Kes versíklu li ta pâpia di 9 kualidadi: ‘Frutu di spritu é: amor, alegria, pas, paxénxa, bondadi, amor lial, fé, brandura, kapasidadi di kontrola kabésa.’ Má, kel-li ka krê fla ma é sô kes kualidadi li ki spritu di Deus pode djuda-nu ten.

Repara kuzê ki apóstlu Polu skrebe antis di el pâpia di kes kualidadi: ‘Kes óbra di karni é kes-li: konportamentu seksual mariadu, inpuréza, konportamentu sen vergónha, idolatria, fitisaria ô bruxaria, dizamizadi, briga, siumi, raiba diskontroladu, dizentendimentu, divizon, formason di seitas, invéja, bebe dimás, féstas diskontroladu i kuzas sima kes-li.’ (Gál. 5:19-21) Kantu Polu fla ‘kuzas sima kes-li’, el staba ta mostra ma tinha más kuza ki ta faze párti di ‘óbras di karni’ sima kes ki sta na Colossenses 3:5. Di mésmu manera, kantu Polu pâpia di kes 9 kualidadi, el fla: ‘Kóntra kes kuza li ka ten lei.’ Nton, Polu ka staba ta tenta faze un lista di tudu kes bon kualidadi ki spritu santu pode djuda-nu ten.

Tanbê, Polu insentiva Timótiu pa ‘npenha pa justisa, pa adorason pa Deus, pa fé, pa amor, pa kapasidadi di aguenta firmi i pa brandura’, ki é 6 bon kualidadi. (1 Tim. 6:11) É sô três di kes kualidadi li (fé, amor i brandura) ki sta na kel lista di kualidadis ki ta faze párti di ‘frutu di spritu’. Má Timótiu ta mesteba pa spritu santu djudaba el ten kes otu kualidadi tanbê, sima justisa, zelu pa adorason pa Deus i kapasidadi di aguenta firmi. — Konpara ku Colossenses 3:12; 2 Pedro 1:5-7.

Pur isu, Gálatas 5:22, 23 ka sta faze un lista di tudu kes kualidadi ki nu debe ten. Spritu di Deus pode djuda-nu ten kes 9 kualidadi ki ta faze párti di ‘frutu di spritu’. Má, ten más kualidadi ki nu meste ten, si nu krê ser un algen maduru i si nu krê ‘bisti di kel manera di ser novu, ki kriadu sima Deus ta krê, ku justisa verdaderu i lialdadi.’ — Efé. 4:24.