NOS tudu nu krê pa otus algen odja ma nos é un algen dretu. Má, é ka faxi ser un algen dretu na es mundu ki nu sta ta vive gósi. Un di kes razon é pamodi txeu algen ka ta ‘ama kuzas dretu’. (2 Tim. 3:3) Es ka ta sigi leis di Deus i es ta fla ma ‘kel ki é bon é mau i ma kel ki é mau é bon’. (Isa. 5:20) Tanbê, pode ser difísil nu ser un algen dretu, pamodi kuzas mariadu ki kontise na nos vida na pasadu i pamodi nos inperfeson. Nton, nu pode xinti sima Anne , * ki dja ta sirbi Jeová pa txeu anu. El fla: “É difísil N kridita ma N pode ser un algen dretu.”

Má, nu ta fika kontenti di sabe ma nos tudu nu pode ten i mostra amor lial. Kel kualidadi li, ta ben di spritu santu di Deus, i se spritu ten mutu más forsa ki kalker prubléma ki pode ka sta dexa-nu mostra amor lial. Nu ben prende kuzê ki é amor lial i modi ki nu pode mostra-l más txeu na nos dia-dia.

Amor lial é un kualidadi ki ta nvolve ser un algen dretu, ki ka ten ninhun maldadi na korason. Un algen lial ta sforsa pa faze sénpri kel ki é dretu. Sénpri el ta djobe maneras di djuda i di faze kuzas dretu pa otus.

Talvês dja bu odja un algen ta faze kuzas dretu pa se famílias i amigus. Má amor lial é sô kel-li? Nu sabe ma é ka tudu óra ki nu ta konsigi mostra amor lial di verdadi, pamodi nos é inperfetu. Bíblia ta fla: ‘Ka ten ninhun ómi justu na Téra ki ta faze sénpri kel ki é dretu i ki nunka ka ta peka.’ (Ecl. 7:20) Apóstlu Polu tanbê fla: ‘N sabe ma na mi, ô, na nha karni, ka ta mora nada di bon’. (Rom. 7:18) Pur isu, si nu krê ten kel kualidadi li, nu meste prende di Jeová, ki é Fonti di amor lial.

Jeová é ki ta disidi kuzê ki é dretu. Bíblia ta fla sobri el: ‘Abo é bon i bus óbra é bon. Inxina-m bus mandamentu.’ (Sal. 119:68) Nu ben odja dôs kuza di amor lial di Jeová ki sta na kel testu li.

Jeová é bon. Amor lial ta faze párti di manera di ser di Jeová. Nunka el ka ta fadja na mostra kel kualidadi li. Odja kuzê ki kontise kantu Jeová fla Muizes: ‘N ta faze pa tudu nha bondadi pasa bu dianti’. Jeová mostra Muizes se glória i tanbê se amor lial. El obi un vós ta fla sobri Jeová: ‘Jeová, Jeová, Deus di mizerikórdia i konpaxon, el ten paxénxa i el é xeiu di amor lial i di verdadi, ki ta mostra amor lial pa milharis, ta púrdua éru, fadja i pekadu. Má di ninhun manera el ka ta dexa di kastiga kel ki ten kulpa’. (Êxo. 33:19; 34:6, 7) Kel-li ta mostra klaru ma Jeová é bon na tudu kuza ki el ta faze. É pur isu ki Jizus, ki éra kel algen ki mostra amor lial más ki tudu algen na Téra, fla: ‘Ningen é ka bon, di fóra un sô, ki é Deus.’ — Luc. 18:19.

