STUDU 25
KÁNTIKU 7 Nos forsa ta ben di Jeová
Lenbra ma Jeová é un ‘Deus bibu’
‘Jeová sta bibu!’ — SALMO 18:46.
ASUNTU PRINSIPAL
Nu ta xinti txeu inkorajadu óras ki nu ta lenbra ma kel Deus ki nu ta adora é un ‘Deus bibu’.
1. Kuzê ki ta djuda povu di Jeová kontinua ta sirbi-l, sikrê ku prublémas ki es ta pasa pa el?
BÍBLIA ta fla ma nu sta ta vive na un ténpu “difísil di aguenta.” (2 Tim. 3:1) Alén di kes prubléma ki tudu algen ta pasa pa el na kel mundu li, povu di Jeová sta ta lida ku opozison i pirsigison. Kuzê ki ta djuda-nu kontinua ta sirbi Jeová sikrê ku kes prubléma li? Un di kes motivu prinsipal é pamodi nu konxe Jeová, ki é un ‘Deus bibu’. — Jer. 10:10; 2 Tim. 1:12.
2. Di ki manera Jeová é un Deus bibu?
2 Jeová é un algen rial ki ta odja tudu prubléma ki nu ta pasa pa el i sénpri el ta ranja maneras di djuda-nu. (2 Cró. 16:9; Sal. 23:4) Óras ki nu ta lenbra ma Jeová é un Deus bibu ki ta preokupa ku nos, nu ta ten forsa pa aguenta kalker prubléma. É kel-li ki rei Davidi xinti.
3. Kuzê ki Davidi krê flaba kantu el fla ma ‘Jeová sta bibu’?
3 Davidi konxeba Jeová i el ta kunfiaba na El. Kantu rei Saul i otus inimigu di sel tenta mata Davidi, el faze orason ta pidi Jeová ajuda. (Sal. 18:6) Dipôs ki Deus obi orason di Davidi i El salva-l, Davidi fla: ‘Jeová sta bibu!’ (Sal. 18:46) Kes palavra li ta mostra ma Davidi ka sô ta kriditaba ma Deus ta izisti, má sima un livru ta fla, Davidi staba ta mostra kunfiansa ma Jeová “é un Deus ki sta bibu i ki sénpri ta aji pa djuda se povu.” Davidi tinha serteza ma Deus sabia kuzê ki staba ta kontise ku el i El staba prontu pa djuda-l. Kel-li da Davidi koraji pa kontinua ta sirbi i ta lova Jeová. — Sal. 18:28, 29, 49.
4. Modi ki ten serteza ma Jeová é un Deus bibu ta djuda-nu?
4 Óras ki nu ten serteza ma Jeová é un Deus bibu, kel-li pode djuda-nu sirbi-l ku zelu. Nu ta ten forsa pa nu kontinua ta aguenta prublémas i nu ta sta más motivadu pa kontinua ta sforsa na nos sirvisu pa el. Tanbê nu ta sta disididu na kontinua ta bira más amigu di Jeová.
KEL DEUS BIBU TA DA-U FORSA
5. Kuzê ki ta djuda-nu ten kunfiansa óras ki nu ta pasa pa prublémas? (Filipensis 4:13)
5 Nu ta konsigi aguenta kalker prubléma grandi ô pikinoti si nu lenbra ma Jeová é un Deus ki sta bibu i ma el sta sénpri prontu pa djuda-nu. El pode djuda-nu ku kalker prubléma pamodi ka ten ninhun prubléma ki é difísil dimás pa nos Deus. El é Tudu-Poderozu, i el pode da-nu forsa pa nu aguenta firmi. (Lé Filipensis 4:13.) Kel-li ta djuda-nu ten kunfiansa óras ki nu ta pasa pa prublémas. I óras ki nu ta odja ajuda di Jeová duránti kes prubléma más pikinoti, kel-li ta da-nu serteza ma el ta ben djuda-nu na kes prubléma más grandi.
