1-2. Kuzê ki un skritor fla i kuzê ki nu sta ben odja na kel studu li?

OJI milhons di algen ta fla ma es ta kridita na Jizus, má es ka ta faze kuzê ki el inxina. (2 Tim. 4:3, 4) É pur isu ki un skritor fla: “Imajina ma staba un otu Jizus oji djuntu ku nos i el fla-nu kes mésmu kuza ki Jizus, Fidju di Deus, flaba. . . nu ta negaba el sima kes algen faze dja ten 2 mil anu? . . . Ta parse ma respósta ta sérba: sin, nu ta negaba el.”

² Kantu Jizus staba li na Téra, txeu algen obi kuzê ki el inxina i es odja kes milagri ki el faze, má simé es ka mostra fé na el. Pamodi? Na kel studu ki pasa nu odja kuatu kuza ki poi pesoas ta tropesa pamodi kuzê ki Jizus fla i ki el faze. Na kel studu li, nu sta ben odja más kuatu kuza. Tanbê nu sta ben odja pamodi ki oji pesoas ka ta seta mensaji di sigidoris di Jizus i kuzê ki nu pode faze pa nu ka tropesa.

3. Kuzê ki Jizus ta fazeba ki poi alguns algen ta tropesa?

³ Kantu Jizus staba na Téra, el faze amizadi ku tudu tipu di algen. El ta kumeba djuntu ku kes algen ki éra riku i ku kes ki tinha txeu autoridadi. Má tanbê el uza txeu di se ténpu pa djuda kes ki éra póbri i ki ka tinha algen pa difendeba es. Tanbê, el ta trataba ku konpaxon kes algen ki otus ta txomaba di ‘pekadoris’. Alguns algen ki éra justu dimás tropesa pamodi kuzê ki Jizus ta fazeba. Es pergunta kes disiplu di Jizus: ‘Pamodi ki nhos ta kume i bebe  djuntu ku kes kobrador di inpostu i kes pekador?’ Jizus responde-s: ‘Kes algen ki tene saúdi ka meste di dotor, má é kes ki sta duenti ki meste. N ka ben txoma kes justu pa rapende, má kes pekador.’ — Luc. 5:29-32.

4. Sima proféta Izaías dja flaba kuzê ki judeus devia speraba sobri Misías?

⁴ Kuzê ki Skrituras ta fla? Txeu ténpu antis di Misías ben, proféta Izaías dja flaba ma mundu ka ta setaba el. Kel profesia ta flaba: ‘Ómis dispreza-l i es ivita-l. Éra sima ki se róstu staba sukundidu di nos. El disprezadu i nen nu ka liga-l.’ (Isa. 53:3) Sima kel profesia ta mostra, ‘ómis’ ta ben ivitaba Misías. Pur isu kes judeu di ténpu di Jizus devia speraba ma pesoas ka ta ben setaba ma el éra Misías.

5. Kuzê ki txeu algen oji ta pensa sobri sérvus di Jeová?

⁵ Nu ta odja mésmu prubléma ta kontise oji? Sin. Txeu xéfi di relijion ta fika kontenti di seta na ses igreja kes algen ki é inportanti i riku i kes ki mundu ta atxa ma é intilijenti. Es ta faze kel-li sikrê kes algen ta faze kuzas ki Deus ta ôdia. Kes xéfi di relijion li ta dispreza kes sérvu di Jeová. Nbóra sérvus di Jeová é zelozu i es ta vive di akordu ku lei di Deus, pesoas di mundu ka ta atxa ma es é inportanti. Sima apóstlu Polu fla, Deus skodje ‘kes kuza disprezadu’. (1 Cor. 1:26-29) Má pa Jeová tudu se sérvus fiel ten txeu valor.

6. Kuzê ki Jizus fla na Mateus 11:25, 26 i modi ki nu pode imita-l?

⁶ Kuzê ki nu meste faze pa nu ka tropesa? (Lé Mateus 11:25, 26.) Ka bu dexa kes kuza ki mundu ta fla sobri povu di Deus ngana-u. Seta ma Jeová ta uza sô kes algen umildi pa faze se vontadi. (Sal. 138:6) I pensa na kantu kuza ki Jeová dja konsigi faze ku kes algen ki mundu ta atxa ma ka ten sabedoria ô ma é ka intilijenti.

