1-2. (a) Na ki situason apóstlu Paulu staba kantu ki el skrebe pa kes irmon di Éfezu i pamodi ki el faze kel-li? (b) Ki perguntas nu sta ben responde?

 TIMENTI Paulu staba prézu na Roma, el faze se midjór pa el da irmons koraji. Dja ki el ka pode ba vizitaba es, el skrebe-s kartas. El skrebe un di kes karta pa vólta di anu 60 ô 61 D.K. pa irmons di Éfezu. — Efé. 1:1; 4:1.

² Kuazi 10 anu antis, Paulu pasaba un ténpu ta prega i ta inxina notísias sábi na Éfezu. (Atus 19:1, 8-10; 20:20, 21) El ta amaba se irmons txeu i el krê djudaba es kontinuaba fiel pa Jeová. Má pamodi ki el skrebe pa kes kriston skodjedu ku spritu santu sobri sukuru i lus? I kuzê ki tudu sérvus di Jeová pode prende ku kel konsedju ki Paulu skrebe? Nu ben odja respóstas pa kes pergunta li.

DI SUKURU PA LUS

3. Ki palavras Paulu uza na kel karta ki el skrebe pa kes kriston di Éfezu?

³ Paulu skrebe pa kes kriston di Éfezu: “Antis nhos staba na sukuru, má gósi nhos sta na lus”. (Efé. 5:8) Li, Paulu uza palavras sukuru i lus pa mostra modi ki kes kriston na Efézu dja mudaba. Nu ben odja pamodi ki Paulu fla ma kes kriston di Éfezu ‘antis staba na sukuru’.

4. Di ki manera kes kriston di Éfezu staba na sukuru pamodi relijion falsu?

⁴ Relijions falsu. Antis di kes kriston di Éfezu prende verdadi i bira kriston, es ta kriditaba na kes ensinu di relijion  falsu i na superstisons. Na sidadi di Éfezu tinha ténplu di deuza gregu Ártemis, ki éra un di kes kuza ki pesoas na mundu más ta dimiraba. Pesoas ta baba kel ténplu pa adoraba imajens. Kes algen ki ta fazeba imajens di santuáriu i di deuza Ártemis ta ganhaba txeu dinheru. (Atus 19:23-27) Alén di kel-li, txeu algen na Éfezu ta fazeba majia. — Atus 19:19.

5. Di ki manera kes algen di Éfezu staba na sukuru pamodi konportamentu seksual mariadu?

⁵ Konportamentu seksual mariadu. Kes algen na Éfezu ta fazeba konportamentu seksual mariadu i es ka tinha vergónha di kel-la. Éra normal obiba konbérsus indisenti na tiatru ki es ta fazeba na sidadi i ti mésmu na kes fésta di relijion. (Efé. 5:3) Txeu algen na Éfezu ka sta xintiba “más ninhun dór na konsénsia”. Kes palavra li krê fla ma es fika ka ta xinti más ninhun dór na ses korason óras ki es fazeba un kuza mariadu. (Efé. 4:17-19) Antis di es prende lei di Jeová sobri kuzê ki é dretu ô mariadu, ses konsénsia ka ta inkomodaba es óras ki es ta fazeba un kuza mariadu. Tanbê, es ka ta fikaba preokupadu ku modi ki Jeová ta xintiba pamodi kuzas ki es ta fazeba. É pur isu ki Paulu fla ma ses menti staba “na sukuru, siparadu di kel vida ki é di Deus”.

6. Pamodi ki Paulu fla ma kes kriston di Éfezu ‘gósi staba na lus’?

⁶ Má alguns algen di Éfezu sai di sukuru. Paulu skrebe: “Gósi nhos sta na lus unidu ku Sinhor.” (Efé. 5:8) Gósi, es staba ta vive di akordu ku Skrituras, ki éra sima un lus ki ta giaba es. (Sal. 119:105) Dja es bandonaba ses relijion falsu i konportamentu seksual mariadu. Tanbê es bira ta “imita Deus” i es staba ta faze ses midjór na adorason pa Jeová i ta lova-l. — Efé. 5:1.

7. Di ki manera nos situason é sima txeu di kes kriston di Éfezu?

⁷ Di mésmu manera, nos tanbê antis di  nu prende verdadi nu staba na sukuru pamodi relijion falsu i konportamentu seksual mariadu. Alguns di nos ta komemoraba féstas di relijion falsu ô nu ta fazeba konportamentu seksual mariadu. Má kantu nu prende leis di Jeová sobri kel ki é dretu i mariadu, nu faze mudansas. Nu pasa ta vive di manera ki Deus ta krê pa nu vive. Pamodi kel-li, nos vida fika mutu más midjór. (Isa. 48:17) Má gósi, nu ten ki lida ku alguns dizafiu. Nu meste fika lonji di kel sukuru ki nu dexa pa tras i “kontinua ta anda sima fidjus di lus”. Modi ki nu pode faze kel-li?

