LIZA a fla: “Bondadi ki irmons ku irmans mostra-m mexe txeu ku mi.” El staba ta pâpia di kuzê ki atrai-l pa verdadi na komésu. Kontise mésmu kuza ku Ana. El fla: “Na komésu kuzê ki más atrai-m pa verdadi foi bondadi ki Tistimunhas di Jeová mostra-m, envês di kuzê ki es inxina-m.” Gósi kes dôs irman li gosta di lé Bíblia i midita na el, má bondadi mexe ku es txeu.

Modi ki nu pode mostra bondadi ki ta toka korason di otus algen? Nu ben odja dôs manera: na kuzas ki nu ta fla i na kuzas ki nu ta faze. Dipôs nu ta ben odja pa kenha ki nu debe mostra bondadi.

Kel mudjer kapás ki Provérbios kapítlu 31 ta pâpia di el, tinha ‘lei di bondadi’ na se língua. (Pro. 31:26) El dexa kel ‘lei’ li afeta kuzê ki el ta flaba i modi ki el ta papiaba. Pai ku mai tanbê debe ten ‘lei di bondadi’ na ses língua. Kuazi tudu pai ku mai sabe ma si es pâpia di manera duru, kel-li pode prujudika ses fidjus i talvês ses fidjus pode ka obi ku es. Má óras ki pai ku mai ta pâpia ku bondadi é más fásil pa ses fidjus obi ku es.

Sikrê bu ka ten fidju, modi ki bu pode pâpia ku bondadi? Nu ta atxa respósta na primeru párti di Provérbios 31:26, ki ta fla: ‘El ta abri se bóka ku sabedoria’. Kel-li ta nvolve skodje kuzê ki nu ta fla i ton di vós ku sabedoria. Un kuza ki normalmenti ta djuda-nu é pensa na kel-li: ‘Kel kuza ki N sta pensa na fla ta poi kel algen ku raiba ô el ta traze pas?’ (Pro. 15:1) Nton, pensa antis di pâpia é sinal di sabedoria.

Un otu provérbiu ta fla: ‘Palavras ki ta fladu sen pensa é sima finka algen un spada’. (Pro. 12:18) Óras ki nu ta pensa na modi ki kuzê ki nu ta fla i nos ton di vós pode afeta otus, kel-li pode djuda-nu kontrola kuzê ki nu ta fla. Óras ki nu ta pâpia di akordu ku ‘lei di bondadi’, nu ka ta uza palavras ki ta mágua, nen nu ka ta pâpia di manera duru. (Efé. 4:31, 32) Envês di ideias i palavras negativu, nu ta pâpia ku bondadi, di manera puzitivu i ku amor. Jeová da un izénplu di kel-li kantu el pâpia ku se sérvu Elias, ki staba ku medu. Kel anju ki staba ta reprizenta Jeová pâpia ku el ku un ‘vós kalmu i baxu.’ (1 Reis 19:12) Má é ka sô na pâpia ki nu ta mostra bondadi. Tanbê nu debe mostra bondadi na kuzas ki nu ta faze. Di ki maneras?

Nu ta imita Jeová óras ki nu ta mostra bondadi na kuzê ki nu ta fla i ki nu ta faze. (Efé. 4:32; 5:1, 2) Liza, ki dja nu papiaba di el antis, pâpia di bondadi ki Tistimunhas di Jeová mostra-l. El fla: “Kantu nos família tevi ki muda dirapenti,  dôs kazal di kongregason tra ténpu di ses trabadju pa ben djuda-nu ruma nos kuzas. Na kel ténpu, nen N ka ta studaba Bíblia!” Kel bondadi ki irmons mostra poi Liza ta studa Bíblia.

Ana, ki dja nu papiaba di el antis, tanbê mostra gratidon pa bondadi ki Tistimunhas di Jeová mostra-l. El fla: “Pa manera ki pesoas na mundu ta trataba mi, pa mi éra difísil kunfia na otus algen. Kantu N konxe Tistimunhas di Jeová, N ka kunfia na es. N fika ta pergunta: ‘Pamodi ki es ta mostra interesi na mi?’ Má kel bondadi di korason ki kel irman ki faze-m studu mostra-m, pô-m ta kunfia na el.” Kal ki foi rezultadu? “Dipôs N kumesa ta konsentra na kuzê ki N staba ta prende.”

