1. Modi ki Jeová ta xinti óras ki un di se ovelhas ta volta pa el?

NA KEL studu ki pasa, nu odja ma Jeová ta konpara se kabésa ku un bon pastor ki ta kuida di kada un di se ovelhas ku amor. Tanbê, el ta ba djobe kalker un di es ki afasta. Jeová flaba kes israelita ki afastaba di el: ‘Nhos volta pa mi, i N ta volta pa nhos’. Nu sabe ma ti inda el ta xinti mésmu kuza, pamodi el fla: ‘N ka ta muda.’ (Mal. 3:6, 7) Jizus fla ma Jeová ku anjus ta fika txeu kontenti, mésmu óras ki sô un di Se sérvus ki staba afastadu ta volta pa El. — Luc. 15:10, 32.

2. Kuzê ki nu sta ben odja na kel studu li?

² Nu ben odja três stória ki Jizus konta, ki ta mostra modi ki nu pode djuda kes algen ki afasta di Jeová. Nu sta ben studa i pâpia di alguns kualidadi ki nu meste ten pa nu pode djuda kes ovelha ki sta perdedu volta pa el. Tanbê, nu sta ben odja pamodi ki bale péna sforsa pa djuda kes ki sta fraku.

3-4. Sima sta na Lúkas 15:8-10, pamodi ki kel mudjer sforsa txeu pa atxa kel muéda ki perde?

³ Nu meste faze txeu sforsu pa nu atxa kes algen ki krê volta pa Jeová. Na un stória ki sta na Ivanjélhu di Lúkas, Jizus splika kuzê ki un mudjer faze pa atxa un muéda di txeu valor ki perde. Kel muéda txomaba drakma. Kel párti más inportanti di kel stória li, é sobri modi ki kel mudjer sforsa pa atxa kel muéda. — Lé Lúkas 15:8-10, Bíblia Na Prugrésu Di Traduson Pa Lingua Kabuverdianu, BPK.

⁴ Jizus mostra modi ki un mudjer xinti kantu el atxa se  muéda ki el ta daba txeu valor. Ta parse ma na ténpu di Jizus, óras ki un mudjer na Israel ta kazaba, se mai ta daba el 10 muéda di drakma. Talvês muéda di kel mudjer, éra un di kes ki se mai daba el na dia di se kazamentu. Kel mudjer pensa ma kel muéda kai na txon. Pur isu, el sende un lánpida i el djobe na se vólta, má el ka atxa nada. Lus di kel lánpida ki ta sendeba ku óliu, ka ta daba pa el odjaba kel muéda pikinoti. Nton, el disidi bare kaza interu. Na meiu di tudu kel puera ki el djunta, kel mudjer odja un kuza ta límia. Kel kuza éra se drakma ki ten txeu valor pa el. El fika uma kontenti kantu el atxa-l! El txoma se amigus i vizinhus i el da-s kel bon notísia.

5. Pamodi ki alvês é difísil atxa kes algen ki afasta di kongregason?

⁵ Sima nu odja na kel stória ki Jizus konta, nu meste faze txeu sforsu pa nu atxa un kuza ki perde. Di mésmu manera, pode ser ki nu meste faze txeu sforsu pa nu atxa kes algen ki afasta di kongregason. Talvês, dja ten alguns anu ki es para di bai runion. Es pode ti muda pa otu lugar i irmons di la ka konxe-s. Má na es momentu li, nu ten sertéza ma alguns di kes inativu tene gana volta pa Jeová. Es krê sirbi Jeová djuntu ku irmons i irmans, má es meste nos ajuda.

6. Modi ki tudu algen na kongregason pode partisipa na djobe kes inativu?

⁶ Ken ki pode partisipa na djobe kes inativu? Nos tudu: ansions, pionerus, ses família i publikadoris na kongregason. Bu ten algun amigu ô família ki sta inativu? Bu atxa algun inativu na pregason di kaza en kaza ô na tistimunhu pa públiku? Splika kel algen ma si el krê un vizita, bu ta fikaba kontenti di da ansions se nderésu ô se nunbru di tilifóni.

7. Kuzê ki bu prende di kuzas ki un ansion ki txoma Tomás fla?

⁷ Kuzê ki ansions pode faze pa atxa kes algen ki krê volta pa Jeová? Odja kuzê ki un ansion na Spanha, ki txoma Tomás, * ta kustuma faze. Dja el djuda más di 40 inativu volta pa kongregason. El fla: “Primeru, N ta pergunta alguns irmon si es sabe undi ki kes inativu sta ta mora gósi. Ô N ta pergunta publikadoris si es ta lenbra di algun irmon ki ka sta bai runion más. Txeu irmon di kongregason ta fika kontenti ku kel-li, pamodi es ta xinti ma es sta ta djuda na djobe-s. Dipôs, óras ki N ta vizita irmons inativu, N ta pergunta-s sobri ses fidjus i ses família. Alguns di kes inativu ta kustuma lebaba ses fidjus pa runion, i ses fidjus talvês éra publikador. Es tanbê, es pode djudadu volta pa Jeová.”

