1-2. Sima Ló, ki prubléma nu ta pasa pa el oji?

 ÓRAS ki nu ta odja konportamentu mariadu di algen gósi, nu ta xinti sima Ló. El ‘xinti txeu frontadu pamodi konportamentu sen vergónha di pekadoris,’ dja ki el sabia ma nos Pai na séu ta ôdia konportamentu mariadu. (2 Ped. 2:7, 8) Kel grandi ruspetu i amor ki Ló tinha pa Deus djuda-l ôdia konportamentu mariadu di kes algen na se vólta. Nos tanbê, nu sta vive na meiu di pesoas ki ten poku ô ninhun ruspetu pa leis di Jeová sobri konportamentu. Má simé, nu pode konporta dretu si nu kontinua ku nos amor pa Deus i nu prende ten grandi ruspetu pa el. — Pro. 14:2.

² Kel inkorajamentu ki Jeová ta da-nu na livru di Provérbios ta djuda-nu faze kel-li. Kel konsedju ki ten sabedoria ki sta na Provérbios pode djuda tudu algen ki krê sirbi Deus, ka ta inporta si el é ómi ô mudjer, jóven ô algen grandi.

3. Sima sta na Provérbios 17:3, pamodi ki nu meste proteje nos korason? (Odja fotus.)

³ Un motivu inportanti pa nu proteje kel ki nos korason ta reprizenta é pamodi Jeová ta analiza nos korason. Kel-li krê fla ma el ta odja más di ki kel ki otus algen ta konsigi odja i el sabe ki tipu di algen anos é di pa déntu. (Lé Provérbios 17:3.) El ta kontinua ta ama-nu si nu kontinua ta pensa na se konsedju, ki pode djuda-nu vive pa tudu ténpu. (Juan 4:14) Asi konportamentu mariadu i mintiras di Satanás i kes algen mau na kel mundu li nunka ka ta prujudika-nu. (1 Juan 5:18, 19) Sima nos amizadi ku Jeová ta ba ta bira más fórti, amor i ruspetu ki nu ten pa el ta  bira más grandi. Dja ki nu ka krê mágua nos Pai, nu ta ôdia ti ideia di faze un pekadu. Óras ki nu xinti tentadu na faze un kuza mariadu, nu ta pergunta: ‘Modi ki N pode mágua di propózitu un Algen ki ta mostra-m txeu amor?’ — 1 Juan 4:9, 10.

4. Modi ki grandi ruspetu pa Jeová proteje un irman di kai na tentason?

⁴ Un irman na Kroásia, ki txoma Marta, xinti tentadu na faze konportamentu seksual mariadu. El fla: “Foi difísil pa mi pensa di un manera klaru i luta kóntra dizeju di faze un kuza mariadu. Má grandi ruspetu ki N ten pa Jeová proteje-m.” b Modi ki ten grandi ruspetu pa Deus djuda-l? Marta fla ma el pensa na rezultadus ki un disizon mariadu ta traze. Nu pode faze mésmu kuza. Kel piór kuza ki pode kontise é poi Jeová ta fika tristi i perde xansi di adora-l pa tudu ténpu. — Gén. 6:5, 6.

5. Kuzê ki bu pode prende ku spiriénsia di Leo?

⁵ Óras ki nu ten grandi ruspetu pa Jeová, nu ka ta ranja diskulpa pa konportamentu mariadu. Un irmon ki ta mora na Kongu, ki txoma Leo, prende kel lison li. Kuatu anu dipôs ki el batiza, el ranja maus koléga. El ta pensaba ma désdi ki el ka faze nada mariadu, el ka staba ta peka kóntra Jeová. Má lógu dipôs, se maus koléga pô-l ta bebe dimás i ta faze konportamentu seksual mariadu. Dipôs el kumesa ta pensa na kuzê ki se pai ku se mai, ki ta sirbi Jeová, inxinaba el i na modi ki el éra filís kantu el ta sirbiba Jeová. Kuzê ki kontise dipôs? El kumesa ta pensa dretu otu bês. Ku ajuda di ansions, el volta pa Jeová. Oji el é ansion i pioneru spesial.

