1, 2. (a) Modi ki alguns pai ku mai ta xinti óras ki ses fidju pidi batiza? (b) Pamodi ki ken ki sta ba batiza ta perguntadu si dja es da ses vida pa Jeová? (Odja fotu na komésu di studu.)

SARA, ki é un minina di 9 anu, fika sakédu djuntu ku kes otu algen ki staba ta ba batiza. Se pai ku se mai staba ta djobe-l timenti ta fazedu kes dôs pergunta di batismu. El responde altu pa tudu algen pode obi. Dipôs el batizadu.

² Pai ku mai di Sara staba orgulhozu pamodi ses fidju-fémia disidi da se vida pa Jeová i batiza. Má simé, un ténpu antis se mai tinha alguns dúvida. El ta perguntaba se kabésa: ‘Má Sara ka sta mininu pa batiza? El ta ntende ma batismu é un kuza sériu? É ka midjór el spéra más ténpu?’ É normal pai ku mai faze kes pergunta li óras ki un fidju fla-s ma el krê batiza. (Ecl. 5:5) Di tudu manera, da vida pa Jeová i batiza é dôs kuza más inportanti ki un algen pode faze na se vida. — Odja kuadru “ Dja bu da bu vida pa Jeová?”

3, 4. (a) Ku kuzê ki apóstlu Pedru konpara batismu pa mostra ma el é inportanti? (b) Pamodi ki batismu pode ser konparadu ku arka ki Nué faze?

 ³ Apóstlu Pedru kompara batismu ku arka ki Nué faze. Pa mostra ma batismu é inportanti, el fla: ‘Batismu, ki ta reprizenta kel-li, tanbê ta salva nhos gósi’. (Lé 1 Pedro 3:20, 21.) Arka éra un próva klaru pa tudu algen ma Nué ta fazeba vontadi di Deus. El foi fiel i el faze tudu kel ki Jeová manda-l. Pamodi fé ki Nué mostra, el ku se família salva kantu Deus manda Dilúviu. Kuzê ki Pedru krê flaba kantu el faze kel konparason li?

⁴ Sima arka ta provaba tudu algen ma Nué tinha fé na Deus, tanbê batismu é un próva klaru. Próva di kuzê? Ma kel algen dja da se vida pa Jeová, ku bazi na fé ki el ten na sakrifisiu i resureison di Jizus Kristu. Sima Nué, kes algen ki da ses vida pa Deus, ta obi ku el i ta faze trabadju ki Deus manda-s. Di mésmu manera ki Jeová salva Nué kantu El traze Dilúviu, asi tanbê el ta salva kes algen ki batiza i ki mante fiel óras ki el ben kaba ku es mundu mau. (Mar. 13:10; Apo. 7:9, 10) Tudu kel-li ta mostra ma da nos vida pa Deus i batiza é txeu inportanti. Un algen ki ta fika ta âdia batismu sen ten un bon motivu, el pode perde xansi di vive pa tudu ténpu.

5. Kuzê ki nu sta ben odja na es studu?

⁵ Gósi ki dja nu sabe ma batismu é un kuza sériu, nu ben responde três pergunta: Kuzê ki Bíblia ta fla sobri batismu? Kuzê ki un algen meste faze antis di el batiza? Pamodi ki bu debe lenbra bu studanti di Bíblia ô bu fidju ma batiza é inportanti?

6, 7. (a) Pamodi ki gentis ta baba na Juan pa el batiza-s? (b) Ki batismu más inportanti Juan faze?

⁶ Primeru bês ki palavra batismu ta parse na Bíblia é óras ki el ta pâpia di Juan Batista. (Mat. 3:1-6) Gentis ta baba pa Juan batiza-s. Pamodi? Pa mostra ma dja es rapendeba di pekadu ki es faze kóntra Lei di Muizes. Má batismu más inportanti ki Juan faze ka tinha nada aver ku rapendimentu. Juan tevi priviléjiu grandi di batiza Jizus, ki é Fidju di Deus. (Mat. 3:13-17) Má Jizus éra perfetu i nunka el peka. El ka mesteba rapende di nada. (1 Ped. 2:22) Nton, pamodi ki Jizus batiza? Pa el mostra ma el krê fazeba vontadi di Deus. — Heb. 10:7.

⁷ Duránti kel ténpu ki Jizus staba na Téra, se disiplus tanbê ta batizaba algen. (João 3:22 ; 4:1, 2 ) Ses batismu éra sima kel ki Juan ta fazeba, pa mostra ma kes algen dja rapendeba di pekadu ki es fazeba kóntra Lei di Muizes. Má, dipôs ki Jizus móre i el resusita, batismu pasa ta ten un siginifikadu diferenti pa se disiplus.