6. Kuzê ki kontise kantu Davidi éra jóven ki djuda-l kunfia más na Jeová?
6 Odja dôs situason ki Davidi pasa pa el na vida ki bira se kunfiansa na Jeová más fórti. Kantu el éra jóven i el éra pastor, un ursu i dipôs un lion pega un ovelha di se pai. Na kes dôs situason, ku koraji Davidi bai tras di es i el salva kes ovelha. Má Davidi ka atxa ma el faze kel-la sen ninhun ajuda. El sabia ma Jeová staba ta djuda-l. (1 Sam. 17:34-37) Davidi nunka ka skese di kes kuza la. Midita na es, djuda-l ten kunfiansa ma kel Deus bibu ta daba el forsa na futuru.
7. Na kuzê ki Davidi konsentra, i pamodi ki kel-li djuda-l ganha Gulias?
7 Dipôs, kantu Davidi talvês tinha ménus di 20 anu, el bai vizita un kanpu di géra di israelitas. El odja ma kes trópa staba ku txeu medu pamodi un filisteu jiganti ki txomaba Gulias staba ta ‘dizafia trópas di Israel.’ (1 Sam. 17:10, 11) Kes trópa staba ku txeu medu pamodi es konsentra na modi ki Gulias éra grandi i na kuzê ki el staba ta fla. (1 Sam. 17:24, 25) Má Davidi konsentra na otu kuza. El odja ma kuzê ki staba ta kontise ka éra un dizafiu sô kóntra kes trópa di Israel, má kóntra kes ‘trópa di kel Deus bibu’. (1 Sam. 17:26) Davidi staba ta pensa na Jeová. El kunfia ma kel Deus ki djudaba el kantu el éra pastor, tanbê ta ba djudaba el na kel situason. El géra ku Gulias pamodi el tinha serteza ma Jeová staba ku el, i é klaru ki el ganha-l! — 1 Sam. 17:45-51.
8. Modi ki nu pode bira nos kunfiansa más fórti ma Jeová ta djuda-nu? (Odja fotu.)
8 Nos tanbê, si nu lenbra ma kel Deus bibu sta prontu pa djuda-nu, nu pode ten bons rezultadu óras ki nu ta pasa pa prublémas. (Sal. 118:6) Nu pode ten más kunfiansa ma Jeová ta ben djuda-nu si nu pensa na kuzê ki dja el faze pa nos na pasadu. Lé stórias di Bíblia ta lenbra-nu di modi ki Jeová dja djuda se sérvus na pasadu. (Isa. 37:17, 33-37) Tanbê, nu pode lé ô odja spiriénsias na jw.org ki ta mostra modi ki Jeová sta ta djuda nos irmons na nos ténpu. Alén di kel-li, bu pode lenbra di alguns bês ki Jeová faze algun kuza pa djuda-u. Ka bu fika preokupadu si nunka bu ka pasa pa un spiriénsia grandi, sima géra ku un ursu ô un lion. Pamodi? Na verdadi, Jeová dja faze txeu kuza pa djuda-u! Jeová konvida-u pa bu bira se amigu. (Juan 6:44) I na verdadi, é sô pamodi se ajuda ki inda bu sta ta sirbi-l. Pamodi ki bu ka ta pidi-l pa el djuda-u lenbra di kes momentu ki el obi bu orason i el da-u ajuda na óra sértu i el kuida di bo duránti un situason difísil? Midita na kes spiriénsia li ta djuda-u bira bu kunfiansa más fórti ma Jeová ta kontinua ta djuda-u.
Nos prublémas ta faze párti di un grandi prubléma (Odja parágrafus 8 i 9.)
9. Kuzê ki nu debe lenbra di el óras ki nu ta pasa pa prublémas? (Provérbios 27:11)
9 Óras ki Jeová é un Deus bibu pa nos, nu ta odja nos prublémas sima es é. Pamodi ki nu ta fla kel-li? Nu ta odja ma nos prublémas ta faze párti di un grandi prubléma entri Jeová i Satanás. Diabu fla ma óras ki nu ta pasa pa prublémas nu ta bandona Jeová. (Jó 1:10, 11; lé Provérbios 27:11.) Má óras ki nu ta kontinua lial pa Jeová, sikrê ku nos prublémas, nu ta mostra nos amor pa Jeová i nu ta prova ma Satanás é mintirozu. Talvês bu sta ta pasa pa prublémas sima opozison di govérnu, falta di dinheru, pesoas na pregason ka sta ta seta notísias sábi ô talvês bu sta ta sufri pamodi otus prubléma. Si bu sta ta pasa pa un di kes situason li, lenbra ma kel-li pode ser un oportunidadi di bu dexa korason di Jeová kontenti. Tanbê, lenbra ma nunka el ka ta dexa-u pasa pa un situason ki bu ka ta konsigi aguenta. (1 Kor. 10:13) El ta da-u forsa pa bu aguenta firmi.
