1-2. Ki bensons un algen ta resebe dipôs ki el batiza?

 NU FIKA kontenti kantu nu batiza i nu bira ta faze párti di família di Jeová. É un ónra ten es amizadi fórti ku Jeová. Nos tudu, nu ta konkorda ku kes palavra li ki salmista Davidi fla: ‘Filís é kel algen ki bu [Jeová] ta skodje i ki bu ta traze pa djuntu di bo, pa mora na entrada di bu kaza’. — Sal. 65:4.

² Jeová ka ta dexa tudu algen entra na se família. Sima nu odja na studu ki pasa, el ta dexa txiga pértu di el kes algen ki prova ma es krê ten un amizadi fórti ku el. (Tia. 4:8) Óras ki bu da bu vida pa Jeová i bu batiza, bu ta ten un amizadi spesial ku Jeová. Bu pode ten serteza ma dipôs ki bu batiza, el ta ben ‘baza un benson riba di bo ti ki ka falta más nada.’ — Mal. 3:10; Jer. 17:7, 8.

3. Ki responsabilidadi inportanti kes algen ki da ses vida pa Jeová i batiza ten? (Eclesiastes 5:4, 5)

³ É klaru ki batiza é sô komésu. Dipôs di da kel pasu li, bu ta krê faze bu midjór pa bu vive di akordu ku bu votu di didikason, mésmu si bu pasa pa tentason ô bu fé podu na próva. (Lé Eclesiastes 5:4, 5.) Dja ki bo é disiplu di Jizus, bu ta faze bu midjór pa bu sigi se izénplu i tudu kel ki el inxina. (Mat. 28:19, 20; 1 Ped. 2:21) Kel studu li ta ben djuda-u faze kel-li.

 KONTINUA TA SIGI JIZUS SIKRÊ KU DIFIKULDADIS I TENTASONS

4. Na ki sentidu kes disiplu di Jizus ta ba karegaba un “staka di tortura”? (Lukas 9:23)

⁴ Ka bu pensa ma dipôs di batiza bu vida ta ser fásil. Na verdadi, Jizus dexa klaru ma se disiplus ta ba karegaba un “staka di tortura” i es tinha ki fazeba kel-li “kada dia”. (Lé Lukas 9:23.) Jizus krê flaba ma se sigidoris ta ba sta sénpri ta sufri? É klaru ki nau. Jizus krê flaba ma alén di kes benson ki es ta resebeba, tanbê es ta ben pasaba pa prublémas. I alguns di kes prubléma ta ben sérba difísil. — 2 Tim. 3:12.

5. Ki bensons Jizus promete pa tudu kes ki faze sakrifisius?

⁵ Talvês bu família dja faze-u opozison ô bu dexa di ten alguns kuza material pa bu poi Reinu na primeru lugar na bu vida. (Mat. 6:33) Si bu faze kel-li, bu pode ten serteza ma Jeová odja kes kuza ki bu faze pamodi bu fé. (Ebr. 6:10) Talvês dja bu da kónta ma kes palavra li di Jizus é verdaderu: “Ka ten ningen ki dexa kaza, irmons, irmans, mai, pai, fidjus ô txon pamodi mi i pamodi notísias sábi ki ka ta resebe 100 bês más gósi, na kel ténpu li, kazas, irmons, irmans, mai, fidjus i kanpus ku pirsigison, i na kel mundu ki ta ben, vida pa tudu ténpu.” (Mar. 10:29, 30) Kes benson ki dja bu resebe é mutu más txeu di ki kalker sakrifisiu ki dja bu faze. — Sal. 37:4.

