1-2. Pamodi ki alguns prinsípiu di Bíblia pode bira más inportanti pa nos óras ki alguns kuza muda na nos vida?

 NA DIA di ses kazamentu, noivu ku noiva ta presta atenson na diskursu di kazamentu ki ten bazi na Bíblia. Dja es konxe kes prinsípiu di Bíblia ki ta papiadu di el na kel diskursu. Má di kel dia pa frenti, kes prinsípiu ta bira más inportanti pa es. Pamodi? Pamodi es ten ki aplika-s na ses kazamentu.

² É kel mésmu kuza ki ta kontise ku un kazal óras ki es ten ses primeru fidju. Sima anus ba ta pasa, talvês dja es obi txeu diskursu sobri modi ki ta kriadu fidju. Má gósi kes prinsípiu ta bira más inportanti pa es pamodi es ten un fidju pa es kria. Kel-li é un responsabilidadi grandi! Óras ki alguns kuza muda na nos vida, alguns prinsípiu di Bíblia ta bira más inportanti pa nos. Kel-li é un di kes motivu pa nu lé Bíblia i midita na el ‘tudu dia’ di nos vida, sima Jeová fla kes rei na Israel pa es fazeba. — Deut. 17:19.

3. Kuzê ki nu sta ben odja na kel studu li?

³ Pai ku mai, nhos ten un di kes priviléjiu más grandi ki un sérvu di Deus pode ten, ki é inxina nhos fidjus sobri Jeová. Má nhos ka krê sô inxina-s sobri Jeová. Nhos krê djuda nhos fidjus ama Jeová di korason. Modi ki nhos pode faze kel-li? Na kel studu li, nu sta ben pâpia di kuatu prinsípiu di Bíblia ki pode  djuda nhos. (2 Tim. 3:16) I tanbê nu ta ben odja modi ki aplika kes prinsípiu li djuda alguns pai ku mai.

4. Ki prinsípiu pode djuda pai ku mai inxina ses fidjus ama Jeová? (Tiago 1:5)

⁴ Prinsípiu 1: Nhos djobe orientason di Jeová. Nhos pidi Jeová pa da nhos sabedoria ki nhos meste pa djuda nhos fidjus ama-l. (Lé Tiago 1:5.) Jeová é kel midjór Algen pa djuda nhos. Pamodi? Primeru, ka ten ningen ki ten más spiriénsia na kria fidju ki el. (Sal. 36:9) I sugundu, kes bon konsedju ki el ta da sénpri ta da bons rezultadu. — Isa. 48:17.

5. (a) Kuzê ki organizason di Jeová ta da pai ku mai pa djuda-s? (b) Sima sta na vídiu, kuzê ki bu prende ku izénplu di irmon Abílio i irman Ulla na kria ses fidjus?

⁵ Através di se Palavra i di se organizason, Jeová ta da txeu kumida spritual ku bazi na Bíblia ki pode djuda nhos kria nhos fidjus pa ama-l. (Mat. 24:45) Pur izénplu, nhos pode atxa txeu bons konsedju na kel grupu di artigu “Ajuda pa família”, ki antis ta binha na revista Nhos korda!, má gósi sta na nos site. Alén di kel-li, ten txeu vídiu na jw.org ki pode djuda pai ku mai aplika kes konsedju di Jeová pa kria ses fidjus. * — Pro. 2:4-6.

6. Kuzê ki un pai ta xinti ku kes orientason ki el ku se mudjer ta resebe di organizason di Jeová?

⁶ Txeu pai ku mai ta agradese pa ajuda ki Jeová sta ta da através di se organizason. Un pai ki txoma Joe fla: “Kria três fidju na verdadi é difísil. Mi ku nha mudjer sénpri nu ta faze orason pa Jeová djuda-nu. I txeu bês nu ta xinti ma un artigu ô un vídiu ta sai na óra sértu pa djuda-nu lida ku un situason ki nu sta pasa pa el. Sénpri nu kunfia na orientason di Jeová.” Joe ku se mudjer da kónta ma kes artigu i kes vídiu sta ta djuda ses fidjus bira más amigu di Jeová.

7. Pamodi ki é inportanti pai ku mai faze ses midjór pa da un bon izénplu? (Romanos 2:21)

 ⁷ Prinsípiu 2: Nhos da un bon izénplu. Fidjus ta djobe dretu kuzê ki pai ku mai ta faze, i txeu bês es ta imita-s. I é klaru ki ninhun pai ô mai é ka perfeitu. (Rom. 3:23) Má simé, pai ku mai debe faze ses midjór pa da un bon izénplu pa ses fidjus. (Lé Romanos 2:21.) Odja kuzê ki un pai fla: “Fidjus é sima un spónja ki ta txupa tudu kuza. Es ta fla-nu óras ki nu ka faze kes kuza ki nu inxina-s.” Nton, si nu krê pa nos fidjus ama Jeová, nos amor pa Jeová ten ki sta fórti i klaru.