Tudu trabadju ki Jeová ta faze é bon. Nu ta konsigi odja amor lial di Jeová na tudu kuza ki el ta faze. Bíblia ta fla: ‘Jeová é bon pa tudu algen, i se mizerikórdia é klaru na  tudu se óbras.’ (Sal. 145:9) Jeová é bon i el ka ta faze skodjénsa, pamodi el da-nu vida i kuzê ki nu meste pa nu kontinua bibu. (Atos 14:17 ) Tanbê, el ta mostra se amor lial óras ki el ta purdua-nu. Un skritor di Salmo fla: ‘Pamodi abo Jeová, bo é bon i bu sta sénpri prontu pa púrdua’. (Sal. 86:5) Nu pode ten sertéza ma ‘Jeová ka ta nega nada di bon pa kes ki ta anda na lialdadi.’ — Sal. 84:11.

É Jeová ki faze-nu, pur isu nu pode ser sima el. Kel-li siginifika ma nu pode ser un algen dretu i faze kuzas dretu. (Gén. 1:27) Má, kel-li ka ta kontise di un óra pa kel otu. Jeová ta fla-nu ma nu debe ‘prende faze kel ki é dretu’. (Isa. 1:17) Má, modi ki nu pode prende faze kel ki é dretu? Nu ben odja três manera.

Primeru, nu pode faze orason ta pidi spritu santu, pa djuda-nu mostra amor lial sima Jeová ta krê. (Gál. 5:22) Spritu santu di Jeová pode djuda-nu ama kel ki é dretu i nega kuzas mariadu. (Rom. 12:9) Bíblia ta fla-nu ma Jeová pode pô-nu ‘firmi na tudu kuza dretu ki nu ta faze i nu ta fla.’ — 2 Tes. 2:16, 17.

Sugundu, nu debe lé Bíblia. Jeová ta uza Bíblia pa inxina-nu ‘tudu bon kaminhu’ i el ta pripara-nu ‘pa tudu bon óbra.’ (Pro. 2:9; 2 Tim. 3:17) Nos korason é sima un lugar pa guarda tizorus. Óras ki nu ta lé Bíblia i pensa na kuzas ki nu lé, nu ta intxi nos korason di kuzas dretu sobri Deus i sobri kuzê ki el krê pa nu faze. Asi, óras ki nu meste mostra amor lial, kes tizoru ki nu intxi na nos korason, ta djuda-nu. — Luc. 6:45; Efé. 5:9.

Tirseru, nu ten ki faze nos midjór pa nu ‘imita kel ki é bon.’ (3 João 11) Na Bíblia, nu ta atxa txeu izénplu ki nu pode imita. Má, kes midjór izénplu ki nu ten é di Jeová i Jizus. Tanbê, nu pode prende ku izénplus di otus algen ki mostra amor lial. Dôs di es éra Tabita i Barnabé. (Atos 9:36; 11:22-24 ) Bu pode djobe ses stória na Bíblia i odja kuzê ki es faze pa djuda otus algen. Dipôs, pensa na kuzas ki bu pode faze pa djuda bu família ô irmons di kongregason. Tanbê bu pode repara modi ki Tabita ku Barnabé rekonpensadu pamodi es faze kuzas dretu pa otus. Pode kontise mésmu kuza ku nos.

Oji tanbê, nu ten txeu izénplu di pesoas ki sta sforsa pa mostra amor lial pa otus. Pur izénplu, ansions di kongregason ta trabadja txeu i es ‘ta ama kel ki é bon’. Tanbê nu ka ta skese di kes irman fiel na kongregason, ki através di ses palavra i kuzas ki es ta faze, es  ‘ta inxina kel ki é dretu’. (Tito 1:8; 2:3 ) Un irman ki txoma Roslyn fla: “Nha amiga ta faze tudu kel ki el ta pode pa djuda i anima irmons na kongregason. El ta pensa na ses situason i txeu bês el ta da-s prezenti ô el ta djuda-s na kuzas ki es meste. Pa mi, el é un izénplu di algen ki ta mostra amor lial.”

Jeová ta insentiva se povu pa ‘djobe kel ki é dretu’. (Amós 5:14 ) Faze si, ta djuda-nu ama leis di Jeová i tanbê ta djuda-nu ten vontadi di faze kel ki é dretu.

