N nase na dia 19 di maiu di 1940, na un sidadi ki txoma Amioûn, na Líbanu. Poku anu dipôs, nu muda pa sidadi di Trípoli. N kria na un família filís ki tinha txeu amor i ki ta sirbiba Jeová. Anos éra sinku fidju, três minina i dôs rapás. I mi éra kel más pikinoti. Pa nha pai ku nha mai, dinheru ka éra más inportanti. Kuza más inportanti éra studa Bíblia, sisti runion i prega notísias sábi.

Na nos kongregason tinha txeu skodjedu ku spritu santu. Un di es éra Michel Aboud. Éra el ki ta fazeba studu di livru. Michel prende verdadi na Nova York i é el ki leba verdadi pa Líbanu, na anu 1921. Dipôs mandadu dôs irman jóven pa nos kongregason ki forma na Skóla di Jiliádi. Es txomaba Anne i Gwen Beavor. N ta lenbra dretu modi ki Michel ta trataba es ku ruspetu i el staba sénpri prontu pa djuda-s. Es bira nos grandis amigu. I txeu anu dipôs, N fika kontenti di nkontra ku Anne otus bês, na Mérka. Más tardi N fika kontenti tanbê di nkontra ku Gwen. El staba ta sirbi na Betel di Londris, na Inglatéra, djuntu ku se maridu Wilfred Gooch.

Kantu mi éra jóven, tinha poku Tistimunhas di Jeová na Líbanu. Má nos éra zelozu na pregason. Sénpri nu ta papiaba di Bíblia ku otus algen, mésmu ku opozison di kes xéfi di relijion. Ti inda N ta lenbra dretu di alguns kuza ki kontise ku nos.

Un dia, mi ku nha irman Sana nu staba ta prega na un prédiu. Nton, un padri bai ti kel andar ki nu staba. Ta parse ma algen aviza-l ma nu staba la. Kel padri kumesa ta insulta nha irman. Nton, el fika tantu violéntu ki el pintxa nha irman di skada i kel-li prujudika-l. Timenti kel-li staba ta kontise, algen txoma pulísia. Kantu kes pulísia txiga, es trata nha irman ku bondadi i es pidi algen pa kuida di el. Dipôs, es leba kel padri pa skuadra. Na skuadra, es odja ma kel padri tinha un pistóla. Kel xéfi di pulísia pergunta-l: “Afinal bo é kenha? Bo é padri ô bo é xéfi di bandidus?”

N ta lenbra tanbê di un dia ki nos kongregason luga un otokaru pa nu ba prega na un zóna fóra di sidadi. Tudu staba ta kóre dretu, ti ki padri di kel sidadi da kónta ma nu staba la. El djunta un grupu di algen i es bai ataka-nu. Ti pédra es da-nu ku el. Nha pai panha pankada na meiu di tudu kel konfuzon. N ta lenbra ma se róstu fika xeiu di sangi. El volta pa otokaru ku nha mai i tudu kes otu irmon bai tanbê. Dipôs N obi un kuza ki nunka N ka ta skeseba. Timenti nha mai staba ta linpa róstu di nha pai, el fla: “Jeová favor, púrdua kes algen li. Es ka sabe kuzê ki es sta ta faze.”

Na otu bês, nu ba vizita nos família na kel sidadi ki nu kria. La na kaza di nha avô staba un bispu. Kel bispu sabia ma nha pai ku nha mai éra Tistimunhas di Jeová. Nbóra N tinha sô 6 anu, el djobe-m déntu róstu i el pergunta-m: “Abo, pamodi ki inda bu ka batiza?” N fla-l: “Inda mi é mininu. Pa N batiza N meste konxe Bíblia más dretu i ten un fé fórti.” Kel bispu ka fika kontenti ku respósta ki N da-l. El fla nha avô ma N pâpia ku el sen ruspetu.

Spiriénsas mariadu sima kes-li ta kontiseba poku. Povu di Líbanu é txeu amigu di algen i es gosta di resebe-s dretu. Sénpri nu ta tinha bons konbérsu ku pesoas sobri Bíblia i nu ta fazeba txeu studu.

Inda N staba na skóla, kantu un irmon jóven di Venezuela bai Líbanu. El ta sistiba runion na nos kongregason i ku ténpu el kumesa ta namora ku nha irman Wafa. Más tardi es kaza i es bai mora na Venezuela. Wafa ta xintiba txeu sodadi di nos. I pur isu, óras ki el ta skrebeba nos karta, el ta tentaba konvense nha pai pa nu mudaba pa Venezuela. Ti ki enfin, el konvense-nu na muda pa la!