FUJI DI SUKURU

8. Sima sta na Efézius 5:3-5, kuzê ki kes kriston di Éfezu tinha ki ivitaba?

⁸ Lé Efézius 5:3-5. Pa kontinuaba lonji di kes konportamentu mariadu ki ta poba kes kriston di Éfezu na sukuru, es tinha ki ivita fazeba kes kuza ki ka ta dexaba Jeová kontenti. Kel-li ta inkluiba ka sô konportamentu seksual mariadu má tanbê kes konbérsu indisenti. Paulu lenbra kes kriston di Éfezu ma es ten ki ivitaba kes kuza li si es krê tinha “eransa na Reinu di Kristu i di Deus.”

9. Pamodi ki nu debe toma txeu kuidadu pa nu ka faze kuzas ki pode pô-nu ta faze konportamentu seksual mariadu?

⁹ Nos tanbê nu meste toma kuidadu pa nu ka faze “óbras di sukuru ki ka ten valor”. (Efé. 5:11) Txeu bês, spiriénsias ta mostra ma kantu más un algen odja, obi ô pâpia sobri kuzas indisenti ô ki ten aver ku konportamentu seksual mariadu, ta ser más fásil el faze kel ki é mariadu. (Gén. 3:6; Tia. 1:14, 15) Na un país, txeu irmon ku irmans fika ta faze párti di un grupu di “amigus” na redi sosial. Na komésu, txeu di es kumesa ta pâpia sobri Jeová i sobri verdadi. Má poku-poku, es kumesa ta pâpia sobri kuzas ki ka ta agrada Jeová. Ses konbérsu bira ta ser prinsipalmenti sobri séksu. Txeu di kes irmon dipôs fla ma kes konbérsu indisenti pô-s ta faze konportamentu seksual mariadu.

10. Modi ki Satanás ta tenta ingana-nu? (Efézius 5:6)

¹⁰ Mundu di Satanás krê ingana-nu. Es krê pa nu kridita ma kes kuza ki Jeová ta fla ma é mariadu i indisenti, na verdadi é ka mariadu. (2 Ped. 2:19) Kel-li ka ta dexa-nu dimiradu. Satanás sénpri tenta konfundi pesoas, asi pa es ka konsigi intende kuzê ki é dretu i kuzê ki é mariadu. (Isa. 5:20; 2 Kor. 4:4) Pur isu, txeu filmi, prugramas di tilivizon i pájinas na internet ta spadja ideias ki ta bai kóntra kes lei justu di Jeová. Satanás krê pô-nu ta pensa ma kes kuza indisenti i konportamentu seksual mariadu, ki é normal na mundu oji, é ka mariadu. I ti el krê pa nu pensa ma es é sábi i ma es ka ta prujudika-nu. — Lé Efézius 5:6.

11. Modi ki spiriénsia di Ánjila ta mostra ma nu meste aplika kel konsedju ki sta na Efézius 5:7? (Odja fotus.)

¹¹ Satanás krê pa nu konvive ku pesoas ki ka ta djuda-nu sigi leis di Jeová. É pur isu ki Paulu fla kes kriston di Éfezu: “Ka nhos faze sima es” ô ka nhos djunta ku es, kel-li krê fla ka djunta ku kes algen ki ta faze kuzas ki Deus ta atxa ma é mariadu. (Efé. 5:7) Nu ten ki lenbra ma nu ka ta konvive sô ku kes algen ki nu sta pértu di es. Tanbê nu pode konvive ku pesoas na redi sosial, i kel-li é un prigu ki  kristons di Éfezu ka tinha. Ánjila, a ki ta mora na Ázia, diskubri ma redi sosial pode ser txeu prigozu. El fla: “Poku-poku, N kumesa ta muda nha manera di pensa. Ka dura txeu, N fika ka ta liga más ten ‘amigus’ ki ka ta ruspetaba prinsípius di Bíblia. Dipôs, N kumesa ta pensa ma ka tinha prubléma vive di un manera ki ka ta agrada Jeová.” Má ku amor, ansions djuda Ánjila faze kes mudansa ki el mesteba. El fla: “Gósi, N ta konsentra na Jeová i na kel ki el ta pensa envês di konsentra na redi sosial.”

12. Kuzê ki ta djuda-nu sigi leis di Jeová sobri kuzê ki é dretu i mariadu?

¹² Nu ka debe dexa mundu pô-nu ta pensa ma konportamentu seksual mariadu é normal. Nu sabe ma kel-li é ka verdadi. (Efé. 4:19, 20) Pur isu, é bon nu pensa na kes pergunta li: ‘N ta toma kuidadu pa N ka pasa ténpu dimás ku kolégas di trabadju, di skóla ô otus algen ki ka ta ruspeta leis justu di Jeová? N ta difende leis di Jeová ku koraji sikrê otus algen pode fla ma mi é ka toleranti?’ Sima 2 Timótiu 2:20-22 ta mostra, talvês nu meste toma kuidadu óras ki nu ta skodje nos amigu déntu di kongregason. Nu debe lenbra ma alguns irmon pode ka djuda-nu kontinua ta sirbi Jeová di manera fiel.