6. Pamodi ki bu meste kontinua ta luta kóntra “dizeju di karni” dipôs ki bu batiza?

⁶ Dipôs di batiza, bu meste kontinua ta luta kóntra “dizeju di karni”. (1 Juan 2:16) Kel-li é pamodi inda bo é un disendenti inperfeitu di Adon. Alvês, bu pode xinti sima apóstlu Paulu. El fla: “Déntu di mi N ta ama lei di Deus própi, má N ta odja na nha korpu otu lei ta briga kóntra lei di nha menti i ta leba-m prézu pa lei di pekadu ki sta na nha korpu.” (Rom. 7:22, 23) Bu pode xinti dizanimadu pamodi bu ten ki luta kóntra dizejus mariadu. Má si bu pensa na kel promésa ki bu faze pa Jeová kantu bu da bu vida pa el, bu ta ten forsa pa bu luta kóntra tentason. Na verdadi, kel votu ki bu faze kantu bu da bu vida pa Jeová ta djuda-u óras ki bu pasa pa tentasons. Di ki manera?

7. Modi ki da bu vida pa Jeová ta djuda-u kontinua fiel pa el?

⁷ Óras ki bu da bu vida pa Jeová, bu ta nega bu kabésa. Kel-li krê fla ma bu ta nega bus dizeju i bu ta nega faze kuzas ki ka ta agrada Jeová. (Mat. 16:24) Pur isu óras ki bu pasa pa un tentason, bu ka ta perde ténpu ta pergunta kuzê ki bu ta faze. Dja bu disidi kuzê ki bu ta ba faze: kontinua fiel pa Jeová. Di manera firmi, bu ta sta disididu na agrada Jeová. Bu ta ser sima Jó. El pasa pa difikuldadis, má simé el fla ku kunfiansa: ‘N ta mante nha lialdadi!’ — Jó 27:5.

8. Modi ki midita na kel orason ki bu faze kantu bu da bu vida pa Jeová, ta djuda-u ka kai na tentason?

⁸ Óras ki bu ta midita na kel orason ki bu faze kantu bu da bu vida pa Jeová, bu ta atxa forsa pa bu ka kai na tentason. Pur izénplu, bu ta mostraba interesi pa un algen ki é kazadu? É klaru ki nau! Bu promete Jeová ma bu ka ta fazeba kel-li. Si bu ka dexa dizejus mariadu kria, nton bu ka ta meste luta  kóntra es más tardi. Di es manera, bu ta ‘fika lonji di kaminhu di kes ki é mau’. — Pro. 4:14, 15.

9. Modi ki midita na kel orason ki bu faze, kantu bu da bu vida pa Jeová, tanbê ta djuda-u kontinua ta poi bu adorason pa Jeová na primeru lugar na bu vida?

⁹ I si bu oferesedu un trabadju ki ka ta dexa-u sisti tudu runion? Bu ka ta fika ku dúvida sobri kuzê ki bu ta faze. Pamodi antis di bu oferesedu kel trabadju dja bu staba disididu ma bu ka ta setaba ninhun trabadju ki ka ta dexa-u sisti tudu runion. Bu ka ta xinti tentadu na seta kel trabadju i dipôs djobe un manera di poi Jeová na primeru lugar. Midita na izénplu di Jizus pode djuda-nu. El staba disididu na agrada se Pai. Sima Jizus, bu debe sta disididu na nega lógu kalker kuza ki ka ta agrada kel Deus ki bu da bu vida pa el. — Mat. 4:10; Juan 8:29.

10. Modi ki Jeová ta djuda-u kontinua ta sigi Jizus dipôs ki bu batiza?

¹⁰ Na verdadi, kes provason i tentasons ta da-u oportunidadi di mostra ma bu sta disididu na kontinua ta sigi Jizus. Si bu faze kel-li, bu pode ten serteza ma Jeová ta djuda-u. Bíblia ta fla: “Deus é fiel, i el ka ta dexa pa nhos tentadu más ki kel ki nhos ta pode aguenta, má óras ki nhos tentadu, Deus ta da nhos un saída pa nhos pode aguenta kel tentason.” — 1 Kor. 10:13.

