1. Modi ki alvês alguns sérvu di Jeová ta xinti?

 NU TA xinti txeu koraji di sabe ma Jeová sta kontenti ku se povu! Bíblia ta fla: ‘Jeová ta fika kontenti ku se povu’. (Sal. 149:4) Má alvês alguns algen ta fika txeu dizanimadu i ti es pode pergunta: ‘Jeová sta kontenti ku mi?’ Txeu sérvu fiel di Jeová ki Bíblia ta pâpia di el alvês atxa difísil kridita ma Jeová staba kontenti ku es. — 1 Sam. 1:6-10; Jó 29:2, 4; Sal. 51:11.

2. Kenha ki Jeová sta kontenti ku el?

² Bíblia ta mostra klaru ma enbóra nos é inperfeitu nu pode dexa Jeová kontenti. Modi ki nu pode faze kel-la? Nu meste mostra fé na Jizus Kristu i batiza. (Juan 3:16) Asi nu ta mostra otus algen ma dja nu rapende di nos pekadus i ma dja nu promete Deus ma nu ta faze se vontadi. (Atus 2:38; 3:19) Jeová ta fika txeu kontenti óras ki el ta odja-nu ta faze kes kuza li pa bira más se amigu. Si nu faze nos midjór pa kontinua ta kunpri nos promésa di sirbi-l, Jeová ta fika kontenti ku nos i el ta odja-nu sima se grandi amigu. — Sal. 25:14.

3. Ki três pergunta nu ta ben responde na kel studu li?

³ Má, pamodi ki alvês alguns algen ta atxa ma Deus ka sta kontenti ku es? Modi ki Jeová ta mostra ma el sta kontenti ku nos? I modi ki un sérvu di Jeová pode ten serteza ma Jeová sta kontenti ku el?

PAMODI KI ALGUNS ALGEN TALVÊS TA XINTI MA JEOVÁ KA STA KONTENTI KU ES?

4-5. Mésmu ki nu ta xinti sen valor, di ki kuzê ki nu pode ten serteza?

⁴ Désdi ki nos éra mininu, txeu di nos ta xinti ma nu ka ten valor. (Sal. 88:15) Un irmon ki txoma Adrián fla: “Sénpri  N xinti ma N ka ten valor. Désdi ki mi éra mininu, N ta lenbra ma N ta oraba pa nha família ba vive na Paraízu, enbóra N tinha serteza ma N ka mereseba ba vive la.” Tony, ki se família ka éra Tistimunha di Jeová, fla: “Nha pai ku nha mai nunka fla-m ma es ta amaba mi ô ma es tinha orgulhu di mi. Kel-li ta poba mi ta xinti ma ka tinha nada ki N ta fazeba ki ta dexaba es kontenti.”

⁵ Si alvês nu ta xinti ma nu ka ten valor, nu pode lenbra ma Jeová atrai-nu pa el. (Juan 6:44) El ta odja kes bon kualidadi ki nu ten, ki nen nos nu ka ta odja-s na nos mê, i el sabe midjór di ki nos ki tipu di algen ki nos é. (1 Sam. 16:7; 2 Cró. 6:30) Pur isu, nu pode kunfia na el óras ki el ta fla-nu ma nu ten valor. — 1 Juan 3:19, 20.

6. Modi ki apóstlu Paulu xinti ku kes éru ki el faze na pasadu?

⁶ Antis di nu prende verdadi, alguns di nos faze kuzas ki talvês inda ta pô-nu ta xinti kulpadu. (1 Ped. 4:3) Ti mésmu sérvus fiel di Jeová luta kóntra kel tendénsia di faze kuzas mariadu. Bo tanbê bu ta xinti ma Jeová ka ta pode purdua-u? Si bu ta xinti si, bu pode fika inkorajadu di sabe ma otus sérvu fiel di Jeová luta ku sentimentus sima di bo. Pur izénplu, apóstlu Paulu ta xintiba mizeriadu óras ki el ta pensaba na se inperfeisons. (Rom. 7:24) É klaru ki Paulu dja rapendeba di se pekadus i dja el batizaba. Má simé, el fla ma el éra “kel apóstlu ménus inportanti” i ma el éra “kel más pekador.” — 1 Kor. 15:9; 1 Tim. 1:15.

