Bíblia ka ta fla. Má el ta fla alguns kuza interesanti ki talvês ta splika pamodi ki es toma kel disizon li.

Un anju fla Maria ma el ta fikaba grávida i ma el ta tinha un fidju. Na kel ténpu la, Maria ku Juzé ta moraba na Nazaré, ki éra kel sidadi na Galilea na undi ki Juzé nase. (Luk. 1:26-31; 2:4) Dipôs kantu ki es volta di Ijitu, es bai otu bês pa Nazaré. Jizus kria la i el bira un Nazarenu. (Mat. 2:19-23) É pur isu ki óras ki nu ta lenbra di Nazaré nu ta pensa na Jizus, Juzé i Maria.

Maria tinha un família ki txomaba Elizabeti ki ta moraba na Judá. Elizabeti éra mudjer di saserdóti Zakarias i el bira mai di Juan Batista. (Luk. 1:5, 9, 13, 36) Maria bai vizita Elizabeti i el fika três mês ku el na Judá. Dipôs Maria volta pa Nazaré. (Luk. 1:39, 40, 56) É pur isu ki Maria konxeba tiritóriu di Judá.

Ku ténpu, Juzé sai di Nazaré i el bai Belen pamodi kes romanu da órdi pa tudu algen “rejista” na sidadi undi ki es nase. Tanbê, sima profesia dja flaba, éra na Belen ki Misías ta naseba. (Luk. 2:3, 4; 1 Sam. 17:15; 20:6; Miq. 5:2) Dipôs ki Jizus nase la, Juzé ka kreba pa Maria fazeba un viajen kunpridu pa volta pa Nazaré ku un bebé. Es fika na Belen, ki éra uns 9 kilómetru di Jiruzalen. Kel-li éra midjór pa es pamodi es tinha ki fazeba kel sakrifisiu ki lei ta izijiba na ténplu. — Lev. 12:2, 6-8; Luk. 2:22-24.

Anju di Deus dja flaba Maria ma se fidju ta ben resebeba “tronu di Davidi” i ma el ta ben sérba “Rei”. Talvês Juzé ku Maria ta atxaba ma éra inportanti pa Jizus naseba na sidadi di Davidi. (Luk. 1:32, 33; 2:11, 17) Talvês es atxa ma éra midjór fika la i spera ti ki Deus da-s algun orientason.

Nu ka sabe kantu ténpu ki dja es tinha na Belen kantu alguns astrólugu txiga la. Má na kel ténpu dja es staba moradu na un kaza i ses fidju dja éra un “mininu”, envês di un bebé. (Mat. 2:11) Ta parse ma envês di es volta pa Nazaré, es fika na Belen pa un ténpu i es fika ta mora la.

Eródis “manda mata tudu mininu ki tinha dôs anu pa baxu, na Belen”. (Mat. 2:16) Un anju aviza Juzé sobri kel-li. El ku Maria i Jizus fuji pa Ijitu i es fika la ti ki Eródis móre. Dipôs, Juzé volta pa Nazaré ku se família. Pamodi ki es ka volta pa Belen? Pamodi na kel ténpu, Arkilau, ki éra fidju di Eródis, staba ta governa na Judea, i el éra un ómi mau. Un anju aviza Juzé sobri kel prigu li. Na Nazaré Juzé pode kriaba Jizus ku suguransa i inxinaba el adora Deus. — Mat. 2:19-22; 13:55; Luk. 2:39, 52.

Ta parse ma Juzé móre antis di Jizus abri kaminhu pa vida na séu. Pur isu, Juzé ta ben resusitadu pa vive li na téra. Txeu algen ta ben konxe-l i ta ben prende más sobri pamodi ki el ku Maria kontinua na Belen dipôs ki Jizus nase.