1. Kuzê ki nu debe faze pa nu salva na dia di Jeová?

 ÓRAS ki Bíblia ta pâpia di “dia di Jeová”, el sta krê fla kel ténpu ki Jeová ta ben distrui se inimigus i salva se povu. Na pasadu, Jeová kastiga alguns nason. (Isa. 13:1, 6; Eze. 13:5; Sof. 1:8) Na nos ténpu, “dia di Jeová” ta kumesa óras ki Babilónia Grandi distruídu i ta tirmina na géra di Armajedon. Pa nu salva na kel “dia”, nu meste pripara gósi. Jizus inxina ma nu debe pripara pa “grandi tribulason” i tanbê sta “sénpri prontu” pa el. — Mat. 24:21; Luk. 12:40.

2. Modi ki 1 Tesalonisensis pode djuda-nu?

² Na kel primeru karta ki apóstlu Paulu skrebe pa irmons na Tesalónika, ku ajuda di spritu santu, el faze alguns konparason pa djudaba es sta prontu pa kel grandi dia di julgamentu di Jeová. Paulu sabia ma dia di Jeová ka ta binha na kel ténpu. (2 Tes. 2:1-3) Má simé, el insentiva se irmons pa pripara pa kel dia, sima si el staba ta ben na kel otu dia. I nos tanbê nu pode sigi se konsedju. Nu ben analiza splikason ki el da sobri: (1) modi ki dia di Jeová ta ben, (2) kenha ki ka ta ben salva na kel dia i (3) modi ki nu pode pripara pa salva.

3. Modi ki dia di Jeová ta ben sima un ladron di noti? (Odja dizenhus.)

³ “Sima un ladron di noti.” (1 Tes. 5:2) Kel-li é primeru di kes três konparason ki Paulu uza pa mostra modi ki dia di  Jeová ta ben. Ladrons ta kustuma aji faxi pa furta di noti óras ki algen ka sta ta spera. Dia di Jeová tanbê ta ben dirapenti i el ta panha kuazi tudu algen di surpréza. Kes kuza ki ta ben kontise faxi pode dexa ti kes algen ki ta sirbi Jeová dimiradu. Má es ka ta ser distruídu sima kes algen mau.

4. Di ki manera ki dia di Jeová é sima dór di ten fidju?

⁴ “Sima óras ki mudjer grávida ta xinti dór di ten fidju”. (1 Tes. 5:3) Un mudjer grávida ka ta konsigi sabe kel óra sértu ki el ta ten fidju. Má el ka ten dúvida ma el ta ten fidju. Óras ki kel-li kontise talvês ta ser dirapenti, ku txeu dór i ka ta da pa para. Di mésmu manera, nu ka sabe kel dia i kel óra ki dia di Jeová ta kumesa. Má, nu ten serteza ma el sta ben i ma julgamentu di Deus kóntra kes algen mau ta ben dirapenti i es ka ta pode skapa di el.

5. Di ki manera ki grandi tribulason é sima lus di dia?

⁵ “Sima lus di dia”. Kel tirseru konparason ki Paulu faze ta pâpia otu bês sobri ladrons ta furta di noti. Má di es bês, Paulu konpara dia di Jeová ku lus di dia. (1 Tes. 5:4) Kes ladron ki ta bai furta di noti, talvês pode fika txeu preokupadu ki nen es ka ta da kónta ma ténpu sta ta pasa. Lus di dia pode panha-s di surpréza. Grandi tribulason tanbê ta panha di surpréza kes ki, sima un ladron, ta kontinua na sukuru, ta faze kes kuza ki ka ta agrada Deus. Diferenti di es, nu pode sta priparadu óras ki nu ka ta faze konportamentu mariadu ki ta dexa Jeová tristi i nu ta inpenha na “ser bon na tudu tipu di kuza, ser justu i anda di akordu ku verdadi.” (Efé. 5:8-12) Dipôs Paulu uza dôs konparason pa pâpia sobri kes ki ka ta ben salva.