KEL DEUS BIBU TA BEN REKONPENSA-U
10. Kuzê ki kel Deus bibu ta faze pa kes algen ki ta adora-l?
10 Jeová sénpri ta rekonpensa kes algen ki ta adora-l. (Ebr. 11:6) El ta da-nu pas i alegria gósi, i el ta ben da-nu vida pa tudu ténpu na futuru. Nu pode kunfia di tudu korason ma Jeová krê rekonpensa-nu i ma el ten puder pa faze kel-li. I kel serteza li ta djuda-nu mante okupadu na nos sirvisu pa Jeová, sima kes sérvu fiel na pasadu faze. É kel-li ki Timótiu di ténpu di apóstlus faze. — Ebr. 6:10-12.
11. Pamodi ki Timótiu trabadja duru na kongregason? (1 Timótiu 4:10)
11 Lé 1 Timótiu 4:10. Timótiu tinha fé fórti ma Jeová ta rekonpensaba el. É pamodi kel-li ki el trabadja duru pa Jeová i pa otus algen. Modi ki el faze kel-li? Apóstlu Paulu insentiva-l pa el midjora se kapasidadi di inxina na pregason i na kongregason. Apóstlu Paulu fla tanbê ma el éra un bon izénplu pa kes irmon ki éra jóven i kes irmon más grandi. Tanbê, el dadu un diziginason difísil ki ta inkluiba daba konsedjus di manera firmi má ku amor pa kes ki mesteba. (1 Tim. 4:11-16; 2 Tim. 4:1-5) Alvês otus algen pode ka odjaba kuzê ki Timótiu ta fazeba ô es pode ka agradiseba el, má Timótiu tinha serteza ma Jeová ta ben rekonpensaba el. — Rom. 2:6, 7.
12. Pamodi ki ansions ta kontinua ta sforsa pa faze ses trabadju na kongregason? (Odja fotu.)
12 Oji, ansions tanbê pode ten serteza ma Jeová ta odja i ta da valor pa ses bon trabadju. Alén di faze vizita di pastoreiu, inxina i prega, txeu ansions sta ta djuda na prujétus di konstruson i óras ki ta kontise un dizastri. Otus ta sirbi na Grupu pa Vizita Duentis ô na Kumison di Ligason ku Ospital. Un ansion ki sta dispostu na faze kes kuza li ta mostra ma el ta rekonhese ma kongregason é di Jeová, ka di ómis. Pamodi kel-li, es ta sforsa txeu na kongregason i es ten tudu kunfiansa ma Deus ta ben rekonpensa-s pa kel ki es sta ta faze. — Kol. 3:23, 24.
Kel Deus bibu ta rekonpensa-u timenti bu ta sforsa pa trabadja na kongregason (Odja parágrafus 12 i 13.)
13. Modi ki Jeová ta xinti ku sforsu ki nu ta faze pa sirbi-l?
13 É ka tudu algen ki ta pode ser ansion. Má, nos tudu nu pode da Jeová algun kuza. Nos Deus ta fika txeu kontenti óras ki nu ta faze nos midjór pa sirbi-l. El ta odja óras ki nu ta faze kontribuisons pa djuda trabadju na mundu interu, sikrê kel kontribuison é poku. El ta fika txeu kontenti óras ki nu ta labanta nos mô pa da komentáriu na runion, sikrê nu tene vergónha. Tanbê, el ta fika txeu kontenti óras ki nu ta púrdua kes algen ki ofende-nu. Sikrê bu ta atxa ma kel ki bu ta faze é poku, bu pode kunfia ma Jeová ta da valor pa kel ki bu ta pode faze. El ta ama-u pamodi kel-li, i el ta ben rekonpensa-u. — Luk. 21:1-4.