7. Pamodi ki Jizus kondena kes farizeu i modi ki es reaji?

⁷ Jizus kondena kes xéfi di relijion di se ténpu pamodi es ka staba ta inxina pesoas adora Deus di manera ki el ta seta. Pur izénplu, Jizus ka xinti medu di kondena kes farizeu ki staba más preokupadu ku manera ki es ta lababa mô di ki ku manera ki es ta kuidaba di ses pai ku ses mai. (Mat. 15:1-11) Ta parse ma ti kes disiplu di Jizus fika spantadu ku kuzê ki el fla. Na verdadi, es pergunta Jizus: ‘Bu sabe ma kes farizeu tropesa kantu ki es obi kuzê ki bu fla?’ Má Jizus responde-s: ‘Tudu planta ki nha Pai na Séu ka planta ta ben rinkadu. Nhos dexa-s. Gia ségu é kel ki es é. I si un ségu gia otu ségu, es tudu dôs ta kai na un braku.’ (Mat. 15:12-14) Kes xéfi di relijion fika xatiadu ku kuzê ki Jizus fla, má el ka dexa kel-la inpidi-l di fla verdadi.

8. Modi ki Jizus mostra ma Deus ka ta seta tudu relijion?

⁸ Jizus tanbê mostra ma kes kuza ki relijion ta inxinaba éra mariadu. El ka fla ma Deus ta seta tudu relijion. Envês di kel-li el fla ma txeu algen ta ben andaba na kel strada largu ki ta leba pa distruison i ma é sô poku algen ki ta ben atxaba kel strada pertadu ki ta leba pa vida. (Mat. 7:13, 14) Tanbê el fla klaru ma alguns algen ta fla ma es ta sirbi Deus, má es ka ta faze kel-la. El aviza: ‘Nhos toma kuidadu ku profétas falsu, ki ta txiga na nhos bistidu ku péli di ovelha, má di  pa déntu es é lobu mau. Pa ses frutu nhos ta konxe-s.’ — Mat. 7:15-20.

9. Kal ki é alguns ensinu di relijion ki Jizus mostra ma é falsu?

⁹ Kuzê ki Skrituras ta fla? Bíblia dja flaba ma Misías ta ben tinha txeu zelu pa kaza di Jeová. (Sal. 69:9; João 2:14-17 ) É kel zelu li ki poi Jizus ta mostra ma kes kuza ki relijion ta inxinaba éra falsu i ma kes kuza ki es ta fazeba éra mariadu. Pur izénplu, kes farizeu ta kriditaba ma alma ka ta móre. Má Jizus inxina ma mortus sta ta durmi. (João 11:11 ) Kes saduseu ka ta kriditaba na resureison. Má Jizus resusita se amigu Lázaru. (João 11:43, 44; Atos 23:8 ) Kes farizeu ta flaba ma tudu kuza ki ta kontiseba éra pamodi Deus ô distinu. Má Jizus inxina ma algen pode skodje si el krê sirbi Deus ô nau. — Mat. 11:28.

10. Pamodi ki kes kuza ki nu ta inxina ta poi txeu algen ta tropesa?

¹⁰ Nu ta odja mésmu prubléma ta kontise oji? Sin. Txeu algen ta tropesa óras ki nu ta mostra-s na Bíblia ma alguns kuza ki relijion ta inxina é falsu. Pur izénplu, pa tenta kontrola pesoas kes xéfi di relijion ta inxina ma Deus ta kastiga algen mau na inférnu. Má kes algen ki ta adora Jeová, kel Deus di amor, ta mostra pesoas ma kel-li é ka verdadi. Kes xéfi di relijion tanbê ta inxina ma alma ka ta móre. Anos nu ta prova pesoas ma Bíblia ka ta inxina kel-li. Si alma ka ta moreba, nton ningen ka meste resusitadu. I timenti txeu relijion ta inxina ma é distinu ki ta kontrola nos vida, anos nu ta inxina ma ómi ten liberdadi di skodje i el pode disidi si el krê sirbi Deus ô nau. Modi ki kes xéfi di relijion ta reaji óras ki nu ta mostra ma kes ensinu li é falsu? Kuazi sénpri es ta fika xatiadu!

11. Sima Jizus fla na João 8:45-47, kuzê ki Jeová ta spéra di se sérvus?

¹¹ Kuzê ki nu meste faze pa nu ka tropesa? Si nu ta ama verdadi nu ten ki  seta kes kuza ki Deus ta fla. (Lé João 8:45-47.) Anos é ka sima Satanás ki ka kontinua na verdadi. Nunka nu ka ta faze nada ki ka sta di akordu ku nos krénsa. (João 8:44 ) Deus krê pa kes algen ki ta sirbi-l ‘ôdia kel ki é mau’ i pa es ‘pega riju na kel ki é bon’ sima Jizus faze. — Rom. 12:9; Heb. 1:9.

