1-2. Kuzê ki un algen meste faze antis di el batiza?

 NA KES últimu sinku anu, más di un milhon di algen batiza i es bira Tistimunhas di Jeová. Txeu di es é sima Timótiu, ki éra un disiplu di ténpu di apóstlus, ki prende verdadi ‘désdi ki el nase’. (2 Tim. 3:14, 15) Otus Tistimunha di Jeová prende sobri Jeová kantu es éra adultu i alguns kantu dja es staba algen di idadi. Dja ten algun ténpu, ki un mudjer ki studa Bíblia ku Tistimunhas di Jeová batiza ku 97 anu!

² Si bo é un studanti di Bíblia ô si bu mai ku bu pai é Tistimunhas di Jeová, bu sta ta pensa na batiza? Kel-li é un bon méta! Má antis di bu batiza, bu meste da bu vida pa Jeová. Kel artigu li ta ben splika kuzê ki da bu vida pa Jeová krê fla. Tanbê, el ta ben djuda-u odja pamodi ki bu ka debe ten medu di da bu vida pa Jeová i batiza, óras ki bu sta prontu pa bu faze kel-li.

KUZÊ KI DA BU VIDA PA JEOVÁ KRÊ FLA?

3. Da izénplu di pesoas ki Bíblia ta pâpia di el ki éra didikadu pa Jeová.

³ Na Bíblia, un algen ki éra didikadu éra un algen ki siparadu pa un obijetivu spesial. Israelitas éra un povu didikadu pa Jeová. Má alguns algen di nason di Israel didikadu di un manera spesial. Pur izénplu, Aron tinha un ‘sinal sagradu di didikason’ ki éra un plaka di oru ki ta limiaba na frenti di se turbanti. Kel plaka di oru ta mostraba ma el skodjedu pa el sirbiba Jeová di un manera spesial, ki éra ser saserdóti prinsipal na Israel. (Lev. 8:9) Kes Nazireu tanbê éra didikadu di un manera  spesial pa Jeová. Kel palavra “Nazireu” ben di palavra ebraiku nazír ki krê fla un “Algen Siparadu” ô un “Algen Didikadu”. Kes nazireu tinha ki obiba prinsipalmenti ku kes mandamentu ki staba skrebedu na Lei di Muizés. — Núm. 6:2-8.

4. (a) Óras ki bu da bu vida pa Jeová kuzê ki ta bira más inportanti pa bo? (b) Kuzê ki “nega bu kabésa” krê fla? (Odja dizenhu.)

⁴ Kantu bu da bu vida pa Jeová, bu skodje bira disiplu di Jizus i di la pa dianti faze vontadi di Jeová bira kel kuza más inportanti na bu vida. Má kuzê ki ta involve da bu vida pa Jeová? Jizus fla: “Si algen krê ser nha sigidor, el debe nega se kabésa”. (Mat. 16:24) Kel frazi na gregu ki traduzidu pa “el debe nega se kabésa” tanbê pode ser traduzidu pa “el debe fla nau pa se kabésa”. Dja ki bu da bu vida pa Jeová, bu meste fla nau pa kalker kuza ki ta bai kóntra se vontadi. (2 Kor. 5:14, 15) Kel-li ta inklui fla nau pa “kes óbra di karni”, sima konportamentu seksual mariadu. (Gál. 5:19-21; 1 Kor. 6:18) Si bu obi ku Jeová, bu vida ta bira más difísil? Nau. Si bu ta ama Jeová i si bu ten serteza ma obi ku se leis é bon pa bo, bu vida ka ta bira más difísil. (Sal. 119:97; Isa. 48:17, 18) Un irmon ki txoma Nikolau fla: “Bu pode odja leis di Jeová sima un gradi di un kadia ki ta inpidi-u di faze kel ki bu krê ô sima un gradi ki ta proteje-u di prigu di un lion.”

