1-2. Kal ki é un razon ki ta pô-nu ta presta atenson na livru di Apocalipse?

 ALGUN bês algen dja mostra-u un álbun di fotu? Óras ki bu ta djobe na kes fotu, bu ta odja txeu algen ki bu ka konxe. Má ten un fotu ki ta pô-u para i djobe-l dretu. Pamodi? Pamodi bu sta na kel fotu. I dipôs bu ta tenta lenbra na ki ténpu i na undi ki bu tra kel fotu. Tanbê, bu ta tenta odja si bu ta lenbra di kada algen na kel fotu. Kel fotu é spesial pa bo.

² Livru di Apocalipse é sima un fotu. Pamodi? Ten peloménus dôs razon. Primeru, kel livru di Bíblia li fazedu pa nos. Na kel primeru versíklu el ta fla: ‘Kuzas ki Jizus Kristu revela, ki Deus fla-l, pa el mostra se skravus kes kuza, ki sta kuazi ta ben kontise.’ (Apo. 1:1) Nton, kes kuza ki sta skrebedu na kel livru li é ka pa tudu algen, má é pa nos ki ta sirbi Deus. Dja ki nos é povu di Deus, nu ka ta fika dimiradu di sabe ma nu sta djuda pa profesias di kel livru li kunpri. Nton, óras ki nu sta ta lé livru di Apocalipse, é sima si nu sta ta odja nos kabésa “na kel fotu”.

3-4. Sima sta na livru di Apocalipse, na ki ténpu ki kes profesia ta kunpri i kuzê ki el ta krê pô-nu ta faze?

³ Sugundu razon é na ki ténpu ki kes profesia li ta kunpriba. Apóstlu Juan fla na ki ténpu ki es ta kunpriba.  El fla: ‘Ku ajuda di spritu santu, N staba na dia di Sinhor’. (Apo. 1:10) Juan skrebe kes palavra li pa vólta di anu 96 D.J., má ‘dia di Sinhor’ ta kumesaba txeu anu dipôs. (Mat. 25:14, 19; Luc. 19:12) Di akordu ku profesia di Bíblia, kel dia kumesa na anu 1914 kantu Jizus bira Rei na Séu. Kes profesia di Apocalipse ki ta aplika na povu di Deus kumesa ta kunpri na anu 1914. Pur isu, gósi nu sta ta vive na ‘dia di Sinhor’!

⁴ Dja ki nu sta ta vive na kel ténpu li, nu meste presta txeu atenson na kes konsedju ki sta na Apocalipse 1:3. La ta fla: ‘Filís é kel ki ta lé kes palavra di kel profesia li ku vós altu, i filís é kes ki ta obi i ta sigi kes kuza ki sta skrebedu na el, pamodi kel ténpu markadu sta kuazi ta txiga.’ Pur isu, nu meste lé ‘ku vós altu’ i nu meste ‘obi i sigi’ tudu kes kuza ki sta skrebedu na el. Kal ki é alguns di kes palavra ki nu debe obi ku el?

5. Modi ki livru di Apocalipse ta mostra-nu kuzê ki nu debe faze pa Jeová seta nos adorason?

⁵ Lógu ki nu kumesa ta lé primeru kapítlu di Apocalipse, nu ta odja klaru ma Jizus sabe tudu kuza ki sta kontise ku se povu. (Apo. 1:12-16, 20; 2:1) Kel mensaji ki Jizus manda pa kes 7 kongregason na Ázia Menór ta prova kel-li. Na kes mensaji Jizus da kes kriston di kel ténpu alguns orientason di modi ki es pode adoraba Jeová di manera ki el ta setaba. I tanbê kes kuza ki el fla na kes mensaji ta aplika na sérvus di Deus oji. Kuzê ki nu ta prende? Jizus Kristu, ki é nos Líder, sabe dretu modi ki nos amizadi ku Jeová sta. El ta gia-nu, proteje-nu i el ta odja tudu kuza ki ta kontise. I el sabe kuzê ki nu meste faze pa Jeová kontinua kontenti ku nos. Ki orientason ki el da-nu ki nu meste obi?

