1. Kuzê ki talvês kontise kantu bu tenta pâpia pa primeru bês ku otus sobri Bíblia?

BU TA lenbra kel primeru bês ki bu da kónta ma dja bu atxa verdadi? Foi fásil di ntende kes verdadi ki bu staba ta prende i bu pensa ma tudu algen ta krê prendeba kes kuza ki bu bira ta kridita na es. I bu tinha sertéza ma kel mensaji di Bíblia ta djudaba es ten un vida midjór gósi i ta daba es un speransa rei di sábi pa futuru. (Sal. 119:105) Nton ku tudu kel alegria, bu disidi pâpia ku bus família i amigus sobri kes kuza ki bu prende. Má kuzê ki kontise? Bu fika spantadu pamodi txeu di es ka seta kuzê ki bu fla-s.

2-3. Kuzê ki maioria di pesoas na ténpu di Jizus ta pensaba di el?

² Nu ka debe fika spantadu óras ki otus algen ka ta seta mensaji ki nu ta prega. Na ténpu di Jizus é poku algen ki seta ma el éra Misías, nbóra el faze milagris ki ta mostra ma Deus staba ta djuda-l. Pur izénplu, Jizus resusita Lázaru. Kel-li éra un milagri ki nen se inimigus ka pode negaba. Má simé, kes xéfi di relijion ka seta ma Jizus éra Misías. Envês di kel-li, es krê mataba el ku Lázaru! — João 11:47, 48, 53; 12:9-11.

³ Jizus dja sabia ma maioria di algen ka ta setaba ma el éra Misías. (João 5:39-44 ) El flaba un grupu di disiplus di Juan Batista: ‘Filís é kel ki ka ta atxa na mi ninhun motivu pa tropesa.’ (Mat. 11:2, 3, 6) Má pamodi ki txeu algen ka seta ma Jizus éra Misías?

4. Kuzê ki nu sta ben prende na kel studu li?

⁴ Na kel studu li i na kel otu, nu sta ben odja alguns kuza ki poi pesoas na ténpu di Jizus ka ta ten fé  na el. Tanbê nu sta ben odja pamodi ki txeu algen oji ta tropesa ô ka ta seta mensaji ki nu ta prega. I más inportanti inda, nu sta ben prende pamodi ki nu meste ten un fé fórti na Jizus pa nu ka tropesa.

5. Kuzê ki talvês poi txeu algen ta atxa ma Jizus ka podia sérba kel Misías ki staba pa binha?

⁵ Txeu algen tropesa pamodi pasadu di Jizus. Es rekonhese ma Jizus éra un grandi instrutor i ma el ta fazeba milagris. Má dja ki Jizus éra fidju di un karpinteru póbri, es ka ta atxaba ma el éra inportanti. Tanbê el éra di Nazaré, un sidadi ki pa txeu algen talvês ka éra inportanti. Ti Natanael, ki bira disiplu di Jizus, txiga di fla: ‘Pode sai algun kuza dretu di Nazaré?’ (João 1:46 ) Talvês Natanael ka gostaba di kel sidadi undi Jizus ta viveba ô pode ser ki el staba ta pensa na kel profesia di Miqueias 5:2, ki ta fla ma Misías ta naseba na Belen envês di Nazaré.

6. Kuzê ki podia djudaba kes algen di ténpu di Jizus sabeba ma el éra Misías?

⁶ Kuzê ki Skrituras ta fla? Proféta Izaías dja flaba ma kes inimigu di Jizus ka ta preokupaba ‘ku kes kuza di jerason’ di Misías. (Isa. 53:8) Txeu di kes informason la éra profesias ki fazedu. Si kes algen traba ténpu pa studaba kes informason, es ta odjaba klaru ma Misías tinha ki naseba na Belen i ma el éra disendenti di rei Davidi. (Luc. 2:4-7) Kel lugar ki Jizus nase sta di akordu ku kel profesia di Miqueias 5:2. Nton, kal ki éra prubléma? Kes algen tra konkluzon faxi dimás. Es ka sabia di tudu verdadi, pur isu es tropesa.