12. Pamodi ki manera ki Jizus móre poi txeu judeu ta tropesa?

¹² Kal ki é otu kuza ki poi judeus ta tropesa na ténpu di Jizus? Polu fla: ‘Nu sta prega ma Kristu matadu na staka, ki é un asuntu ki ta poi judeus ta tropesa’. (1 Cor. 1:23) Dja ki Jizus móre na staka, txeu judeu ka seta ma el éra Misías. Pamodi? Pamodi mórti di Jizus na staka pô-l ta parse ku un kriminozu i un pekador, envês di Misías. — Deut. 21:22, 23.

13. Kuzê ki kes judeu ki tropesa pamodi mórti di Jizus ka rekonhese?

¹³ Kes judeu ki tropesa, ka leba en kónta txeu kuza. Es ka rekonhese ma Jizus ka tinha kulpa, ma el akuzadu di un kuza ki el ka faze i ma el tratadu di manera injustu. Kes juís ki kondena Jizus ka staba preokupadu ku justisa. Es julga Jizus ku présa i es ka ruspeta txeu lei sobri julgamentu. (Luc. 22:54; João 18:24 ) Si kes juís éra justu, es ta djobeba dretu kes akuzason ki fazedu kóntra Jizus. Má envês di kel-li, es mê ki ba ‘djobe tistimunhas falsu kóntra Jizus, pa es pode mataba el.’ I kantu kel-li ka da sértu, kel saserdóti prinsipal tenta poi Jizus ta fla un kuza ki es pode uzaba kóntra el. Kel-li éra kóntra kes lei di kel ténpu. (Mat. 26:59; Mar. 14:55-64) I mésmu dipôs ki Jizus resusitadu, kes juís kontinua ta aji di manera injustu. Es paga kes trópa ki staba ta guarda túmulu di Jizus ‘un bon kuantidadi di muédas di prata’ pa es spadja un stória falsu, ki ta splika pamodi ki korpu di Jizus dizaparse. — Mat. 28:11-15.

14. Kuzê ki Skrituras dja flaba sobri mórti di Misías?

 ¹⁴ Kuzê ki Skrituras ta fla? Nbóra txeu judeu di ténpu di Jizus ka ta atxaba ma Misías tinha ki moreba, repara kuzê ki Skrituras dja flaba: ‘El da se vida ti ki el móre, i el kontadu djuntu ku kes pekador; el karega pekadu di txeu algen i el pidi pa pekadoris.’ (Isa. 53:12) Pur isu judeus ka tinha ninhun motivu pa tropesaba kantu Jizus matadu sima si el éra un pekador.

15. Ki akuzasons kóntra Tistimunhas di Jeová dja poi txeu algen ta tropesa?

¹⁵ Nu ta odja mésmu prubléma ta kontise oji? Sin! Jizus akuzadu i el kondenadu di manera injustu i mésmu kuza ta kontise oji ku Tistimunhas di Jeová. Odja alguns izénplu. Na Mérka, di anu 1930 ti 1950 povu di Deus ba tribunal txeu bês pa ba difende ses liberdadi di adora Deus. Alguns juís mostra klaru ma es éra kóntra nos. Na Kebéki, na Kanadá, igreja ku Stadu trabadja djuntu pa kaba ku nos trabadju. Txeu publikador podu na kadia sô pamodi es pâpia ku ses vizinhu sobri Reinu di Deus. Na Alimanha, govérnu nazista mata txeu jóven fiel. I gósi txeu irmons na Rúsia dja prendedu i dja podu prézu pamodi es pâpia di Bíblia, ki é un kuza ki govérnu di Rúsia ta fla ma é kóntra ses lei. Ti Tradução do Novo Mundo da Bíblia Sagrada dja proibidu na Rúsia. Es ta fla ma el é un livru kóntra govérnu pamodi el ta uza nómi di Jeová.