8. (a) Dipôs ki Jizus resusitadu, ki órdi el da pa se disiplus? (b) Kuzê ki un algen meste faze pa el pode batiza?

⁸ Na anu 33, kantu Jizus resusitadu el parse pa más di 500 ómi ku mudjer i talvês mininus. Pode ser ki foi na kel momentu ki el da se disiplus kel órdi li: ‘Nhos bai i nhos faze disiplus di algen di tudu nasons, nhos batiza-s na nómi di Pai, di Fidju i di spritu santu, nhos inxina-s obidese tudu kuza ki N manda nhos.’ (Mat. 28:19, 20; 1 Cor. 15:6) Ta parse ma senténas di se sigidoris staba la, kantu Jizus da órdi di faze disiplus. I el fla ma tudu algen ki krê biraba se disiplu tinha ki batizaba. (Mat. 11:29, 30) Pa un algen sirbi Jeová sima el ta krê, el ten ki seta ma El uza Jizus pa kunpri se vontadi. Dipôs, el pode batiza. Kel-li é úniku batismu na agu ki Deus ta seta. Monti testu di Bíblia ta mostra ma kes primeru disiplu di Jizus, ta ntendeba ma batismu éra txeu inportanti. I kes disiplu li ka fika ta âdia batismu sen ninhun motivu. — Atos 2:41 ; 9:18 ; 16:14, 15, 32, 33.

9, 10. Kuzê ki nu pode prende di batismu di kel ómi di Itiópia i di apóstlu Polu?

⁹ Lé Atus 8:35, 36. Odja izénplu di un ómi di Itiópia. Dipôs di adora Jeová na Jiruzalen, el staba ta volta pa Itiópia. Nton, un anju di Jeová manda Filipi bai ti kel ómi i ‘el kumesa ta konta-l notísia sábi sobri Jizus’. Kuzê ki kel ómi di Itiópia faze dipôs ki el obi kes notísia sábi? El fika txeu kontenti ku kes verdadi ki el prende i el krê fazeba sima Jeová ta manda. Nton, kel óra el batiza.

¹⁰ Un sugundu izénplu é di un ómi judeu ki ta pirsigiba kristons. El nase na un povu didikadu pa Deus. El ta kriditaba ma pa adora Deus, el tinha ki sigiba kes tradison di judeus. Má judeus perde ses amizadi spesial ku Jeová pamodi es ka foi obidienti. Ti ki un dia Jizus, pâpia ku kel ómi judeu la di Séu. Kuzê ki kel ómi faze? El seta ajuda di un disiplu di Jizus ki txomaba Ananias. Dipôs Bíblia ta fla  ma kel ómi judeu ‘labanta i el batizadu’. (Atus 9:17, 18 ; Gál. 1:14) Dja bu odja ma es ómi judeu é apóstlu Polu. Má pensa na kel-li. Lógu ki Polu ntende ma Deus staba ta uza Jizus pa kunpri se vontadi, el aji. El batiza kel óra. — Lé Atos 22:12-16.

11. (a) Kuzê ki ta poi txeu studanti di Bíblia krê batiza? (b) Modi ki nu ta xinti óras ki nu ta odja studantis di Bíblia ta batiza?

¹¹ Mésmu kuza ta kontise ku studantis di Bíblia oji, ka ta nporta ses idadi. Kes ki ten fé i ta fika kontenti ku verdadis di Bíblia ki es prende, es ta krê da ses vida pa Jeová i batiza. Na tudu asenbleia ku kongrésu, un di kes diskursu más inportanti é kel di batismu. Tistismunhas di Jeová ta fika kontenti óras ki studantis di Bíblia ta seta verdadi i ta batiza. I kes ki é pai ku mai tanbê ta fika kontenti di odja ses fidju na meiu di kes ki sta ba batiza. Duránti anu di sirvisu di 2017, más di 284 mil algen batiza, pamodi es kreba da ses vida pa Jeová di korason. (Atos 13:48 ) Di sertéza, kes novu disiplu ntende ma batismu é un kuza ki tudu kristons meste faze. Má kuzê ki es tinha ki fazeba antis di es batiza?

