1-2. Si bu ka sta priparadu pa batiza, pamodi ki bu ka debe dizanima? (Odja fotus na kapa.)

 SI BU krê batiza, dja bu poi un bon méta pa bo. Bu sta prontu pa batiza? Si bu ta atxa ma sin i ansions ta konkorda, batiza na kel primeru oportunidadi ki parse. Si bu faze kel-li, bu ta ten un vida sábi na sirbi Jeová.

² Algun algen dja fla-u ma bu meste faze más prugrésu antis di batiza? Ô bu da kónta di kel-li bo sô? Si kel-li kontise, ka bu dizanima. Bu pode faze prugrésu pa da kel pasu inportanti li, ka ta inporta si bo é jóven ô algen grandi.

3. Kuzê ki un funsionáriu di govérnu di Itiópia pergunta Filipi, i ki pergunta kel-li ta pô-nu ta faze? (Atos 8:36, 38)

³ Lé Atos 8:36, 38. Un funsionáriu di govérnu di Itiópia pergunta Filipi, kel pregador di ivanjélhu: ‘Kuzê ki ta inpidi-m di batiza?’ Kel ómi di Itiópia tinha gana di batiza, má el staba priparadu pa batiza?

4. Modi ki kel ómi di Itiópia mostra ma el staba disididu na kontinua ta prende?

⁴ Kel ómi di Itiópia ‘baba Jiruzalen pa adora’. (Atos 8:27) Nton, talvês el bira di relijion di judeus. Di sertéza, el prende sobri Jeová ku bazi na Skrituras Ebraiku. Má simé, el tinha gana di prende más. Na verdadi, kantu Filipi inkontra ku kel funsionáriu na strada, kuzê ki Filipi atxa-l ta faze? El staba ta lé rolu di proféta Izaías. (Atos 8:28) Kel kuza ki el staba ta lé éra un verdadi difísil di Skrituras. Kel funsionáriu di govérnu ka krê prendeba  sô alguns verdadi prinsipal di Skrituras, má el krê kontinuaba ta prende.

5. Kuzê ki kel ómi di Itiópia faze ku kes kuza ki el prende?

⁵ Kel ómi di Itiópia éra un funsionáriu inportanti di Rainha di Kandasi di Itiópia. El ‘éra enkaregadu di tudu se tizoru.’ (Atos 8:27) Nton, talvês el éra un ómi okupadu i ku txeu responsabilidadi. Má simé, el tra ténpu pa adora Jeová. El ka fika kontenti sô ku prende verdadi, má el faze kuzê ki el prende. Pur isu, el viaja tudu kel kaminhu di Itiópia pa adora Jeová na ténplu na Jiruzalen. Talvês el gasta txeu ténpu i dinheru na kel viaji. Má el krê fazeba kalker kuza pa el adoraba Jeová.

6-7. Modi ki amor ki kel ómi di Itiópia tinha pa Jeová kontinua ta bira más fórti?

⁶ Kel ómi di Itiópia prende alguns verdadi novu i inportanti ku Filipi. Un di es é ma Jizus éra Misías. (Atos 8:34, 35) Kel funsionáriu di govérnu li di sertéza fika kontenti di sabe kuzê ki Jizus faze pa el. Má kuzê ki el faze dipôs ki el prende kes kuza li? El pode kontinuaba na relijion di judeus. Má envês di kel-li, se amor pa Jeová i pa Se Fidju bira más txeu. El staba disididu na toma kel disizon inportanti di batiza i bira sigidor di Jizus Kristu. Filipi odja ma kel ómi staba priparadu, pur isu, el batiza-l.

⁷ Si bu sigi izénplu di kel ómi di Itiópia, bu pode sta priparadu pa batiza i fla ku kunfiansa: ‘Kuzê ki ta inpidi-m di batiza?’ Kel ómi di Itiópia kontinua ta prende, el faze sima el prende i el kontinua ta bira se amor pa Deus más fórti. Nu ben odja modi ki bu pode faze kes mésmu kuza ki el faze.

