1-2. Sima sta na Salmo 25:14, kuzê ki nu debe faze si nu krê ten un amizadi fórti ku Jeová?

 KI KUALIDADIS bu ta atxa ma é inportanti si bu krê kontinua ku un amizadi fórti ku un algen? Talvês bu pode fla ma bons amigu debe ama i djuda kunpanheru. Talvês bu ka ta atxa ma grandi ruspetu é un kualidadi inportanti pa ten un bon amizadi. Má sima testu ki tradu téma di kel studu li ta fla, kes algen ki krê ten un bon amizadi ku Jeová debe ten grandi ‘ruspetu pa el’. — Lé Salmo 25:14.

² Ka ta inporta kantu ténpu dja nu ten ta sirbi Jeová, nos tudu nu meste kontinua ta ten txeu ruspetu pa el. Má kuzê ki ten grandi ruspetu pa Deus krê fla? Modi ki nu pode prende ten grandi ruspetu pa Jeová? I kuzê ki nu pode prende sobri ten grandi ruspetu pa Deus ku izénplu di Obadias ki éra un enkaregadu, di Jioiada, ki éra saserdóti prinsipal i di rei Jioás?

3. Splika modi ki medu pode proteje-nu.

³ Ten grandi ruspetu pa Deus krê fla ma nu ta xinti medu di faze algun kuza ki el ka gosta. Enbóra pode parse ma medu é ka un kuza bon, el pode djuda-nu toma bons disizon. Pur izénplu, medu di kai ka ta dexa-nu anda na pónta di un rótxa altu. Medu di da un pankada  pode pô-nu ta fuji di un situason prigozu. Medu di straga amizadi ku un algen ki nu ta ama, ka ta dexa-nu fla ô faze algun kuza ki ta magua-l.

4. Kuzê ki Satanás krê pa nu xinti pa Jeová?

⁴ Satanás krê pa algen xinti medu di Jeová. Satanás krê pa nu kridita ma Jeová ta sta sénpri xatiadu, ma el krê kastiga-nu i ma nunka nu ka ta konsigi pô-l ta fika kontenti ku nos. É kel-li ki Elifás krê flaba kantu el pâpia ku Jó. (Jó 4:18, 19) Satanás krê pa nu xinti medu di Jeová di tal manera ki nu ta para di sirbi-l. Pa nu ka kai na kel armadilha li, nu debe prende ruspeta Jeová i xinti medu di magua-l.

5. Kuzê ki ten grandi ruspetu pa Deus krê fla?

⁵ Un algen ki ten grandi ruspetu pa Deus ta ama-l i el ka ta krê faze nada ki pode prujudika se amizadi ku El. É kel ‘grandi ruspetu’ pa Deus li ki Jizus tinha. (Ebr. 5:7) Jizus ka ta tremeba di medu di Jeová. (Isa. 11:2, 3) Envês di kel-li, el tinha txeu amor pa Jeová i el krê obiba ku el. (Juan 14:21, 31) Sima Jizus, nu ten grandi ruspetu i dimirason pa Jeová pamodi el ta mostra amor, sabedoria, justisa i el é poderozu. Tanbê, nu sabe ma Jeová ta ama-nu txeu i ma manera ki nu ta reaji óras ki el ta inxina-nu ta afeta-l. Nu pode poi Jeová ta xinti dór ô nu pode poi se korason ta fika kontenti. — Sal. 78:41; Pro. 27:11.

6. Kal ki é un manera di nu prende ten grandi ruspetu pa Deus? (Salmo 34:11)

⁶ Nu meste dizenvolve grandi ruspetu pa Jeová pamodi nu ka nase ku el. (Lé Salmo 34:11.) Un manera di faze kel-li é djobe pa kriason ku atenson. Óras ki nu da kónta di modi ki kes kuza ki kriadu ta mostra sabedoria, puder i grandi amor di Jeová pa nos, nu ta ten grandi ruspetu i amor pa el. (Rom. 1:20) Un irman ki txoma Adriene, fla: “Sabedoria di Jeová ki N ta odja na kriason, ta dexa-m dimiradu i ta djuda-m odja ma el sabe kuzê ki é midjór pa mi.” Pamodi el ta pensaba sénpri na kel-li, el fla: “N ka krê faze nada ki ta straga nha amizadi ku Jeová, kel ki da-m vida.” Pamodi ki bu ka ta tra algun ténpu kel simana li pa pensa na algun kuza ki Jeová kria? Faze kel-li ta poi bu ruspetu i amor pa Jeová ta bira más grandi. — Sal. 111:2, 3.