5. (a) Modi ki bu ta da bu vida pa Jeová? (b) Kal ki é diferénsa entri da bu vida pa Jeová i batiza? (Odja fotus.)

⁵ Modi ki bu ta da bu vida pa Jeová? Na un orason, bu ta promete-l ma bu ta sirbi sô el i ma faze se vontadi ta ser kel kuza más inportanti na bu vida. Na  verdadi, bu sta promete Jeová ma bu ta kontinua ta ama-l “di tudu bu korason, di tudu bu alma, di tudu bu menti i di tudu bu forsa.” (Mar. 12:30) Bu ta faze bu didikason sô bo ku Jeová. Má bu ta batiza na públiku. Kel-li ta mostra kes algen ki sta ta odja ma bu da bu vida pa Jeová. Bu didikason é un votu sagradu. Bu obijetivu debe ser kunpri kel votu li i Jeová ta spera ma bu ta faze kel-li. — Ecl. 5:4, 5.

PAMODI KI BU DEBE DA BU VIDA PA JEOVÁ?

6. Kuzê ki ta motiva un algen pa da se vida pa Jeová?

⁶ Kel motivu más inportanti é pamodi bu ta ama Jeová. Bu amor ka ten bazi sô na sentimentu. Envês di kel-li, el ten bazi na “konhisimentu izatu” i na “intendimentu ki spritu ta da”, ki krê fla kes kuza ki bu prende sobri Jeová ki poi kel amor ki bu ten pa el ta bira más fórti. (Kol. 1:9) Studa Bíblia pô-u ta ten serteza ma (1) Jeová é un algen rial, (2) Bíblia é se Palavra i (3) Jeová ta uza se organizason pa faze se vontadi.

7. Kuzê ki bu debe faze antis di bu da bu vida pa Deus?

⁷ Pa un algen da se vida pa Jeová, el debe konxe kes ensinu prinsipal ki sta na Palavra di Deus i vive di akordu ku es. El debe faze se midjór pa pâpia ku otus algen sobri kuzê ki el prende. (Mat. 28:19, 20) Se amor pa Jeová ta bira más fórti i na se korason el ta dizeja sirbi sô El. É kel-li ki kontise ku bo? Óras ki bu dizenvolve kel amor li, bu ta  da bu vida pa Jeová i batiza ka sô pa agrada bu instrutor di Bíblia ô bu pai ku bu mai. I nen bu ka ta faze kel-li sô pamodi bus amigu sta ta faze si.

8. Modi ki gratidon ta djuda-u toma disizon di da bu vida pa Jeová? (Salmo 116:12-14)

⁸ Óras ki bu ta pensa na tudu kuza ki Jeová dja faze pa bo, bu ta xinti gratidon i bu ta krê da bu vida pa el. (Lé Salmo 116:12-14.) Bíblia ta fla ma Jeová é Kel ki ta da “tudu bon prezenti i tudu prezenti perfeitu”. (Tia. 1:17) Un di kes prezenti más grandi ki Jeová da-nu é sakrifisiu di se Fidju, Jizus. Pensa na modi ki kel-li é un bon prezenti! Pamodi resgati, bu ta pode ten un amizadi fórti ku Jeová. I tanbê bu ta pode ten oportunidadi di vive pa tudu ténpu. (1 Juan 4:9, 10, 19) Da bu vida pa Jeová é un di kes midjór manera di bu mostra ma bo é gratu pa kel grandi amor ki Jeová mostra i pa tudu kes benson ki Jeová dja da-u. (Deut. 16:17; 2 Kor. 5:15) É kel-li ki nu ta prende na livru Vive filís pa tudu ténpu! na lison 46, pontu 4, ki ta inklui un vídiu di três minutu ku téma Da Deus bus prezenti.

BU STA PRONTU PA BU DA BU VIDA PA JEOVÁ I BATIZA?

