NOS tudu nu ta kridita ma Jeová sta ta orienta se povu, i el sta ta djuda-s ten un amizadi fórti ku el duránti es ‘ténpu di fin’. (2 Tim. 3:1) Má nos tudu, nu meste obi ku Jeová. Nu pode fla ma nos situason é sima di kes israelita ki staba na dizértu. Óras ki es obiba tóki di tronbéta, es tinha ki ajiba.

Jeová manda Muizés faze dôs tronbéta di prata batidu ku martélu. Es ta sirbiba pa ‘djuntaba povu i pa daba sinal pa labanta kanpamentu.’ (Núm. 10:2) Kes saserdóti tinha ki tokaba es di manera diferenti, asi povu ta sabeba kuzê ki es tinha ki fazeba. (Núm. 10:3-8) Oji, povu di Deus tanbê ta resebe orientasons di txeu manera. Kel-li ta lenbra-nu di kes tóki di tronbéta na ténpu antigu. Nu ben odja três di es: óras ki nu ta konvidadu pa kes runion más grandi, óras ki ansions ta resebe trenamentu i óras ki ten mudansas na orientasons ki kongregason ta resebe.

Óras ki Jeová kreba pa ‘povu interu’ djuntaba na entrada, ki ta fikaba na ladu lésti di tabernákulu, kes saserdóti ta tokaba kes dôs tronbéta. (Núm. 10:3) Tudu kes tribu ki ta staba na vólta di tabernákulu i divididu na kuatu grupu, ta obiba kel son. Kes ki ta staba pértu di entrada ta txigaba la na alguns minutu. Má, kes ki ta staba más lonji, ta mesteba di más ténpu i es tinha ki fazeba más sforsu pa txigaba la. Ka ta nporta si es staba pértu ô lonji, Jeová kreba pa tudu es djuntaba pa obiba se orientasons.

Oji, nu ka ta djunta na un tabernákulu, má nu ta konvidadu pa sta djuntu ku povu di Deus. Nu ta faze kel-li, óras ki nu ta bai kongrésus i otus runion spesial, undi nu ta resebe informasons i orientasons rei di inportanti. Na mundu interu, povu di Jeová ta sisti mésmu prugrama. Tudu sérvus di Jeová, ki ta seta kel konviti di djunta, ta faze párti di un grupu grandi i filís. Alguns ta viaja di lugaris más lonji di ki otus. Ka ta nporta kal ki é situason, bale péna sforsa pa sta na kes runion grandi.

Má, i kes ki ta sta na kes grupu izoladu, lonji dimás di kes lugar ki ta fazedu kes runion más grandi? Ku ajuda di tekinolojia, txeu di es ta pode sisti kes runion i ti xinti ma es sta la. Pur izénplu, duránti vizita di un reprizentanti di sédi mundial, Betel di Benin transmiti kel prugrama pa un sidadi na Níjer, ki txoma Arliti, ki ta fika na meiu di dizértu di Sara. Staba 21 algen ta sisti, irmons ku irmans i otus algen interesadu. Sikrê es staba lonji, es xinti párti di kel grupu di  44.131 algen ki djunta pa kel runion spesial. Un irmon skrebe: “Obrigadu di fundu di nos korason, pa kel prugrama. Kel-li mostra-nu más un bês ma nhos ta ama-nu txeu.”

Óras ki saserdótis ta tokaba sô un tronbéta, éra ‘sô kes xéfi di tribu i kes kabésa di milharis’ ki devia baba pa ténda di runion. (Núm. 10:4) La, Muizés ta daba es informasons i trenamentu. Kel-li ta djudaba es kuidaba di ses responsabilidadi na ses tribu. Si bo éra un di kes xéfi di tribu, bu ka ta fazeba di tudu pa bu staba la?

Oji, ansions na kongregason é ka ‘xéfis di tribu’, nen es ka ta tenta manda na ovelhas di ribanhu di Deus. (1 Ped. 5:1-3) Má di sertéza, es ta faze ses midjór pa kuida di ribanhu. Pur isu, óras ki es konvidadu pa resebe más trenamentu, sima Skóla pa Trabadju di Reinu, es ta seta lógu. Na kes skóla, ansions ta prende modi ki es pode kuida midjór di kes asuntu di kongregason. Asi, kes ansion i irmons na kongregason ta bira más amigu di Jeová. Sikrê bu ka sisti un di kes skóla, bu pode prende ku kes ki dja sisti.

Alvês, kes saserdóti ta tokaba tronbéta i es ta fazeba un son ta treme. Kel-li éra pa mostraba ma Jeová kreba pa tudu kanpamentu saíba di la. (Núm. 10:5, 6) Kes israelita ta saíba di la di manera organizadu. Má, kel-li éra un kuza ki ta daba txeu trabadju pa tudu algen. É pur isu ki alvês, alguns israelita ka ta krê mudaba. Pamodi?

Talvês, alguns ta atxaba ma kes tóki pa mudaba ta binha txeu dimás i na óra ki es ka sta speraba. ‘Alvês, kel núven ta fikaba paradu sô di noti ti ki manxe’. Tanbê, tinha óras ki kel ténpu entri un mudansa pa kel otu éra di ‘dôs dia, un mês ô más’. (Núm. 9:21, 22) I kantu bês ki povu muda ses kanpamentu? Números kapítlu 33, ta pâpia di uns 40 lugar ki israelitas arma kanpamentu.

Alvês, alguns israelita ta mudaba pa un lugar ki tinha sónbra. Kel-li éra un kuza sábi na meiu di ‘tudu kel dizértu grandi i ki ta da algen medu’. (Deut. 1:19) Má, kel-li pode sérba un tentason pa es. Kes israelita pode pensaba ma si es saíba di la es ta baba pa un lugar más piór.

Óras ki kes tribu kumesa ta mudaba, talvês alguns ka ta krê speraba ses vês. Tudu es ta obiba kel son di tronbéta, má es ka ta pode saíba omésmu ténpu. Óras ki es tokaba kel primeru son di tronbéta ta treme, ta saíba kes tribu ki staba na ladu lésti, ki éra tribu di Judá, Isakar i Zebulon. (Núm. 2:3-7; 10:5, 6) Dipôs ki es saíba tudu, kes saserdóti ta tokaba kel tronbéta ku son ta treme pa sugundu bês. Kel-li éra sinal pa kes tribu na ladu sul saíba. Kes saserdóti ta fazeba kel-la ti ki tudu povu saíba.

Talvês bu atxa difísil di seta alguns mudansa na organizason di Jeová. Pode ser ki bu atxa ma sta kontise mudansas dimás. Ô talvês bu gostaba di kel manera ki kuzas ta fazeda antis i bu ka krê pa es mudaba. Ka ta nporta kal ki é razon, pode ser ki bu atxa difísil ten paxénxa pa lida ku kes mudansa i leba ténpu pa bu kustuma ku es. Má simé, si nu sforsa pa nu faze kel ki nu sabe ma é dretu, nu pode xinti bensons di Deus.

Na ténpu di Muizés, Jeová gia milhons di ómis, mudjeris ku mininus na dizértu. Si Jeová ka kuidaba di es i orientaba es, es ka ta skapaba. Oji tanbê, Jeová sta ta gia-nu na es ténpu di fin. El sta djuda-nu ten un amizadi fórti ku el i mante nos fé fórti! Pur isu, óras ki bu obi kes tóki di tronbéta faze sima kes israelita fiel: aji lógu!