7. Modi ki orason pode djuda-nu dizenvolve grandi ruspetu pa Jeová?

⁷ Otu manera di dizenvolve grandi ruspetu pa Deus, é faze orason sénpri. Óras ki nu ta faze orason txeu, Jeová ta bira más rial pa nos. Kada bês ki nu ta pidi-l forsa pa nu aguenta un provason, nu ta lenbra di se grandi puder. Óras ki nu ta agradese-l pa se Fidju ki el da-nu, nu ta lenbra ma Jeová ta ama-nu. I óras ki nu ta pidi Jeová pa djuda-nu ku un prubléma, nu ta lenbra ma el ten txeu sabedoria. Kes tipu di orason li, ta bira nos ruspetu pa Jeová más grandi. I es ta djuda-nu sta más disididu na ivita faze kalker kuza ki pode straga nos amizadi ku el.

8. Kuzê ki nu pode faze pa nu kontinua ta ten grandi ruspetu pa Deus?

⁸ Studa Bíblia ku obijetivu di prende di kes bon i di kes mau izénplu ki sta na el, pode djuda-nu kontinua ta ten grandi ruspetu pa Deus. Nu ben pâpia di dôs sérvu fiel di Jeová, Obadias ki éra  enkaregadu di kaza di rei Akabi i Jioiada ki éra saserdóti prinsipal. Dipôs, nu ta ben odja kuzê ki nu pode prende ku Jioás ki éra rei di Judá, ki kumesa dretu má dipôs el bandona Jeová.

9. Modi ki ten grandi ruspetu pa Jeová djuda Obadias? (1 Reis 18:3, 12)

⁹ Primeru bês ki Bíblia ta pâpia di Obadias b, el ta fla: ‘Obadias tinha txeu ruspetu pa Jeová’. (Lé 1 Reis 18:3, 12.) Modi ki kel grandi ruspetu li djuda Obadias? El djuda-l bira onéstu i di kunfiansa. Pur isu, rei skodje-l pa el bira enkaregadu di se palásiu. (Konpara ku Neemias 7:2.) Kel grandi ruspetu ki Obadias tinha pa Deus, tanbê djuda-l ten un kualidadi ki el ta mesteba, ki éra koraji. El vive na ténpu di rei Akabi, ki éra mau i ki pa Jeová, ‘éra más piór di ki tudu kes ki reina antis di el.’ (1 Reis 16:30) Tanbê Jizabel, ki éra mudjer di Akabi i ki ta adoraba Baal, ta odiaba Jeová di tal manera ki el tenta kaba ku adorason verdaderu na reinu di nórti. Ti el mata txeu proféta di Deus. (1 Reis 18:4) Nu ka ten dúvida ma Obadias adora Jeová na un ténpu txeu difísil.

10. Modi ki Obadias mostra txeu koraji?

¹⁰ Modi ki Obadias mostra txeu koraji? Kantu Jizabel kumesa ta djobe kes proféta di Deus pa mata-s, Obadias panha 100 proféta i el sukundi-s ‘na grupus di 50 na kada kavérna, i el sustenta-s ku pon i ku agu.’ (1 Reis 18:13, 14) Si Jizabel diskubriba, di serteza el ta mataba Obadias ki éra korajozu. É klaru ki talvês Obadias tinha medu i el ka krê moreba. Má amor ki Obadias tinha pa Jeová i pa kes ki ta sirbiba El, éra más grandi di ki amor ki el tinha pa se vida.