7. Pamodi ki txeu algen oji ka ta krê bira Tistimunha di Jeová?

⁷ Nu ta odja mésmu prubléma ta kontise oji? Sin. É poku sérvu di Jeová ki é riku ô algen inportanti. Pur isu, pesoas ta atxa ma nos é algen ‘normal i ku poku skóla’. (Atos 4:13 ) Alguns algen ta atxa ma Tistimunhas di Jeová ka debe inxina Bíblia pamodi es ka faze kursu na ninhun di kes skóla inportanti sobri relijion. Otus ta fla ma nos é un relijion di Mérka. Má na kada 7 Tistimunha di Jeová é sô un ki ta vive na Mérka. Inda otus dja obi ta fladu ma nu ka ta kridita na Jizus. Dja ten txeu ténpu ki pesoas ta fla ma Tistimunhas di Jeová ta dexa ses fidjus móre pamodi es ka da sangi i ma es ta dividi família. Kes algen ki ta kridita na kes stória li ka sabe verdadi sobri povu di Jeová. Pur isu, es ta tropesa ô es ka ta krê bira Tistimunha di Jeová.

8. Sima sta na Atos 17:11, kuzê ki pesoas meste faze si es krê sabe ken ki é sérvus di Deus oji?

⁸ Kuzê ki pesoas meste faze pa es ka tropesa? Es meste diskubri kal ki é verdadi. É kel-li ki skritor di Ivanjélhu di Lucas faze. El sforsa pa el ‘piskiza dretu tudu kes kuza désdi komésu’. El kreba pa kes algen ki ta leba se Ivanjélhu tinha ‘tudu sertéza di kes kuza ki es obi ta fladu’ sobri Jizus. (Luc. 1:1-4) Kes judeu di sidadi di Berea na ténpu antigu éra sima Lúkas. Kantu es obi kes notísia sábi sobri Jizus es ba piskiza na Skrituras Ebraiku pa es tinha sertéza ma éra verdadi. (Lé Atos 17:11.) Di mésmu manera, oji pesoas meste diskubri kal ki é verdadi. Es pode konpara kel ki povu di Jeová ta inxina ku kel Skrituras ta fla. Tanbê es meste studa stória di povu di Jeová di nos ténpu.  Si es faze kel-li, kes kuza mariadu ki pesoas ta fla ka ta sega ses menti.

9. Kuzê ki kontise kantu Jizus nega mostra un sinal di Séu?

⁹ Jizus éra bon na inxina má alguns algen di se ténpu ka staba kontenti sô ku kel-la. Es kreba más. Pur isu, es iziji pa Jizus mostra-s un ‘sinal di Séu’ ki ta provaba ma el éra Misías. (Mat. 16:1) Talvês es faze kel-li pamodi es ka ntende dretu kes palavra ki sta na Daniel 7:13, 14. Má inda ka txigaba kel ténpu sértu pa Jeová kunpriba kel profesia la. Kes kuza ki Jizus staba ta inxina ta txigaba pa konvenseba es ma el éra Misías. Dja ki el nega da un sinal ki es pidi, es tropesa. — Mat. 16:4.

10. Modi ki Jizus kunpri kel ki Izaías skrebe sobri Misías?

¹⁰ Kuzê ki Skrituras ta fla? Proféta Izaías skrebe kel-li sobri Misías: ‘El ka ta ben grita nen el ka ta ben labanta vós, el ka ta ben faze nada pa se vós obidu na rua.’ (Isa. 42:1, 2) Jizus faze se trabadju di pregason sen txoma atenson pa se kabésa. Jizus ka faze ténplu, el ka uza kes ropa ki xéfis di relijion ta uzaba i nen el ka iziji pa pesoas uza nómi inportanti óras ki es ta txomaba el. Mésmu kantu se vida staba na mô di Eródis, Jizus ka faze un milagri pa agrada-l. (Luc. 23:8-11) É verdadi ki Jizus faze alguns milagri, má kuza más inportanti pa el éra prega kes notísia sábi. El fla se disiplus: ‘É pa kel-li ki N ben.’ — Mar. 1:38.