6. Sobri ki dôs mudjer nu sta ben pâpia gósi?

 ⁶ Nu ben analiza Provérbios kapítlu 9, ki ta pâpia di dôs mudjer. Un ta reprizenta sabedoria i kel otu ta reprizenta tolisi. (Konpara ku Romanus 5:14; Gálatas 4:24.) Timenti nu ta faze kel-li, lenbra ma un di kes kuza ki mundu di Satanás más krê é séksu i pornografia. (Efé. 4:19) Pur isu, é inportanti nu kontinua ta dizenvolve grandi ruspetu pa Deus i fuji di kuzas mariadu. (Pro. 16:6) Asi, kel ki sta na Provérbios kapítlu 9 pode djuda nos tudu, ka ta inporta si nos é ómi ô mudjer. El ta fla ma kada un di kes dôs mudjer faze un konviti pa kes ki ka ten spiriénsia, ki é kes ki ‘ka ten juís’. É sima si kada un di kes mudjer staba ta fla: ‘Nhos ben nha kaza i nhos kume algun kuza!’ (Pro. 9:1, 5, 6, 13, 16, 17) Má kontise kuzas diferenti ku kes ki seta kada un di kes konviti.

7. Sima sta na Provérbios 9:13-18, kuzê ki ta kontise ku kes ki ta seta konviti di kel mudjer tola? (Odja dizenhu.)

⁷ Nu ben odja konviti di kel ‘mudjer tola’. (Lé Provérbios 9:13-18.) Sen vergónha, el ta konvida kes algen ki ka ten spiriénsia pa bai se kaza i pa kume ku el. Kuzê ki ta kontise dipôs? ‘Kes mortu i sen forsa sta la’. Talvês bu ta lenbra ma na kes kapítlu antis na Provérbios, nu ta atxa alguns konparason sima kel-li. Nu ta dadu avizu sobri ‘kel mudjer di má vida’ i ‘kel mudjer ki ta konporta mariadu’. Nu ta fladu: ‘Kaza di kel mudjer ki ta konporta mariadu ta leba algen pa mórti’. (Pro. 2:11-19) Provérbios 5:3-10 ten un avizu sobri un otu ‘mudjer di má vida’ ki ‘se pé ta dixi pa mórti.’

8. Ki disizon nu meste toma?

⁸ Kes ki ta obi ‘kel mudjer tola’ ten ki disidi si es ta seta se konviti ô nau. Talvês nos tanbê nu ten ki toma un disizon sima kel-li. Kuzê ki nu ta faze si nu tentadu pa faze konportamentu seksual mariadu ô si dirapenti parse imajen di pornografia na nos aparelhu iletróniku ô na internet?

9-10. Pamodi ki nu debe ivita konportamentu seksual mariadu?

⁹ Nu ten bons motivu pa nu ka faze konportamentu seksual mariadu. ‘Kel mudjer tola’ fla: ‘Agu furtadu é dósi’. Kuzê ki é ‘agu furtadu’? Bíblia ta konpara relason seksual ki maridu ku mudjer pode faze ku kunpanheru ku agu frésku. (Pro. 5:15-18) Dja ki es é kazadu, es  pode faze relason seksual ku kunpanheru. Má kel-li é diferenti di ‘agu furtadu’, ki pode krê fla faze konportamentu seksual mariadu. Kel-li txeu bês ta fazedu sukundidu, sima un ladron ki normalmenti ta furta sukundidu. ‘Agu furtadu’ pode parse dósi, prinsipalmenti si kes algen atxa ma ningen ka ta diskubri kuzê ki es faze. Fórti es sta inganadu! Jeová ta odja tudu kuza. Ka ten nada más kasábi di ki perde aprovason di Jeová. Nton, ka ten nada ‘dósi’ na faze kel-li. (1 Kor. 6:9, 10) Má é ka sô kel-li.