MODI KI NU TA KONTINUA TA SIGI JIZUS

11. Kal ki é un di kes midjór manera di bu kontinua ta sigi Jizus? (Odja fotus.)

¹¹ Jizus éra zelozu i sénpri el ta oraba pa Jeová. (Luk. 6:12) Na verdadi, un di  kes midjór manera di bu kontinua ta sigi Jizus dipôs ki bu batiza é kontinua ta faze kuzas ki ta pô-u ta bira más amigu di Jeová. Bíblia ta fla: “Ka ta inporta kal ki é prugrésu ki dja nu faze, nu kontinua ta anda na es mésmu kaminhu.” (Flp. 3:16) Di vês en kuandu, bu ta obi spiriénsias di irmons ku irmans ki disidi faze más na ses sirvisu pa Jeová. Talvês, es bai pa Skóla pa Pregadoris di Reinu ô es muda pa un lugar ki ten más nisisidadi. Si bu situason ta da, kes-li é bons méta pa bo tanbê. Povu di Jeová ta djobe manera di faze más na pregason. (Atus 16:9) Má i si gósi, bu ka ta konsigi faze más? Ka bu pensa ma bu ten ménus valor di ki kes irmon ki ta konsigi faze kel-li. Más inportanti é kontinua ta aguenta firmi. (Mat. 10:22) Nunka ka bu skese ma bu pode poi Jeová txeu kontenti óras ki bu ta faze kel ki bu ta pode di akordu ku bu situason. Kel-li é un manera inportanti di bu kontinua ta sigi Jizus dipôs ki bu batiza. — Sal. 26:1.

12-13. Kuzê ki bu pode faze si bu zelu sta ta fika más poku? (1 Koríntius 9:16, 17) (Odja kuadru “ Kontinua na korida”.)

¹² Kuzê ki bu debe faze si bu xinti ma bu ka sta ora di korason ô ma bu ka sta gosta di bu pregason sima antis? I si bu ka sta ta tra pruvetu di bu leitura di Bíblia sima antis? Si bu xinti di kel manera li dipôs ki bu batiza, ka bu pensa ma spritu di Jeová ka sta ku bo más. Abo é un algen inperfeitu i alvês bus sentimentu pode muda. Si bu zelu sta fika más poku, pensa na izénplu di apóstlu Paulu. Enbóra el ta tenta imitaba Jizus, el sabia ma alvês el ka ta xintiba ku  vontadi di faze kel ki el meste fazeba. (Lé 1 Koríntius 9:16, 17.) El fla: “Sikrê N faze-l kóntra nha vontadi, simé el é un responsabilidadi ki N dadu.” Paulu krê flaba ma el staba disididu na faze se trabadju di pregason ka ta inporta modi ki el staba ta xinti.

¹³ Di mésmu manera, ka bu toma disizons ku bazi sô na bus sentimentu. Sta disididu na faze kel ki é dretu sikrê é ka kel-la ki bu krê faze. Si bu kontinua ta faze kel ki é dretu, ku ténpu bus sentimentu pode muda pa midjór. Timenti kel-li ka kontise, kontinua ta studa Bíblia, ta faze orason, ta sisti tudu runion i ta sai na pregason. Kes kuza li ta djuda-u kontinua ta sigi Jizus dipôs ki bu batiza. Óras ki bus irmon ku irmans odja ma bu sta kontinua ta aguenta firmi na bu sirvisu pa Jeová, es ta fika inkorajadu. — 1 Tes. 5:11.