11. Modi ki kes sérvu di Jeová di nos ténpu é sima Obadias? (Odja fotu.)

¹¹ Oji txeu sérvu di Jeová ta vive na kes país ki nos trabadju sta proibidu. Es ta mostra kes autoridadi di govérnu kel  ruspetu ki es merese. Má sima Obadias, kes irmon ku irmans li ki nu krê txeu, ta adora sô Jeová, ki é un kuza ki é sô el ki merese! (Mat. 22:21) Es ta mostra ma es ten grandi ruspetu pa Deus óras ki es ta obi ku el envês di obi ku ómis. (Atus 5:29) Es ta faze kel-li óras ki es ta kontinua ta prega i ta faze runion sukundidu. (Mat. 10:16, 28) Es ta faze ses midjór pa djuda ses irmons ku irmans ten kes kuza ki es meste pa es kontinua ku un amizadi fórti ku Jeová. Odja izénplu di Enri, ki ta mora na un país di Áfrika ki duránti un ténpu nos trabadju staba proibidu. Kantu nos trabadju staba proibidu, Enri oferese pa leba publikasons ku bazi na Bíblia pa se irmons na fé. El fla: “N ten txeu vergónha. Pur isu, N ten serteza ma é kel grandi ruspetu ki N ten pa Jeová ki da-m kel koraji ki N staba ta meste.” Bu ta atxa ma bu ta konsigi ser korajozu sima Enri? Bu ta konsigi, si bu dizenvolve un grandi ruspetu pa Deus.

12. Modi ki saserdóti prinsipal Jioiada i se mudjer mostra lialdadi di korason pa Jeová?

¹² Saserdóti prinsipal Jioiada tinha grandi ruspetu pa Jeová i kel-li pô-l ta ser lial i ta insentiva otus pa adora Jeová. Kel-li fika klaru kantu Atalia, ki éra fidju-fémia di Jizabel, kumesa ta governa na Judá sen ten direitu. Povu tinha bons motivu pa ten medu di Atalia. El éra runha i el krê sérba rainha di tal manera ki ti el tenta mata tudu se nétus pa el pode governaba! (2 Cró. 22:10, 11) Jioás, ki éra un di se nétus, skapa ku vida pamodi mudjer di Jioiada, ki éra Jiozeba, salva-l. El ku se maridu sukundi Jioás i es toma kónta di el. Di kel manera li, Jioiada i Jiozeba djuda pa kes rei ki ta binha di família di Davidi kontinuaba. Jioiada éra lial pa Jeová i el ka tinha medu di Atalia. — Pro. 29:25.

13. Kantu Jioás tinha 7 anu, modi ki Jioiada mostra lialdadi más un bês?

¹³ Kantu Jioás tinha 7 anu, más un bês Jioiada mostra se lialdadi pa Jeová. El faze un planu. Si kel planu daba sértu Jioás ta biraba rei, i el tinha direitu legal pamodi el binha di família di Davidi. Má, si kel planu ka daba sértu, talvês Jioiada ta moreba. Ku ajuda di Jeová, kel planu da sértu. Ku ajuda di kes xéfi di tribu i kes levita, Jioiada poi Jioás ta bira rei i el poi Atalia ta matadu. (2 Cró. 23:1-5, 11, 12, 15; 24:1) Dipôs, Jioiada ‘faze un kontratu entri Jeová, rei i povu, pa es kontinua ta ser povu di Jeová.’ (2 Reis 11:17) Jioiada ‘tanbê poi porteru na kes porton di kaza di Jeová, asi pa ningen ki staba inpuru pamodi algun kuza, ka entraba.’ — 2 Cró. 23:19.

14. Di ki maneras ki Jeová da ónra pa Jioiada?

¹⁴ Jeová dja flaba antis: ‘N ta onra kes ki onra-m’. Na verdadi, el rekonpensa Jioiada. (1 Sam. 2:30) Pur izénplu, el poi stória di Jioiada na Bíblia pa nu pode prende ku el. (Rom. 15:4) I kantu Jioiada móre, el da-l un ónra spesial di ser interadu ‘na Sidadi di Davidi djuntu ku kes otu rei, pamodi el faze kuzas dretu na Israel, kuzas sobri Deus verdaderu i Se kaza.’ — 2 Cró. 24:15, 16.