11. Ki manera di pensa mariadu alguns algen ten oji?

¹¹ Nu ta odja mésmu prubléma ta kontise oji? Sin. Oji txeu algen ta fika dimiradu ku kes igreja uma grandi i ku kes óbra di arti karu ki ten na es. Tanbê es ta fika dimiradu ku kes xéfi di relijion ki ta uza nómis inportanti i ku kes serimónia di relijion ki nen es ka sabe di undi ki  ben. Má kuzê ki tudu kes kuza la ta inxina kes algen sobri vontadi di Deus? Kes algen ki ta sisti nos runion ta prende kuzê ki Jeová krê pa nu faze i modi ki nu pode aji di akordu ku se vontadi. Nos Salons di Reinu é lugaris linpu, sinplis i ku dikorasons ki ka ta txoma atenson. Kes algen ki ta toma kónta di povu di Deus ka ta bisti ninhun tipu di ropa spesial nen es ka ta resebe nómis inportanti. Kes kuza ki nu ta inxina i ki nu ta kridita na es ten bazi na Palavra di Deus. Má simé, txeu algen oji ta tropesa pamodi es ta atxa ma nos manera di adora Deus é sinplis dimás i pamodi kel ki nu ta inxina é ka kel ki es ta krê obi.

12. Sima sta na Hebreus 11:1, 6, nos fé debe ten bazi na kuzê?

¹² Kuzê ki nu meste faze pa nu ka tropesa? Apóstlu Polu fla kes kriston na Roma: ‘Fé ta sigi kel ki algen obi. I kel ki algen ta obi ta ben através di palavra sobri Kristu.’ (Rom. 10:17) Kes serimónia ki relijions ta faze pode ser bunitu i ti dexa algen dimiradu, má es ka ta poi nos fé ta bira fórti. Kuzê ki ta djuda-nu ten un fé fórti é studa Palavra di Deus, pamodi ‘sen fé nu ka ta pode agrada Deus’. (Lé Hebreus 11:1, 6.) Pur isu, pa nu ten un fé fórti nu meste ten konhisimentu izatu. Nton, pa nu ten sertéza ma dja nu atxa verdadi, nu ka meste odja ninhun sinal di Séu ki ta dexa-nu dimiradu. Si nu studa Palavra di Deus ku kuidadu nos fé ta bira más fórti. I sô kel-li ta txiga pa kaba ku kalker dúvida ki nu ten.

13. Pamodi ki txeu algen ka seta ma Jizus éra Misías?

¹³ Na ténpu di Jizus, kes disiplu di Juan Batista fika dimiradu pamodi disiplus di Jizus ka ta fazeba jejun. Jizus splika-s ma es ka meste fazeba kel-la timenti el staba bibu. (Mat. 9:14-17)  Má simé, kes farizeu i kes otu inimigu di Jizus ka seta ma el éra Misías pamodi el ka ta sigiba ses tradison. Kes ómi li tanbê fika txeu xatiadu kantu Jizus disidi kura alguns duenti na sábadu. (Mar. 3:1-6; João 9:16 ) Es ta flaba ku orgulhu ma es ta guardaba sábadu, má es ta atxaba ma ka tinha ninhun prubléma fazeba nogósiu na ténplu. Es fika uma xatiadu kantu Jizus kondena kuzê ki es staba ta faze. (Mat. 21:12, 13, 15) I kes algen ki obi Jizus ta prega na sinagóga na Nazaré fika txeu xatiadu kantu el uza izénplus di stória di Israel pa mostra ma es ta pensaba sô na ses kabésa i ma es ka tinha fé. (Luc. 4:16, 25-30) Dja ki Jizus ka faze kel ki es staba ta spéra, es tropesa. — Mat. 11:16-19.

14. Pamodi ki Jizus kondena kes tradison di ómi ki ka staba di akordu ku Skrituras?

¹⁴ Kuzê ki Skrituras ta fla? Através di proféta Izaías, Jeová fla: ‘Kel povu li ta txiga na mi ku bóka i es ta da-m ónra ku ses bóka, má ses korason sta mutu lonji di mi; i kel adorason ki es ta faze-m é ku bazi na régras di ómis, ki es inxinadu.’ (Isa. 29:13) Jizus tinha razon kantu el kondena kes tradison di ómi ki ka staba di akordu ku Skrituras. Kes algen ki ta pensaba ma kes régra i tradison di ómi éra más inportanti di ki Skrituras staba ta nega Jeová i kel Misías ki el manda.

15. Pamodi ki txeu algen oji ka gosta di Tistimunhas di Jeová?

¹⁵ Nu ta odja mésmu prubléma ta kontise oji? Sin. Txeu algen ta fika xatiadu ku Tistimunhas di Jeová pamodi es ka ta partisipa na kes komemorason ki ka sta di akordu ku Bíblia, sima aniversáriu i fésta di Natal. Otus ta fika xatiadu ku Tistimunhas di Jeová pamodi es ka ta partisipa na komemorason di un data inportanti di ses país ô pamodi es ka ta sigi kes tradison ki ten aver ku mórti ki ka sta di akordu ku kel ki Bíblia ta inxina. Kes algen ki ta dexa kes kuza li tropesa-s, talvês es ta kridita di verdadi ma es sta ta adora Deus di manera ki el ta seta. Má ken ki ta prifiri sigi kes tradison di ómi envês di kes verdadi klaru ki sta na Bíblia, ka sta ta agrada Jeová. — Mar. 7:7-9.