Pa nu ser un algen dretu, nu ka meste faze kuzas pa txoma atenson i nen kunpra prezentis karu pa otus algen. Pur izénplu: Bu ta konsigi imajina un artista ta pinta un fotu sô ku un ô dôs pinselada? Klaru ki nau! El ten ki uza pinsel txeu bês. Di mésmu manera, pesoas ta odja nos amor lial óras ki nu ta faze txeu kuza pikinoti pa djuda otus.

Bíblia ta fla pa nu sta ‘priparadu’ i ‘prontu’ pa faze kel ki é dretu. (2 Tim. 2:21; Tito 3:1 ) Si nu sta sienti na situasons di otus algen, nu ta djobe maneras di djuda-s ‘pa ses ben’. (Rom. 15:2) Talvês nu pode da otus algen kuzas ki nu ten. (Pro. 3:27) Nu pode konvida un algen pa nos kaza pa toma un lanxi ô sô pa nu nkoraja-l. Si nu sabe ma un algen sta duenti, nu pode skrebe-l un karta, ba djobe-l ô tilifona-l. Nu ta atxa txeu manera di fla un palavra ‘ki ta djuda, di akordu ku nisisidadi, pa fla ken ki sta ta obi kuzê ki é dretu.’ — Efé. 4:29.

Jeová é bon pa tudu algen, i nu ta sforsa pa nu ser sima el. Un di kes midjór manera di nu trata otus algen tudu igual é óras ki nu ta prega notísias sábi. Sima Jizus manda, nu ta sforsa pa faze kel ki é dretu ti pa kes algen ki ta odia-nu. (Luc. 6:27) Nunka é ka mariadu ser un algen dretu i faze kuzas dretu pa otus algen. Sima Bíblia ta fla ‘kóntra kes kuza li ka ten lei.’ (Gál. 5:22, 23) Tanbê, óras ki nu ta faze kuzas dretu ti mésmu óras ki pesoas ta trata-nu mariadu, nu pode djuda otus konxe verdadi i da glória pa Deus. — 1 Ped. 3:16, 17.

‘Ómi bon ta kodje rekonpénsa di kuzas ki el ta faze.’ (Pro. 14:14) Kal ki é alguns di kes rekonpénsa? Óras ki nu ta faze kuzas dretu pa otus é más faxi es trata-nu di mésmu manera. (Pro. 14:22) Mésmu óras ki otus ka ta trata-nu dretu, nu debe kontinua ta faze kuzas dretu pa es. Asi, es pode muda ses manera di ser i es pode trata-nu más midjór. — Rom. 12:20, nóta di rodapé.

Óras ki nu ta faze kuzas dretu i nu ta dexa di faze kuzas mariadu, nu ta ten bons rezultadu. Txeu irmon ku irman ta fla ma é kel-la ki kontise ku es. Pur izénplu, un irman ki txoma Nancy fla: “Ami éra un algen ki ka tinha responsabilidadi, N ta fazeba konportamentu seksual mariadu i N ka tinha ruspetu pa otus. Má, kantu N prende kuzê ki Jeová ta fla ma é dretu i N obi ku el, N kumesa ta xinti más filís. Gósi N prende ama i ruspeta nha kabésa.”

Kel motivu más inportanti pa nu mostra amor lial, é pamodi Jeová ta fika kontenti ku nos. Mésmu ki otus algen ka odja kuzê ki nu faze, Jeová ta odja. El ta repara tudu kes kuza dretu ki nu ta faze i tudu kes bon pensamentu ki nu ta ten. (Efé. 6:7, 8) Modi ki el ta rekonpensa-nu? ‘Algen dretu ta ten aprovason di Jeová’. (Pro. 12:2) Pur isu, kontinua ta faze bu midjór na mostra amor lial. Jeová promete ma el ta da ‘glória, onra i pas pa tudu kes ki ta faze kel ki é dretu’. — Rom. 2:10.