“NHOS KONTINUA TA DJOBE SI NHOS STA NA FÉ”

14. Di vês en kuandu, kuzê ki bu debe analiza i pamodi? (2 Koríntius 13:5)

¹⁴ Otu kuza ki tanbê ta djuda-u dipôs ki bu batiza é analiza bu kabésa di vês en kuandu. (Lé 2 Koríntius 13:5.) Di vês en kuandu, tra ténpu pa bu analiza bu vida i bus ábitu pa odja si bu sta ora tudu dia, lé i studa Bíblia, sisti runion i sai na pregason. Djobe maneras di bu tra más pruvetu di kes kuza li. Pur izénplu, pergunta bu kabésa: ‘N ta konsigi splika otus algen kes ensinu prinsipal di Bíblia? Ten algun manera di N tra más pruvetu di nha pregason? Na nha orason, N ta fla Jeová kuzas klaru i N ta mostra ma N ta kunfia na el? N ta sisti tudu runion? Modi ki N pode konsentra i partisipa más txeu na runion?’

15-16. Kuzê ki bu prende ku spiriénsia di un irmon sobri ka kai na tentason?

¹⁵ É inportanti bu analiza bus pontu fraku. Un irmon, ki txoma Robert, konta un spiriénsia ki ta mostra pamodi ki é bon faze kel-li. El fla: “Kantu N tinha uns 20 anu, N tinha un trabadju di meiu piriúdu. Un dia dipôs di trabadju, un minina di nha trabadju konvida-m pa N bai se kaza. El fla ma nu ta fikaba nos sô i ma nu ‘ta pasaba sábi’. Na kumesu, N da-l uns diskulpa má dipôs N fla-l nau i N splika-l pamodi.” Nu ta fika kontenti pamodi Robert ka kai na tentason. Má dipôs, el pensa na kuzê ki kontise i el da  kónta ma el pode reajiba di manera diferenti. El fla: “N ka nega kel konviti lógu ki el fla-m ô di manera firmi, sima Juzé faze ku mudjer di Putifar. (Gén. 39:7-9) Na verdadi, N fika dimiradu pamodi foi difísil nega. Kel-li djuda-m odja ma N meste biraba nha amizadi ku Jeová más fórti.”

¹⁶ Sima Robert, é inportanti bu analiza bus sentimentu. Mésmu óras ki bu ka kai na un tentason, pergunta bu kabésa: ‘Kantu ténpu N leba pa N fla nau?’ Si bu odja ma bu meste midjora, ka bu fika dizanimadu. Fika kontenti pamodi gósi bu konxe bu frakéza. Pâpia ku Jeová sobri bu frakéza i faze di tudu pa bu bira bu dizeju di obi ku el más fórti. — Sal. 139:23, 24.

17. Modi ki nómi di Jeová staba involvidu na kel spiriénsia ki Robert pasa pa el?

¹⁷ Nu pode prende otu kuza ku spiriénsia di Robert. El fla: “Dipôs ki N nega konviti di nha koléga di trabadju, el fla-m: ‘Bu pasa na próva!’. N pergunta-l kuzê ki el krê flaba. El splika-m ma un amigu di sel ki antis éra Tistimunha di Jeová fla ma tudu jóvens ki é Tistimunhas di Jeová ta leba un vida finjidu i si es ten un xansi es ta faze kuzas mariadu. Nton, el fla se amigu ma el ta ba poba mi na próva pa el odjaba si kel-la éra verdadi. N fika filís di sabe ma N onra nómi di Jeová.”

18. Kuzê ki bu sta disididu na faze dipôs ki bu batiza? (Odja kuadru “ Dôs artigu ki bu ta ba gosta txeu”.)

¹⁸ Óras ki bu da bu vida pa Jeová i bu batiza, bu ta mostra ma bu krê santifika se nómi ka ta inporta kuzê ki kontise. I bu pode ten serteza ma Jeová konxe kes difikuldadi i kes tentason ki bu ta pasa pa el. El ta abênsua bu sforsu di mante fiel pa el. Bu pode ten serteza ma el ta uza se spritu santu pa da-u kel forsa ki bu meste pa bu faze kel-li. (Luk. 11:11-13) Ku ajuda di Jeová, bu pode kontinua ta sigi Jizus dipôs ki bu batiza.