Na verdadi ningen ka ten sertéza modi ki éra aparénsia di apóstlu Polu. Dizenhus i pinturas ki ta parse na nos publikason é óbras di arti. Es é ka óbras ki arkiólugus diskubri.

Má dja ten algun ténpu, ki ten alguns informason sobri aparénsia di Polu. Pur izénplu, revista A Torre de Vigia de Sião (gósi Sentinéla) di 1 di marsu di 1902 fla un di kes informason: “Sobri aparénsia di Polu: . . . Na livru di ‘Atos de Paulo e Tecla’, . . . ki skrebedu talvês na anu 150 D.J., ta pâpia sobri aparénsia di Polu ki pode ser kel midjór i kel ki sta más pértu di modi ki el éra. El ta fla ma Polu éra ‘baxu, karéka, pé tórtu, fórti, ku pistana djuntadu i narís kunpridu.’”

Un disionáriu di Bíblia fla sobri livru Atos de Paulo e Tecla: “Pode ser ki alguns informason ki ta parse na ‘Atos’ é verdadi.” Na ténpu di apóstlus, livru di Atos de Paulo e Tecla éra txeu ruspetadu. Ti inda ten 80 óbra di es livru na gregu i tanbê na otus língua. Pur isu, kes dizenhu ô pintura di apóstlu Polu na nos publikason sta di akordu ku alguns informason antigu.

Nu debe lenbra ma más inportanti é ka aparénsia di Polu. Mésmu kantu Polu ta fazeba se trabadju di pregason, alguns ta kritikaba el i es ta flaba ma se prezénsa éra fraku i se palavra ka tinha valor. (2 Cor. 10:10) Má nu debe lenbra ma el bira un kriston pamodi un milagri di Jizus. Tanbê nu debe lenbra di tudu kuza ki Polu faze pamodi Jizus Kristu uza-l pa leba se nómi dianti di kes ki ka éra judeu. (Atos 9:3-5, 15 ; 22:6-8 ) Nu ka pode skese ma kes livru di Bíblia ki Polu skrebe sima Jeová orienta-l, ta inxina-nu txeu kuza inportanti.

Polu faze txeu kuza inportanti antis di el bira kriston, má el ka fika ta ngaba di kel-la. Tanbê el ka fla modi ki se aparénsia éra. (Atos 26:4, 5 ; Fil. 3:4-6) El fla: ‘Ami é kel apóstlu ménus inportanti, N ka ta merese pa N txomadu di apóstlu’. (1 Cor. 15:9) Dipôs el skrebe: ‘Ami, algen más pikinoti di ki tudu kes santu, N dadu es bondadi ki N ka merese, asi pa N pâpia ku nasons sobri notísias sábi di rikézas grandi di Kristu.’ (Efé. 3:8) Nu ka ten dúvida ma kel mensaji li é mutu más inportanti ki kalker preokupason ku aparénsia di Polu.