8-9. Kuzê ki bu prende di kel ki André ku Emma fla?

⁸ Ten txeu manera ki pai ku mai pode inxina ses fidjus ama Jeová. Odja kuzê ki un irmon di 17 anu ki txoma André, fla: “Nha pai ku nha mai sénpri ta mostraba mi ma faze orason é inportanti. Tudu noti nha pai ta fazeba orason ku mi, sikrê dja N fazeba nha orason. Nha pai ku nha mai sénpri ta flaba: ‘Bu pode pâpia ku Jeová kantu bês ki bu krê.’ Pamodi kel-li, orason bira un di kes kuza más inportanti na nha vida. Gósi N ta xinti avontádi pa faze orason i N ta xinti ma Jeová é un Pai ki ta ama-m.” Pai ku mai, nhos lenbra sénpri ma amor ki nhos ten pa Jeová pode djuda nhos fidjus ama-l tanbê.

⁹ Odja tanbê izénplu di Emma. Kantu se pai bandona se família, el dexa se mai ku txeu dívida. Emma fla: “Txeu bês nha mai tinha falta di dinheru, má sénpri el ta flaba modi ki Jeová ta kuida di se sérvus. N ta odjaba na se izénplu ma el ta kriditaba na kel-li. Nha mai ta fazeba kel ki el ta inxinaba mi.” Kuzê ki nu ta prende? Mésmu óras ki situason sta difísil, pai ku mai pode inxina através di ses izénplu. — Gál. 6:9.

10. Ki oportunidadis txeu pai ku mai israelita tinha di papiaba ku ses fidjus? (Deuteronómio 6:6, 7)

¹⁰ Prinsípiu 3: Nhos pâpia sénpri ku nhos fidjus. Jeová fla kes israelita na ténpu antigu pa es inxinaba ses fidjus sénpri sobri el. (Lé Deuteronómio 6:6, 7.) Na kel ténpu pai ku mai tinha txeu oportunidadi duránti dia pa papiaba ku ses fidjus i inxinaba es ama Jeová. Pur izénplu, un rapazinhu israelita pode pasaba txeu óra na kanpu ta djuda se pai símia ô faze kodjéta. Se irman pode pasaba kuazi dia interu ta djuda se mai faze trabadjus di kaza. Óras ki pai ku mai ta trabadjaba djuntu ku ses fidjus es pode papiaba di txeu kuza inportanti. Pur izénplu, es pode papiaba di modi ki Jeová dja mostraba bondadi i modi ki el staba ta djuda se família.

11. Ki oportunidadi pai ku mai ten pa pâpia ku ses fidjus?

¹¹ Má gósi kuza é diferenti. Na txeu país, pai ku mai ka ta konsigi pasa txeu ténpu ku ses fidjus duránti dia. Pai ku mai pode sta na trabadju i fidjus pode sta na skóla. Pur isu, pai ku mai debe djobe oportunidadis pa pâpia ku ses fidjus. (Efé. 5:15, 16; Fil. 1:10) Adorason na família é un bon oportunidadi pa faze kel-li. Un jóven ki txoma Alexander, fla: “Nha pai ta fazeba  adorason na família sénpri, i el ka ta dexaba nada inpidi-nu di faze adorason na família. I dipôs nu ta fika ta papiaba.”

12. Di kuzê ki un xéfi di família debe lenbra óras ki el ta faze adorason na família?

¹² Si bo é xéfi di família, kuzê ki bu pode faze pa bus fidju gosta más txeu di adorason na família? Pur izénplu, nhos pode studa kel livru novu Vive filís pa tudu ténpu!. Kel livru li ta da nhos oportunidadi di ten un konbérsu animadu ku nhos fidjus. Nhos krê pa nhos fidjus pâpia ku nhos sobri kuzê ki es sta ta pensa i kuzê ki sta ta preokupa-s. Nton, ka nhos uza adorason na família pa kritika-s ô pa koriji-s. I si nhos fidjus fla algun kuza ki ka sta di akordu ku prinsípius di Bíblia, ka nhos xatia. Envês di kel-li, nhos fika kontenti pamodi es fla nhos kuzê ki es sta ta xinti i nhos dexa-s avontádi pa es kontinua ta fla nhos kuzê ki es ta xinti. Sô nhos ta konsigi djuda nhos fidjus si nhos sabe kuzê ki es sta ta xinti di verdadi.

13. Ki otus oportunidadi pai ku mai ten pa djuda ses fidjus bira más amigu di Jeová?

¹³ Pai ku mai, nhos djobe oportunidadis duránti dia pa djuda nhos fidjus bira más amigu di Jeová. Nhos ka meste spéra pa inxina-s sobri Jeová sô óras ki nhos ta studa Bíblia ku es. Nhos odja kuzê ki un mai ki txoma Liza, fla: “Nu ta uza tudu kuza ki sta na naturéza pa inxina nos fidjus sobri Jeová. Pur izénplu, óras ki nos katxor ta faze algun kuza ki ta poi nos fidjus ta ri, nu ta fla-s ma kel-li ta mostra ma Jeová é un Deus filís i ma el faze kes kuza li pa nu ser filís i pa nu gosta di kuzas divirtidu tanbê.”