6. (a) Di akordu ku palavras di Jizus na Apocalipse 2:3, 4, ki prubléma kongregason di Éfezu tinha? (b) Kuzê ki nu ta prende ku kel-li?

⁶ Lé Apocalipse 2:3, 4. Nu ka debe perde kel amor ki nu tinha pa Jeová. Kel mensaji ki Jizus fla pa kongregason na Éfezu ta mostra ma es aguenta firmi i ma es kontinua ta sirbi Jeová, sikrê ku txeu prubléma. Má simé, es perde kel amor ki es tinha na komésu. Pur isu, es meste rekuperaba kel amor ki es tinha, asi pa Jeová setaba ses adorason. Di mésmu manera, oji nu meste aguenta firmi i faze-l pa motivus sértu. Jeová sta interesadu ka sô na kuzê ki nu ta faze, má tanbê na pamodi ki nu ta faze-l. Kel-li é inportanti pamodi Jeová krê pa nu adora-l ku bazi na amor i na gratidon ki nu ten pa el. — Pro. 16:2; Mar. 12:29, 30.

7. (a) Sima sta na Apocalipse 3:1-3, ki prubléma kongregason di Sardis tinha? (b) Kuzê ki nu meste faze?

⁷ Lé Apocalipse 3:1-3. Nu meste kontinua sienti. Irmons na kongregason di Sardis tinha un otu prubléma. Nbóra dja es sirbiba Jeová antis, es dexa di faze-l. Jizus fla pa es ‘korda’. Kuzê ki nu ta prende? É klaru ki Jeová  ka ta skese di nos trabadju. (Heb. 6:10) Má nu ka debe kunfia sô na kel trabadju ki dja nu fazeba pa Jeová. Nbóra talvês nu ka ta konsigi faze kel ki nu ta fazeba antis, nu meste kontinua okupadu ‘na óbra di Sinhor’, i mante sienti ti fin. — 1 Cor. 15:58; Mat. 24:13; Mar. 13:33.

8. Sima sta na Apocalipse 3:15-17, ki lison nu ta prende ku kes palavra ki Jizus fla irmons di Laudiseia?

⁸ Lé Apocalipse 3:15-17. Nu ten ki ten zelu i adora Jeová di tudu korason. Mensaji di Jizus pa kongregason na Laudiseia ta pâpia di un otu prubléma. Ses adorason staba ‘mornu’, pamodi es ka staba ta liga ses adorason. Pur isu Jizus fla ma es éra ‘mizeriadu i koitadu’. Es meste mostraba más zelu pa Jeová i pa se adorason. (Apo. 3:19) Kuzê ki nu ta prende? Si dja nu perde algun zelu, nu meste mostra más gratidon pa tudu kuza ki Jeová i se organizason ta faze pa nos. (Apo. 3:18) Nunka nu ka debe sforsa pa ten un vida sábi gósi ki ta poi nos adorason pa Jeová na sugundu lugar.

9. Sima kel mensaji ki Jizus fla kristons na Pérgamu i Tiatira, ki prigu nu meste ivita?

⁹ Nu debe nega ensinus di kes algen ki bandona verdadi. Jizus reprende kes irmon di Pérgamu pamodi es staba ta kria dizunion entri irmons. (Apo. 2:14-16) Jizus ilojia kes irmon di Tiatira pamodi es ivita kes ensinu ki ta ben di Satanás, i el insentiva-s pa es ‘pega riju’ na verdadi. (Apo. 2:24-26) Kes kriston ki staba fraku i ki kumesa ta sigi kes ensinu falsu meste rapendeba. Kuzê ki nu ta prende? Nu meste nega kalker ensinu ki é kóntra kes kuza ki Jeová ta fla. Kes algen ki bandona verdadi ‘ta finji ma es ta adora Deus, má es ka ta seta puder di es adorason.’ (2 Tim. 3:5) Si nos é bons studanti di Palavra di Deus, ta ser más fásil nu nega kes ensinu falsu. — 2 Tim. 3:14-17; Judas 3, 4.

