Alguns algen ki ta lé kel stória faxi, ta faze kel pergunta li. Má kes versíklu sta ta pâpia di dôs ómi diferenti i es tudu dôs txomaba Mefibozéti. Nu pode prende algun kuza ku kuzê ki kontise ku es.

Saul, ki éra rei di Israel, tevi 7 fidju matxu i dôs fidju-fémia. Se primeru fidju, txomaba Jonatan. Dipôs el tevi un otu fidju ku Rispa, ki txomaba Mefibozéti. Jonatan tanbê tinha un fidju ki txomaba Mefibozéti. Nton, rei Saul tevi un fidju i un nétu ki tinha mésmu nómi.

Rei Saul kumesa ta ôdia jibionitas i el tenta kaba ku es. Ta parse ma txeu di es matadu. Saul ka devia fazeba kel-la. Pamodi? Pamodi na ténpu di Juzué, kes xéfi di israelitas faze un kontratu di pas ku jibionitas. — Jos. 9:3-27.

Na ténpu di rei Saul inda es tinha kel kontratu. Má, rei Saul bai kóntra kel kontratu i el tenta kaba ku jibionitas. Pamodi kel-li, Saul ‘ku se kaza’ fika ku ‘kulpa di sangi’. (2 Sam. 21:1) Dipôs ki Davidi bira rei, kes jibionita ki skapa ba pâpia ku el sobri kuzê ki Saul faze ku es. Davidi pergunta-s kuzê ki el podia fazeba pa pagaba kel pekadu gravi ki Saul faze, asi pa Jeová abensuaba téra di Israel otu bês. Má envês di jibionitas pidi dinheru, es pidi Davidi pa ntrega-s 7 fidju matxu di Saul, ki éra kel algen ki ‘faze planu di kaba’ ku es. (Núm. 35:30, 31) Davidi faze sima es pidi-l i es mata kes fidju di Saul. — 2 Sam. 21:2-6.

Na kel ténpu, Saul ku Jonatan dja moreba na géra. Má Mefibozéti, fidju di Jonatan, inda staba bibu. El fika manku pamodi un asidenti ki kontise kantu el éra mininu i el ka ataka kes jibionita djuntu ku se avó, Saul. Davidi faze un kontratu di amizadi ku Jonatan, ki djuda Mefibozéti i kes otus fidju di Jonatan. (1 Sam. 18:1; 20:42) Bíblia ta fla: ‘Rei [Davidi] xinti péna di Mefibozéti, ki é fidju di Jonatan i nétu di Saul, pamodi kel juramentu ki Davidi ku Jonatan, fidju di Saul, fazeba dianti di Jeová.’ — 2 Sam. 21:7.

Davidi faze kuzê ki kes jibionita pidi-l. El ntrega-s dôs fidju matxu i sinku nétu di Saul i un di kes fidju txomaba Mefibozéti. (2 Sam. 21:8, 9) Kuzê ki Davidi faze djuda pa kel kulpa di sangi sai di téra di Israel.

Nu pode prende txeu ku kel stória li. Lei di Deus ta fla klaru: ‘Fidjus ka debe matadu pamodi kuzas ki ses pai faze.’ (Deut. 24:16) Si kes dôs fidju i kes sinku nétu di Saul ka tinha kulpa, Jeová ka ta dexaba jibionitas mataba es. Lei ta fla: ‘Un algen debe matadu sô pamodi se própi pekadu.’ Ta parse ma kes dôs fidju i kes sinku nétu di Saul ki matadu, faze párti di kel planu di Saul pa kababa ku jibionitas. Pur isu, es tudu tinha ki pagaba pa ses pekadu.

Kel stória li ta inxina-nu ma Jeová ka ta seta pa un algen faze un kuza mariadu i dipôs da diskulpa ma el staba ta sigi orientason. Bíblia ta fla: ‘Poi kaminhu di bus pé ta fika planu, i tudu bus kaminhu ta ser suguru.’ — Pro. 4:24-27; Efé. 5:15.