1. Sima sta na 1 Pedru 5:2, ki priviléjiu ansions ten?

 JEOVÁ da ansions responsabilidadi di toma kónta di se ovelhas ki ten txeu valor. Kes ómi di fé li, ta da valor pa ses priviléjiu di sirbi ses irmons ku irmans i es ta sforsa txeu pa es ser ‘pastoris pa es ki ta pastora di verdadi.’ (Jer. 23:4; lé 1 Pedru 5:2.) Nu ta fika kontenti di ten ómis sima es na nos kongregasons!

2. Ki prublémas alguns ansion pode pasa pa el?

² Ansions ta pasa pa txeu prubléma óras ki es ta kuida di ses responsabilidadi. Es meste trabadja txeu pa toma kónta di kongregason. Un ansion na Mérka, ki txoma Toni, tevi ki prende rekonhese se limitasons óras ki el ta disidiba si el ta setaba más trabadju. El fla: “Kantu COVID-19 kumesa, N tenta faze más trabadju pa organiza runion i pregason. Má sikrê N faze txeu trabadju, sénpri tinha más kuza pa faze. N fika okupadu di tal manera ki N tinha poku ténpu pa N lé Bíblia, studa i faze orason.” Un ansion na Kozovu, ki txoma Ilir, pasa pa un prubléma diferenti. Kantu el staba na un zóna di géra, el ta atxaba difísil obi ku kes orientason di organizason. El fla: “Nha koraji podu na próva kantu skritóriu di filial da-m un diziginason di djuda irmons ku irmans na un zóna prigozu. N tinha medu i ta parseba mi ma kel orientason ka ta fazeba sentidu.” Un misionáriu na Ázia, ki txoma Tim, ta atxaba difísil kontinua ta faze kes kuza ki el tinha ki fazeba tudu dia. El fla: “Alvês N ta xintiba kansadu dimás pa N kuidaba di irmons ku irmans.” Kuzê ki pode djuda ansions ki sta ta pasa pa prublémas sima kes-li?

3. Modi ki izénplu di juís Jidion pode djuda nos tudu?

 ³ Ansions pode prende ku izénplu di juís Jidion. (Ebr. 6:12; 11:32) El ta protejeba i el ta giaba povu di Deus. (Juí. 2:16; 1 Cró. 17:6) Sima Jidion, ansions skodjedu pa toma kónta di povu di Deus na un ténpu difísil. (Atus 20:28; 2 Tim. 3:1) Jidion ta setaba se limitasons, el éra umildi i obidienti. Nu pode prende ku se izénplu. Se kapasidadi di aguenta firmi podu na próva timenti el ta kuidaba di se diziginason. Ka ta inporta si nos é ansion ô nau, nu pode prende mostra más gratidon pa nos ansions. Nu pode djuda kes ómi li ki ta trabadja txeu i ki ten bon amizadi ku Jeová. — Ebr. 13:17.

4. Modi ki Jidion mostra ma el éra umildadi i ma el ta setaba se limitason?

⁴ Jidion éra un ómi umildi i el ta setaba se limitason. b Kantu anju di Jeová fla Jidion ma el skodjedu pa salva Israel di kes midianita ki tinha txeu puder, kel ómi umildi li fla: ‘Nha família é kel ménus inportanti di Manasés, i ami é kel ménus inportanti na kaza di nha pai.’ (Juí. 6:15) El xinti ma el ka staba priparadu pa kel diziginason, má Jeová sabia ma el staba priparadu. Ku ajuda di Jeová, Jidion kunpri se diziginason i el tevi bons rezultadu.

5. Na ki situasons pode ser difísil pa un ansion mostra umildadi i seta se limitason?

⁵ Ansions ta faze ses midjór pa mostra umildadi i seta ses limitasons na tudu kuza. (Miq. 6:8; Atus 20:18, 19) Es ka ta ingaba di kuzê ki es pode faze ô di kuzê ki dja es faze, i es ka ta atxa ma es ka bale nada pamodi es fadja alguns bês. Má alvês, é difísil pa un ansion mostra umildadi i seta se limitason. Pur izénplu, el pode seta txeu diziginason i dipôs atxa difísil faze tudu es. Ô el pode kritikadu pa manera ki el kuida di un diziginason ô ilojiadu pa manera ki el kuida di un otu diziginason. Kuzê ki ansions pode prende ku Jidion ki ta djuda-s na kes situason li?

