Na kel noti antis di Jizus móre, el konsedja se disiplus pa es ka tenta ser más inportanti ki ses irmon na fé. El fla-s: “Reis des mundu ta guberna ses povu pa forsa. Kes xéfi ki ten otoridadi riba gentis es ta fla di ses kabésa: ‘Ami é bon patron.’ Má anhos, nhos ka debe faze si.” — Lúkas 22:25, 26, BPK.

Kenha ki éra kes “bon patron” ki Jizus pâpia di es? Gregus ku romanus di ténpu antigu, tinha ábitu di txomaba ses governanti i kes algen inportanti di “bon patron”. Kel titlu li atxadu skrebedu na muédas i na otus kuza. Es ta txomaba es di “bon patron” pamodi éra un manera di es onraba kes ómi ki ta fazeba alguns kuza di valor pa ses povu.

Txeu di kes rei resebe titlu di “bon patron”. Alguns di es éra governantis di Ijitu ki éra konxedu pa Ptolomeu III Evergetes (pa vólta di 247-222 A.J.) i Ptolomeu VIII Evergetes II (pa vólta di 147-117 A.J.). Otus algen ki txomadu di “bon patron” éra kes governanti di Roma sima Júlio César (48-44 A.J.) i Augusto (31 A.J.–14 D.J.), i tanbê Eródis Grandi, ki éra rei di Judea. Eródis talvês txomadu si pamodi el manda buska trigu pa se povu duránti ténpu di fómi i el ranja ropa pa kes algen ki tinha nisisidadi.

Un studiozu di Bíblia di Alimanha ki txoma Adolf Deissmann, fla ma kes algen di kel ténpu ta uzaba txeu kel titlu di “bon patron”. El skrebe: ‘Si bu djobe na kuzas antigu, na poku ténpu bu ta atxa kel titlu li skrebedu más di 100 bês.’

Nton, kuzê ki Jizus krê flaba kantu el fla se disiplus: ‘Má anhos, nhos ka debe faze si’? Jizus ka krê flaba ma es ka devia preokupaba ku kes algen di ses ténpu. Má, el staba preokupadu ku ses intenson, óras ki es ta fazeba bondadi pa otus.

Na ténpu di Jizus, kes algen riku ta krê tinha bon nómi na sosiadadi. Pur isu, es ta daba dinheru pa faze spetaklus, pa faze prasas i otus kuza sima kes-li. Má txeu di es ta fazeba kes kuza la sô pa algen odjaba, pa es fikaba konxedu ô pa pesoas votaba na es. Un livru inportanti ta fla: “Alguns di kes algen ki gostaba di da, ta fazeba el di korason, má kuazi tudu algen ta fazeba el pamodi interesi na pulítika.” Jizus da se disiplus kel konsedju, pamodi el krê pa es ivitaba tendénsia di ser inportanti i di pensa sô na ses kabésa.

Alguns anu dipôs, apóstlu Polu tanbê mostra ma é inportanti nu da kuzas ki nu ten, di korason. El skrebe pa kristons na Korintu: ‘Kada un di nhos, nhos faze sima nhos disidi na korason, ka kóntra vontadi nen pa obrigason, pamodi Deus gosta di ken ki ta da ku alegria.’ — 2 Cor. 9:7.