8. Kuzê ki Juan 17:3 ta fla ma bu debe faze?

⁸ Lé Juan 17:3. Kes palavra di Jizus li djuda-u disidi studa Bíblia? É kel-li ki kontise ku txeu di nos. Má kes palavra li tanbê ta djuda-nu kontinua ta prende? Sin. Nunka nu ka ta para di “konxe... kel Deus verdaderu”. (Ecl. 3:11) Pa tudu ténpu, nu ta kontinua ta prende. I óras ki nu prende más sobri Jeová, nu ta bira más se amigu. — Sal. 73:28.

9. Kuzê ki nu meste faze dipôs ki nu prende kes verdadi prinsipal di Bíblia?

⁹ Óras ki bu kumesa ta prende sobri Jeová, bu ta konxe sô kes verdadi prinsipal di Bíblia. Na se karta pa ebreus,  apóstlu Paulu fla ma kes ensinu li é ‘kes kuza prinsipal’. El ka staba ta fla ma kes ‘dotrina prinsipal’ ka éra inportanti. Má envês di kel-li, el mostra ma es éra sima leti ki ta sustenta un bebé. (Heb. 5:12; 6:1) El insentiva tudu kes irmon pa prendeba más di ki sô kes ensinu prinsipal. Má tanbê, pa es prendeba kes verdadi más difísil di Palavra di Deus. Bu gosta di studa kes verdadi prinsipal di Bíblia? Bu krê kontinua ta faze prugrésu i kontinua ta prende sobri Jeová i se vontadi?

10. Pamodi ki studa é difísil pa alguns algen?

¹⁰ Má pa txeu di nos, studa é un kuza difísil. I pa bo? Na skóla bu prende lé i studa dretu? Bu gosta di studa i bu ta xinti ma bu ta prende txeu? Ô bu ta atxa ma bo é ka bon na prende na livrus? Si é kel-li ki bu ta atxa, é ka sô bo. Má, Jeová pode djuda-u. El é perfeitu i el é kel midjór Profesor ki ten.

11. Modi ki Jeová ta mostra ma el é ‘Grandiozu Instrutor’?

¹¹ Jeová fla ma el é ‘Grandiozu Instrutor’. (Isa. 30:20, 21) El é un Profesor ki ta mostra paxénxa, bondadi i ki ta intende se alunus. El ta djobe kuzê ki se alunus ten di bon. (Sal. 130:3) I nunka el ka ta spéra ma nu ta faze más di ki kel ki nu ta pode. Lenbra ma el faze bu sérbru ki é un prezenti bunitu. (Sal. 139:14) Nu ten gana di prende. Nos Kriador krê pa nu kontinua ta prende pa tudu ténpu i pa nu atxa-l sábi. Pur isu, é bon nu ‘dizenvolve un dizeju fórti’ pa kes verdadi di Bíblia gósi. (1 Ped. 2:2) Poi métas ki bu ta konsigi txiga na es i lé i studa Bíblia sénpri. (Jos. 1:8) Jeová ta djuda-u gosta di lé i di prende kada bês más txeu sobri el.

12. Pamodi ki nu debe studa sobri vida i trabadju di pregason di Jizus?

¹² Tra ténpu sénpri pa bu midita na vida i na trabadju di pregason di Jizus. É inportanti nu imita izénplu di Jizus di manera fiel si nu krê sirbi Jeová, prinsipalmenti na es ténpu difísil. (1 Ped. 2:21) Jizus fla se sigidoris ma es ta ben pasaba pa prublémas. (Luk. 14:27, 28) Má simé, el tinha sertéza ma se sigidoris verdaderu ta kontinuaba fiel pa Deus sima el. (Juan 16:33) Studa kuzas sobri vida di Jizus i poi méta di imita-l na bu dia-dia.

13. Kuzê ki bu debe kontinua ta pidi Jeová, i pamodi?

¹³ Sô ten konhisimentu ka ta txiga. Bu meste konhisimentu pa nu pode prende más sobri Jeová i dizenvolve kualidadis sima amor pa el i fé na el. (1 Cor. 8:1-3) Sima bu ta ba ta prende, pidi Jeová pa djuda-u ten más fé. (Luk. 17:5) El ta responde kes tipu di orason li. Fé di verdadi ku bazi na konhisimentu izatu di nos Deus ta djuda-u faze prugrésu. — Tia. 2:26.