6. Kuzê ki ansions pode prende ku Jidion sobri seta ses limitasons? (Odja fotu.)

 ⁶ Pidi ajuda. Un algen ki ta seta se limitason sabe ma ten kuzas ki el ka ta pode faze. Jidion mostra ma el ta setaba se limitason pamodi el pidi ajuda di otus algen. (Juí. 6:27, 35; 7:24) Ansions ki ten sabedoria ta faze mésmu kuza. Toni, ki dja nu papiaba di el antis, fla: “Pamodi manera ki N trenadu kantu mi éra mininu, N seta más trabadju di ki kel ki N ta pode fazeba. Pur isu, N disidi pâpia na nos adorason na família sobri modi ki nu pode rekonhese nos limitason i N pergunta nha mudjer kuzê ki el ta atxaba. Tanbê N sisti otu bês kel vídiu na jw.org ku téma: Imite Jesus no Modo de Treinar, Confiar e Delegar.” Toni kumesa ta konvida otus algen pa djuda-l faze kes trabadju. Kal ki foi rezultadu? Toni fla: “Trabadju na kongregason sta ta fazedu i N ten más ténpu pa bira nha amizadi ku Jeová más fórti.”

7. Si ansions kritikadu, modi ki es pode imita Jidion? (Tiagu 3:13)

⁷ Ka bu fika ku raiba si algen kritika-u. Otu dizafiu ki ansions ta pasa pa el é si es kritikadu. Izénplu di Jidion pode djuda otu bês. El sabia ma el ka éra perfeitu, nton el kontinua kalmu kantu kes ómi di Efrain kritika-l. (Juí. 8:1-3) Jidion ka responde ku raiba. El mostra umildadi kantu el obi ses preokupason i ku jetu el kalma kel situason. Ansions ki ten sabedoria ta imita Jidion óras ki es ta obi ku atenson i es ta reaji ku kalma si algen kritika-s. (Lé Tiagu 3:13.) Di kel manera li, es ta mante pas na kongregason.

8. Modi ki ansions debe reaji si es resebe ilojiu? Da un izénplu.

⁸ Da tudu lovor pa Jeová. Kantu otus algen ilojia Jidion pamodi el salva povu di kes midianita, el da tudu glória pa Jeová. (Juí. 8:22, 23) Modi ki ansions pode imita Jidion? Es pode da tudu lovor pa Jeová pa kuzas ki es ta faze. (1 Kor. 4:6, 7) Pur izénplu, si un ansion ilojiadu pamodi el é bon na inxina, el pode fla ma kel instruson ben di Palavra di Deus ô ma nos tudu nu ta prende ku organizason di Jeová. Ansions alvês pode pensa si es sta ta txoma atenson ki es ka debe pa ses kabésa. Odja izénplu di un ansion ki txoma Timótiu. Kantu el bira ansion, Timótiu gostaba di faze diskursus pa públiku. El fla: “N ta fazeba intruduson i ilustrasons txeu kunpridu i konplikadu. Pamodi kel-li txeu algen ta ilojiaba mi. Infilismenti, N staba ta txoma atenson pa nha kabésa envês di txoma atenson pa Bíblia ô pa Jeová.” Ku ténpu, Timótiu odja ma el meste mudaba se manera di inxina pa ka txoma atenson dimás pa se kabésa. (Pro. 27:21) Kal ki foi rezultadu? El fla: “Gósi txeu irmon ku irmans ta fla ma nha diskursu djuda-s lida ku un prubléma, aguenta firmi na un provason ô bira más amigu di Jeová. N ta fika más kontenti ku kuzê ki es ta fla-m gósi di ki ku kes ilojiu ki N ta resebeba dja ten alguns anu.”

