1. Ki disizon inportanti tudu algen ten ki toma?

 OJI pesoas ten un disizon inportanti pa es toma. Es ten ki disidi si es ta apoia Jeová, ki é kel Deus ki ten direitu di governa Séu ku Téra, ô si es ta fika di ladu di se piór inimigu, ki é Satanás. Ten sô kel dôs ladu li, i tudu algen ten ki disidi ki ladu ki es ta apoia. I disizon ki es ta toma pode da-s vida pa tudu ténpu ô nau. (Mat. 25:31-33, 46) Duránti ‘grandi tribulason’ es ta ben siparadu pa es salva ô pa es distruídu. — Apo. 7:14; 14:9-11; Eze. 9:4, 6.

2. (a) Kuzê ki Hebreus 10:35-39 ta insentiva-nu pa nu faze? (b) Modi ki livru di Apocalipse pode djuda-nu?

² Lé Hebreus 10:35-39. Si dja bu skodje apoia govérnu di Deus, kel-li é midjór disizon ki bu toma. Di sertéza bu tene gana di djuda otus algen toma kel mésmu disizon. Bu pode uza kes informason ki sta na livru di Apocalipse pa djuda-s. Kel livru li, ki ta dexa-nu dimiradu, ta pâpia sobri kuzê ki ta ben kontise ku inimigus di Jeová i di tudu kes benson ki kes algen ki ta apoia govérnu di Deus ta ben resebe. É inportanti nu studa kes verdadi li pamodi si nu faze kel-li el ta djuda-nu bira nos lialdadi pa Jeová más fórti. Tanbê nu pode uza kuzê ki nu prende pa djuda otus algen toma kel midjór disizon i kontinua ta sirbi Jeová.

3. Kuzê ki nu ta ben odja na kel studu li?

³ Na es studu, nu ta ben responde kes pergunta li: Kuzê ki ta ben kontise ku kes algen ki ta apoia govérnu di Deus? I kuzê ki ta ben kontise ku kes ki ta apoia kel féra brumedju ki livru di Apocalipse ta pâpia di el?

4. Ki grupu ki apóstlu Juan odja na Séu djuntu ku Jizus?

⁴ Na un vizon, apóstlu Juan odja dôs grupu ki ta apoia govérnu di Deus i ki ta ben resebe bensons di vive pa tudu ténpu. Na kel primeru grupu el odja 144 mil algen. (Apo. 7:4) Es skodjedu pa vive na Séu i pa governa djuntu ku Jizus na Reinu di Deus. La di Séu es ta governa Téra djuntu ku Jizus. (Apo. 5:9, 10; 14:3, 4) Na kel vizon, Juan odja-s sakédu djuntu ku Jizus na Monti Sion na Séu. — Apo. 14:1.

5. Kuzê ki ta ben kontise já-já ku kel réstu di 144 mil ki inda sta na Téra?

⁵ Désdi ténpu di apóstlus ti gósi, monti algen dja skodjedu pa faze párti di kel grupu di 144 mil. (Luc. 12:32; Rom. 8:17) Má Juan fladu ma é sô un réstu, ô un grupu pikinoti, di kes 144 mil ki ta sta bibu na Téra duránti ténpu di fin. Antis di grandi tribulason kumesa, kel réstu di 144 mil ki inda sta na Téra ta resebe kel ‘sélu’ final ki ta konfirma ma es ta lebadu pa Séu. (Apo. 7:2, 3; 12:17) Dipôs, duránti grandi tribulason es ta lebadu pa Séu. La es ta bai djunta ku kes otu skodjedu ki móre fiel, i es ta bai governa djuntu ku Jizus. — Mat. 24:31; Apo. 5:9, 10.

6-7. (a) Ki otu grupu Juan odja dipôs i kuzê ki nu sabe sobri es? (b) Pamodi ki kes skodjedu i kel ‘monti di algen’ debe sta interesadu na kuzê ki Apocalipse kapítlu 7 ta fla?

⁶ Dipôs ki Juan odja kel grupu ki ta bai pa Séu, el odja ‘un monti di algen’. Bíblia ka ta fla kantu algen ki ta faze párti di kel grupu li. (Apo. 7:9, 10) Kuzê ki nu sabe sobri kel grupu li? Juan fladu: ‘Kes-li é kes ki ta sai di grandi tribulason; es laba ses ropa kunpridu i es bira-s branku na sangi di Korderu.’ (Apo. 7:14) Dipôs ki es salva na grandi tribulason, kel ‘monti di algen’ li ta ben vive na Téra pa tudu ténpu i es ta ten txeu benson. — Sal. 37:9-11, 27-29; Pro. 2:21, 22; Apo. 7:16, 17.

⁷ Nu ta konsigi imajina nos kabésa ta resebe kes benson ki Apocalipse kapítlu 7 ta pâpia di el, sikrê nu skodjedu pa nu vive na Séu ô na Téra? Nu debe faze kel-li. Ta ben ser un ténpu rei di sábi pa tudu kes ki ta adora Jeová! Di sertéza nu ta ben fika txeu kontenti pamodi nu skodje apoia govérnu di Deus. Má kuzê más ki livru di Apocalipse ta fla-nu sobri grandi tribulason? — Mat. 24:21.

