1-2. Modi ki izénplu di apóstlu Polu pode djuda ansions oji?

 APÓSTLU Polu ta amaba irmons txeu i el trabadja duru pa djuda-s. (Atos 20:31) Pur isu, irmons ku irmans ta amaba el txeu. Un bês, ansions di Éfezu ‘txora txeu’ kantu es fika ta sabe ma nunka más es ka ta odjaba Polu. (Atos 20:37) Sima Polu, nos ansions ta trabadja duru, es ta ama irmons ku irmans txeu i es ta faze tudu kel ki es pode pa djuda-s. (Fil. 2:16, 17) Má, alvês é difísil pa ansions faze tudu kel ki es ten ki faze. Kuzê ki pode djuda-s?

² Ansions pode imita izénplu di Polu. (1 Cor. 11:1) Polu ka tinha kapasidadi sima di anjus. El éra un ómi inperfeitu i alvês el ta sforsaba txeu pa fazeba kel ki é dretu. (Rom. 7:18-20) Polu pasa pa txeu prubléma, má el ka dizisti nen el ka perde se alegria. Óras ki ansions ta imita izénplu di Polu, es pode kontinua ta sirbi Jeová ku alegria sikrê es pasa pa prublémas. Nu ben odja modi.

3. Kuzê ki nu sta ben odja na kel studu li?

³ Na kel studu li, nu sta ben odja kuatu dizafiu ki ansions ta pasa pa el: (1) ranja ténpu pa prega i pa faze otus kuza, (2) ranja ténpu pa nkoraja irmons ku irmans, (3) lida ku ses frakéza i (4) lida ku inperfeisons di otus algen. Tanbê, nu sta ben odja modi ki Polu lida ku kada un di kes dizafiu li i modi ki ansions pode imita-l.

4. Pamodi ki alvês é un dizafiu pa ansions da un bon izénplu na trabadju di pregason?

⁴ Pamodi ki kel-li pode ser un dizafiu? Ansions ten txeu responsabilidadi i tanbê es ten ki da izénplu na  trabadju di pregason. Pur izénplu, txeu di es ta faze prizidénsia na runion di meiu di simana ô es ten ki faze Studu di Bíblia na kongregason. Tanbê es ta faze otus diskursu, es ta trena ajudantis di kongregason i es gosta di nkoraja irmons ku irmans. (1 Ped. 5:2) Alguns ansion ta trabadja na faze i na konpo Salons di Reinu i otus lugar ki nu ta uza na nos adorason. Má tanbê, sima tudu irmons na kongregason, kel trabadju más inportanti ki es ta faze é prega notísias sábi. — Mat. 28:19, 20.

5. Ki izénplu Polu da?

⁵ Kuzê ki ansions pode prende ku Polu? Na Filipenses 1:10, Polu fla-nu pamodi ki el ta tinha bons rezultadu na se trabadju di pregason. El fla: ‘Konfirma kuzê ki é más inportanti’. Polu sigi se própi konsedju. El skodjedu pa faze trabadju di pregason i pa txeu ténpu kel-li foi kel kuza más inportanti na se vida. El prega ‘na públiku i di kaza en kaza.’ (Atos 20:20) El ka ta pregaba sô na kel óra ki el ta atxaba ma éra midjór pa el ô sô na un dia di simana. El ta pruvetaba tudu oportunidadi pa prega! Pur izénplu, timenti el staba ta spéra se kunpanherus na Atenas, el da un grupu di algen inportanti tistimunhu i el tevi bons rezultadu. (Atos 17:16, 17, 34) Sikrê el staba prézu na un kaza, Polu prega pa kes algen ki ba djobe-l. — Fil. 1:13, 14; Atos 28:16-24.