¹⁰ Konportamentu seksual mariadu pode poi algen ta xinti vergónha, sen valor, ta ten un fidju sen el krê i ta distrui família. Ta fika klaru ma ivita ‘kaza’ i kumida di kel mudjer tola é sinal di sabedoria. Alén di perde ses amizadi ku Jeová, txeu algen ki ta faze konportamentu seksual mariadu ta panha duénsas ki pode pô-s ta móre. (Pro. 7:23, 26) Kapítlu 9, versíklu 18 ta fla: ‘Se konvidadus sta na fundu di Sipultura.’ Si rezultadu é tristi si, nton pamodi ki txeu algen ta seta se konviti? — Pro. 9:13-18.

11. Pamodi ki odja pornografia ta prujudika algen?

¹¹ Un kuza ki ten txeu oji i ki nu debe ivita é pornografia. Alguns algen ta atxa ma odja pornografia ka ta prujudika-s. Má pornografia ta prujudika algen pamodi el ta pô-l ta perde ruspetu pa se kabésa i pa otus i é difísil para di odja-l. É difísil skese di kes imajen di pornografia. Tanbê, pornografia ka ta djuda algen kaba ku kes dizeju mariadu, má el ta poi kes dizeju ta bira más fórti. (Kol. 3:5; Tia. 1:14, 15) Txeu algen ki ta odja pornografia ta faze konportamentu seksual mariadu.

12. Modi ki nu pode mostra ma nu sta tenta ivita kes imajen ki ta pô-nu ta pensa na kuzas mariadu?

¹² Kuzê ki nu debe faze si dirapenti parse un imajen di pornografia na nos aparelhu iletróniku? Nu debe tra odju di el lógu. Un kuza ki pode djuda-nu faze kel-li é lenbra ma nos amizadi ku Jeová é kuza más inportanti ki nu ten. Sikrê alguns imajen pode ka ser di pornografia, es pode pô-nu ta pensa na kuzas mariadu. Pamodi ki nu debe ivita-s? Pamodi nu ka krê faze nada ki pode pô-nu ta faze adultériu na nos korason, sikrê é un kuza pikinoti. (Mat. 5:28, 29) Un ansion na Tailándia, ki txoma Davidi, fla: “N pergunta nha kabésa: ‘Sikrê un imajen pode ka ser di pornografia, Jeová ta fika kontenti si N kontinua ta odja-l?’ Pensa di kel manera li ta djuda-m toma bons disizon.”

13. Kuzê ki ta djuda-nu toma bons disizon?

¹³ Xinti medu di faze kalker kuza ki ta mágua Jeová ta djuda-nu toma bons disizon. ‘Ten grandi ruspetu pa Jeová é komésu di sabedoria’. (Pro. 9:10) Kel-li sta klaru na kes primeru versíklu di Provérbios kapítlu 9, ki ta konpara ‘sabedoria di verdadi’ ku un otu mudjer.

14. Ki konviti diferenti nu ta atxa na Provérbios 9:1-6?

¹⁴ Lé Provérbios 9:1-6. Li nu ta atxa un konviti di Jeová, ki é nos Kriador i Fonti di tudu sabedoria. (Pro. 2:6; Rom. 16:27) Kes versíklu li ta pâpia di un kaza grandi ki ten 7 pilar. Kel-li ta mostra ma Jeová gosta di da i ma el ta resebe dretu tudu kes ki krê ten sabedoria na ses vida.

15. Kuzê ki Deus ta konvida-nu pa nu faze?

¹⁵ Na Provérbios kapítlu 9 kel mudjer ki  ta reprizenta ‘sabedoria di verdadi’ ta inxina-nu ma Jeová gosta di da i ma el ta da-nu txeu kuza bon. Kes versíklu li ta fla ma kel mudjer faze kumida, mistura vinhu i el poi méza na se kaza. (Pro. 9:2, nóta di rodapé.) I versíklus 4 i 5 ta fla: ‘El [sabedoria di verdadi] ta fla kes ki ka ten juís: “Nhos ben, nhos kume nha pon.”’ Pamodi ki nu debe bai pa kaza di sabedoria di verdadi i kume se kumida? Jeová krê pa se fidjus ten sabedoria i pa es sta suguru. El ka krê pa nu prende kes lison di vida di manera difísil, ku kuzas kasábi ki nu ta pasa pa el i ki nu ta rapende. É pur isu ki ‘el ta guarda sabedoria pa kes algen justu’. (Pro. 2:7) Óras ki nu ten grandi ruspetu pa Jeová, nu ta krê dexa-l kontenti ku nos. Nu ta obi ku se konsedjus ki ten sabedoria i nu ta fika kontenti di sigi-s. — Tia. 1:25.

