N nase na dia 22 di dizenbru di 1929, na Noville, ki é un vila pikinoti pértu di Bastogne, na Ardenas Belgas. La tinha 9 lugar ki ta fazedu plantason i ta kriadu animal. N ten bons lenbransa di kantu mi éra mininu na kanpu djuntu ku nha pai i ku nha mai. Mi ku nha irmon más novu ki txoma Raymond, nu ta traba leti di vaka ku nos mô tudu dia i nu ta djudaba na faze kodjéta. Na nos vila pikinoti tudu algen ta trabadjaba djuntu pa djuda kunpanheru.

Nha pai, Emile i nha mai Alice, éra katóliku ferénha. Es ta baba misa tudu dumingu. Má na anu 1939, pionerus di Inglatéra ben pa nos vila i es fla nha pai si el ta setaba fika ta resebe revista Consolação (ki gósi ta txomadu Nhos korda!). Nha pai lógu da kónta má kes kuza ki el staba ta lé na kes revista éra verdadi i pamodi kel-li el kumesa ta lé Bíblia. Kantu el para di bai misa, nos vizinhus ki antis ta trataba el dretu, kumesa ta faze-l txeu opozison. Es ta diskutiba ku nha pai i es ta fazeba di tudu, pa el kontinuaba ta ser katóliku.

N fika txeu tristi kantu N odja nha pai ta tratadu di kel manera li i é pamodi kel-li, ki N faze kel orason ki sta na kumesu di kel artigu li, ta pidi Deus pa djuda nha pai. N fika txeu kontenti kantu ki poku-poku nhos vizinhus para di faze nha pai opozison. Kel-li da-m serteza ma Jeová é ‘Kel ki ta obi orason’.

Alimanha Nazista invadi Béljika, na dia 10 di maiu di 1940. Pamodi kel-li txeu algen fuji di país. Nos família fuji pa sul di Fransa. Na kaminhu, nu pasa na alguns lugar undi ki  trópas di Alimanha ku Fransa staba ta briga ku kunpanheru.

Kantu nu volta pa kaza, nu diskubri ma furtadu maioria di nos kuzas. É sô nos katxor, ki txomaba Bobbie, ki staba la pa resebeba nos. Kes kuza ki N pasa pa el pô-m ta pensa: ‘Pamodi ki ten géra ku sufrimentu?’

Duránti kel ténpu, nu xinti txeu inkorajadu ku vizita di irmon Emile Schrantz, a un ansion fiel ki éra pioneru. El uza Bíblia pa splika-m di manera klaru pamodi ki ten sufrimentu i pa responde otus pergunta ki N tinha sobri vida. N dizenvolve un amizadi fórti ku Jeová i N pasa ta ten serteza ma el é un Deus di amor.

Sikrê duránti géra, nos família konsigi sta djuntu ku irmons más txeu di ki antis. Na agostu di anu 1943, irmon José-Nicolas Minet vizita kel lugar undi ki nu ta moraba pa faze un diskursu. El pergunta: “Kenha ki krê batiza?” Nha pai ku nha tiu labanta mô, i mi tanbê. Nos tudu três nu batizadu na un riu ki ta fikaba pértu di la.

Na dizenbru di anu 1944, trópas di Alimanha kumesa ta ataka ses inimigu na oésti di Europa. Kel ataki li foi kel últimu di kel más grandi di Sugundu Géra Mundial. El fika ta konxedu pa Batalha das Artenas. Nu ta moraba pértu di undi ki kontise kel ataki li, pur isu nu fika kuazi un mês sukundidu na kávi di nos kaza. Un dia kantu N sai pa da animal kumida, un bonba kai riba di armazén i el straga tedja. Un trópa di Mérka ki staba na un kural pértu di mi grita: “Deta na txon!” N kóre i N deta na txon pértu di el, i el poi se kapaseti na nha kabésa pa proteje-m.

Dipôs di géra, nu ranja manera pa pâpia sénpri ku irmons di kongregason na Liège, ki ta fikaba uns 90 kilómetru (56 milha) pa nórti di undi ki nu ta moraba. Ku ténpu, nu konsigi kria un grupu di studu na Bastogne. N kumesa ta trabadja na un nogósiu i N tevi oportunidadi di studa direitu. Dipôs,  N trabadja na un skritóriu di govérnu. Na anu 1951 nu organiza un asenbleia pikinoti ku enkaregadu di grupu di kongregason na Bastogne. Tinha uns 100 algen ta sisti, tanbê tinha un irman pionera zeloza, ki txomaba Elly Reuter. El viaja 50 kilómetru (31 milha) di bisikléta pa pode sistiba kel asenbleia. Lógu, nu kumesa ta gosta di kunpanheru i nu fika noivu. Dja tinha poku ténpu ki Elly resebeba un konviti pa bai Skóla di Jiliádi na Mérka. El skrebe pa Sédi Mundial ta splika-s pamodi ki el ka ta setaba kel konviti. Irmon Nathan Knorr, ki staba ta toma kónta di povu di Jeová na kel ténpu, responde ku amor ma talvês un dia el pode baba pa Skóla di Jiliádi djuntu ku se maridu. Nu kaza na febreru di anu 1953.