14. Pamodi ki é inportanti pai ku mai djuda ses fidjus ranja bons amigu? (Provérbios 13:20)

¹⁴ Prinsípiu 4: Nhos djuda nhos fidjus ten bons amigu. Palavra di Deus ta mostra klaru ma nos amigus pode pô-nu ta faze kuzas dretu ô kuzas  mariadu. (Lé Provérbios 13:20.) Pai ku mai, nhos konxe amigus di nhos fidjus? Dja nhos pasa ténpu ku es pa nhos pode konxe-s? Kuzê ki nhos pode faze pa djuda nhos fidjus ranja amigus ki ta ama Jeová? (1 Cor. 15:33) Nhos pode konvida kes irmon ki ten un bon amizadi ku Jeová pa faze alguns kuza djuntu ku nhos i ku nhos fidjus. — Sal. 119:63.

15. Kuzê ki pai ku mai pode faze pa djuda ses fidjus ten bons amigu?

¹⁵ Odja kuzê ki kontise ku un pai, ki txoma Toni. El fla kuzê ki el ku se mudjer es faze pa djuda ses fidjus ranja bons amigu. El fla: “Duránti txeu anu mi ku nha mudjer, nu konvida txeu irmon ku irmans diferenti pa nos kaza, uns éra jóven i otus éra algen grandi. Nu ta kumeba djuntu i nu ta fazeba adorason na família. Kel-li é un bon manera di konxe kes ki ta ama Jeová i ki ta sirbi-l ku alegria. Dja nu tevi priviléjiu di resebe na nos kaza alguns enkaregadu di grupu di kongregason, misionárius i otus irmon. Nos fidjus prende txeu kuza di kes spiriénsia ki es konta, di zelu ki es mostra i di trabadju duru ki es faze na sirvisu di Jeová. Tudu kes kuza li djuda nos fidjus bira más amigu di Jeová.” Pai ku mai, nhos debe sta disididu na djuda nhos fidjus ten bons amigu.

16. Kuzê ki pai ku mai debe lenbra si un fidju fla ma el ka krê sirbi Jeová más?

¹⁶ Má i si ku tudu sforsu ki nhos faze, un di nhos fidju fla ma el ka krê sirbi Jeová? Ka bu xinti ma é bo ki é kulpadu. Jeová da tudu algen liberdadi di skodje. Kel-li krê fla ma bus fidju ten kapasidadi di skodje si es ta sirbi Deus ô nau. Si bu fidju disidi bandona Jeová, ka bu perde speransa ma un dia el ta volta. Lenbra di kel ilustrason di kel fidju ki perde. (Luc. 15:11-19, 22-24) Kel jóven faze txeu kuza mariadu,  má dipôs el volta. Alguns algen pode fla: “Kel-li é sô un ilustrason. Kel-li ta kontise própi?” Klaru ki sin! Na verdadi é kel-li ki kontise ku un jóven ki txoma Elie.

17. Pamodi ki spiriénsia di Elie ta nkoraja-u?

¹⁷ Elie fla kel-li sobri se pai ku se mai: “Es faze ses midjór pa es djuda-m ama Jeová i se Palavra, Bíblia. Má kantu N tinha uns 15 anu, N kumesa ta rabela.” Elie kumesa ta faze alguns kuza mariadu sukundidu. Se pai ku se mai tenta djuda-l midjora se amizadi ku Jeová, má el ka obi ku es. Dipôs el sai di kaza i el faze kuzas mariadu. Má simé, alvês el ta papiaba sobri Bíblia ku un se amigu. Elie da kónta ma óras ki el papiaba más txeu sobri Jeová ku se amigu, el ta pensaba más txeu na Jeová. Elie fla: “Poku-poku kes simenti di verdadi di Bíblia ki staba kuazi ta móre na nha korason i ki nha pai ku nha mai simiaba, kumesa ta kria.” Ku ténpu Elie volta pa verdadi. * Imajina modi ki se pai ku se mai fika kontenti pamodi es tenta inxina-l ama Jeová désdi pikinoti! — 2 Tim. 3:14, 15.

18. Kuzê ki bu ta xinti pa kes pai ku mai ki ta sforsa txeu pa inxina ses fidjus ama Jeová?

¹⁸ Pai ku mai, Jeová da nhos un prezenti bunitu ki é kria un jerason novu ki ta adora Jeová. (Sal. 78:4-6) Kel-li é ka un trabadju fásil i nu ta ilojia nhos di korason pa sforsu ki nhos ta faze pa djuda nhos fidjus. Si nhos kontinua ta faze nhos midjór pa djuda nhos fidjus ama Jeová i inxina-s obi ku el, nhos pode ten sertéza ma nos Pai na Séu, ki krê-nu txeu, ta fika kontenti ku nhos. — Efé. 6:4.