8. Na kel stória di kel fidju ki perde, ki sta na Lucas 15:17-24, modi ki kel pai trata se fidju ki rapende?

⁸ Ki kualidadis nu meste ten pa nu djuda kes algen ki krê volta pa Jeová? Repara kuzê ki nu pode prende ku stória ki Jizus konta di un fidju ki sai di kaza. (Lé Lucas 15:17-24.) Jizus splika kuzê ki kontise kantu ki kel fidju ben na el i el disidi volta pa kaza. Kel pai kóre pa ba nkontra ku se fidju i el da-l un abrasu fórti, pa mostra se amor pa el. Kel fidju xinti kulpadu i el atxa ma el ka mereseba ser tratadu sima un fidju. El fla se pai modi ki el staba ta xinti i kel pai poi na  se lugar, i el ntende se situason. Dipôs, kel pai faze alguns kuza pa mostra se fidju ma el fika kontenti pamodi el volta pa kaza. Tanbê kel pai ka trata-l sima un npregadu, má sima un fidju ki el kreba txeu. Pa mostra se amor pa el, kel pai manda faze un fésta pa se fidju ki rapende i el da-l bons ropa pa el bisti.

9. Ki kualidadis nu meste ten pa djuda kes algen inativu volta pa Jeová? (Odja kuadru “ Modi ki nu pode djuda kes algen ki krê volta”.)

⁹ Jeová é sima kel pai di kel stória. El ta ama nos irmons ku irmans ki sta inativu i el krê pa es volta pa el. Nu pode imita izénplu di Jeová óras ki nu ta djuda-s volta. Pa kel-li, nu meste ten paxénxa, amor i poi na ses lugar. Pamodi ki nu debe mostra kes kualidadi li i modi ki nu pode faze kel-li?

10. Pamodi ki nu meste ten paxénxa óras ki nu ta djuda un algen rekupera se amizadi ku Jeová?

¹⁰ Nu meste ten paxénxa pamodi ta leba ténpu pa un algen rekupera se amizadi ku Jeová. Txeu di kes ki staba inativu, ta fla ma es konsigi volta pa kongregason sô dipôs ki es resebe txeu vizita di ansions i di otus irmon. Un irman di Ázia ki txoma Nansi, skrebe: “Un grandi amiga na kongregason djuda-m txeu dimás. El gostaba txeu di mi, sima si mi éra se irman más grandi. El djuda-m lenbra di kes bon momentu ki nu pasaba djuntu. El ta obiba mi ku paxénxa, óras ki N ta kontaba el nhas sentimentu, i el ka tinha medu di daba mi konsedju. El prova ma el éra un amiga di verdadi, prontu pa djuda na kalker momentu.”

11. Pamodi ki nu meste poi na lugar di otus óras ki nu ta djuda un algen ki sta maguadu?

 ¹¹ Poi na lugar di otus é sima un bon ramedi. El pode djuda un algen ki sta maguadu xinti midjór. Alguns inativu dja ten anus maguadu ku algun algen na kongregason. I kel mágua pode tra kel algen vontadi di volta pa Jeová. Alguns pode atxa ma es tratadu ku injustisa. Talvês, kes irmon li meste un algen pa obi-s i ki ta ntende kuzê ki es sta xinti. (Tia. 1:19) Un irman, ki txoma Maria, ki fika inativu pa un ténpu, fla: “N mesteba di un amiga pa obiba mi, un onbru pa N txoraba i un mô pa djudaba mi.”

12. Da un izénplu ki ta mostra modi ki Jeová ta uza se amor pa torna traze kes inativu pa se povu.

¹² Bíblia ta fla ma amor di Jeová pa se povu é sima un kórda. Di ki manera? Pensa na kel izénplu li: Imajina ma bu kai na un mar brabu i bu sta ta foga. Nton, un algen ta bota-u un koleti di salva-vida. Di sertéza bu ta fikaba kontenti, pamodi kel koleti ka ta dexa-u bai fundu. Má, sô kel koleti ka ta salva-u. Agu sta friu i pa bu skapa bu meste txiga na boti di salva-vida. Bu meste pa un algen bota-u un kórda i pa puxa-u pa kel boti. Jeová fla kes israelita ki afasta di el: ‘N kontinua ta konduzi-s ku kes kordon di amor’. (Ose. 11:4) Deus ta xinti mésmu kuza oji, pa kes algen ki para di sirbi-l i ki sta ta foga na prublémas i preokupasons dimás. El krê pa kes algen sabe ma el ta ama-s i el krê puxa-s otu bês pa el. I Jeová pode uza-u pa el mostra se amor pa kes ki sta inativu.