14. Modi ki apóstlu Pedru distaka ma é inportanti nu faze sima nu prende? (Odja dizenhu.)

¹⁴ Apóstlu Pedru distaka ma é inportanti sigidoris di Kristu kontinua ta faze sima es prende. El pâpia sobri kel stória di Nué ki sta na Bíblia. Jeová fla Nué ma através di un dilúviu, el ta ben distruíba kes algen mau di kel ténpu. Sô sabe ma Dilúviu staba ta binha ka ta  txigaba pa salvaba Nué i se família. Repara ma Pedru staba ta pâpia di kel ténpu antis di Dilúviu ‘timenti staba ta fazedu kel arka’. (1 Ped. 3:20) Kantu Nué ku se família faze kel arka ki éra sima un barku grandi, es faze kel ki Deus inxina-s. (Heb. 11:7) Pedru konpara kuzê ki Nué faze ku batismu. El fla: ‘Batismu, ki ta reprizenta kel-li, tanbê ta salva nhos gósi’. (1 Ped. 3:21) Nton, nu pode konpara kes kuza ki bu sta ta faze gósi pa pripara pa batismu ku trabadju di faze arka ki Nué i se família faze duránti txeu anu. Kuzê ki bu meste faze pa pripara pa batismu?

15. Modi ki nu ta mostra ma dja nu rapende di korason?

¹⁵ Un di kes primeru kuza ki nu debe faze é rapende di korason di kes pekadu ki nu faze. (Atos 2:37, 38) Óras ki nu ta rapende di korason, nu ta muda própi. Dja bu para di faze kes kuza ki Jeová ka gosta, sima konportamentu mariadu, fuma ô uza maus palavra? (1 Cor. 6:9, 10; 2 Cor. 7:1; Efé. 4:29) Si inda bu ka faze kel-li, kontinua ta tenta faze mudansas. Pâpia ku kel algen ki ta studa Bíblia ku bo ô pidi ansions di kongregason pa djuda-u i pa da-u orientason. Si bo é jóven i bu ta mora ku bu pai i ku bu mai, kontinua ta pidi-s pa es djuda-u kaba ku kalker ábitu mariadu ki pode inpidi-u di batiza.

16. Kuzê ki nu debe faze si nu krê adora Jeová sénpri?

¹⁶ Tanbê é inportanti nu faze sénpri kes kuza ki ta djuda-nu ten un bon amizadi ku Jeová. Kel-li pode inklui sisti runion i partisipa na el. (Heb. 10:24, 25) I óras ki bu bira publikador, partisipa na pregason sénpri. Óras ki bu partisipa na pregason txeu bu ta atxa-l más sábi. (2 Tim. 4:5) Si bo é jóven i bu ta mora ku bu pai i ku bu mai, pergunta bu kabésa: ‘Nha pai ku nha mai meste lenbra-m ma N ten ki sisti runion ô partisipa na pregason? Ô N ta faze kel-li di mi pa mi?’ Óras ki bu ta faze kes kuza li di bo pa bo, bu ta  mostra bu fé, amor i gratidon pa Jeová. Kes-li é ‘kuzas ki ta mostra ma bu ta adora Deus’ i es é prezenti ki bu ta da Jeová. (2 Ped. 3:11; Heb. 13:15) Nos Deus ta fika kontenti ku tudu prezenti ki nu ta da-l di livri vontadi. (Konpara ku 2 Coríntios 9:7) Nu ta faze kel-li pamodi nu ta fika kontenti óras ki nu ta da Jeová nos midjór.