10. Ki otu lison nu pode prende ku kuzê ki Jizus fla kes kongregason di Pérgamu i Tiatira?

¹⁰ Nu ka debe faze ô seta ninhun tipu di konportamentu seksual mariadu. Irmons na Pérgamu i Tiatira tinha un otu prubléma. Jizus reprende alguns  irmon di kes kongregason pamodi es staba ta seta konportamentu seksual mariadu. (Apo. 2:14, 20) Kuzê ki nu ta prende? Jeová ka ta seta ninhun tipu di konportamentu seksual mariadu ki nu ta faze, sikrê dja nu ten txeu ténpu ta sirbi-l ô nu ten txeu priviléjiu. (1 Sam. 15:22; 1 Ped. 2:16) Jeová ta spéra pa nu ten un bon konportamentu, sikrê mundu sta ta piora. — Efé. 6:11-13.

11. Kuzê ki dja nu prende ti gósi? (Tanbê odja kuadru “ Kuzê ki nu ta prende”.)

¹¹ Kuzê ki dja nu prende ti gósi? Nu prende ma nu debe ten sertéza ma Jeová ta seta nos adorason. Si nu sta ta faze algun kuza ki ta poi Jeová ka ta seta nos adorason, nu ten ki aji faxi i muda nos konportamentu. (Apo. 2:5, 16; 3:3, 16) Jizus tanbê pâpia di un otu kuza na kes mensaji ki el da kes kongregason. Nu ben odja é kuzê.

12. Kuzê ki nu pode prende ku kel mensaji ki Jizus da irmons di Smirna i Filadélfia? (Apocalipse 2:10)

¹² Nu ben odja kel mensaji ki Jizus da kes kongregason di Smirna ku Filadélfia. El fla kes kriston pa es ka fikaba ku medu di pasa pa pirsigison, pamodi Jeová ta rekonpensaba es si es kontinuaba fiel. (Lé Apocalipse 2:10; 3:10) Kuzê ki nu ta prende? Nu debe spéra ma nu ta pasa pa pirsigison i nu debe sta prontu pa aguenta-l. (Mat. 24:9, 13; 2 Cor. 12:10) Pamodi ki kel-li é inportanti?

13-14. Sima Apocalipse kapítlu 12 ta fla, kuzê ki ta ben kontiseba ku povu di Deus?

¹³ Livru di Apocalipse ta mostra-nu ma povu di Deus ta sérba pirsigidu na ‘dia di Sinhor’, ki é kel ténpu ki nu sta ta vive gósi. Apocalipse kapítlu 12 ta fla ma ta tinha un géra na Séu lógu dipôs ki Jizus biraba Rei. Migel, ki é Jizus Kristu dipôs ki el volta pa Séu, i se anjus ta brigaba ku Satanás i se dimónis. (Apo. 12:7, 8) Pamodi kel-li, inimigus di Deus botadu pa Téra i es traze txeu sufrimentu pa pesoas. (Apo. 12:9, 12) Má kuzê ki kontise ku povu di Deus?

¹⁴ Livru di Apocalipse ta fla-nu kuzê ki Satanás faze. Dja ki el ka pode entra na Séu más, el sta ta ataka kes skodjedu ku spritu santu li na Téra. Kes-li é kes ‘ki ses trabadju é da tistimunhu di Jizus.’ (Apo. 12:17; 2 Cor. 5:20; Efé. 6:19, 20) Modi ki kel profesia li kunpri?

15. Kenha ki ta reprizenta kes ‘dôs tistimunha’ ki Apocalipse kapítlu 11 ta pâpia di el i kuzê ki kontise ku es?

 ¹⁵ Satanás poi inimigus di Deus ta ataka kes irmon skodjedu ku spritu santu ki staba ta toma kónta di trabadju di pregason. Livru di Apocalipse ta pâpia di ‘dôs tistimunha’ ki matadu, ki ta reprizentaba kes irmon li. * (Apo. 11:3, 7-11) Na 1918, oitu di kes irmon ki staba ta toma kónta di organizason, fazedu akuzason falsu i es kondenadu pa pasa txeu anu na kadia. Kuazi tudu algen atxa ma é sima ki kel trabadju di kes skodjedu staba ‘mortu’.