8. Modi ki grandi tribulason ta ben kumesa i kuzê ki kuazi tudu algen ta ben faze?

⁸ Sima nu odja na kel studu ki pasa, ka ta dura govérnus di kel mundu li ta ben ataka Babilónia Grandi, ki ta reprizenta tudu kes relijion falsu. (Apo. 17:16, 17) É si ki grandi tribulason ta kumesa. Má kel-li ta ben poi monti algen ta kumesa ta sirbi Jeová? Nau. Envês di kel-li, Apocalipse kapítlu 6 ta mostra ma kes algen ki ka ta sirbi Jeová ta bai djobe proteson na pulítikus i na komérsiu di kel mundu li, ki na Bíblia ta konparadu ku montanhas.  Dja ki es ka ta ben apoia Reinu di Deus, kes algen li ta bira inimigu di Jeová. — Luc. 11:23; Apo. 6:15-17.

9. Modi ki povu di Jeová ta ben mostra ma es é diferenti na grandi tribulason i kal ki ta ben ser rezultadu?

⁹ Duránti grandi tribulason, ki é un ténpu difísil, otus algen ta ben repara más inda ma povu di Jeová é diferenti. Es ta kontinua ta ser kel úniku grupu di algen na Téra ki ta sirbi Jeová i ki ta nega apoia ‘kel féra’. (Apo. 13:14-17) Dja ki es ta kontinua lial, kes inimigu di Jeová ta fika ku txeu raiba. Pur isu, un grupu di nasons ta ben ataka povu di Deus na Téra interu. Bíblia ta txoma kel ataki li di ataki di Gogi di Magogi. — Eze. 38:14-16.

10. Sima sta na Apocalipse 19:19-21, modi ki Jeová ta ben reaji óras ki se povu atakadu?

¹⁰ Modi ki Jeová ta ben reaji óras ki se povu atakadu? El ta fla-nu: ‘N ta ben xinti txeu raiba.’ (Eze. 38:18, 21-23) Apocalipse kapítlu 19 ta mostra kuzê ki ta ben kontise dipôs. Jeová ta manda se Fidju pa proteje se povu i pa kaba ku inimigus di se povu. Jizus ku ‘kes trópa na Séu’, ki é kes anju fiel i kes 144 mil kriston skodjedu, ta ben ataka Gogi di Magogi. (Apo. 17:14; 19:11-15) Kuzê ki ta ben kontise na kel géra li? Tudu kes algen i kes organizason ki é kóntra Jeová ta ben distruídu pa tudu ténpu! — Lé Apocalipse 19:19-21.

11. Kal ki é kel kontisimentu más inportanti di livru di Apocalipse?

¹¹ Óras ki kes inimigu di Deus ben distruídu, se sérvus fiel ta skapa ku vida. Imajina modi ki es ta ben xinti! Kel-li ta ben ser un ténpu sábi! Nbóra ta ben ten grandi alegria na Séu óras ki Babilónia Grandi distruídu, ta ben ten otu kuza ki ta ben traze más alegria inda. (Apo. 19:1-3) É ‘kazamentu di Korderu’, ki é kel kontisimentu más inportanti di livru di Apocalipse. — Apo. 19:6-9.

12. Sima sta na Apocalipse 21:1, 2, ki ténpu ki kazamentu di Korderu ta ben kontise?

¹² Ki ténpu ki kel kazamentu li ta ben kontise? Tudu kes 144 mil ta sta na Séu antis di géra di Armajedon kumesa. Má inda é ka ténpu di kazamentu di Korderu. (Lé Apocalipse 21:1, 2.) Kazamentu di Korderu ta ben kontise dipôs ki géra di Armajedon kaba ku tudu inimigus di Deus. — Sal. 45:3, 4, 13-17.

13. Kuzê ki ta ben kontise na kazamentu di Korderu?

¹³ Kuzê ki ta ben kontise na kazamentu di Korderu? Sima un kazamentu ta djunta un ómi ku un mudjer, kel kazamentu li ta ben djunta Rei Jizus Kristu ku kes 144 mil, ki é se ‘noiva’. Óras ki kel kuza inportanti li kontise, kel govérnu novu ta ben kumesa ta governa Téra duránti mil anu. — Apo. 20:6.

14-15. Ku kuzê ki Apocalipse kapítlu 21 ta konpara kes 144 mil? (Odja dizenhu na kapa.)

¹⁴ Dipôs, Apocalipse kapítlu 21 ta konpara kes 144 mil ku un sidadi rei di bunitu ki txoma ‘Jiruzalen Novu’. (Apo. 21:2, 9) Kel sidadi li ten  bazi na kes 12 pédra di alisérsi ki ten skrebedu ‘nómi di kes 12 apóstlu di Korderu.’ Pamodi ki kel-li ta interesaba Juan? Pamodi el odja se nómi skrebedu na un di kes pédra. Kel-li éra un priviléjiu grandi! — Apo. 21:10-14; Efé. 2:20.

