1-2. Kuzê ki ta kontise óras ki un algen ta batiza i kuzê ki nu debe analiza?

 DJA bu kustuma odja un grupu di algen ta batiza? Bu obi-s ta responde ku sertéza kes dôs pergunta antis di es batiza. Bu odja ses família i amigus txeu kontenti. Kantu es sai di agu, bu obi palmu i bu odja na ses róstu modi ki es staba kontenti. Tudu simana, milharis di algen ta da ses vida pa Jeová, es ta batiza i es ta bira Tistimunhas di Jeová.

² I bo? Si bu sta pensa na batiza, bo é un algen txeu spesial na kel mundu mau li, pamodi bu sta ta ‘djobe Jeová.’ (Sal. 14:1, 2) Kel studu li é pa bo, sikrê bo é jóven ô algen grandi. Má si dja bu batiza, tanbê kel studu li ta ben djuda-u bira bu fé más fórti i sta disididu na sirbi Jeová pa tudu ténpu. Nton, nu ta ben odja três di kes txeu motivu ki nu ten pa nu sirbi Jeová.

3. Pamodi ki sérvus di Jeová ta ama verdadi i justisa? (Salmo 119:128, 163)

³ Jeová fla se povu pa es ‘ama verdadi’. (Zac. 8:19) Jizus fla se sigidoris pa es buska justisa. (Mat. 5:6) Kel-li krê fla ma un algen meste ten un dizeju fórti pa faze kuzê ki Jeová ta fla ma é dretu i é bon. Bu ta ama verdadi i justisa? Nu ten sertéza ma bu ta ama. Bu ta ôdia mintira i tudu kuza mariadu i mau. (Lé Salmo 119:128, 163.) Kenha ki ta konta mintira ta imita Satanás, ki é governanti di kel mundu li. (Juan 8:44; 12:31) Un di kes obijetivu di Satanás é mantxa nómi santu di  Jeová. Satanás sta ta spadja mintira sobri Deus désdi rebelion na jardin di Éden. El tenta poi algen ta atxa ma Jeová ta pensa sô na se kabésa, ma el é un Governanti dizonéstu ki ta nega faze kuzê ki é dretu pa nos. (Gén. 3:1, 4, 5) Kes mintira ki Satanás ta konta sobri Jeová, ta poi algen ta pensa kuzas mariadu sobri Jeová. Óras ki algen ta skodje ka ‘ama verdadi’, Satanás pode pô-l ta faze tudu tipu di kuza injustu i mariadu. — Rom. 1:25-31.

4. Modi ki Jeová prova ma el é ‘Deus di verdadi’? (Odja dizenhu.)

⁴ Jeová é ‘kel Deus di verdadi’, i ku amor el ta inxina verdadi pa kes ki ta ama-l. (Sal. 31:5) Óras ki el ta faze kel-li, el ta djuda-s pa mintiras di Satanás ka ingana-s más. Jeová tanbê, ta inxina se sérvus modi ki es ta ser onéstu i justu. Kel-li ta djuda-s ten más ruspetu pa ses kabésa i ten pas déntu di es. (Pro. 13:5, 6) El faze kel-li pa bo timenti bu staba ta studa Bíblia? Bu prende ma kaminhus di Jeová é midjór pa tudu algen i pa bo tanbê. (Sal. 77:13) Nton, bu krê faze kuzê ki Jeová ta fla ma é dretu. (Mat. 6:33) Bu krê difende verdadi i prova ma kuzê ki Satanás fla sobri Jeová é mintira. Modi ki bu pode faze kel-li?

5. Modi ki bu pode difende verdadi i justisa?

⁵ Bu pode vive di un manera ki ta mostra klaru pa tudu algen ma bo é kóntra kes mintira di Satanás, i ma bu ta difende verdadi. Tanbê, bu pode mostra ma bu krê pa Jeová ser bu Governanti i bu krê faze kuzê ki el ta fla ma é dretu. Modi ki bu pode faze kel-li? Fla Jeová na orason ma bu ta promete sirbi-l pa tudu ténpu i dipôs batiza. Asi, bu ta mostra na públiku ma dja bu da bu vida pa Jeová. Amor pa kel ki é verdadi i dretu é un bon motivu pa pô-nu ta batiza.

6. Ki motivus ki Salmo 45:4 ta da pa bu ama Jizus Kristu?

⁶ Pamodi ki bu ta ama Jizus Kristu? Odja alguns motivu na Salmo 45:4. (Lé.) Jizus ta ama verdadi, el é umildi i justu. Si bu ta ama verdadi i justisa  é normal bu ama Jizus Kristu tanbê. Pensa na modi ki Jizus difende ku koraji kuzê ki é verdaderu i dretu. (Juan 18:37) Má modi ki Jizus inxina-nu ser umildi?