6. Di ki manera ki txeu algen oji sta ta durmi? (1 Tesalonisensis 5:6, 7)

⁶ “Kes ki ta durmi”. (Lé 1 Tesalonisensis 5:6, 7.) Paulu konpara kes ki ka ta ben salva na dia di Jeová ku kes algen ki sta ta durmi. Es ka ta da kónta di ténpu ta pasa i nen di kuzê ki sta kontise na ses vólta. Pur isu, es ka ta konsigi intende pamodi ki alguns kuza inportanti sta ta kontise na mundu i es ta kontinua sen faze nada. Oji, maioria di algen sta ta durmi na sentidu spritual. (Rom. 11:8) Es ka ta kridita ma nu sta ta vive na “ténpu di fin” i ma ka ta dura grandi tribulason ta kumesa. Óras ki ta kontise mudansas grandi na mundu, alguns algen ta mostra interesi na mensajen di Reinu. Má txeu di es ta durmi otu bês envês di fika kordadu. Ti kes algen ki ta kridita na dia di Jeová ta atxa ma inda el ta dura ki ben. (2 Ped. 3:3, 4) Má kada dia ki ta pasa é más inportanti inda nu sta kordadu.

7. Di ki manera ki kes ki ka ta salva na dia di Jeová é sima kes ki ta fika moku?

⁷ “Kes ki ta fika moku”. Apóstlu Paulu konpara kes algen ki Deus ta ben distrui ku kes ki ta sta moku. Un algen ki ta sta moku, ta dura ki da kónta di kuzê ki sta ta kontise na se vólta i faze algun kuza. I tanbê el ta toma disizons mariadu. Di mésmu manera, kes algen mau ka ta obi ku kes avizu ki Deus ta da. Es ta skodje un manera di vive ki ta leba-s pa distruison. Má kes ki ta sirbi Deus, ta inxinadu mante sienti i pensa di un manera klaru. (1 Tes. 5:6) Un studiozu di Bíblia fla ma un algen ki ta mante sienti ta kontinua “kalmu, i el ka ta fika dizusperadu. El ta konsigi pensa di un manera klaru i toma bons disizon.” Má pamodi ki nu debe mante kalmu i firmi? Pa nu ka mete na asuntus di es mundu ki ten aver ku pulítika ô prublémas na sosiadadi. Sima dia di Jeová sta ta fika kada bês más pértu, preson pa mete na kes asuntu li ta fika más txeu. Má nu ka meste fika preokupadu dimás na modi ki nu ta ben reaji. Spritu santu di Deus pode djuda-nu mante kalmu i firmi i toma disizons ku sabedoria. — Luk. 12:11, 12.

8. Sima sta na 1 Tesalonisensis 5:8, ki kualidadis ta djuda-nu mante priparadu pa dia di Jeová? (Odja dizenhu.)

⁸ “Nu poi koleti i kapaseti”. Paulu konpara-nu ku trópas ki sta sienti i priparadu pa géra. (Lé 1 Tesalonisensis 5:8.) Na ténpu di géra, un trópa debe sta prontu pa géra kalker óra. Mésmu kuza ta kontise ku nos. Nu ta sta priparadu pa dia di Jeová óras ki nu ta poi nos koleti di fé i di amor i nos kapaseti di speransa. Kes kualidadi li pode djuda-nu txeu.

9. Modi ki nos fé ta proteje-nu?

⁹ Un koleti ta proteje korason di un trópa. Di mésmu manera, fé i amor ta proteje kel ki nos korason ta reprizenta. Kes kualidadi li ta djuda-nu kontinua ta sirbi Jeová i ta sigi Jizus. Fé ta djuda-nu ten serteza ma Jeová ta rekonpensa-nu si nu sirbi-l di tudu nos korason. (Ebr. 11:6) Tanbê el ta motiva-nu pa nu kontinua lial pa nos líder, Jizus, mésmu óras ki nu sta pasa pa prublémas. Pa nu bira nos fé i kapasidadi di aguenta firmi más fórti, nu pode prende ku izénplu di irmons di nos ténpu ki kontinua lial sikrê ku pirsigison ô falta di dinheru. I nu pode ivita prigu  di ama dinheru i kuzas material, si nu imita kes ki bira ses vida más sinplis i poi Reinu na primeru lugar. b