6. Polu trena otus pa faze kuzê?

⁶ Polu uza se ténpu di midjór manera. Txeu bês el ta konvidaba otus algen pa trabadjaba djuntu ku el na pregason. Pur izénplu, na se primeru viaji misionáriu, el leba Juan Markus i na se sugundu viaji el leba Timótiu. (Atos 12:25; 16:1-4) Di sertéza, Polu faze se midjór pa inxina kes ómi li modi ki es ta organizaba un kongregason, modi ki es ta nkorajaba irmons i modi ki es ta biraba bons instrutor. — 1 Cor. 4:17.

7. Sima sta na Efésios 6: 14, 15, modi ki ansions pode faze kuzê ki Polu fla?

⁷ Modi ki ansions pode imita Polu? Ansions pode imita Polu ka sô óras ki es ta prega di kaza en kaza, má tanbê óras ki es ta sta prontu pa da tistimunhu na tudu situason. (Lé Efésios 6:14, 15.) Pur izénplu, es pode da tistimunhu óras ki es ta ba kunpra algun kuza ô na ses lugar di trabadju. Tanbê, óras ki es ta djuda na faze Salon di Reinu, es pode da tistimunhu pa kes algen ki ta mora  pértu ô pa kes algen ki es ta kunpra kuza na es. Sima Polu, ansions pode uza kel ténpu ki es ta pasa na pregason pa trena otus i tanbê pa trena kes ajudanti di kongregason.

8. Alvês kuzê ki un ansion ta meste faze?

⁸ Ansions ka debe sta okupadu dimás ku trabadju di kongregason ki es ta fika sen ténpu pa prega. Pa es ten ténpu pa faze tudu kuza ki es ta meste, alvês es ten ki nega alguns diziginason. Dipôs di pensa i di ora sobri un diziginason, es pode da kónta ma si es seta-l, es ka ta konsigi kuida di kes kuza más inportanti. Kes kuza li ta inklui faze adorason na família tudu simana, sai sénpri na pregason ô trena ses fidjus pa prega. Alguns ta atxa difísil ka seta más responsabilidadi. Má, es pode ten sertéza ma Jeová ta ntende ma es krê ser ikilibradu na tudu kuza.

9. Ki dizafiu ansions ki ten txeu kuza di faze ta pasa pa el?

⁹ Pamodi ki kel-li pode ser un dizafiu? Povu di Jeová ta pasa pa txeu prubléma. Duránti es ténpu di fin, nos tudu nu meste di nkorajamentu, ajuda i konsolu. I alvês alguns ta meste ajuda pa ka faze kuzas mariadu. (1 Tes. 5:14) É klaru ki ansions ka ta pode rezolve tudu prublémas ki irmons ku irmans ta pasa pa el. Má simé, Jeová krê pa ansions faze ses midjór pa nkoraja i proteje Se ovelhas. Modi ki ansions ki ten txeu kuza di faze pode atxa ténpu pa djuda irmons?

10. Sima sta na 1 Tessalonicenses 2:7, modi ki Polu mostra ma el ta preokupaba ku irmons?

¹⁰ Kuzê ki ansions pode prende ku Polu? Polu staba sénpri prontu pa ilojia i nkoraja irmons. Ansions pode imita izénplu di Polu óras ki es ta trata irmons ku irmans ku amor i bondadi. (Lé 1 Tessalonicenses 2:7.) Polu fla irmons ku irmans ma el ta amaba es i ma Jeová ta amaba es tanbê. (2 Cor. 2:4; Efé. 2:4, 5) Polu éra amigu di irmons ku irmans na kongregason i el ta pasaba ténpu ku es. El mostra ma el ta kunfiaba na es pamodi el ta papiaba ku es sobri se preokupasons i sobri se frakézas. (2 Cor. 7:5; 1 Tim. 1:15) Má Polu ka konsentra na se prublémas. Envês di kel-li, el krê djudaba irmons.