¹⁵ Kel sidadi li é diferenti di kalker otu sidadi. Se rua prinsipal é di oru puru. El ten 12 porton di pérula, se alisérsi i kes paredi ten pédras di txeu valor na el. I tanbê se medidas é perfeitu. (Apo. 21:15-21) Má Juan da kónta ma staba ta falta algun kuza. El fla: ‘N ka odja ninhun ténplu na el, pamodi Jeová Deus, kel Tudu-Poderozu, é se ténplu, i Korderu tanbê é se ténplu. Kel sidadi ka meste nen sól nen lua pa da-l lus, pamodi glória di Deus ta límia-l, i se lánpida é Korderu.’ (Apo. 21:22, 23) Kes ki ta faze párti di Jiruzalen Novu ta sta ku Jeová. I Jizus, ki dja é Saserdóti Prinsipal na Séu, é ses Líder. Pur isu, es ka meste ten un ténplu más. (Heb. 7:27; Apo. 22:3, 4) Asi, Jeová ku Jizus é ténplu di kel sidadi.

16. Kuzê ki ta ben kontise ku tudu algen duránti Govérnu di mil anu di Reinu di Deus?

¹⁶ Óras ki kes kriston skodjedu ta pensa na kel sidadi li es ta fika dimiradu. Má kes ki ten speransa di ben vive na Téra, tanbê debe ten interesi na kel sidadi li. Pamodi duránti Govérnu di mil anu di Reinu di Deus, Jiruzalen Novu ta ben traze txeu benson pa Téra. Juan odja kes benson sima ‘un riu di agu di vida’. I na kes dôs ladu di kel riu, ten ‘arvis di vida’ ki ta da fódjas ki ta ‘sirbi pa kura nasons’. (Apo. 22:1, 2) Tudu kes algen ki ta sta na Téra ta ben resebe kes benson li. I poku-poku tudu algen ki obi ku Jeová ta ben bira perfeitu. Ka ta ben ten duénsa más, nen dór i ningen ka ta ben txora pamodi tristéza. — Apo. 21:3-5.

17. Sima sta na Apocalipse 20:11-13, kenha ki ta ben resebe kes benson na Govérnu di mil anu?

¹⁷ Kenha ki ta ben resebe kes benson li? Primeru, é kel monti di algen ki ta  salva na Armajedon i kes mininu ki pode ben nase na mundu novu. Má Apocalipse kapítlu 20 tanbê ta promete ma ta ben ten resureison. (Lé Apocalipse 20:11-13.) Kes algen ‘justu’ ki móre na pasadu i kes algen ‘injustu’ ki ka tevi oportunidadi di konxe Jeová, ta ben resusitadu pa vive na Téra. (Atos 24:15; João 5:28, 29) Kel-li krê fla ma tudu algen ta ben resusitadu pa vive na Téra duránti kel Govérnu di mil anu? Nau. Kes algen ki tevi xansi di sirbi Jeová antis di es móre, má ki ka faze kel-li pamodi es é mau, ka ta resusitadu. Es prova ma es ka merese vive na Paraízu na Téra. — Mat. 25:46; 2 Tes. 1:9; Apo. 17:8; 20:15.

18. Modi ki algen ta sta na fin di kes mil anu?

¹⁸ Na fin di kes mil anu, tudu algen na Téra ta ben bira perfeitu. Kel pekadu ki nu erda di Adon ka ta ben prujudika ningen más, pamodi el ta ben kabadu ku el. (Rom. 5:12) Na fin di kes mil anu, kes algen na Téra ta ‘torna vive otu bês’ pamodi es ta bira perfeitu. — Apo. 20:5.

19. Ki oportunidadi kada algen ta ben ten na kel próva final?

¹⁹ Sikrê ku tentason di Satanás, Jizus kontinua lial pa Deus. Má óras ki Satanás ben prova tudu algen perfeitu, es ta kontinua lial sima Jizus? Kada algen ta ben ten oportunidadi di prova se lialdadi pa Jeová óras ki Satanás ben tradu di abismu na fin di kes mil anu. (Apo. 20:7) Kes algen ki kontinua lial na kel próva final ta ben resebe vida pa tudu ténpu i es ta ben ten liberdadi di verdadi. (Rom. 8:21) Kes ki sigi Satanás i rabela kóntra Jeová ta ben distruídu pa tudu ténpu djuntu ku Diabu i se dimónis. — Apo. 20:8-10.

20. Modi ki bu ta xinti dipôs di studa kes profesia ki nu ta atxa na livru di Apocalipse?

²⁰ Modi ki bu ta xinti dipôs di studa alguns informason di livru di Apocalipse? Bu ka ta fika animadu di odja kes profesia li ta kunpri? Bu ka ta xinti gana di djuda otus algen ben da Jeová adorason puru? (Apo. 22:17) Dipôs di studa kes kuza ki ta ben kontise na futuru, nu sta animadu i nu krê fla sima apóstlu Juan: ‘Amén! Ben, Sinhor Jizus.’ — Apo. 22:20.