16. Kuzê ki kontise na anu 1919, má kuzê ki Satanás kontinua ta faze désdi kel ténpu?

¹⁶ Profesia di Apocalipse kapítlu 11 ta fla ma dipôs di poku ténpu kes ‘dôs tistimunha’ ta viveba otu bês. Kel profesia kunpri di un manera ki ta dexa-nu dimiradu, pamodi un anu dipôs, kes irmon ki staba prézu tradu di kadia. Na marsu di 1919 kes irmon skodjedu ku spritu santu sai di kadia i dipôs tradu kes akuzason ki fazedu kóntra es. Kes irmon kumesa lógu ta faze trabadju di prega i inxina sobri Reinu. Má Satanás ka para di ataka povu di Deus. Désdi kel ténpu Satanás sta ta poi un ‘riu’ di pirsigison kóntra povu di Deus. (Apo. 12:15) Nton nos tudu nu meste ‘aguenta firmi i mostra fé.’ — Apo. 13:10.

17. Nbóra povu di Deus ta sufri ataki di Satanás, ki ajuda es ta resebe?

¹⁷ Apocalipse kapítlu 12 ta mostra ma povu di Deus ta ben resebeba ajuda di un lugar ki es ka staba ta spéra. Ta sérba sima si ‘Téra’ ta ‘inguliba kel riu’ di pirsigison. (Apo. 12:16) I é kel-li ki kontise. Alvês algun párti di mundu di Satanás, sima alguns tribunal, dja djuda povu di Deus. Txeu bês sérvus di Jeová dja ganha kazus na tribunal ki djuda-s ten algun liberdadi. Má modi ki es ta uza kel liberdadi li? Es sta ta pruveta tudu oportunidadi  di faze kel trabadju ki Jeová da-s. (1 Cor. 16:9) Ki trabadju é kel-li?

18. Ki trabadju inportanti nu sta ta faze na ténpu di fin?

¹⁸ Jizus fla ma se povu ta ben pregaba kes ‘notísia sábi di Reinu’ di Deus na Téra interu antis di fin ben. (Mat. 24:14) Óras ki es ta prega, es ta resebe ajuda di un anju ô grupu di anjus ki Bíblia ta fla ma ten ‘notísias sábi ki ta dura pa tudu ténpu, pa fla pa kes algen ki ta mora na Téra, pa tudu nasons, tribus, línguas i povus.’ — Apo. 14:6.

19. Ki otu mensaji kes algen ki ta ama Jeová ten ki prega?

¹⁹ Povu di Deus ka ta prega sô notísias sábi di Reinu. Tanbê es ta apoia trabadju ki anjus ta faze ki Apocalipse kapítlu 8 ti 10 ta pâpia di el. Kes anju ta aviza alguns difikuldadi ki kes ki ta nega Reinu di Deus ta ben pasa pa el. Pur isu, Tistimunhas di Jeová sta ta prega un mensaji ki é sima ‘granizu ku lumi’ ki ta mostra julgamentu di Deus kóntra mundu di Satanás. (Apo. 8:7, 13) Pesoas meste sabe ma fin sta kuazi ta txiga, asi pa es pode faze mudansa na ses vida i skapa na dia di Jeová. (Sof. 2:2, 3) Má é ka tudu algen ki krê obi kel mensaji li. Nu meste ten koraji pa nu prega kel mensaji li. Duránti grandi tribulason, kel últimu mensaji di julgamentu ta ben ser más duru inda. — Apo. 16:21.

20. Kuzê ki nu ta ben odja na kes otu dôs studu?

²⁰ Nu ten ki kontinua ta obi ku ‘kes palavra di kel profesia li’ dja ki nu ta faze párti di kuzê ki nu ta lé na livru di Apocalipse. (Apo. 1:3) Má modi ki nu pode aguenta pirsigison ku fé i kontinua ta prega kel mensaji li ku koraji? Dôs kuza ta djuda-nu: primeru, é sabe kuzê ki livru di Apocalipse ta fla sobri inimigus di Deus i sugundu, é sabe sobri kes benson ki nu ta ben resebe si nu kontinua fiel. Na kes otu dôs studu, nu ta ben pâpia sobri kel-li.