16. Sima sta na 1 João 4:1, pamodi ki nu ka debe dexa kes stórias falsu kóntra povu di Jeová ngana-nu?

¹⁶ Kuzê ki nu meste faze pa nu ka tropesa? Nu meste sabe verdadi. Na kel diskursu ki Jizus faze na un monti, el aviza ma pesoas ‘ta konta mintira i ta fla tudu tipu di kuzas mariadu kóntra’ se disiplus. (Mat. 5:11) Tudu kes mintira li ta ben di Satanás. El ta poi kes algen ki é kóntra organizason di Jeová ta spadja mintira kóntra kes ki ta ama verdadi. (Apo. 12:9, 10) Nu ka debe obi kes mintira ki es ta konta. Nunka nu ka debe dexa kes mintira ta pô-nu ku medu ô ta frakise nos fé. — Lé 1 João 4:1.

17. Modi ki kes kuza ki kontise antis di Jizus móre, talvês poi alguns algen ta tropesa?

¹⁷ Un poku antis di Jizus móre, un di se 12 apóstlu trai-l. Otu apóstlu nega Jizus três bês i tudu kes otu apóstlu bandona-l na kel noti antis di se mórti. (Mat. 26:14-16, 47, 56, 75) Jizus ka fika spantadu. Dja el flaba antis ma kel-li ta kontiseba. (João 6:64; 13:21, 26, 38; 16:32 ) Talvês alguns algen tropesa kantu es odja kuzê ki kontise i es pensa: ‘Si é si ki apóstlus di Jizus ta aji, N ka krê faze párti di kel grupu la!’

18. Ki profesias kunpri antis di Jizus móre?

¹⁸ Kuzê ki Skrituras ta fla? Senténas di anu antis, Jeová dja flaba na se Palavra ma Misías ta sérba traídu pa 30 muéda di prata. (Zac. 11:12, 13) Kel traidor ta sérba un di kes grandi amigu di Jizus. (Sal. 41:9) Proféta Zakarias tanbê skrebe: ‘Da pastor pankada, i pa ribanhu fika spadjadu’. (Zac. 13:7) Kes algen ki éra sinseru, ka ta ben tropesaba pamodi kes kuza li. Envês di kel-li, óras ki es odjaba kes profesia ta kunpriba, ses fé ta fikaba más fórti inda.

19. Kuzê ki kes algen di korason sinseru sabe?

¹⁹ Nu ta odja mésmu prubléma ta  kontise oji? Sin. Na nos ténpu alguns Tistimunhas di Jeová txeu konxedu bandona verdadi, bira kóntra organizason di Jeová i es ta tenta disvia otus. Es ta uza kuzas sima internet i tilivizon pa spadja stórias falsu, kuzas ki ta konfundi algen kabésa i mintiras sobri Tistimunhas di Jeová. Má kes sinseru ka ta tropesa pamodi kes kuza li. Envês di kel-li, es sabe ma Bíblia dja flaba ma alguns algen ta biraba kóntra organizason di Jeová i ta tenta disvia otus. — Mat. 24:24; 2 Ped. 2:18-22.

20. Kuzê ki ta djuda-nu ka tropesa pamodi kes ki bandona verdadi? (2 Timóteo 4:4, 5 )

²⁰ Kuzê ki nu meste faze pa nu ka tropesa? Nu meste mante nos fé fórti. Pa kel-li, nu ten ki studa Bíblia sénpri, kontinua ta faze orason i mante okupadu na kel trabadju ki Jeová da-nu. (Lé 2 Timóteo 4:4, 5.) Si nu ten un fé fórti, nu ka ta fika ku medu óras ki nu ta obi kes notísia mariadu sobri Tistimunhas di Jeová. (Isa. 28:16) Nos amor pa Jeová, pa se Palavra i pa nos irmons ta djuda-nu ka tropesa pamodi kes ki bandona verdadi.

21. Nbóra maioria di algen oji ka ta seta nos mensaji, ki sertéza Palavra di Deus ta da-nu?

²¹ Na ténpu di Jizus, txeu algen tropesa i es ka seta ma el éra Misías. Má tanbê un monti algen seta ma Jizus éra Misías. Entri kes algen, staba un ménbru di kel Tribunal más altu di judeus i ti mésmu ‘un monti saserdóti’. (Atos 6:7; Mat. 27:57-60; Mar. 15:43) Mésmu kuza ta kontise oji. Milhons di algen ka ta dexa nada pô-s ta tropesa. Pamodi? Pamodi es konxe i es ta ama kes verdadi ki sta na Bíblia. É sima Palavra di Deus ta fla: ‘Kes ki ta ama bu lei ten grandi pas; nada ka ta pô-s tropesa.’ — Sal. 119:165.