10. Modi ki amor pa Deus i pa otus algen ta djuda-nu aguenta firmi?

¹⁰ Amor tanbê é txeu inportanti pa nu kontinua kordadu i mante sienti. (Mat. 22:37-39) I amor pa Deus ta djuda-nu kontinua ta prega, sikrê kel-li pode pô-nu na algun prubléma. (2 Tim. 1:7, 8) Dja ki nu ta mostra amor tanbê pa kes ki ka ta sirbi Jeová, nu ta kontinua ta prega na nos tiritóriu i ti mésmu nu ta da tistimunhu pa tilifóni i pa karta. Nu ka ta perde speransa ma un dia kes algen li ta muda i es ta kumesa ta faze kel ki é dretu. — Eze. 18:27, 28.

11. Modi ki amor pa nos irmons ta djuda-nu? (1 Tesalonisensis 5:11)

¹¹ Tanbê nu ta ama nos irmons i irmans. Nu ta mostra kel amor li óras ki nu “ta inkoraja i djuda kunpanheru”. (Lé 1 Tesalonisensis 5:11.) Sima trópas ta fika ladu-ladu na un géra, nu ta inkoraja kunpanheru. É klaru ki un trópa pode da se kunpanheru pankada duránti un géra. Má el ka ta faze-l di abuzu. Di mésmu manera, nunka nu ka ta mágua nos irmons i irmans di abuzu ô paga mal ku mal. (1 Tes. 5:13, 15) Tanbê, nu ta mostra nos amor óras ki nu ta ruspeta kes irmon ki ta toma kónta di kongregason. (1 Tes. 5:12) Kantu Paulu skrebe pa kes irmon na Tesalónika, ses kongregason ka tinha un anu inda ki formadu. Talvês kes ómi ki ta tomaba kónta di kongregason ka tinha txeu spiriénsia i es fadja txeu bês. Má simé, es ta mereseba ruspetu. Sima grandi tribulason ta fika más pértu, nu pode meste dipende di orientasons di ansions di nos kongregason más ki gósi. Nu pode ka konsigi ten orientasons di irmons di sédi mundial i di filial. Pur isu, désdi gósi é inportanti nu prende ama i ruspeta ansions di nos kongregason. Ka ta inporta kuzê ki kontise, nu ta  mante sienti i nu ka ta konsentra na ses inperfeison. Envês di kel-li, nu debe konsentra na manera ki Jeová através di Jizus sta ta orienta kes ómi fiel li.

12. Modi ki nos speransa ta proteje nos manera di pensa?

¹² Sima un kapaseti ta proteje kabésa di un trópa, nos speransa di salvason ta proteje nos manera di pensa. Ten un speransa fórti ta djuda-nu rekonhese ma kes kuza ki es mundu li ta oferese-nu ka ten valor. (Fil. 3:8) Nos speransa ta djuda-nu kontinua kalmu i firmi. É kel-li ki kontise ku Wallace i Laurinda, ki ta sirbi na Áfrika. Sô na três simana, pai di Wallace i mai di Laurinda móre. I pamodi duénsa di COVID-19 es ka konsigi volta pa kaza pa sta djuntu ku ses família. Wallace fla: “Speransa di resureison ta djuda-m pensa na es. N ka ta pensa na modi ki es staba antis di es móre, má na modi ki es ta ben fika óras ki es resusita na mundu novu. Kel speransa li ta pô-m ta fika kalmu óras ki N sta txeu tristi ta pensa na tudu kuza ki kontise.”