7. Kuzê ki más bu gosta na umildadi di Jizus?

⁷ Jizus inxina-nu ser umildi através di se izénplu. Pur izénplu, el da tudu glória pa se Pai i nunka pa se kabésa. (Mar. 10:17, 18; Juan 5:19) Modi ki umildadi di Jizus ta pô-u ta xinti? Ka ta da-u gana di ama-l i di sigi-l? Klaru ki sin. Pamodi ki Jizus é umildi? Pamodi el ta ama i el ta imita se Pai ki é umildi. (Sal. 18:35; Heb. 1:3) Bu ka ta xinti más gana di konxe Jizus pamodi el ta imita kualidadis di Jeová di manera perfeitu?

8. Pamodi ki nu ta ama Jizus ki é nos Rei?

⁸ Nu ta ama Jizus ki é nos Rei, pamodi el é kel midjór Governanti ki ten. Jeová trena se Fidju i el skodje-l pa governa. (Isa. 50:4, 5) Pensa tanbê na sakrifisius ki Jizus faze pa nos ku amor. (Juan 13:1) Pamodi el é bu Rei, el merese tudu bu amor. El splika ma ses amigu é kes ki ta ama-l di verdadi i ki ta mostra ses amor pamodi es ta obi ku se mandamentus. (Juan 14:15; 15:14, 15) É un priviléjiu grandi ser amigu di Fidju di Jeová!

9. Modi ki nos batismu é sima di Jizus?

⁹ Un di kes mandamentu ki Jizus da se sigidoris é ma es debe batiza. (Mat. 28:19, 20) I el da izénplu di kel-li. Na alguns manera, batismu di Jizus é diferenti di kel di se sigidoris. (Odja kuadru “ Modi ki batismu di Jizus é diferenti di batismu di se sigidoris”.) Má es ten alguns kuza kuazi igual. Kantu Jizus batiza, el aprizenta pa faze vontadi di se Pai. (Heb. 10:7) Di mésmu manera, óras ki sigidoris di Kristu ta batiza, es ta mostra na públiku ma es da ses vida pa Jeová. Di la pa frenti, kuza más inportanti na ses vida é faze vontadi di Jeová, envês di ses vontadi. Nton, es ta pasa ta sigi izénplu di Jizus.

10. Pamodi ki amor pa Jizus debe pô-u ku gana di batiza?

¹⁰ Bu ta kridita ma Jizus é Fidju unijénitu di Jeová i bu sta kontenti pamodi el é kel Rei ki Deus skodje pa governa. Bu sabe ma Jizus é umildi i ma el ta imita se Pai di manera perfeitu. Bu prende ma el da kumida pa kes algen ki tinha fómi, el konsola kes ki staba dizanimadu i ti el kura kes ki staba duenti. (Mat. 14:14-21) Bu sta odja modi ki el ta toma kónta di kongregason oji. (Mat. 23:10) I bu sabe ma dja ki el é Rei di Reinu di Deus, el ta ben faze kuzas sábi pa nos na futuru. Modi ki bu pode mostra ma bu ta ama-l? Óras ki bu ta sigi se izénplu. (Juan 14:21) Un di kes primeru kuza ki bu pode faze pa sigi se izénplu é da bu vida pa Jeová i batiza.

11. Kal ki é motivu más inportanti pa nu batiza i pamodi?

¹¹ Kal ki é kel motivu más inportanti pa nu batiza? Jizus mostra kal ki é kel mandamentu más inportanti di Deus. El fla: “Ama Jeová, bu Deus, di tudu bu korason, di tudu bu alma, di tudu bu menti i di tudu bu forsa.” (Mar. 12:30) Bu amor pa Deus é si?

12. Pamodi ki bu ta ama Jeová? (Odja fotus i dizenhu.)

¹² Bu ten txeu motivu pa ama Jeová. Pur izénplu, bu intende ma el é ‘fonti di vida’ i ma el ta da-u ‘tudu bon prezenti i tudu prezenti perfeitu’. (Sal. 36:9; Tia. 1:17) Tudu kuza sábi ki bu ten ben di nos Deus, ki gosta di da i ki ta ama-nu.

13. Pamodi ki resgati é un prezenti bunitu?

¹³ Resgati é un prezenti bunitu ki Jeová da-nu. Pamodi ki nu pode fla kel-li? Pensa na kel amizadi ki Jeová tevi ku se Fidju. Jizus fla: ‘Nha Pai ta ama-m’ i ‘N ta ama nha Pai’. (Juan 10:17; 14:31) Ses amizadi bira más fórti kantu es pasa txeu ténpu djuntu. (Pro. 8:22, 23, 30) Má pensa na dór ki Deus xinti kantu el dexa se Fidju sufri i móre. Jeová ta ama tudu algen txeu i abo tanbê. Pur isu, el da se Fidju ki el ta ama pa móre pa bo i pa otus algen pode vive pa tudu ténpu. (Juan 3:16; Gál. 2:20) Kel-li é kel motivu más grandi ki nu ten pa nu ama Deus.

14. Kal ki é midjór méta na vida ki bu pode poi?

¹⁴ Sima bu ba ta prende más sobri Jeová, bu amor pa el bira más fórti. Di sertéza, bu krê bira más se amigu gósi i pa tudu ténpu. I bu pode faze kel-li. Ku  amor, el ta fla-u pa bu poi se korason ta fika kontenti. (Pro. 23:15, 16) Bu pode faze kel-li na kuzas ki bu ta fla i tanbê na kuzas ki bu ta faze. Manera ki bu ta vive ta mostra si bu ta ama Jeová di verdadi. (1 João 5:3) Kel-li é midjór méta na vida ki bu pode poi.