 Nu txiga na Venezuela na anu 1953 i nu ba mora na Karakas, pértu di palásiu di prizidenti. Dja ki mi éra jóven, N ta fikaba dimiradu óras ki N ta odjaba prizidenti ta pasa na se karu di luxu i ku se kondutor partikular. Má ka foi fásil pa nha pai ku nha mai kustuma ku língua, kultura, kumida i ku klima di kel país. Na verdadi, kantu es kumesa ta kustuma, kontise un kuza rei di tristi.

Nha pai kumesa ta fika duenti. Kel-li éra un kuza stranhu pa nos, pamodi nha pai éra un ómi fórti i el tinha bon saúdi. Aliás, N ka ta lenbra di odja nha pai duenti. El atxadu ku kánser i el tevi ki faze un operason. Infilismenti, un simana dipôs el móre.

É difísil di atxa palavra pa splika modi ki nu staba ta xinti. N tinha sô 13 anu. Nunka nu ka sta speraba ma nha pai ta moreba i nu xinti sima si nu ka ta sérba filís otu bês. Duránti algun ténpu, foi difísil pa nha mai seta ma se maridu móre. Má, nu da kónta ma vida tinha ki sigiba pa frenti. I ku ajuda di Jeová, nu konsigi aguenta kel ténpu difísil. Kantu N tinha 16 anu, N finda liseu na Karakas. N tinha txeu vontadi di djudaba sustenta nha família.

Na kel ténpu, nha irman Sana kaza ku Ruben Arauju, ki forma na Skóla di Jiliádi i dipôs el volta pa Venezuela. Es disidi muda pa Nova York. Nha família disidi ma N devia ba studaba na universidadi, la Nova York. Nton, N ba mora ku nha irman i ku nha kunhadu. Timenti N staba ta mora ku es, es djuda-m bira más amigu di Jeová. Tanbê tinha txeu irmon maduru na nos kongregason spanhol, na Brooklyn. N fika txeu kontenti di konxe dôs di kes irmon ki éra Milton Henschel i Frederick Franz. Es tudu dôs ta sirbiba na Betel di Brooklyn.

Kantu N staba kuazi ta tirmina nha primeru anu di universidadi na Nova York, N kumesa ta pensa na kuzê ki N staba ta faze ku nha vida. Dja N leba alguns artigu na Sentinéla ki ta papiaba sobri faze más pa Jeová. I N fika ta pensa txeu na kel-la. N ta odjaba ma kes pioneru i kes betelita di nha kongregason éra filís i N krê sérba sima es. Má, N ka éra batizadu. Nton, N da kónta ma N tinha ki daba nha vida pa Jeová. I é kel-li ki N faze. Na dia 30 di marsu di 1957, N batiza. Kel-li é un di kes disizon más inportanti ki N toma na nha vida.

Dipôs ki N batiza, N kumesa ta pensa na un otu disizon inportanti, ki éra ser pioneru. Má N sabia ma ka ta sérba fásil N faze kel-li. Modi ki N ta konsigiba ser pioneru i omésmu ténpu studa na universidadi? Mi ku nha família, nu ta skrebeba txeu karta pa kunpanheru sobri nha disizon di larga universidadi i volta pa Venezuela pa N ba sérba pioneru.

 N volta pa Karakas, na junhu di 1957. Má N odja ma situason di nha família ka staba dretu. Más algen di família tinha ki trabadjaba pa djuda. Modi ki N pode djudaba? N atxa trabadju na un banku, má N tinha gana di sérba pioneru. Na verdadi, éra pamodi kel-li ki N volta pa Venezuela. Nton, N disidi faze tudu dôs. Duránti txeu anu N trabadja na banku i N sirbi di pioneru. Foi un ténpu di nha vida ki N staba txeu okupadu, má tanbê txeu filís.

Otu kuza ki da-m más alegria inda, é kantu N konxe Silvia, un irman bunita di Alimanha ki ta amaba Jeová txeu. El muda pa Venezuela djuntu ku se pai ku se mai. Nu kaza i dipôs nu tevi dôs fidju. Un fidju matxu ki txoma Mike i un fidju-fémia ki txoma Samira. Tanbê N kumesa ta kuida di nha mai. Nton, el ba mora ku nos. Pamodi nhas responsabilidadi na família, N tevi ki para nha sirvisu di pioneru. Má, N kontinua ta prega ku zelu. Sénpri ki ta daba, mi ku Silvia nu ta sirbiba di pioneru ajudanti duránti nos féria.

