazeba pa el salvaba es, sima un pastor israelita ta fazeba óras ki un ovelha  perdeba. (Lé Ezequiel 34:11-16.) Primeru, kel pastor ta ba djobeba se ovelha. Kel-li ta izijiba txeu ténpu i sforsu. Sugundu, óras ki el atxaba kel ovelha ki perde, el ta torna lebaba el pa ribanhu. Tirseru, si kel ovelha staba ku pankada ô ku fómi, kel pastor ta kuidaba di el ku amor, el ta maraba kel pankada, el ta karegaba el i el ta daba el kumida. Ansions, ki é pastoris di ‘ribanhu di Deus’, meste faze mésmu kuza pa djuda kalker algen ki afasta di kongregason. (1 Ped. 5:2, 3) Ansions ta ba djobe-s, ta djuda-s volta pa ribanhu, i ku amor es ta djuda-s rekupera ses amizadi ku Jeová. *

11. Kuzê ki un bon pastor ta ntendeba?

¹¹ Un bon pastor ta ntendeba ma un ovelha pode perdeba. I óras ki un ovelha afastaba di ribanhu, kel pastor ka ta kastigaba el. Nu ben odja izénplu ki Deus dexa, kantu el djuda alguns di se sérvus ki afasta di el duránti un ténpu.

12. Modi ki Jeová trata Jonas?

¹² Proféta Jonas fuji di se diziginason. Má simé, Jeová ka dizisti di el lógu. Sima un bon pastor, Jeová salva-l i djuda-l ten forsa ki el mesteba pa el kunpriba se diziginason. (Jonas 2:7; 3:1, 2 ) Dipôs di kel-li, Deus uza un planta pa djuda Jonas ntende ma vida di kada algen ten valor pa el. (Jonas 4:10, 11 ) Kuzê ki nu ta prende? Ansions ka debe dizisti lógu di kes irmon ki bira inativu. Má, es debe tenta ntende kuzê ki poi un ovelha ta afasta di ribanhu. I óras ki kel ovelha volta pa Jeová, ansions ta kontinua ta mostra-l amor i ta kuida di el.

13. Kuzê ki nu pode prende ku manera ki Jeová lida ku kuza ki kel skritor di Salmo 73 fla?

¹³ Kel skritor di Salmo 73, fika dizanimadu kantu el odja ma vida di kes algen mau sta parseba sábi. El pergunta si  baleba péna faze vontadi di Deus. (Sal. 73:12, 13, 16) Modi ki Jeová lida ku el? El ka kondena-l. Má, Deus dexa se palavras fika skrebedu na Bíblia. Dipôs, kel salmista ntende ma ten un bon amizadi ku Jeová, bale mutu más di ki kalker otu kuza na vida. (Sal. 73:23, 24, 26, 28) Kuzê ki nu ta prende? Ansions ka debe julga lógu kes algen ki kumesa ta ten dúvida si bale péna sirbi Jeová. Má envês di kondena-s, ansions debe tenta ntende pamodi ki es sta pâpia i aji di kel manera la. É sô asi ki ansions pode uza Bíblia pa nkoraja-s na kuza ki es meste.

14. Pamodi ki Elias mesteba ajuda i modi ki Jeová djuda-l?

¹⁴ Proféta Elias fuji di Rainha Jizabel. (1 Reis 19:1-3 ) El ta pensaba ma éra sô el ki staba ta sirbi Jeová sima un proféta i ma se trabadju ka ta sirbiba pa nada. Elias fika tantu dizanimadu ki el krê moreba. (1 Reis 19:4, 10 ) Envês di kondena Elias, Jeová fla-l ma el ka staba el sô. Tanbê el fla-l ma el pode kunfiaba na se puder i ma inda el tinha txeu trabadju pa faze. Ku bondadi, Jeová obi kuzê ki Elias staba ta fla i el da-l novus diziginason. (1 Reis 19:11-16, 18 ) Kuzê ki nu ta prende? Nos tudu, inda más kes ki é ansion, debe trata ovelhas di Jeová ku bondadi. Si un algen fla ma el sta xatiadu ô el ta atxa ma Jeová nunka ka ta purdua-l, ansions debe obi-l óras ki el ta fla-s modi ki el sta xinti. Dipôs, es ta  tenta djuda kel ovelha ki perde odja ma el ten txeu valor pa Jeová.

15. Sima sta na João 6:39, kuzê ki Jizus ta pensaba di ovelhas di se Pai?

¹⁵ Kuzê ki Jeová krê pa nu pensa di se ovelhas ki perde? Nu pode prende ku izénplu di Jizus. El sabeba ma tudu ovelhas di Jeová ten txeu valor. Pur isu, el faze tudu kel ki el pode pa djuda ‘kes ovelha di kaza di Israel ki perde’ volta pa Jeová. (Mat. 15:24; Luc. 19:9, 10) Jizus é un bon pastor, pur isu el tanbê, el faze di tudu pa ka dexa ninhun ovelha di Jeová perde. — Lé João 6:39.

16-17. Kuzê ki ansions ta atxa di djuda kes algen ki afasta? (Odja kuadru “ Modi ki un ovelha ki sta perdedu pode xinti”.)

¹⁶ Apóstlu Polu insentiva ansions di kongregason na Éfezu pa imita izénplu di Jizus. El skrebe: ‘Nhos debe djuda kes ki sta fraku i lenbra sénpri di kes palavra di Sinhor Jizus, ki fla: “É más sábi da di ki toma.”’ (Atos 20:17, 35 ) Kel testu li ta mostra klaru, ma ansions ten un responsabilidadi inportanti di kuida di povu di Jeová. Un ansion na Spanha ki txoma Salvador, fla: “Óras ki N ta pensa na modi ki Jeová ta kuida di se ovelha ki perde, N ta fika ku vontadi di faze tudu kel ki N pode pa N djuda-s. N sabe ma Jeová krê pa N kuida di es.”

¹⁷ Tudu kes ki staba inativu, ki papiadu di es na kel studu li, resebe ajuda i es volta pa Jeová. Na es momentu li, txeu algen ki sta afastadu tanbê krê volta. Na kel otu studu, nu ta ben odja kuzê ki nu pode faze más pa djuda-s volta pa Jeová.