Na kel mésmu anu, mi ku Elly nu bai pa Asenbleia da Sociedade do Novo Mundo, ki fazedu na stadu di Yankee, na Nova York. Kantu nu staba la, N konxe un irmon ki oferese-m un bon trabadju i el konvida-m pa N fika na Mérka. Dipôs di ora pa Jeová sobri kel asuntu li, mi ku Elly nu disidi ka seta i nu volta pa Béljika pa apoia kel grupu di kongregason pikinoti ki tinha 10 publikador na Bastogne. Alguns anu dipôs, nu fika kontenti kantu nu tevi nos fidju matxu, Serge. Infilismenti 7 mês dipôs, Serge fika duenti i el móre. Nu pâpia ku Jeová na orason sobri nos tristéza, i el da-nu forsa através di speransa di resureison.

Na otubru di anu 1961, N konsigi atxa un trabadju di meiu piriúdu ki ta dexaba mi ser pioneru. Má na kel mésmu dia, N resebe un xamada di responsável di filial di Béljika. El pergunta-m si N podia ser sérvu di sirkuitu (ki gósi é txomadu di enkaregadu di grupu di kongregason). N pergunta-l: “N pode ser pioneru antis di N seta kel diziginason li?” Irmons seta nha pididu. Nu sirbi di pioneru pa 8 mês, i na setenbru di anu 1962 nu kumesa ta vizita kongregasons.

Dipôs di dôs anu ta vizita kongregasons, nu konvidadu pa sirbi na Betel di Bruxelas. Nu kumesa ta sirbi la na otubru di anu 1964. Nu resebe txeu bensons na kel novu diziginason li. Poku ténpu dipôs ki irmon Nathan Knorr vizita nos Betel na anu 1965, N fika dimiradu pamodi N diziginadu pa toma kónta di filial. Dipôs, mi ku Elly nu konvidadu pa nu kursa turma nunbru 41 di Skóla di Jiliádi. Kuzê ki irmon Nathan Knoor flaba 13 anu antis kontise mê! Dipôs di kursa skóla, nu volta pa Betel di Béljika.

N fika txeu kontenti di tene oportunidadi di uza nhas konhisimentu di lei pa djuda difende nos direitu di adora Jeová di manera livri na Europa i na otus lugar. (Flp. 1:7) Pamodi kel-li, N pâpia ku autoridadis di  más di 55 país undi nos trabadju tinha poku liberdadi ô staba proibidu. Envês di papiaba ku kes autoridadi sobri nha spiriénsia ku lei, sénpri N ta flaba es ‘Ami é un ómi di Deus.’ Sénpri N ta djobeba orientason di Jeová na orason pamodi N sabia ma ‘korason di rei [ô di juís] é sima agu ki ta kóre na mô di Jeová. El ta pô-l ta bai pa undi ki El krê.’ — Pro. 21:1.

Inda N ta lenbra di un konbérsu ki N tevi ku un ménbru di Parlamentu di Europa. N tenta pâpia ku el txeu bês ti ki el seta pâpia ku mi. El fla-m: “N ta da-u sô sinku minutu, nen un minutu más.” N baxa kabésa i N kumesa ta faze orason. Kel ómi di Parlamentu fika preokupadu i el pergunta-m kuzê ki N staba ta faze. N labanta kabésa i N fla-l: “N agradese Deus pamodi abo é un di se sérvus.” El pergunta: “Kuzê ki bu krê fla?” N mostra-l Romanus 13:4. El éra protestanti, pur isu el fika interesadu na kel versíklu di Bíblia. Kuzê ki kontise dipôs? El da-m meia óra i nu tevi un runion. Ti mésmu el fla-m ma el ta ruspeta trabadju di Tistimunhas di Jeová.

Duránti txeu anu, povu di Jeová luta pa difende ses direitu na Europa, sima ka bai trópa, fika ku fidjus, inpostu i otus kuza. Pa mi foi un grandi priviléjiu odja modi ki Jeová djuda-nu ganha na tribunal. Ti gósi, Tistimunhas di Jeová dja ganha más di 140 kazu na Tribunal di Europa pa Direitus di Ómi!