15. Modi ki bu pode mostra ma bu ta ama Jeová?

¹⁵ Modi ki bu pode mostra ma bu ta ama Jeová? Primeru, bu ta faze un orason spesial i bu ta da bu vida pa kel úniku Deus verdaderu. (Sal. 40:8) Dipôs, bu ta batiza pa mostra na públiku ma dja bu da bu vida pa Jeová. Sima dja nu odja na kel studu li, bu batismu ta bira un momentu sábi i inportanti na bu vida. Bu ta kumesa un vida novu, ka pa bo, má pa Jeová. (Rom. 14:8; 1 Ped. 4:1, 2) Kel-li pode parse ma é un disizon grandi, i é própi. Má el ta abri kaminhu pa midjór vida ki ten. Di ki manera?

16. Kuzê ki Salmo 41:12 ta mostra ma Jeová ta ben faze pa kes ki ta uza ses vida pa sirbi-l?

¹⁶ Ka ten ningen ki gosta di da más ki Jeová. Ka ta inporta kuzê ki bu da-l, sénpri el ta da-u mutu más txeu. (Mar. 10:29, 30) El ta da-u kel vida más interesanti i más sábi ki ten, sikrê gósi na kel mundu mau li. I kel-li é sô komésu. Kel vida ki kumesa kantu bu batiza ka meste kaba. Bu pode kontinua ta sirbi bu Pai pa tudu ténpu. Kel amor ki izisti entri bo ku bu Pai ta kontinua ta bira más txeu. I dipôs, bu ta kontinua ta vive pa tudu ténpu sima el. — Lé Salmo 41:12.

17. Kuzê ki bu pode da Jeová ki inda el ka ten?

¹⁷ Óras ki bu da bu vida pa Jeová i bu batiza, bu ta ten priviléjiu di da bu Pai un kuza ki ten txeu valor pa el. El da-u tudu kuza dretu, tudu momentu sábi ki dja bu pasa pa el na bu vida. I abo, bu pode da Dónu di séu ku téra un kuza ki inda el ka ten, ki é sirbi-l ku lialdadi  i di livri vontadi. (Jó 1:8; 41:11; Pro. 27:11) Di sertéza, kel-li é midjór manera di uza bu vida. Nu ka ten dúvida ma bu amor pa Jeová é kel midjór motivu ki ta pô-u ta batiza.

18. Ki perguntas ki bu pode faze?

¹⁸ Nton, modi ki bu pode responde kel pergunta li: Bu ta batiza? É sô bo ki pode responde. Má un kuza ki pode djuda-u é pergunta bu kabésa: ‘Kuzê ki N sta spéra?’ (Atos 8:36) Lenbra di kes três motivu ki nu pâpia di el. Primeru, bu ta ama verdadi i justisa. Pergunta bu kabésa: ‘N krê odja kel dia ki tudu algen ta pâpia verdadi i ta faze kel ki é dretu?’ Sugundu, bu ta ama Jizus Kristu. Pergunta bu kabésa: ‘N krê pa Fidju di Deus ser nha Rei i N krê sigi se izénplu?’ Tirseru, bu ta ama Jeová. Pergunta bu kabésa: ‘N krê sirbi Jeová nha Deus i poi se korason ta fika kontenti?’ Si respósta di kes pergunta li é sin, nton pamodi ki bu ka ta batiza? Kuzê ki bu sta spéra? — Atos 16:33.

19. Pamodi ki bu ka debe dexa batismu pa dipôs? Da un izénplu. (Juan 4:34)

¹⁹ Si bu sta ta dexa batismu pa dipôs, pensa na un konparason ki Jizus faze. (Lé Juan 4:34.) Repara ma Jizus konpara faze vontadi di se Pai ku kumida. Pamodi? Kumida é bon pa nos. Jizus sabia ma tudu kel ki Jeová ta pidi-nu é bon pa nos. Jeová ka krê pa nu faze nada ki pode prujudika-nu. Má Jeová krê pa bu batiza? Sin. (Atos 2:38) Nton, bu pode ten sertéza ma obi ku kel órdi di batiza é bon pa bo. Si bu ka ta dexa kel kumida más sábi pa dipôs, nton pamodi ki bu ta dexa batismu pa dipôs?

20. Kuzê ki nu sta ben odja na kel otu studu?

²⁰ Kuzê ki bu sta spéra? Alguns algen pode fla: “Inda N ka sta priparadu.” É verdadi ki disizon más inportanti ki bu pode toma é da bu vida pa Jeová i batiza. Nton, bu meste pensa ku kuidadu na kel disizon li, i ta leba ténpu i txeu sforsu pa bu pripara. Má si bu krê batiza, kuzê ki bu pode faze gósi pa bu pripara? Nu ta ben odja respósta di kel pergunta li na kel otu studu.