9. Pamodi ki un algen ka debe xinti presionadu na da se vida pa Jeová?

⁹ Bu pode xinti ma bu ka sta prontu pa bu da bu vida pa Jeová i batiza. Talvês inda bu meste faze mudansas na bu vida pa bu vive di akordu ku prinsípius di Jeová ô talvês bu meste di más ténpu pa bu bira bu fé más fórti. (Kol. 2:6, 7) É ka tudu studanti ki ta prugridi na mésmu ténpu, nen é ka tudu jóven ki ta sta prontu pa da ses vida pa Jeová i batiza na mésmu idadi. Tenta intende ki mudansas ki bu meste faze i faze-s di akordu ku bu kapasidadi i sen konpara ku otus algen. — Gál. 6:4, 5.

10. Kuzê ki bu pode faze si bu da kónta ma inda bu ka sta priparadu pa da bu vida pa Jeová i batiza? (Odja kuadru “ Pa kes jóven ki ses pai ku ses mai é Tistimunhas di Jeová”.)

¹⁰ Sikrê bu da kónta ma inda bu ka sta priparadu pa da bu vida pa Jeová, kontinua ku kel méta li. Ora ta pidi Jeová pa djuda-u faze kes mudansa ki meste na bu vida. (Flp. 2:13; 3:16) Bu pode ten serteza ma el ta obi bu orason i ma el ta djuda-u. — 1 Juan 5:14.

PAMODI KI ALGUNS ALGEN TA FIKA KU MEDU

11. Modi ki Jeová ta djuda-nu kontinua fiel pa el?

¹¹ Alguns algen ki sta prontu pa da ses vida pa Jeová i batiza, ta fika ku medu di faze kel-li. Es pode pergunta: ‘I si dipôs N faze un pekadu gravi i N dizasosiadu?’ Si bu ta xinti kel medu li, ten serteza ma Jeová ta da-u tudu kel ki bu meste pa bu “anda di manera dretu pa [el] di akordu ku se leis, pa [bu] pode agrada-l na tudu kuza”. (Kol. 1:10) Tanbê, el ta da-u forsa pa bu faze kel ki é dretu. Jeová dja djuda txeu algen faze kel ki é dretu. (1 Kor. 10:13) É pur isu ki é poku algen ki ta dizasosiadu di kongregasons. Jeová ta djuda se povu kontinua fiel.

12. Modi ki nu pode ivita faze un pekadu gravi?

¹² Tudu algen ta xinti tentadu na faze kuzas mariadu. (Tia. 1:14) Má, bu ten ki disidi kuzê ki bu ta faze óras ki bu xinti tentadu. Na verdadi, é bo ki ta disidi modi ki bu ta vive. Alguns algen ta fla  ma nu ka pode kontrola kuzê ki nu ta xinti i ki nu ta faze. Má kel-la é mintira. Bu pode prende kontrola bus dizeju mariadu. I mésmu si bu ten algun dizeju mariadu, bu pode nega aji di akordu ku el. Pur isu, ora tudu dia. Kontinua ta studa Palavra di Deus. Sisti tudu runion. Pâpia ku otus algen sobri bu fé. Faze kes kuza li sénpri, ta da-u forsa ki bu ta meste pa bu kunpri bu votu di didikason. I nunka ka bu skese ma Jeová ta djuda-u faze kel-li. — Gál. 5:16.

13. Ki bon izénplu Juzé da-nu?

¹³ Bu pode atxa más fásil vive di akordu ku bu didikason, si bu disidi kuzê ki bu ta faze antis di bu pasa pa un tentason. Bíblia ta pâpia di txeu algen ki faze kel-li, enbóra es éra inperfeitu. Pur izénplu, mudjer di Putifar tenta deta ku Juzé txeu bês. Má Juzé sabia kuzê ki el debe fazeba. Má, Bíblia ta fla ma el ta ‘negaba’ i el ta flaba: ‘Modi ki N pode faze es grandi maldadi i peka kóntra Deus?’ (Gén. 39:8-10) Nton, ta fika klaru ma Juzé sabia modi ki el ta reajiba ti mésmu antis ki mudjer di Putifar tentaba el. Kel-li bira más fásil pa el faze kel ki é sértu kantu el pasa pa kel tentason.