15. Kuzê ki nu pode prende ku stória di Jioiada? (Odja fotus.)

¹⁵ Stória sobri Jioiada pode djuda nos tudu dizenvolve grandi ruspetu pa  Deus. Ansions pode imita Jioiada óras ki sénpri es ta djobe maneras di proteje kongregason. (Atus 20:28) Kes algen ki dja sta grandi pode prende ku Jioiada ma óras ki es ten grandi ruspetu pa Jeová i es ta kontinua lial, Jeová pode uza-s pa faze se vontadi. El ka ta bandona-s. Jóvens pode prende modi ki Jeová trata Jioiada i imita-l óras ki es ta trata kes irmon ku irmans ki dja sta grandi ku ruspetu, prinsipalmenti kes ki dja ten txeu anu ta sirbi Jeová. (Pro. 16:31) I nos tudu nu pode prende un lison ku kes xéfi di tribu i kes levita ki djuda Jioiada. Ku lialdadi, nu ta djuda ‘kes ki ta toma kónta di nos’ óras ki nu ta obi ku es. — Ebr. 13:17.

16. Kuzê ki ta mostra ma rei Jioás ka tinha ruspetu pa Jeová?

¹⁶ Jioiada djuda rei Jioás bira un algen dretu. (2 Reis 12:2) Pur isu, kantu rei éra jóven, el krê dexaba Jeová kontenti. Má dipôs ki Jioiada móre, Jioás kumesa ta obi ku kes prínsipi ki ka ta obiba ku Jeová. Kal ki foi rezultadu? El ku se povu ‘kumesa ta sirbi kes pósti sagradu i kes imajen’. (2 Cró. 24:4, 17, 18) Enbóra Jeová fika txeu tristi ku kel-li, el ta ‘mandaba es kes proféta pa trazeba es pa El otu bês. Má es ka krê obiba.’ Nen es ka obi ku Zakarias, fidju di Jioiada, ki éra proféta i saserdóti di Jeová i ki tanbê éra primu di Jioás. Rei Jioás ti mata  Zakarias, enbóra família di Zakarias dja djudaba el. — 2 Cró. 22:11; 24:19-22.

17. Kuzê ki kontise ku Jioás?

¹⁷ Jioás ka tinha grandi ruspetu pa Jeová. Pur isu, txeu kuza mariadu kumesa ta kontise ku el. Jeová dja flaba: ‘Kes ki dispreza-m ta tratadu ku disprézu.’ (1 Sam. 2:30) Dipôs, kes trópa di Síria ki éra poku ganha kel ‘grupu di trópas uma grandi’ di Jioás i ‘es dexa-l ku pankada gravi’. Dipôs ki kes gentis di Síria bai ses kaminhu, kes sérvu di Jioás mata-l pamodi el mataba Zakarias. Povu ta atxaba ma kel rei li éra mau di tal manera ki el ka mereseba pa es intera-l na ‘kes sipultura di kes otu rei.’ — 2 Cró. 24:23-25.

18. Sima sta na Jeremias 17:7, 8, kuzê ki nu pode faze pa nu ka bira sima Jioás?

¹⁸ Kuzê ki nu pode prende ku izénplu di Jioás? El éra sima un arvi ki mesteba di ajuda di un staka pa el ka kai. Kantu Jioiada ki éra sima se staka móre, Jioás kumesa ta obi ku kes ki bira kóntra Jeová i el ka obi ku Jeová más. Kel izénplu li ta mostra ma nu ka debe obi ku Jeová sô pamodi nos família i otus algen na kongregason ta insentiva-nu pa nu faze kel-li. Pa nu kontinua ku un bon amizadi ku Jeová, sénpri nu debe studa, midita i faze orason, asi pa nos amor i ruspetu pa el bira más fórti. — Lé Jeremias 17:7, 8; Kol. 2:6, 7.

19. Kuzê ki Jeová ta iziji di nos?

¹⁹ Jeová ka ta iziji txeu di nos. Kuzê ki el ta iziji di nos sta na Eclesiastes 12:13, ki ta fla: ‘Ten grandi ruspetu pa Deus verdaderu i obi ku se mandamentus, pamodi é kel-li ki tudu ómi debe faze.’ Óras ki nu ten grandi ruspetu pa Deus, nu ta konsigi aguenta kes provason ki sta pa ben i kontinua firmi sima Obadias i Jioiada. Nada ka ta pode ben prujudika nos amizadi ku Jeová.