STUDU 23
KÁNTIKU 28 Ken ki pode ser amigu di Jeová?
Jeová ta konvida-nu pa nu entra na se ténda
‘Nha ténda ta ben sta ku es, i N ta ben ser ses Deus’. — EZEQUIEL 37:27.
ASUNTU PRINSIPAL
Omenta nos gratidon pa konviti ki Jeová ta faze-nu di entra na se ténda i pa manera ki el ta kuida di nos dja ki nos é se konvidadu.
1-2. Ki konviti Jeová ta faze pa se sérvus fiel?
SI UN algen pergunta-u: ‘Pa bo, ken ki é Jeová?’ Kuzê ki bu ta flaba? Talvês bu pode flaba: ‘Jeová é nha Pai, nha Deus i nha amigu.’ Talvês bu pode pensaba na otus palavra pa pâpia sobri Jeová. Má, bu ta flaba ma Jeová é kel ki ta resebe-u na se ténda?
2 Rei Davidi konpara kel amizadi ki ten entri Jeová ku Se sérvus lial ku amizadi ki ten entri un algen ki ta konvida i se konvidadus. Davidi fla: ‘Ó Jeová, ken kin pode ser konvidadu pa entra na bu ténda? Ken ki pode mora na bu monti santu?’ (Sal. 15:1) Kes versíklu li ta mostra ma nu pode ser un konvidadu na ténda di Jeová, kel-li krê fla ser se amigu. Bu ka ta atxa ma kel-li é un konviti sabe dimás?
JEOVÁ KRÊ PA NU SER SE KONVIDADUS
3. Kenha ki foi primeru konvidadu di Jeová, i kuzê ki es xinti pa kunpanheru?
3 Antis di kria tudu kuza, Jeová staba el sô. Má dipôs, Jeová kria se primeru Fidju i el konvida-l pa se ténda. Jeová fika txeu kontenti di resebe se primeru konvidadu na se ténda. Bíblia ta fla ma Jeová ‘gostaba más txeu’ di se Fidju i se Fidju staba ‘sénpri kontenti na se frenti.’ — Pro. 8:30.
4. Kenha ki Jeová konvida tanbê pa entra na se ténda?
4 Dipôs, Jeová kria otus anju i tanbê el konvida-s pa se ténda. Bíblia ta txoma anjus di ‘fidjus di Deus’ i el ta mostra ma es sta kontenti djuntu ku Jeová. (Jó 38:7; Dan. 7:10) Pa txeu anu, amigus di Jeová éra sô kes ki ta viveba ku el la na séu. Má dipôs, el faze pesoas pa vive li na téra i es tanbê pode sérba se konvidadus. Alguns di kes konvidadu éra Enoki, Nué, Abraon i Jó. Bíblia ta mostra ma es éra amigu di Jeová pamodi es ta obiba ku el. — Gén. 5:24; 6:9; Jó 29:4; Isa. 41:8.
5. Kuzê ki nu ta prende ku kel profesia ki sta na Ezequiel 37:26, 27?
5 Désdi ténpu antigu, Jeová sta ta konvida se amigus pa ser se konvidadus. (Lé Ezequiel 37:26, 27.) Pur izénplu, na profesia di Ezekiel nu ta prende ma Deus krê pa se adoradoris lial ten un amizadi fórti ku el. El promete faze un ‘kontratu di pas’ ku es. Kel profesia li ta pâpia di un ténpu ki kes algen ki ten speransa di vive na séu i kes ki ten speransa di vive na téra ta ben sta unidu dibaxu di ténda di Jeová i es ta ben ser “sô un ribanhu”. (Juan 10:16) Kel-li sta ta kontise gósi!
DEUS TA KUIDA DI NOS NA KALKER LUGAR KI NU STA
6. Modi ki nu pode bira un konvidadu na ténda di Jeová? É sô pesoas di un lugar ki pode bira konvidadus na ténda di Jeová?
6 Na ténpu ki Bíblia skrebedu, ténda éra un lugar ki pesoas ta uzaba pa diskansa i pa proteje di txuba, sól i otus kuza. Un algen ki konvidadu pa un ténda ta speraba ma es ta kuidaba dretu di el. Óras ki nu ta da nos vida pa Jeová, nu ta bira un konvidadu na se ténda. (Sal. 61:4) Nu ten tudu kel ki nu meste pa nu ten un amizadi fórti ku Jeová i nu pode ser amigu di otus algen ki tanbê é konvidadus na se ténda. Pesoas di tudu lugar pode bira konvidadu na ténda di Jeová. Talvês dja bu viaja pa otu país pa sisti un kongrésu spesial i bu konxe otus algen ki sta kontenti di sta na ténda di Deus. Si nu sirbi Jeová di manera fiel, nu pode ser un konvidadu na se ténda ka ta inporta na undi ki nu sta. — Apo. 21:3.