Nhas fidju inda staba na skóla, kantu kontise kuzê ki N pâpia di el na komésu di es artigu. N pode fla ma N tinha un vida sábi. I kes algen ki ta trabadjaba djuntu ku mi na banku ta ruspetaba mi. Má simé, kuzê ki más N kreba éra pa pesoas odjaba mi sima un sérvu di Jeová. Kel pensamentu li ka sai di nha kabésa. Nton, mi ku nha mudjer nu xinta i nu pâpia sobri dinheru ki nu tinha. Si N largaba kel trabadju na banku, inda N ta resebeba txeu dinheru. I dja ki nu ka tinha ninhun dívida, nu pensa ma si nu sinplifikaba nos vida inda nu ta tinha dinheru ki ta da pa djudaba nos duránti un bon ténpu.

Ka foi fásil toma kel disizon li. Má nha mudjer ki N krê txeu i nha mai da-m tudu apoiu. Asi, N podia ser pioneru otu bês. Fórti sábi! N staba prontu pa N kumesa sirvisu di pioneru. Má dipôs, nu resebe un notísia ki nu ka staba ta spéra.

Un dia nos dotor fla ma Silvia staba grávida. Foi un surpréza sábi pa nos! Nu fika txeu kontenti. Má simé, N fika ta pensa na kel disizon ki N kaba di toma, ki éra ser pioneru otu bês. Ta daba pa N kontinua na  sirvisu di pioneru? Lógu nu seta ma nos situason dja mudaba. Nu tinha gana di resebeba kel novu ménbru di família. Má, i tudu kes planu ki dja N fazeba pa sirvisu di pioneru?

Dipôs di pâpia sobri nos obijetivu, nu disidi kontinua ku nos planu. Nos fidju Gabriel nase na abril di 1985. Nton, N larga nha trabadju na banku i más un bês N kumesa nha sirvisu di pioneru fíksu na junhu di 1985. Dipôs di algun ténpu, N resebe priviléjiu di ser ménbru di Kumison di Filial. Má, Betel ka ta fikaba na Karakas. Nton, N tinha ki viajaba uns 80 kilómetru, dôs ô três bês pa simana, pa N txigaba la.

Betel ta fikaba na sidadi di La Vitória. Nton, pa nu fikaba más pértu, nu disidi muda pa la. Kel-li foi un grandi mudansa pa nha família. N ta dimira nha família i N ten txeu gratidon pa es. Apoiu ki es da-m, djuda-m txeu. Nha irman Baha fika ta kuida di nos mai. Mike dja éra kazadu. Má Samira ku Gabriel inda ta moraba ku nos, kel-li krê fla ma kantu nu muda pa La Vitória es tevi ki dexa pa tras tudu ses amigu. Tanbê nha mudjer ki N krê txeu, ki dja staba kustumadu na mora na un sidadi ku txeu movimentu tevi ki kustuma ku un sidadi pikinoti. I nos tudu, nu tevi ki kustuma ku un kaza más pikinoti. Di sertéza muda di Karakas pa La Vitória foi más un grandi disizon ki nu toma.

Má, kuzas muda otu bês. Gabriel kaza i Samira ba mora el sô. Dipôs na 2007, mi ku Silvia nu konvidadu pa nu ben mora na Betel i ti inda nu sta li. Mike, ki é nos fidju más grandi é ansion i pioneru, djuntu ku se mudjer Mónika. Gabriel tanbê é ansion i el ta mora na Itália, djuntu ku se mudjer Anbra. Samira é pionera i el ta trabadja pa Betel la di se kaza.

Na nha vida N toma txeu disizon inportanti. Má N ka ta rapende di nada. Si ta daba N ta tomaba kes mésmu disizon otu bês. N ta agradese txeu pa tudu kes priviléjiu i diziginasons ki N tevi na sirvisu di Jeová. Sima anus ba ta pasa, N da kónta ma é inportanti ten un amizadi fórti ku Jeová. Ka ta nporta si kes disizon ki nu ta toma é grandi ô pikinoti, Jeová ta da-nu kel pas ‘ki ningen ka ta konsigi ntende’. (Fil. 4:6, 7) Mi ku Silvia nu gosta txeu di sirbi na Betel. I nu ten sertéza ma Jeová abênsua i el gia-nu na kada disizon ki nu toma.