16. Modi ki ten grandi ruspetu pa Deus djuda Alan toma un bon disizon i kal ki foi rezultadu?

¹⁶ Odja modi ki ten grandi ruspetu pa Deus djuda Alan, ki é ansion i profesor, toma un bon disizon. El fla: “Txeu di nhas koléga ta atxaba ma filmis di pornografia éra un manera di es prendeba más sobri séksu.” Má Alan ka dexa kel-li ingana-l. El fla: “Pamodi N ta ama i N ta ruspeta Jeová, N nega odja kes filmi. Tanbê N splika nhas koléga pamodi ki N ka ta odja kes filmi la.” El sigi konsedju di ‘sabedoria di verdadi’ di ‘kontinua ta anda na kaminhu di intendimentu.’ (Pro. 9:6) Alguns profesor fika dimiradu ku disizon di Alan i gósi es sta ta studa Bíblia i ta sisti runion.

17-18. Kuzê ki kes algen ki ta seta konviti di ‘sabedoria di verdadi’ sta ta resebe gósi, i kuzê ki es pode spera pa futuru? (Odja dizenhu.)

¹⁷ Jeová ta uza izénplu di kes dôs mudjer li pa mostra-nu modi ki nu pode ten un futuru filís. Kes ki ta seta konviti di ‘kel mudjer tola’ ta atxa ma faze konportamentu seksual mariadu é sábi. Es krê sô pasa sábi sen pensa na futuru. Má kuzê ki es sta ta faze ta leba-s pa ‘fundu di Sipultura.’ — Pro. 9:13, 17, 18.

¹⁸ Kes ki ta seta konviti di kel mudjer ki ta reprizenta ‘sabedoria di verdadi’ ta ten un futuru diferenti! I es é filís pamodi es ten tudu kes kuza ki es meste pa es kontinua ku un amizadi fórti ku Jeová. (Isa. 65:13) Através di proféta Izaías Jeová fla: ‘Nhos obi-m ku atenson i nhos kume kuza dretu, i nhos ta ben xinti gostu di kes midjór kumida.’ (Isa. 55:1, 2) Nu sta ta prende ama kes kuza ki Jeová  ta ama i ôdia kes kuza ki el ta ôdia. (Sal. 97:10) I nu ta fika kontenti di konvida otus algen pa prende ku ‘sabedoria di verdadi’. É sima si nu ta ‘txoma na kes lugar altu di sidadi: “Tudu kes ki ka ten spiriénsia, pa ben pa li!”’ Ajuda ki sabedoria di verdadi ta da anos i kes ki seta se konviti ka ta sirbi sô pa gósi. El ta kontinua pamodi el ta djuda-nu ‘vive’ pa tudu ténpu timenti nu ta ‘anda na kaminhu di intendimentu.’ — Pro. 9:3, 4, 6.

19. Sima sta na Eclesiastes 12:13, 14, kuzê ki nu debe sta disididu na faze? (Odja kuadru “ Ten grandi ruspetu pa Deus ta djuda-nu”.)

¹⁹ Lé Eclesiastes 12:13, 14. Na es ténpu di fin difísil ki nu sta ta vive, ten grandi ruspetu pa Jeová ta proteje-nu i ta djuda-nu kontinua ku un bon konportamentu i ku un bon amizadi ku el. Nu ta kontinua ta konvida tudu algen ki nu ta konsigi pa djobe ‘sabedoria di verdadi’ i prende ku el. Nu ta faze kel-li pamodi nu ta ama i nu ta ruspeta Jeová di tudu nos korason.