7. Modi ki nu sabe ma kes algen fiel ki dja móre inda é konvidadus na ténda di Jeová? (Odja fotu.)
7 I kes algen fiel ki dja móre? Inda es é konvidadu na ténda di Jeová? Sin! Pamodi ki nu pode fla kel-li? Pamodi kes algen li sta bibu na mimória di Jeová. Jizus fla: “Sobri algen mortu ser resusitadu, ti mésmu Muizés pâpia sobri kel-la na kel stória sobri kel pé di spinhu, kantu el txoma Jeová di ‘Deus di Abraon, Deus di Izaki i Deus di Jakó.’ El é Deus, ka di algen mortu, má di algen bibu, pamodi pa el es tudu sta bibu.” — Lukas 20:37, 38.
Ti mésmu kes algen fiel ki dja móre ta kontinua ta ser un konvidadu na ténda di Jeová (Odja parágrafu 7.)
NU TEN BENSONS I RESPONSABILIDADIS
8. Ki bensons nu ta ten óras ki nos é un konvidadu na ténda di Jeová?
8 Sima un ténda pode ser un lugar pa diskansa i pa proteje di sól, txuba i otus kuza, ténda di Jeová pode proteje se konvidadus di kalker kuza ki pode straga ses amizadi ku Deus i el ta da-s un speransa sértu pa futuru. Óras ki nu kontinua ta ten un amizadi fórti ku Jeová, Satanás ka ta pode faze nada ki ta prujudika-nu pa tudu ténpu. (Sal. 31:23; 1 Juan 3:8) Na mundu novu, Jeová ta ben kontinua ta proteje se amigus fiel ka sô di kuzas ki pode prujudika ses amizadi ku el, má tanbê di mórti. — Apo. 21:4.
9. Kuzê ki Jeová ta spera di se konvidadus?
9 Ser un konvidadu na ténda di Jeová é un grandi priviléjiu, pamodi nu pode ten un amizadi fórti ku el ki ta dura pa tudu ténpu. Kuzê ki nu debe faze si nu krê kontinua ta ser un konvidadu na se ténda? Óras ki un algen konvida-u pa se kaza, bu ta krê sabe kuzê ki el ta spera di bo. Pur izénplu, na alguns lugar es pode spera pa bu tra sapatu antis di bu entra i bu ta fazeba kel-li sen prubléma. Di mésmu manera, nu krê sabe kuzê ki Jeová ta spera di kes algen ki krê kontinua ta ser un konvidadu na se ténda. Nos amor pa Jeová ta pô-nu ta faze kalker kuza ki nu ta pode pa nu “agrada-l na tudu kuza”. (Kol. 1:10) É verdadi ma Jeová é nos amigu, má tanbê el é nos Deus i nos Pai, pur isu el merese pa nu ruspeta-l. (Sal. 25:14) Nunka nu ka debe skese di kel-li i sénpri nu debe ten txeu ruspetu pa el. Kel ruspetu li ta djuda-nu ivita faze kuzas ki pode ofende-l. Sénpri nu krê ‘anda di manera modéstu’ ku nos Deus. — Miq. 6:8.
JEOVÁ TRATA KES ISRAELITA DI MANERA IGUAL
10-11. Ki izénplu nu ta ben pâpia di el ki ta mostra ma Jeová ta trata tudu algen igual?
10 Jeová ta trata tudu se konvidadus igual. (Rom. 2:11) Nu ta prende kel-li na manera ki el trata tudu kes israelita igual kantu ki es staba na dizértu di Sinai.
11 Dipôs ki Jeová liberta se povu di skravidon na Ijitu, el skodje saserdótis pa sirbi na tabernáklu. El skodje levitas pa toma kónta di otus trabadju na tabernáklu. Jeová kuida más dretu di kes algen ki ta sirbiba na tabernáklu ô ki ta moraba más pértu di el, di ki kes otu israelita? Nau! Jeová ta trata tudu algen igual.
12. Modi ki manera ki Jeová trata Israelitas na dizértu ta mostra ma el ta trata tudu algen igual? (Êxodo 40:38) (Odja dizenhus.)