11. Pamodi ki Polu da irmons ku irmans konsedju?

¹¹ Alvês Polu meste daba irmons ku irmans konsedju, má nunka el ka faze kel-li óras ki el staba xatiadu. El ta daba es konsedju pamodi el ta amaba es i el krê  protejeba es di prigu. El ta sforsaba pa irmons ntendeba i setaba se konsedju. Pur izénplu, na un karta ki el skrebe pa irmons na Korintu, el da-s un konsedju fórti. Dipôs ki el skrebe kel karta, el manda Titu pa ba vizita-s. Polu krê sabeba modi ki es reaji ku kel karta. El fika txeu kontenti di sabe ma es seta dretu kel konsedju ki el da-s! — 2 Cor. 7:6, 7.

12. Modi ki ansions pode nkoraja irmons?

¹² Modi ki ansions pode imita Polu? Ansions pode imita Polu óras ki es ta pasa ténpu ku irmons. Un manera di es faze kel-li é óras ki es ta txiga na runion más sédu pa es pode nkoraja i pa pâpia ku irmons. Alvês es meste tra sô alguns minutu pa nkoraja un irmon ô un irman ki sta meste. (Rom. 1:12; Efé. 5:16) Un ansion ki ta imita Polu ta uza Bíblia pa nkoraja irmons i djuda-s odja ma Jeová ta ama-s. Tanbê, el ta dexa irmons sabe ma el ta ama-s. El ta pâpia ku es sénpri i el ta djobe manera di ilojia-s. Óras ki un ansion meste da un konsedju, el ta da-l ku bazi na Bíblia. El ta da konsedju di manera dirétu, má ku amor, pamodi el krê pa irmons aplika kel konsedju. — Gál. 6:1.

13. Modi ki frakéza di un ansion pode pô-l ta xinti?

¹³ Pamodi ki kel-li pode ser un dizafiu? Ansions é ka perfeitu. Sima tudu algen, es ta fadja. (Rom. 3:23) Alvês pode ser difísil es pensa di manera ikilibradu sobri ses frakéza. Alguns pode fika preokupadu ku ses frakéza i kel-li pode pô-s ta fika dizanimadu. Otus pode atxa ma ses frakéza é ka gravi i ma es ka meste faze ninhun mudansa.

14. Sima sta na Filipenses 4:13, modi ki Polu mostra umildadi óras ki el ta lidaba ku se frakézas?

¹⁴ Kuzê ki ansions pode prende ku Polu? Polu éra umildi, pur isu el ntende ma el ka ta konsigi lidaba el sô ku se frakézas. El mesteba pa Deus daba el forsa. Antis, Polu ta pirsigiba kristons, má dipôs el ntende ma kuzê ki el staba ta faze éra mariadu i el muda se manera di ser. (1 Tim. 1:12-16) Ku ajuda di Jeová, Polu bira un ansion umildi ki ta mostraba amor i konpaxon. El sabia ma el éra inperfeitu, má el ka fika ta pensa na kel-la. El kunfia ma Jeová ta purduaba se érus. (Rom. 7:21-25) El ka ta speraba ma el ta fazeba tudu kuza dretu. Má, el trabadja duru pa ser un kriston midjór, i ku umildadi el kunfia ma  Jeová ta djudaba el faze se trabadju. — 1 Cor. 9:27; lé Filipenses 4:13.

15. Ki atitudi ikilibradu ansions debe ten di ses frakéza?

¹⁵ Modi ki ansions pode imita Polu? Ansions ka ta diziginadu pamodi es é perfeitu. Má, Jeová ta spéra ma es ta rekonhese ses fadja i es ta midjora ses manera di ser. (Efé. 4:23, 24) Un ansion debe studa Bíblia pa djuda-l odja na undi ki el meste midjora. Asi, Jeová ta djuda-l ser un bon ansion i faze se trabadju ku alegria. — Tia. 1:25.