7. Di kuzê ki nu debe lenbra sobri pekadus ki nu faze na pasadu?

⁷ Nos Pai na séu promete ma el ta purdua-nu si nu rapende. (Sal. 86:5) Nton, si nu rapende di verdadi di pekadus ki nu faze, nu pode kunfia ma kel ki Jeová fla é verdadi, i el ta purdua-nu. — Kol. 2:13.

8-9. Modi ki nu pode vense kel sentimentu ma kel ki nu ta faze nunka ka ta txiga pa dexa Jeová kontenti?

⁸ Nos tudu nu krê faze tudu kel ki nu ta pode pa sirbi Jeová. Má, alguns algen pode xinti ma kel ki es ta faze nunka ka ta txiga pa dexa Jeová kontenti. Un irman ki txoma Amanda fla: “N ta kustuma pensa ma da Jeová nha midjór krê fla ma sénpri N ten ki faze más. Pur isu, txeu bês N ta tenta faze más di ki kel ki N ta pode. Pamodi kel-li, óras ki N ka ta konsigi faze kel ki N staba ta spéra di mi, N ta atxa ma Jeová ka sta kontenti ku mi, sima ami N ka sta kontenti ku nha kabésa.”

⁹ Modi ki nu pode vense kel sentimentu ma kel ki nu ta faze nunka ka ta txiga pa dexa Jeová kontenti? Lenbra ma Jeová é ka duru. Nunka el ka ta spera di nos más di ki kel ki nu ta konsigi faze. Jeová ta da txeu valor pa kalker kuza ki nu ta faze, désdi ki nu faze nos midjór. Tanbê, pensa na kes algen ki Bíblia ta pâpia di el ki sirbi Jeová di tudu ses korason. Pur izénplu, pensa na Paulu. El trabadja duru duránti txeu anu. El viaja txeu kilómetru, i el djuda forma txeu kongregason. Má, kantu kuzas muda na se vida i el ka konsigi prega sima el ta fazeba antis, kel-li krê fla ma Jeová ka staba kontenti ku el más? Klaru ki nau. El kontinua ta faze kel ki el ta podeba i Jeová abensua-l. (Atus 28:30, 31) Di mésmu manera, kel ki nu ta pode da Jeová pode muda ku ténpu. Má kuzê ki más ta inporta pa Jeová é kel motivu ki ta pô-nu ta sirbi-l. Nu ben odja alguns manera ki Jeová ta mostra ma el sta kontenti ku nos.

 MODI KI JEOVÁ TA MOSTRA MA EL STA KONTENTI KU NOS?

10. Modi ki nu pode “obi” Jeová ta fla ma el sta kontenti ku nos? (Juan 16:27)

¹⁰ El da-nu Bíblia. Jeová djobe maneras di mostra se povu ma el ta ama-s i ma el sta kontenti ku es. Bíblia ta pâpia di dôs situason ki El fla Jizus ma el éra se fidju ki el ta ama i ki ta da-l txeu alegria. (Mat. 3:17; 17:5) Bu ta gostaba pa Jeová fla mésmu kuza di bo? Oji, Jeová ka ta pâpia ku nos la di séu, má através di Bíblia. Óras ki nu ta lé kes palavra ki Jizus fla se disiplus ku amor, é sima si nu sta “obi” Jeová ta fla ma el sta kontenti ku nos. (Lé Juan 16:27.) Jizus imita se Pai di manera perfeitu. Pur isu, óras ki nu lé ma Jizus fla se disiplus inperfeitu, má ki éra fiel, ma el staba kontenti ku es, nu ta pode imajina Jeová ta fla-nu kes mésmu kuza. — Juan 15:9, 15.

11. Pamodi ki óras ki nu ta pasa pa prublémas, kel-li ka krê fla ma Jeová ka sta kontenti ku nos? (Tiagu 1:12)

¹¹ El ta da-nu kel ki nu meste. Jeová sta sénpri prontu pa djuda-nu. Pur izénplu, el ta da-nu kel ki nu meste. Má, alvês Jeová ta dexa kes kuza mariadu kontise ku nos, sima kontise ku Jó, ki éra un ómi justu. (Jó 1:8-11) Óras ki nu ta pasa pa prublémas, kel-li ka krê fla ma Deus ka sta kontenti ku nos. Envês di kel-li, kes prubléma ta da-nu oportunidadi di mostra ma nu ta ama Jeová txeu i ma nu ten tudu kunfiansa na el. (Lé Tiagu 1:12.) I duránti kes prubléma, nu ta odja ma el ta ama-nu txeu i ma el ta djuda-nu aguenta firmi.