12 Kada un di kes israelita pode tinha un amizadi fórti ku Jeová ka ta inporta kal ki éra ses diziginason ô si es ta moraba pértu di tabernáklu ô nau. Pur izénplu, Jeová ranja manera pa kel nason interu konsigi odjaba kel kuluna di núven i kel kuluna di lumi ki staba riba di tabernáklu. (Lé Êxodo 40:38) Óras ki kel núven kumesaba ta bai na un direson, ti mésmu kes algen ki ta staba más lonji di tabernáklu ta konsigi odjaba el. Asi, es ta konsigi rumaba ses kuzas, tra ses ténda i bai djuntu ku kes otu israelita. (Núm. 9:15-23) Tudu algen ta konsigi obiba kel son altu i klaru di kes dôs tronbéta di prata ki éra sinal ma es meste labantaba kanpamentu. (Núm. 10:2) Nton, sô pamodi un algen ta moraba pértu di tabernáklu, kel-li ka krê flaba ma el éra más amigu di Jeová di ki kes ki ta moraba más lonji. Kada israelita pode sérba un konvidadu di Jeová i el pode tinha serteza ma Jeová ta giaba i protejeba el. Oji tanbê, ka ta inporta na undi ki nu ta vive, nu pode ten serteza ma Jeová ta ama-nu, el ta kuida di nos i el ta proteje-nu.
Tabernáklu ki ta staba na meiu di kanpamentu éra un próva ma Jeová ta trata tudu algen igual (Odja parágrafu 12.)
OJI JEOVÁ TA TRATA TUDU ALGEN IGUAL
13. Di ki manera Jeová ta trata tudu algen igual na nos ténpu?
13 Alguns algen ki ta faze párti di povu di Deus oji, ta vive pértu di Sédi Mundial di Tistimunhas di Jeová ô di un Betel. I otus algen ta sirbi na kes lugar li. Pamodi kel-li, es ta partisipa na txeu di kes atividadi ki ta fazedu na kes lugar i es ta konvive ku kes ki ta toma kónta di povu di Jeová. Tanbê, otus irmon ta trabadja na vizita kongregasons ô na otus sirvisu spesial pa ténpu interu. Sikrê bu ka ten kes priviléjiu li, bu pode ten serteza ma bo é konvidadu di Jeová i el ta ama-u. El konxe-u dretu i el ta da-u kel ki bu meste. (1 Ped. 5:7) Jeová ta da kumida spritual pa kada un di se sérvus, el ta orienta-s i el ta proteje-s.
14. Kal ki é otu manera ki ta mostra ma Jeová ta trata tudu algen igual?
14 Otu izénplu ki ta mostra ma Jeová ta trata tudu algen igual é pamodi el ranja manera pa pesoas na mundu interu lé Bíblia. Na komésu, Bíblia skrebedu na ebraiku, aramaiku i gregu. Kes algen ki ta pode lé Bíblia na kes língua li, ten un amizadi más fórti ku Jeová di ki kes ki ka ta konsigi faze kel-li? Klaru ki nau. — Mat. 11:25.
15. Kuzê ki ta da-nu serteza ma Jeová ta trata tudu algen igual? (Odja fotus.)
15 Jeová ka ta konvida-nu pa nu ser se amigu sô si nu ten txeu skóla ô si nu konxe kes língua ki Bíblia skrebedu na komésu. Jeová ta da se sabedoria pa tudu algen na mundu, ka ta inporta si el ten txeu skóla ô nau. Bíblia ki é Palavra di Deus, dja traduzidu na milharis di língua. Pamodi kel-li, pesoas na mundu interu pode tra pruvetu di kuzê ki Jeová ta inxina i prende modi ki es pode ser se amigus. — 2 Tim. 3:16, 17.
Bíblia sta traduzidu na milharis di língua. Modi ki kel-li ta mostra ma Jeová ta trata tudu algen igual? (Odja parágrafu 15.)
KONTINUA TA SER UN ALGEN KI JEOVÁ TA “SETA”
16. Sima sta na Atus 10:34, 35, modi ki nu pode kontinua ta ser un algen ki Jeová ta seta?
16 É un grandi priviléjiu ser konvidadu pa entra na ténda di Jeová. Jeová é kel algen ki más ta resebe algen dretu, ki ta mostra bondadi i amor. Tanbê el ta trata tudu algen igual. El ta resebe tudu algen dretu, ka ta inporta na undi ki es ta mora, ses kultura, skóla, rasa, tribu, idadi ô si es é ómi ô mudjer. Má, Jeová ta seta pa ser se konvidadus sô kes algen ki ta obi ku el. — Lé Atus 10:34, 35.
17. Na undi ki nu ta atxa más informason ki pode djuda-nu kontinua ta ser un konvidadu na ténda di Jeová?
17 Na Salmo 15:1, Davidi faze kes pergunta li: ‘Ó Jeová, ken ki pode ser konvidadu pa entra na bu ténda? Ken ki pode mora na bu monti santu?’ Jeová uza Davidi pa responde kes pergunta li. Na kel otu studu nu ta ben odja alguns kuza ki nu meste faze pa nu agrada Jeová i pa nu kontinua se amigu.
KÁNTIKU 32 Fika di ladu di Jeová!