16. Kuzê ki pode kontise si ansions kumesa ta konsentra na inperfeisons di irmons?

¹⁶ Pamodi ki kel-li pode ser un dizafiu? Óras ki ansions ta pasa txeu ténpu ku irmons i irmans, es pode odja klaru ses inperfeisons. Má si ansions ka toma kuidadu, es pode fika xatiadu, ka mostra bondadi ô kumesa ta kritika otus. Polu aviza kes kriston ma é kel-li ki Satanás krê pa es fazeba. — 2 Cor. 2:10, 11.

17. Modi ki Polu ta odjaba irmons?

¹⁷ Kuzê ki ansions pode prende ku Polu? Polu ta odjaba irmons ku irmans di manera puzitivu. El konxeba ses inperfeison dretu pamodi alvês es ta fazeba kuzas ki ta maguaba el. Má, Polu sabia ma si un algen fazeba un kuza mariadu, kel-li ka krê fla ma el éra un mau algen. El ta amaba irmons i el ta konsentraba na kes bon kualidadi ki es tinha. Si el odjaba irmons ta sforsa pa faze kuzas dretu, el ka ta duvidaba di ses intenson i el ta djudaba es.

18. Kuzê ki nu pode prende na manera ki Polu lida ku kel situason di Evódia i Síntiki? (Filipenses 4:1-3)

¹⁸ Pur izénplu, odja modi ki Polu djuda dôs irman di kongregason na Filipus. (Lé Filipenses 4:1-3.) Talvês Evódia ku Síntiki staba xatiadu ku kunpanheru i es ka éra amiga más. Polu ka pâpia duru ku es nen el ka kritika-s, má el konsentra na kes bon kualidadi ki es tinha. Es éra irman ki dja tinha txeu ténpu ta sirbiba Jeová i Polu sabia ma Jeová ta amaba es. Pamodi Polu ta pensaba dretu di es, el insentiva-s pa es faze pas ku kunpanheru. Polu konsentra na kes bon kualidadi di otus. Pur isu, el konsigi mante se alegria i el kontinua ta ten un amizadi fórti ku irmons na kongregason.

19. (a) Modi ki ansions pode konsentra na kes bon kualidadi di irmons? (b) Kuzê ki bu pode prende ku kel fotu di un ansion ki sta ta linpa Salon di Reinu?

¹⁹ Modi ki ansions pode imita Polu?  Ansions debe djobe kes bon kualidadi ki irmons ten. Tudu irmons é inperfeitu, má kada un ten kualidadis ki nu ta da valor. (Fil. 2:3) É verdadi ki alvês ansions meste da irmons konsedju. Má sima Polu, ansions ka debe konsentra na kuzas ki irmons ta faze ô ta fla ki pode magua-s. Es debe konsentra na amor ki irmons ten pa Jeová, na manera ki es ta aguenta firmi i na kuzas dretu ki es ta faze. Ansions ki ta konsentra na kes bon kualidadi di otus, ta djuda irmons ku irmans xinti ma tudu algen na kongregason ta ama-s.

20. Modi ki ansions pode kontinua ta imita izénplu di Polu?

²⁰ Ansions, nhos debe kontinua ta studa izénplu di Polu. Pur izénplu, na Índice das Publicações da Torre de Vigia, bu ta bai na “Paulo” i dipôs na párti “exemplo para os anciãos”. Timenti nhos ta lé kes informason, nhos faze kel pergunta li: ‘Modi ki izénplu di Polu pode djuda-m kontinua ta faze nha trabadju di ansion ku alegria?’

21. Ki sertéza ansions pode ten?

²¹ Ansions, nhos debe lenbra ma Jeová ka sta pidi nhos pa nhos ser perfeitu, má el krê pa nhos ser fiel. (1 Cor. 4:2) Jeová staba kontenti ku trabadju duru i fiel ki Polu ta fazeba. Nhos pode ten sertéza ma Deus tanbê ta da valor pa trabadju ki nhos ta faze pa el. Jeová ka ta ‘skese di nhos óbra i di amor ki nhos mostra pa se nómi, pamodi nhos sirbi kes santu i nhos kontinua ta sirbi-s.’ — Heb. 6:10.