KONTINUA AMIGU DI KEL DEUS BIBU
14. Modi ki ten un amizadi fórti ku Jeová ta djuda-nu kontinua fiel? (Odja fotu.)
14 Si nu ten un amizadi fórti ku Jeová, nu ta odja ma é fásil kontinua lial pa el. É kel-li ki kontise ku Juzé. El ka seta faze konportamentu seksual mariadu. Jeová éra rial pa el i el ka krê fazeba nada ki ta dexaba Jeová tristi. (Gén. 39:9) Pa Jeová ser un algen rial pa nos, nu meste tra ténpu pa faze orason i pa studa se Palavra. Di kel manera li, nos amizadi ku el ta bira más fórti. Óras ki sima Juzé nu ten un amizadi fórti ku Jeová, nu ka ta krê faze nada ki ta dexa-l tristi. — Tia. 4:8.
Bira más amigu di kel Deus bibu ta ba djuda-u kontinua fiel (Odja parágrafus 14 i 15.)
15. Ki lison nu pode prende di kuzê ki kontise ku kes israelita na dizértu? (Ebreus 3:12)
15 Si un algen skese ma Jeová é un Deus bibu, pode ser más fásil pa el dexa di ser lial pa Jeová. Odja kuzê ki kontise ku israelitas kantu es staba na dizértu. Es sabia ma Jeová ta izisti, má es kumesa ta duvida si el ta daba es kes kuza ki es mesteba. Ti es pergunta: ‘Jeová sta ô el ka sta na nos meiu?’ (Êxo. 17:2, 7) Pamodi kel-li, es rabela kóntra Deus. Di serteza nu krê ivita ses mau izénplu, ki é un izénplu di avizu pa nos. — Lé Ebreus 3:12.
16. Kuzê ki pode poi nos fé na próva?
16 Kel mundu li ten txeu prubléma, pur isu é difísil nu kontinua amigu di Jeová. Txeu algen ka ta seta ma Deus ta izisti. Txeu bês, ta parse ma kes algen ki ka ta obi ku Deus ten un vida sábi. Óras ki nu ta odja kel-li ta kontise, nos fé pode podu na próva. Enbóra nu ta kridita ma Deus ta izisti, nu pode kumesa ta duvida si el ta ben djuda-nu. Skritor di Salmo 73, tanbê kumesa ta xinti si pa un ténpu. El odja ma kes algen ki staba na se vólta ka ta obiba ku leis di Deus, má simé ses vida éra sábi. Pamodi kel-li, el kumesa ta pergunta si bale pena sirbi Deus. — Sal. 73:11-13.
17. Kuzê ki ta djuda-nu kontinua amigu di Jeová?
17 Kuzê ki talvês djuda kel salmista li muda se manera di pensa? El kumesa ta midita na kuzê ki ta ba kontiseba ku kes algen ki para di kunfia na Jeová. (Sal. 73:18, 19, 27) Tanbê, el pensa na kes benson ki nu ta ten óras ki nu ta sirbi Deus. (Sal. 73:24) Nos tanbê, nu pode pensa na kes benson ki Jeová ta da-nu. Imajina modi ki nos vida ta sérba si nu ka ta sirbiba Jeová. Faze kel-li pode djuda-nu kontinua ta ten un fé fórti. Sima salmista nu pode fla: ‘Pa mi, txiga pértu di Deus é bon pa mi.’ — Sal. 73:28.
18. Pamodi ki nu ka meste xinti medu di futuru?
18 Nu pode vense kalker prubléma ki nu ta pasa pa el duránti es ténpu di fin pamodi nos é “skravu di un Deus bibu i verdaderu”. (1 Tes. 1:9) Nos Deus é un algen rial ki sénpri ta djuda kes algen ki ta sirbi-l. El mostra ma el staba ku se sérvus na pasadu i el ta sta ku nos oji. Ka ta dura nu ta ben pasa pa kel tribulason más grandi ki ta ben kontise na téra. Má nu ka ta ben sta nos sô, Jeová ta ben sta ku nos. (Isa. 41:10) Nos tudu nu ta ben fika “xeiu di koraji” i nu ta ben fla: “Jeová é kel ki ta djuda-m. N ka ta xinti medu.” — Ebr. 13:5, 6.
KÁNTIKU 3 Jeová ta da-m forsa i speransa