9. Modi ki obidiensa i koraji di Jidion podu na próva? (Odja dizenhu na kapa.)

⁹ Dipôs ki Jidion skodjedu pa ser juís, se obidiensa i koraji podu na próva. El resebe un diziginason difísil pa kaba ku altar di Baal ki éra di se pai. (Juí. 6:25, 26) Dipôs ki Jidion djunta un monti di trópa, Jeová fla-l dôs bês pa el fika  ku trópa más poku. (Juí. 7:2-7) Dipôs el fladu pa el ataka di noti, kes trópa ki éra ses inimigu. — Juí. 7:9-11.

10. Modi ki obidiensa di un ansion pode podu na próva?

¹⁰ Ansions debe ‘sta prontu pa obidese’. (Tia. 3:17) Un ansion ki é obidienti ta sta prontu pa faze kuzê ki Skrituras ta fla i pa sigi orientason di organizason di Deus. Asi, el ta da un bon izénplu pa otus algen. Má simé, se obidiensa pode podu na próva. Pur izénplu, el pode atxa ma é difísil sigi orientasons ki el ta resebe. Na alguns situason, el pode pergunta si un orientason ta sirbi ô si el é bon. Ô el pode dadu algun diziginason ki pode poi se liberdadi na prigu. Modi ki ansions pode imita obidiensa di Jidion na kes situason li?

11. Kuzê ki pode djuda ansions ser obidienti?

¹¹ Obi un orientason ku atenson i sigi-l. Deus fla Jidion modi ki el ta distruíba altar di se pai, na undi ki el ta fazeba un altar novu pa Jeová i ki animal ki el ta sakrifikaba. Jidion ka kritika kes orientason. El faze kel ki Jeová fla-l. Oji ansions ta resebe orientasons di organizason di Jeová através di kartas, avizus i otus instruson ki ta djuda-nu kontinua suguru i ku un amizadi fórti ku Jeová. Nu ta ama nos ansions pamodi es ta sigi orientasons di organizason di manera fiel. Kel-li ta djuda kongregason interu. — Sal. 119:112.

12. Si ten un mudansa na orientason di organizason, modi ki ansions pode sigi kuzê ki sta na Ebreus 13:17?

¹² Sta prontu pa muda. Lenbra ma Jeová fla Jidion pa manda kuazi tudu se trópas pa kaza. (Juí. 7:8) Talvês el pensa: ‘N meste faze kel mudansa li própi? El ta da rezultadu?’ Má simé, Jidion obi ku Jeová. Oji ansions ta imita Jidion óras ki es ta obi ku organizason i es ta faze kes mudansa ki meste. (Lé Ebreus 13:17.) Pur izénplu, na anu 2014, Grupu Enkaregadu di Óbra muda manera di paga prujétus di konstruson di Salons di Reinu i Salons di Asenbleia. (2 Kor. 8:12-14) Antis, éra kes kongregason ki ta pagaba pa kel salon ki es faze. Má dipôs, organizason fika ta uza kontribuisons di kongregasons na mundu interu pa faze salons na undi ki mestedu, sikrê kel kongregason ki sta ba uza kel Salon di Reinu ka ten txeu dinheru. Kantu Juzé fika ta sabe di kel mudansa li, el tevi dúvida si el ta daba bon rezultadu. El pensa: ‘Di es manera li ninhun Salon di Reinu ka ta fazedu. É ka si ki kuzas ta fazedu na kel párti di mundu li.’ Kuzê ki djuda Juzé apoia kel orientason? El fla: “Provérbios 3:5, 6 lenbra-m ma N debe kunfia na Jeová. I nu tevi bons rezultadu! Nu sta  ta faze más Salons di Reinu i tanbê nu prende faze kontribuisons di maneras diferenti, asi pa kuzas fika igual pa tudu algen.”

13. (a) Jidion tinha serteza di kuzê? (b) Modi ki ansions pode imita Jidion? (Odja fotu.)