Repara ma bondadi ki irmons mostra na kuza ki es faze mexe txeu ku Liza i Ana i kel-li pô-s ku gana di studa Bíblia. Bondadi ki kongregason mostra-s djuda-s kumesa ta kunfia na Jeová i na se povu.

Alguns algen ta pâpia ku bondadi i es ta da un sorizu pamodi é asi ki es kriadu. É bunitu óras ki alguns algen é idukadu pamodi ses kultura ô ses manera di ser. Má si nu sta faze kel-li sô pamodi nos kultura ô nos manera di ser, nu pode ka sta ta imita bondadi di Deus. — Konpara ku Atos 28:2.

Bondadi di verdadi é un di kes kualidadi di frutu di spritu santu di Deus. (Gál. 5:22, 23) Nton kel-li krê fla ma nu meste spritu santu di Deus pa djuda-nu mostra bondadi di verdadi. Óras ki nu ta faze kel-li, nu ta imita Jeová i Jizus. I tanbê, sima Jizus, nu ta mostra interesi di korason pa otus algen. Nton é amor pa Jeová i amor pa otus algen ki ta motiva-nu. Si nu faze asi, nos bondadi ta bira un kualidadi ki ten puder, ki ta ben di korason i ki Deus ta aprova.

Pode ser más fásil nu mostra bondadi pa kes algen ki ta mostra-nu bondadi ô pa kes algen ki nu konxe. (2 Sam. 2:6) Un manera di faze kel-li é fla-s obrigadu. (Col. 3:15) Má i si nu atxa ma un algen ka merese pa nu mostra-l bondadi?

Pensa na kel-li: Jeová ta da kel midjór izénplu di mostra bondadi pa tudu algen, ka ta nporta si es merese ô nau. I se Palavra ta inxina-nu un lison inportanti sobri mostra kel kualidadi li. Skrituras Gregu ta pâpia txeu bês di kel tipu di bondadi li. Modi ki Deus ta mostra-nu bondadi?

Jeová mostra bondadi pa tudu algen ki dja vive na Téra, pamodi el da-s kel ki es meste pa es vive. (Mat. 5:45) Na verdadi, ti mésmu antis di nu konxe Jeová, el mostra-nu bondadi. (Efé. 2:4, 5, 8) Pur izénplu, el da-nu kel midjór ki el tinha, ki é se úniku Fidju. Apóstlu Polu fla ma Jeová da-nu resgati ‘di akordu ku rikézas di se bondadi ki ka meresedu.’ (Efé. 1:7) Alén di kel-li, nbóra nu ta peka i nu ta poi Jeová ta fika tristi ku nos, el ta kontinua ta orienta-nu i ta inxina-nu. Se orientasons i kuzas ki el ta fla é sima ‘txuba mansu’. (Deut. 32:2) Nu ka ta konsigi paga-l pa tudu bondadi ki dja el faze pa nos. I na verdadi, nos futuru ta dipende di bondadi di Jeová. — Konpara ku 1 Pedro 1:13.

Nu ka ten dúvida ma bondadi di Jeová ta atrai i ta motiva algen. Pur isu, envês di mostra bondadi sô pa alguns algen, nu debe sforsa pa imita Jeová i sénpri mostra bondadi na nos dia-dia. (1 Tes. 5:15) Óras ki nu ta mostra bondadi sénpri, nu ta bira sima un fogera na un dia friu. Nu ta konsola nos família, irmons, kolégas di trabadju, di skóla i vizinhus.

Pensa na kes algen na bu família ô na bu kongregason ki kuzas ki bu ta fla ô ki bu ta faze ku bondadi pode djuda-s. Pode ten algun algen na bu kongregason ki meste pa bu djuda-l faze algun kuza na kaza ô otu kuza ki el ta meste sénpri, sima faze kónpra. Tanbê óras ki bu ta atxa un algen na pregason ki meste ajuda, bu pode djuda-l di algun manera?

Nton, nu imita Jeová i nu dexa ‘lei di bondadi’ afeta kuzê ki nu ta fla i kuzê ki nu ta faze sénpri.