12. Kuzê ki nu pode prende ku spiriénsia di Dmitrii?

¹² Odja kuzê ki kontise ku un irmon na Ázia ki txoma Dmitrii. El perde se trabadju i el fika txeu mês sen konsigi atxa un trabadju. Nton el disidi faze más na pregason, asi pa el mostra ma el ta kunfia na Jeová. Má pasa txeu mês i el ka atxa un trabadju. Dipôs, el tevi un duénsa gravi ki pô-l na kama. El kumesa ta pensa ma el ka éra más un bon maridu ô un bon pai, i el pergunta si Jeová ka staba más kontenti ku el. Nton, un dia di noti se fidju-fémia leba-l un papel ku kes palavra ki sta na Isaías 30:15: ‘Pa nhos ten forsa  nhos ten ki kontinua kalmu i ten kunfiansa.’ Se fidju-fémia fla-l: “Papá, óras ki bu sta xinti tristi, bu pode lenbra di kel testu li.” Dmitrii da kónta ma grasas-a Jeová, se família inda tinha kumida, ropa i un lugar pa mora. El fla: “Kuzê ki N meste fazeba éra kontinua kalmu i kunfia na nha Deus.” Si bu sta pasa pa un situason sima kel-li, bu pode kunfia ma Jeová ta preokupa ku bo i ma el ta djuda-u aguenta firmi.

13. Kenha ki Jeová pode uza pa mostra ma el sta kontenti ku nos, i modi ki el ta faze kel-li?

¹³ El da-nu irmons ku irmans. Jeová ta uza nos irmons ku irmans pa mostra ma el sta kontenti ku nos. Pur izénplu, el pode uza otus algen pa inkoraja-nu na momentu sértu. É kel-li ki kontise ku un irman na Ázia kantu el pasa pa un situason ki dexa-l txeu stresadu. El perde se trabadju i el fika txeu duenti. Dipôs, se maridu faze un pekadu gravi i el tradu priviléjiu di ser ansion. Kel irman fla: “N ka staba ta intende pamodi ki kel-li staba ta kontise. N pensa ma talvês N faze algun kuza mariadu i Jeová ka staba kontenti ku mi más.” Nos irman inplora Jeová pa mostra-l ma el ta ama-l. Kuzê ki Jeová faze? El fla: “Ansions di kongregason djuda-m odja ma Jeová inda ta amaba mi.” Má dipôs, el torna pidi Jeová pa djuda-l. El fla: “Na kel mésmu dia N resebe un karta di un grupu di irmons ku irmans di kongregason. Timenti N staba ta lé kes palavra ki ta da algen koraji, N xinti ma Jeová obi nha orason.” Na verdadi, Jeová txeu bês ta uza nos irmons pa fla-nu palavras ki ta konsola-nu pa djuda-nu odja ma el sta kontenti ku nos. — Sal. 10:17.

14. Kal ki é otu manera ki Jeová ta mostra ma el sta kontenti ku nos?

 ¹⁴ Jeová tanbê ta mostra ma el sta kontenti ku nos óras ki el ta uza nos irmons pa da-nu konsedju óras ki nu meste. Pur izénplu, na ténpu di apóstlus, Jeová uza spritu santu pa poi apóstlu Paulu ta skrebe 14 karta pa otus irmon. Na kes karta, Paulu da konsedjus dirétu, má ku amor. Má pamodi ki Jeová poi Paulu ta skrebe kes konsedju la? Pamodi Jeová é un bon Pai i el ta disiplina se fidjus ‘ki el krê txeu.’ (Pro. 3:11, 12) Pur isu, óras ki algen ta da-nu konsedjus ku bazi na Bíblia, kel-li ka krê fla ma Jeová ka sta kontenti ku nos. Envês di kel-li, el ta mostra ma Jeová inda ta ama-nu. (Ebr. 12:6) Kuzê más ki ta mostra ma Jeová sta kontenti ku nos?