Duránti anus 1990, N trabadja djuntu ku irmon Philip Brumley, di Sédi Mundial i irmon Valter Farneti, di Itália, pa djuda irmons ku irmans di Kuba adora Jeová di manera más livri, pamodi nos trabadju tinha poku liberdadi. N skrebe pa enbaixada di Kuba na Béljika i dipôs N inkontra ku un autoridadi ki skodjedu pa djobe nos pididu. Duránti nos primeru runion, nu ka konsigi rezolve maioria di kes prubléma ki poba govérnu ta tra-nu alguns liberdadi di adorason.

Dipôs di djobe orientason di Jeová na orason, nu pidi pa es dexa-nu manda 5 mil Bíblia pa Kuba i es dexa-nu manda. Kes Bíblia txiga dretu i irmons resebe-s, pur isu nu fika konvensidu ma Jeová staba ta abênsua nos sforsu. Dipôs nu pidi pa es dexa-nu manda 27.500 Bíblia. Govérnu konkorda ku kel-li tanbê. N fika txeu kontenti di djuda kada un di nos irmons ku irmans na Kuba ki nu krê txeu ten un Bíblia.

 N vizita Kuba txeu bês, pa djuda midjora nos direitu di faze nos trabadju. Duránti kel ténpu la, N kumesa ta da dretu ku kes autoridadi di govérnu.

Na anu 1994, más di 1 milhon di algen di rasa tutsi matadu di manera kruel na Ruanda. Infilismenti, alguns di nos irmon matadu tanbê. Lógu skodjedu un grupu di irmons, pa djuda irmons i da-s kes kuza ki es mesteba.

Kantu mi ku kel grupu di irmons nu txiga na Kigali, ki é kapital di Ruanda, nu odja má paredis di skritóriu di traduson i di kel lugar di guarda publikasons staba xeiu di braku pamodi tiru. Nu obi txeu stória tristi di nos irmons ku irmans ki matadu ku katana. Tanbê, nu obi txeu stória di modi ki irmons mostra amor. Pur izénplu, nu inkontra ku un irmon tutsi ki un família di Tistimunha di Jeová ki éra utu, sukundi na un braku dibaxu di txon duránti 28 dia. Duránti un runion na Kigali, nu sforsa txeu pa da koraji i konsola más di 900 irmon ku irmans.

Dipôs, nu bai pa Zairi (ki gósi ta txomadu di Repúblika Dimokrátika di Kongu) pa djobe txeu tistimunha di Jeová di Ruanda, ki fujiba pa kanpu di rafujiadu pértu di sidadi di Goma. Nu ka konsigi atxa-s, pur isu nu ora ta pidi Jeová pa djuda-nu txiga na es. Dipôs, nu odja un algen ta ben pa nos, i nu pergunta-l si el konxeba algun tistimunha di Jeová. El fla: “Sin, ami é Tistimunha di Jeová. N pode leba nhos pa kumison di ajuda.” Dipôs di un runion ku kumison di ajuda ki da-nu koraji, nu inkontra ku 1.600 rafujiadu pa da-s konsolu i koraji. Tanbê, nu lé pa es un karta di Grupu Enkaregadu di Óbra. Irmons ku irmans fika txeu kontenti di obi kes palavra li: “Nhos sta sénpri na nos orason. Nu sabe ma Jeová ka ta bandona nhos.” Kes palavra di Grupu Enkaregadu di Óbra éra verdadi. Oji, ten más di 30 mil Tistimunha di Jeová na Ruanda ki sta txeu kontenti ta sirbi Jeová djuntu!

Dipôs di kuazi 58 anu kazadu, Elly nha mudjer ki N krê txeu móre na anu 2011. N fla Jeová na orason ma N staba ta xinti tristi dimás i el konsola-m. Tanbê, un kuza ki konsola-m foi pâpia di notísia sábi di Reinu ku nhas vizinhu.

Enbóra já N tene más di 90 anu, N ta kontinua ta prega tudu simana. Tanbê, N sta kontenti di djuda na Dipartamentu di Lei li na Betel di Béljika, pâpia di nha spiriénsia ku otus irmon i da jóvens di família di Betel koraji.

Dja ten uns 84 anu, ki N faze nha primeru orason pa Jeová. Kel-li foi kumesu di nha amizadi ku el ki bira kada bês más fórti. Ami é txeu gratu pamodi duránti tudu nha vida, Jeová presta atenson na nhas orason. — Sal. 66:19. b