17-18. Ki kualidadi inportanti ta djuda-u faze prugrésu pa batiza i pamodi? (Provérbios 3:3-6)

¹⁷ Timenti bu ta kontinua ta faze prugrésu pa batiza, bu ta pasa pa txeu difikuldadi. Alguns algen pode faze-u trósa pamodi bu fé, i ti es pode fika kóntra bo ô pirsigi-u. (2 Tim. 3:12) Talvês bu sta ta sforsa txeu pa bu para di faze un kuza ki bu sabe ma é mariadu, má alvês bu pode faze kel kuza otu bês. Ô bu pode fika sen paxénxa i dizanimadu pamodi ta parse ma bu ka ta konsigi txiga na bu méta. Kuzê ki ta djuda-u aguenta firmi? É un kualidadi inportanti ki é amor pa Jeová.

¹⁸ Bu amor pa Jeová é un kualidadi bunitu, kel midjór ki bu ten. (Lé Provérbios 3:3-6.) Bu amor fórti pa Deus pode djuda-u ten bons rezultadu na lida ku prublémas di vida. Bíblia txeu bês ta pâpia di amor lial di Jeová pa se sérvus. Amor lial krê fla ma Jeová nunka ka ta bandona se sérvus ô ma nunka el ka ta dexa di ama-s. (Sal. 100:5) Bu fazedu sima imaji di Deus. (Gén. 1:26) Modi ki bu pode mostra kel tipu di amor li?

19. Modi ki bu pode mostra más gratidon pa tudu kuza ki Jeová dja faze pa bo? (Gálatas 2:20)

¹⁹ Kumesa ku gratidon. (1 Tes. 5:18) Tudu dia, pergunta bu kabésa: ‘Modi ki Jeová mostra amor pa mi?’ Dipôs ka bu skese di agradese Jeová na bus orason. Pâpia di kuzas ki dja el faze pa bo. Intende ma Jeová dja faze kuzas dretu pa bo, pamodi el ta ama-u, sima kontise ku apóstlu Paulu. (Lé Gálatas 2:20.) Pergunta bu kabésa: ‘N krê mostra amor pa Jeová pamodi el ta ama-m?’ Amor pa Jeová ta djuda-u kontinua ta aguenta tentason i ten bons rezultadu na lida ku prublémas ki bu ta  pasa pa el. Kel-li ta motiva-u pa bu kontinua ta faze kes kuza ki ta djuda-u adora Jeová sénpri, i ta mostra bu amor pa bu Pai tudu dia.

20. Kuzê ki bu debe faze pa bu da bu vida pa Jeová i pamodi ki kel-li é inportanti?

²⁰ Ku ténpu, bu amor pa Jeová ta pô-u ta faze un orason spesial pa el. Bu ta da bu vida pa Deus. Lenbra ma óras ki bu da bu vida pa Jeová, bu ta ten un speransa sábi, ki é ser di sel pa tudu ténpu. Óras ki bu ta da bu vida pa Jeová bu ta promete sirbi-l na ténpu sábi i na ténpu kasábi. Bu ka meste faze kel promésa li otu bês. É verdadi ki da bu vida pa Jeová é un disizon inportanti. Má pensa na kel-li: Bu ta toma txeu disizon na bu vida i alguns di es é dretu. Má nunka bu ka ta toma un disizon midjór di ki da bu vida pa Jeová. (Sal. 50:14) Satanás ta tenta frakise bu amor pa bu Pai i el ta spéra ma bu ka ta kontinua lial pa el. Nunka ka bu dexa Satanás ganha! (Jó 27:5) Amor fórti ki bu ten pa Jeová ta djuda-u kontinua ta kunpri bu promésa di sirbi-l pa tudu ténpu i bira bu amizadi ku el más fórti.

21. Pamodi ki nu pode fla ma batismu é ka fin má é komésu?

²¹ Dipôs ki bu da bu vida pa Jeová, pâpia ku ansions di bu kongregason sobri kel otu pasu inportanti. Má lenbra sénpri ma batismu é ka fin, má é komésu. É komésu di un vida pa tudu ténpu ta sirbi Jeová. Nton, bira bu amor pa bu Pai más fórti gósi. Poi métas ki ta djuda bu amor bira más fórti tudu dia. Faze kel-li ta pô-u ta batiza. Kel-li ta ser un dia sábi dimás. Má kel-li é sô komésu. Pa bu amor pa Jeová i pa se Fidju kontinua ta bira más fórti pa tudu ténpu!