13. Kuzê ki nu pode faze pa nu resebe spritu santu di Deus?

¹³ “Ka nhos paga lumi di spritu.” (1 Tes. 5:19) Paulu konpara spritu santu ku lumi déntu di nos. Óras ki nu ten spritu santu di Deus nu ta fika ku txeu zelu, ku gana di faze kel ki é dretu i ku forsa pa trabadja pa Jeová. (Rom. 12:11) Má kuzê ki nu pode faze pa nu resebe spritu santu? Nu pode faze orason ta pidi spritu santu, studa Palavra di Deus i faze párti di se organizason ki spritu santu ta orienta. Kel-li ta djuda-nu dizenvolve ‘frutu di spritu’. — Gál. 5:22, 23.

14. Kuzê ki nu meste ivita pa nu kontinua ta resebe spritu santu di Deus? (Odja fotus.)

¹⁴ Dipôs ki Jeová da-nu se spritu santu, nu debe ten txeu kuidadu pa nu “ka paga lumi di spritu.” Deus ta da se spritu santu sô pa kes ki ta sforsa pa kontinua ta pensa i ta faze kuzas dretu. El ka ta kontinua  ta da-nu se spritu santu si nu fika ta pensa ô ta faze kuzas ki el ka gosta. (1 Tes. 4:7, 8) Pa nu kontinua ta resebe spritu santu, tanbê nu meste ka “dispreza kes profesia.” (1 Tes. 5:20) “Kes profesia” li krê fla kes mensajen na Bíblia ki Deus da-nu através di se spritu santu. I kel-li ta inklui kes mensajen sobri dia di Jeová i sobri ténpu di fin. Ka nu pensa ma dia di Jeová ô Armajedon ka ta ben timenti nu sta bibu. Envês di kel-li, nu mostra ma nu sta spera ma ka ta dura el ta ben. Nu ta faze kel-li óras ki tudu dia nu ta mante okupadu ta ‘faze kuzas ki ta mostra ma nu ta adora Deus’. — 2 Ped. 3:11, 12.

15. Modi ki nu pode ivita pa informasons falsu ki ta ben di dimónis ka ingana-nu? (1 Tesalonisensis 5:21)

¹⁵ Ka ta dura, di algun manera, kes inimigu di Deus ta ben fla: “Pas i suguransa!” (1 Tes. 5:3) Kes informason falsu ki ta ben di dimónis, ta ben intxi téra i ta ben ingana kuazi tudu algen. (Apo. 16:13, 14) Má i nos? Nu ka ta ser inganadu si nu “djobe dretu [ô prova] tudu kuza”. (Lé 1 Tesalonisensis 5:21.) Kel palavra na gregu ki traduzidu pa “djobe dretu” ta uzadu pa pâpia di manera ki algen ta provaba si metal sima prata i oru, éra verdaderu. Pur isu, nu meste prova si kel ki nu ta obi ô ki nu ta lé é verdaderu. Kel-li éra inportanti pa kes irmon na Tesalónika i é más inportanti inda pa nos sima grandi tribulason sta kuazi ta txiga. Envês di nu kridita na tudu kuza ki otus algen ta fla, nu uza nos kapasidadi di pensa pa nu konpara kuzê ki nu ta lé ô ki nu ta obi, ku kuzê ki Bíblia i organizason di Jeová ta fla. Si nu faze kel-li, ninhun informason falsu ki ta ben di dimónis ka ta ingana-nu. — Pro. 14:15; 1 Tim. 4:1.

16. Ki speransa sértu nu ten pa futuru i kuzê ki nu debe sta disididu na faze?

¹⁶ Nu sabe ma povu di Jeová ta ben salva na grandi tribulason. Má nu ka sabe kuzê ki ta ben kontise ku kada un di nos manhan. (Tia. 4:14) Sikrê nu salva na grandi tribulason ô nu móre antis, nu ta ser rekonpensadu ku vida pa tudu ténpu si nu kontinua fiel. Kes skodjedu ku spritu santu ta ba sta ku Jizus na séu. Kes otu ovelha ta ben sta na paraízu li na téra. Nton, nos tudu nu meste konsentra na nos speransa sábi i sta sénpri prontu pa dia di Jeová!