OTUS PRÓVA MA JEOVÁ STA KONTENTI KU NOS

15. Kenha ki Jeová ta da se spritu santu, i ki serteza kel-li ta da-nu?

¹⁵ Jeová ta da se spritu santu pa kes algen ki el sta kontenti ku es. (Mat. 12:18) Pensa na kel-li: ‘N ta mostra alguns kualidadi di frutu di spritu santu na nha vida?’ Bu ten más paxénxa gósi ku otus algen di ki antis di bu konxe Jeová? Na verdadi, kantu más bu mostra kes kualidadi di frutu di spritu di Deus, más serteza bu ta ten ma Jeová sta kontenti ku bo! — Odja kuadru “ Frutu di spritu é...”

16. Kenha ki Jeová ta uza pa prega notísias sábi, i modi ki kel-li ta pô-u ta xinti? (1 Tesalonisensis 2:4)

¹⁶ Jeová ta dexa sô kes algen ki el sta kontenti ku el prega notísias sábi. (Lé 1 Tesalonisensis 2:4.) Odja modi ki pâpia di notísias sábi ku otus algen djuda un irman ki txoma Jocelyn. Un dia Jocelyn korda txeu tristi. El fla: “N staba ta xinti sen forsa i sen valor. Má mi éra pionera i éra dia ki N ta saíba na pregason. Nton, N faze un orason i N bai pregason.” Na kel palmanhan Jocelyn konxe Mary, ki éra un mudjer dretu ki seta studa Bíblia. Alguns mês dipôs, Mary fla ma el staba ta ora pa Deus ta pidi-L ajuda kantu Jocelyn konku na se pórta. Kuzê ki Jocelyn prende ku kel spiriénsia? El fla: “N xinti sima si Jeová staba ta fla-m: ‘N sta kontenti ku bo.’” É klaru ki nen tudu  algen ka ta obi kel mensajen ki nu ta prega, má nu pode ten serteza ma Jeová ta fika kontenti óras ki nu ta faze nos midjór pa pâpia ku otus algen sobri notísias sábi.

17. Kuzê ki bu prende ku kel ki Vicky fla sobri resgati? (Salmo 5:12)

¹⁷ Ku bazi na resgati Jeová ta púrdua pekadus di kes algen ki el sta kontenti ku es. (1 Tim. 2:5, 6) Má, i si na nos korason inda nu ka ten serteza ma Jeová sta kontenti ku nos, sikrê nu ten fé na resgati i dja nu batiza? Lenbra ma nen sénpri nu ka ta pode kunfia na kuzas ki nu sta xinti, má nu pode kunfia na Jeová. Pa el kes algen ki ten fé na resgati é justu i el promete ma el ta abênsua-s. (Lé Salmo 5:12; Rom. 3:26) Un irman ki txoma Vicky da kónta modi ki foi bon pa el pensa txeu na valor di resgati. El fla: “Jeová tevi txeu ténpu ta mostra paxénxa ku mi... Má, éra sima si N staba ta fla-l: ‘Bu ka ta konsigi ama un algen sima mi. Sakrifisiu di bu Fidju ka ta txiga pa púrdua nhas pekadu.’” Dipôs di pensa txeu na prezenti di resgati, el kumesa ta xinti ma Jeová ta ama-l. Nos tanbê, nu pode xinti ma Jeová ta ama-nu i ma el sta kontenti ku nos si nu pensa na resgati.

18. Di kuzê ki nu pode ten serteza si nu kontinua ta ama nos Pai ki sta na séu?

¹⁸ Enbóra nu pode sforsa pa aplika kes kuza ki nu prende, alvês nu pode fika dizanimadu i pergunta si Jeová sta kontenti ku nos. Si kel-li kontise, lenbra ma el ta sta kontenti ku “kes ki ta kontinua ta ama-l.” (Tia. 1:12) Pur isu, kontinua ta bira amigu di Jeová i ta djobe tudu kes próva ki ta mostra ma el sta kontenti ku bo. Nunka ka bu skese ma Jeová “ka sta lonji di kada un di nos.” — Atus 17:27.