14. Modi ki bu pode prende fla nau óras ki bu tentadu?

¹⁴ Modi ki bu pode imita Juzé i faze kel ki é dretu óras ki bu pasa pa un tentason? Bu pode disidi gósi kuzê ki bu ta faze óras ki bu tentadu. Prende fla nau lógu pa kes kuza ki Jeová ta ôdia i ti mésmu nega pensa na es. (Sal. 97:10; 119:165) Di es manera bu ka ta peka óras ki bu tentadu pamodi bu ta sabe modi ki bu ta reaji.

15. Modi ki un algen pode mostra Jeová ma el sta ta “djobe-l asériu”? (Ebreus 11:6)

¹⁵ Talvês bu sabe ma bu atxa verdadi i bu krê sirbi Jeová di tudu bu korason. Má talvês ten algun kuza ki inda sta ta inpidi-u di da bu vida pa Jeová i batiza. Bu pode faze mésmu kuza ki rei Davidi. Bu pode inplora Jeová: ‘Ó Deus, djobe-m i konxe nha korason. Izamina-m i konxe nhas preokupason. Odja si N tene algun tendénsia mariadu, i gia-m na kaminhu di ténpu sen fin.’ (Sal. 139:23, 24) Jeová ta abênsua “kes  ki ta djobe-l asériu.” Sforsu ki bu sta faze di txiga na bu méta di da bu vida pa Jeová i batiza, ta mostra ma bu sta ta djobe-l asériu. — Lé Ebreus 11:6.

KONTINUA TA BIRA MÁS AMIGU DI JEOVÁ

16-17. Modi ki Jeová ta atrai kes ki ses pai ku ses mai é Tistimunhas di Jeová? (Juan 6:44)

¹⁶ Jizus fla ma Jeová ta atrai se disiplus pa el. (Lé Juan 6:44.) Pensa na modi ki kel-li é sábi i kuzê ki kel-li ta siginifika pa bo. Jeová ta odja un kuza di bon na kada algen ki el ta atrai pa el. El ta odja kel algen sima se ‘propriadadi spesial’ ô un algen ki ten txeu valor pa el. (Deut. 7:6; nóta di rodapé) É si ki Jeová ta odja-u tanbê.

¹⁷ Má talvês, abo é un jóven ki bu pai ku mai é Tistimunhas di Jeová. Bu pode xinti ma bu sta ta sirbi Jeová sô pamodi bu pai ku bu mai sta ta sirbi-l i ka pamodi é Jeová ki atrai-u pa el. Má Bíblia ta fla: “Nhos txiga pértu di Deus, i el ta txiga pértu di nhos.” (Tia. 4:8; 1 Cró. 28:9) Óras ki bu ta sforsa pa bira amigu di Jeová, el ta bira bu amigu tanbê. Jeová ka ta odja-u sima un algen na un grupu. El ta atrai kada algen i kel-li ta inklui ti kes ki ses pai ku ses mai é Tistimunhas di Jeová. Óras ki kes algen li ta sforsa pa bira amigu di Jeová, el ta bira ses amigu tanbê sima Tiagu 4:8 ta mostra. — Konpara ku 2 Tesalonisensis 2:13.

18. Kuzê ki nu ta ben odja na kel otu studu? (Salmo 40:8)

¹⁸ Óras ki bu ta da bu vida pa Jeová i bu ta batiza, bu sta ta imita atitudi di Jizus. Di livri vontadi Jizus staba dispostu na faze tudu kel ki se Pai pidi-l. (Lé Salmo 40:8; Ebr. 10:7) Na kel otu studu nu ta ben odja kuzê ki pode djuda-u kontinua ta sirbi Jeová di manera fiel dipôs ki bu batiza.