ANDA “SIMA FIDJUS DI LUS”

13. Kuzê ki “kontinua ta anda sima fidjus di lus” krê fla? (Efézius 5:7-9)

¹³ Paulu inkoraja kes kriston di Éfezu pa es kontinua ka sô ta nega sukuru, má tanbê pa es “kontinua ta anda sima fidjus di lus”. (Lé Efézius 5:7-9.) Kuzê ki kel-li krê fla? Kel-li krê fla ma nu debe konporta sima sérvus di Jeová tudu óra. Un manera di faze kel-li é lé i studa Bíblia sénpri i tanbê nos publikasons ku bazi na Bíblia. É inportanti nu presta txeu atenson na izénplu di Jizus Kristu, ki é “lus di mundu” i na kuzê ki el inxina. — Juan 8:12; Pro. 6:23.

14. Modi ki spritu santu pode djuda-nu?

 ¹⁴ Tanbê nu meste ajuda di spritu santu di Deus pa nu konsigi kontinua ta konporta “sima fidjus di lus”. Pamodi ki nu meste faze kel-li? Pamodi é ka fásil kontinua linpu na es mundu xeiu di konportamentu mariadu. (1 Tes. 4:3-5, 7, 8) Spritu santu pode djuda-nu luta kóntra pensamentu di mundu, i kel-li ta inklui filozofias i ideias ki ta bai kóntra pensamentu di Deus. Tanbê, spritu santu pode djuda-nu ser bon na ‘tudu tipu di kuza i ser justu’. — Efé. 5:9.

15. Di ki maneras nu pode resebe spritu santu? (Efézius 5:19, 20)

¹⁵ Un manera ki nu pode resebe spritu santu é óras ki nu ta pidi-l na orason. Jizus fla ma Jeová ta “da spritu santu pa kes ki ta pidi-l”. (Luk. 11:13) Tanbê, nu ta resebe spritu santu óras ki nu ta lova Jeová djuntu na runion. (Lé Efézius 5:19, 20.) Kel bon influénsia ki spritu santu di Deus ten na nos ta djuda-nu vive di un manera ki ta agrada Deus.

16. Kuzê ki ta djuda-nu toma bons disizon? (Efézius 5:10, 17)

¹⁶ Óras ki nu ten ki toma disizons inportanti, nu meste intende “kal ki é vontadi di Jeová” i dipôs aji di akordu ku el. (Lé Efézius 5:10, 17.) Óras ki nu ta djobe prinsípius di Bíblia ki ta aplika na nos situason, na verdadi nu sta ta djobe kuzê ki Jeová ta pensa sobri kel asuntu. I sima nu ta ba ta aplika kes prinsípiu di Bíblia, nu ta konsigi toma bons disizon.

17. Modi ki nu pode uza nos ténpu di midjór manera? (Efézius 5:15, 16) (Odja dizenhu.)

¹⁷ Paulu tanbê fla kes kriston di Éfezu pa es uza ses ténpu di midjór manera. (Lé Efézius 5:15, 16.) Kel “Malvadu”, ki é Satanás nos inimigu, ta gostaba di pô-nu  okupadu dimás ku kuzas di es mundu, asi pa nu ka ten ténpu pa sirbi Deus. (1 Juan 5:19) Un sérvu di Jeová pode kumesa ta konsentra na dinheru, na skóla ô na trabadju, envês di konsentra na kes txeu oportunidadi di sirbi Jeová. Si kel-li kontise, el ta mostra ma el sta ta kumesa ta pensa sima kes algen ki ka ta sirbi Jeová. É klaru ki kes kuza li é ka mariadu, má nunka nu ka debe pô-s na primeru lugar na nos vida. Pa nu anda “sima fidjus di lus”, nu meste “uza [nos] ténpu” di midjór manera, kel-li krê fla konsentra na kuzê ki é más inportanti.

18. Kuzê ki Ronaldu faze pa uza se ténpu di midjór manera?

¹⁸ Djobe maneras di faze más na bu sirvisu pa Jeová. É kel-li ki Ronaldu, ki ta vive na Áfrika di Sul, faze. El fla: “Pensa na nha vida i ora txeu pa Jeová djuda-m faze más na pregason. N ora pa N atxa un trabadju ki ta dexaba mi ten más ténpu pa pregason. Ku ajuda di Jeová, N atxa un bon trabadju. Mi ku nha mudjer nu kumesa nos sirvisu pa ténpu interu djuntu.”

19. Modi ki nu pode kontinua ta anda “sima fidjus di lus”?

¹⁹ Kel karta ki Paulu skrebe pa kes kriston di Éfezu talvês djuda-s kontinua fiel pa Jeová. Kel karta li tanbê pode djuda-nu. Sima nu prende, el pode djuda-nu skodje ku sabedoria kuzê ki nu ta divirti ku el i kenha ki nu ta konvive ku el. El ta insentiva-nu pa nu studa Bíblia sénpri, asi pa lus di verdadi kontinua ta orienta nos vida. I el ta mostra ma spritu santu é inportanti pa nu dizenvolve bons kualidadi. Si nu faze kel ki Paulu skrebe, nu pode konsigi toma bons disizon ki ta sta di akordu ku kel ki Jeová ta pensa. Si nu faze kes kuza li, nu ta konsigi fuji di sukuru di es mundu i kontinua na lus.