¹³ Faze vontadi di Jeová ku koraji. Jidion obi ku Jeová sikrê el tinha medu i kel diziginason éra prigozu. (Juí. 9:17) Dipôs ki Jidion resebe garantia di Jeová, el fika ku serteza ma Jeová ta djudaba el proteje Se povu. Ansions ki ta mora na kes lugar undi nos trabadju sta proibidu ta imita Jidion. Ku koraji es ta da izénplu na runion i na pregason, sikrê ku amiasa di podu prézu, fazedu perguntas, perde trabadju ô sufri violénsia. c Na grandi tribulason, ansions meste ten koraji pa obi ku kes orientason ki es ta ben resebe, sikrê faze kel-li ta pô-s na prigu. Pur izénplu, nu pode ben resebe orientasons sobri modi ki nu ta ben prega un mensajen fórti di julgamentu i kuzê ki nu meste faze pa salva di ataki di Gogi di Magogi. — Eze. 38:18; Apo. 16:21.

14. Pamodi ki éra difísil pa Jidion aguenta firmi?

¹⁴ Jidion sforsa txeu kantu el éra juís. Kantu kes midianita fuji di noti duránti géra, Jidion ba ses tras désdi vali di Jizreel ti riu Jurdon, ki talvês tinha txeu arvi. (Juí. 7:22) Jidion para na Jurdon? Nau! Enbóra Jidion ku se 300 ómi staba kansadu, es pasa riu i es kontinua ta bai ses tras. Dipôs, es pega kes midianita i es ganha géra. — Juí. 8:4-12.

15. Pamodi ki alvês é difísil pa un ansion aguenta firmi?

¹⁵ Alvês kuida di kongregason i família pode dexa un ansion txeu kansadu. Na kes situason li, modi ki ansions pode imita Jidion?

16-17. Kuzê ki djuda Jidion aguenta firmi i ki serteza ansions pode ten? (Isaías 40:28-31) (Odja fotu.)

 ¹⁶ Kunfia ma Jeová ta da-u forsa. Jidion kunfia ma Jeová ta daba el forsa, i Jeová da-l. (Juí. 6:14, 34) Un bês, Jidion i se ómis staba ta kóre tras di dôs rei di Midian ki talvês staba montadu na kamelu. (Juí. 8:12, 21) Má Deus djuda kes israelita pega-s i ganha kel géra. Di mésmu manera, ansions pode kunfia na Jeová, ki é kel ki ‘ka ta kansa i nen el ka ta fika stafadu.’ El ta da-s forsa óras ki es meste. — Lé Isaías 40:28-31.

¹⁷ Odja spiriénsia di Mateus, ki ta faze párti di un Kumison di Ligason ku Ospital. Kuzê ki djuda-l aguenta firmi? Mateus fla: “N xinti kel forsa di Jeová ki Filipensis 4:13 ta pâpia di el. Txeu bês, óras ki N ta staba kansadu i stafadu, N ta fazeba orason ta pidi Deus pa da-m kel forsa ki N staba ta meste pa N djuda nhas irmon. Na kes óra la, N xinti ma spritu santu di Jeová da-m forsa i djuda-m aguenta firmi.” Sima Jidion, ansions pode pasa pa txeu difikuldadi óras ki es ta toma kónta di povu di Jeová. É klaru ki es debe ser umildi i rekonhese ma nen sénpri es ka ta pode faze tudu kuza ki es ta krê. Má es pode kunfia ma Jeová ta obi ses pididu di ajuda i el ta da-s forsa pa es aguenta firmi. — Sal. 116:1; Fil. 2:13.

18. Sima nu prende, modi ki ansions pode imita Jidion?

¹⁸ Ansions pode prende txeu kuza ku izénplu di Jidion. Ansions debe ser umildi i seta ses limitasons óras ki es ta disidi si es ta seta más trabadju ô nau i modi ki es ta reaji óras ki es kritikadu ô ilojiadu. Es debe ser obidienti i mostra koraji, prinsipalmenti sima nu ta txiga más pértu di fin. I ka ta inporta ki difikuldadi es pode pasa pa el, es meste kunfia ma Deus pode da-s forsa. Di serteza nu ta “kontinua ta da txeu valor” pa kes pastor li ki ta trabadja txeu. — Fil. 2:29.