13. Da un izénplu ki ta mostra ma nos amor pode djuda otus volta pa Jeová.

 ¹³ É inportanti nu fla kes inativu ma Jeová ta ama-s i ma nos tanbê nu ta ama-s. Pablu, ki dja nu papiaba di el na kel studu ki pasa, fika inativu pa más di 30 anu. El fla: “Un dia di sédu, kantu N staba ta sai di kaza, N nkontra ku un irman di idadi, ki éra dretu. El pâpia ku mi ku amor i N kumesa ta txora sima mininu. N fla kel irman ma é Jeová ki manda-l pa el ben pâpia ku mi. Na kel momentu N disidi volta pa Jeová.”

14. Sima sta na Lucas 15:4, 5, kuzê ki kel pastor faze kantu el atxa kel ovelha ki perde?

¹⁴ Kes inativu meste pa nu djuda-s sénpri. Sima kel fidju ki perde di stória di Jizus, talvês es sta ta xinti txeu dizanimadu, ki pode leba txeu ténpu pa es rekupera. I es pode sta fraku pamodi kuzas ki es pasa na mundu di Satanás. Pur isu, nu meste djuda kes inativu rekupera ses fé na Jeová. Na kel stória di un ovelha ki perde, Jizus fla ma kel pastor poi ovelha riba di se onbru i el torna leba-l pa ribanhu. Kel pastor dja gastaba txeu ténpu i forsa na tenta atxa kel ovelha ki perde. Má tanbê, el da kónta ma kel ovelha ka tinha forsa pa voltaba el sô. Pur isu, el karega-l i el torna leba-l pa ribanhu. — Lé Lucas 15:4, 5.

15. Modi ki nu pode djuda kes ki sta fraku volta pa Jeová? (Odja kuadru “ Un feraménta inportanti”.)

¹⁵ Talvês nu meste tra ténpu i uza nos forsa pa djuda alguns inativu vense ses frakéza. Má, ku ajuda di spritu di Jeová, di se Palavra i di publikasons, nu pode  djuda-s rekupera ses amizadi ku Jeová. (Rom. 15:1) Modi ki nu pode faze kel-li? Un ansion ki ten spiriénsa fla: “Dipôs ki kes inativu disidi volta pa Jeová, txeu di es meste di algen pa studa Bíblia ku es.” * Pur isu, si ansions pidi-u pa bu faze un inativu studu, pamodi ki bu ka ta seta es priviléjiu? Kel ansion tanbê fla: “Kel publikador ki ta faze studu meste ser un bon amigu, un algen ki kel inativu pode kunfia na el.”

16. Modi ki nu sabe ma nu pode konta ku ajuda di anjus?

¹⁶ Ten txeu spiriénsa ki ta mostra ma anjus sta ta djuda-nu atxa kes inativu ki krê volta pa Jeová. (Apo. 14:6) Pur izénplu, un irmon di Ekuador ki txoma Sílviu, faze txeu orason ta pidi Jeová pa djuda-l volta pa kongregason. Timenti el staba ta faze orason, kanpaínha toka. Dôs ansion staba na se pórta. Duránti kel vizita, kes ansion fika kontenti di kumesa ta djuda Sílviu.

17. Modi ki nu ta xinti óras ki nu ta djuda kes ki sta fraku?

¹⁷ Nu ta fika txeu kontenti óras ki nu ta djuda kes ki sta fraku volta pa Jeová. Repara kuzê ki un pioneru ki txoma Salvador i ki ta sforsa pa djuda kes inativu, fla: “Alvês N ta fika kontenti dimás ti ki N ta txora. N ta fika uma sábi di sabe ma Jeová salva un di se ovelhas, ki el gosta txeu, di mundu di Satanás i ma N tevi priviléjiu di trabadja ku El.” — Atos 20:35.

18. Si bu sta inativu, di kuzê ki bu pode ten sertéza?

¹⁸ Si dja bu para di sta djuntu ku povu di Jeová, bu pode ten sertéza ma inda el ta ama-u. El krê pa bu volta pa el. É klaru ki bu meste faze sforsu pa bu volta pa el. Má, sima kel pai di stória di Jizus, Jeová tene gana pa bu volta pa el i el sta di brasu abértu ta spera-u.