12. Kuzê ki un studanti di Bíblia meste faze antis di el batiza?

¹² Antis di un studanti di Bíblia batiza, el meste ten fé. Pa kel-li, el ten ki prende verdadi sobri Deus, sabe kuzê ki El krê pa nos i ntende kuzê ki el faze pa salva-nu. (1 Tim. 2:3-6) Óras ki studanti ten fé, el ta krê obi ku leis di Deus i dexa di faze kes kuza ki Deus ka gosta. (Atos 3:19 ) Kel-li é un kuza txeu inportanti, pamodi Jeová ka ta seta pa un algen da se vida pa el i kontinua ta faze kel ki Bíblia ta fla ma é mariadu. (1 Cor. 6:9, 10) Sô sigi kuzê ki Bíblia ta fla ma é dretu ô mariadu ka ta txiga. Un algen ki krê da se vida pa Jeová debe sisti runion i partisipa na trabadju di pregason di korason. Jizus fla ma é se disiplus verdaderu ki ta fazeba kel trabadju li. (Atos 1:8 ) Un studanti di Bíblia ki krê batiza meste faze tudu kes kuza li. Dipôs, na un orason ki el ta faze el sô, el ta promete da Jeová se vida i el ta batiza, pa mostra tudu algen ma dja el da se vida pa Jeová.

13. Pamodi ki kel algen ki sta faze studu debe lenbra sénpri ma batismu é inportanti?

¹³ Óras ki nu ta studa Bíblia ku nos fidju ô otus algen, nu ten ki lenbra ma sô es ta ser disiplus verdaderu di Jizus si es batiza. Si sénpri nu lenbra di kel-li, é más faxi djuda-s faze kes kuza ki es meste pa es txiga la. Tanbê nu ka ta fika ku medu di fla-s ma é inportanti da nos vida pa Jeová i batiza. Kuza ki más nu krê, é pa nos fidju ô studantis di Bíblia faze prugrésu i batiza.

14. Pamodi ki nu ka debe obriga ningen batiza?

¹⁴ Má ningen na kongregason, nen pai ku mai, nen kel algen ki sta faze studu ka debe obriga un algen batiza. Jeová ka ta obriga ningen pa sirbi-l. (1 João 4:8 ) Pur isu, óras ki nu ta inxina otus, nu ten ki djuda-s ntende ma es debe ten un amizadi fórti ku Jeová. Asi, óras ki el da valor pa kes verdadi ki el prende, el ta seta ser  disiplu di Jizus i el ta krê batiza. — 2 Cor. 5:14, 15.

15, 16. (a) Ten un idadi sértu pa un algen batiza? Splika. (b) Pamodi ki un studanti di Bíblia ki krê ser un Tistimunha di Jeová meste batiza, sikrê dja el batizaba na un otu relijion?

¹⁵ Ka ten un idadi sértu pa un algen batiza. Ninhun studanti é ka igual. Txeu ta batiza óras ki es é jóven i es ta kontinua fiel pa vida interu. Otus ta studa Bíblia i es ta ben batiza óras ki es sta grandi. Inda ten kes ki ta batiza óras ki es ten más di 100 anu di idadi!

¹⁶ Un mudjer grandi ki ta studaba Bíblia, pergunta un irman ki ta fazeba el studu: “N meste batiza mê? Ami dja N batizaba na otus relijion.” Kel irman mostra-l alguns testu di Bíblia ki ta papiaba sobri kel asuntu. Kel mudjer ntende ma batismu é inportanti pa kristons i poku ténpu dipôs el batiza. Nbóra el staba kuazi ta faze 80 anu, el ntende ma batismu éra inportanti pa el. Kuzê ki nu ta prende ku kel-li? Pa Jeová seta nos batismu, nu ten ki ten un konhisimentu izatu di verdadi. Pur isu, tudu algen ki krê ser un Tistimunha di Jeová meste batiza, sikrê dja el batizaba na otu relijion. — Lé Atos 19:3-5.

17. Na dia ki un algen sta ba batiza, na kuzê ki el debe pensa?

¹⁷ Dia ki un algen ta ba batiza é un dia di txeu alegria. Tanbê é un momentu pa el pensa na kuzê ki sta nvolvidu na da vida pa Jeová i batiza. Vive sima Jeová ta krê é ka faxi. Pur isu, Jizus fla ma ser se disiplus é sima karega un kanga. Disiplus di Jizus ka debe ‘kontinua ta vive pa ses kabésa, má pa kel ki móre pa es i ki labantadu.’ — 2 Cor. 5:15; Mat. 16:24.

18. Ki perguntas nu ta ben responde na kel otu studu?

¹⁸ Sima nu odja li, disidi ser un sérvu di Jeová é un asuntu sériu. É pur isu ki mai di Sara faze kes pergunta ki sta na komésu di studu. Si bo é pai ô mai, pergunta bu kabésa: ‘Nha fidju sta mésmu priparadu pa batiza? Dja el ten un konhisimentu izatu ki Jeová ta spéra di el? É ka éra midjór el faze kursu i atxa un bon trabadju antis di el batiza? I si nha fidju faze un pekadu gravi dipôs ki el batiza?’ Na kel otu studu, nu ta ben odja modi ki pai ku mai ki ta sirbi Deus, pode pensa na batismu sima Jeová ta pensa.