16. Sima sta na Salmo 119:97, 113, 163-165, kuzê ki nu debe faze i kuzê ki nu ka debe faze?

¹⁶ Kuzê ki nu meste faze pa nu ka tropesa? Nu meste ten un amor fórti pa kes lei i prinsípius di Jeová. (Lé Salmo 119:97, 113, 163-165.) Si nu ta ama Jeová nu ka ta sigi ninhun tradison ki ta dizagrada-l. Tanbê nu ka ta dexa nada bira más inportanti di ki nos amor pa Jeová.

17. Kuzê ki txeu algen na ténpu di Jizus staba ta spéra ma Misías ta fazeba?

¹⁷ Alguns algen na ténpu di Jizus tinha gana di odjaba mudansas na govérnu. Govérnu di Roma ta maltrataba es i es kreba pa Misías liberta-s. Kantu es ba tenta poi Jizus ta bira ses rei, el ka seta. (João 6:14, 15 ) Má kes saserdóti i otus algen tinha medu pa Jizus ka fazeba ninhun mudansa na govérnu, pamodi govérnu di Roma podia fikaba xatiadu i tomaba kel autoridadi ki el daba es. Kel preokupason li ku pulítika poi txeu judeu ta tropesa.

18. Ki profesias sobri Misías txeu algen ka liga?

¹⁸ Kuzê ki Skrituras ta fla? Txeu profesia sobri Misías dja flaba ma el ta ben sérba un gereru ki ta tinha txeu vitória.  Má otus ta mostra ma primeru el tinha ki moreba pa nos pekadu. (Isa. 53:9, 12) Nton pamodi ki txeu judeu tinha ideia mariadu sobri Misías? Pamodi txeu di es krê odjaba soluson di ses prubléma na kel ténpu. Pur isu, es ka liga ninhun di kes profesia ki ka ta prometeba kel-la. — João 6:26, 27.

19. Ki ideias mariadu ta poi txeu algen ta tropesa oji?

¹⁹ Nu ta odja mésmu prubléma ta kontise oji? Sin. Oji txeu algen ta tropesa pamodi nu ka ta mete na asuntus di pulítika. Es ta atxa ma nu debe skodje un kandidatu i vota na el. Má nu sabe ma si nu skodje un ómi pa ser nos governanti nu sta ta nega Jeová. (1 Sam. 8:4-7) Tanbê talvês pesoas ta atxa ma nu debe faze skóla, ospital i otus kuza pa djuda otus. Es ta tropesa óras ki es ta odja ma nu ta sforsa txeu na trabadju di pregason envês di ranja un soluson gósi pa prublémas di mundu.

20. Sima Jizus mostra na Mateus 7:21-23, kuzê ki debe ser más inportanti pa nos?

²⁰ Kuzê ki nu meste faze pa nu ka tropesa? (Lé Mateus 7:21-23.) Kuza más inportanti ki nu debe konsentra na el é faze kel trabadju ki Jizus da-nu. (Mat. 28:19, 20) Nunka nu ka debe dexa asuntus di pulítika i di kel mundu li distrai-nu. Nu ta ama pesoas i nu ta preokupa ku ses prubléma, má nu sabe ma midjór manera di djuda nos prósimu é inxina-s sobri Reinu di Deus i djuda-s ser amigu di Jeová.

21. Kuzê ki nu debe sta disididu na faze i pamodi?

²¹ Na kel studu li, nu odja kuatu kuza ki poi txeu algen ta tropesa i ka seta ma Jizus éra Misías. Tanbê nu odja ma ti inda kes kuza li sta poi alguns algen ka ta seta mensaji di sigidoris di Jizus oji. Má nu debe toma kuidadu sô ku kes kuza li? Nau. Na kel otu studu, nu sta ben odja más kuatu kuza ki pode poi algen ta tropesa. Sta disididu na kontinua ta ten un fé fórti i na ka dexa nada tropesa-u!