1, 2. (a) Modi ki Jizus responde Pedru kantu el fla-l pa el ten péna di se kabésa? (Odja dizenhu na komésu di studu.) (b) Pamodi ki Jizus da Pedru kel respósta la?

DISIPLUS di Jizus ka konsigi kridita na kuzê ki es obi. Es pensaba ma Jizus ta sérba Rei di Israel. Má Jizus fla-s ma faltaba poku ténpu pa el sufreba i pa el moreba. Apóstlu Pedru fla Jizus: ‘Ten péna di bu kabésa, Sinhor! Kel-li ka ta kontise ku bo.’ Jizus responde-l: ‘Sai di nha frenti Satanás! Bo é un pédra di tropesu pa mi, pamodi bu ka ten pensamentus di Deus, má kes di ómi.’ — Mat. 16:21-23; Atos 1:6.

² Kantu Jizus fla kes palavra li, el mostra ma pensamentus di Jeová é diferenti di pensamentus di mundu, ki é kontroladu pa Satanás. (1 João 5:19 ) Pedru sta flaba Jizus pa el pensa sô na se kabésa. Oji é si ki txeu algen na mundu ta pensa. Má Jizus sabia ma é ka si ki Jeová ta pensa. Jeová kreba pa el priparaba se kabésa pa el sufri i pa el móre. É kel-li ki kontise ku el dipôs. Respósta klaru ki Jizus da Pedru, mostra ma el ta pensaba sima Jeová i ma el ka krê pensaba sima mundu.

3. Pamodi ki é más faxi pensa sima mundu di ki pensa sima Jeová?

 ³ I nos? Nu ta pensa sima Deus ô sima mundu? Anos é sérvus di Jeová, pur isu, nu ta sforsa pa nu ten sertéza ma kel ki nu ta faze ta dexa-l kontenti. Má i sobri nos manera di pensa? Nu ta sforsa pa nu pensa sima Jeová? Pa nu pensa sima el, nu ten ki faze txeu sforsu. Má é faxi nu pensa sima algen di mundu, pamodi spritu di mundu sta na tudu lugar. (Efé. 2:2) Tanbê pesoas di mundu ta fla-nu pa nu pensa sô na nos kabésa i nu pode xinti gana di sigi ses konsedju. Pur isu, é difísil pensa sima Jeová, má é faxi pensa sima algen di mundu.

4. (a) Kuzê ki pode kontise si nu bira ta pensa sima mundu? (b) Modi ki kel studu li ta ben djuda-nu?

⁴ Si nu bira ta pensa sima mundu, nu ta fika ta pensa sô na nos kabésa i nu ta krê disidi pa nos mê kuzê ki é dretu ô mariadu. (Mar. 7:21, 22) Pur isu, é txeu inportanti nu prende pensa sima ‘Deus ta pensa’ i pa nu ka pensa ‘sima ómis ta pensa’. Kel studu li, ta ben djuda-nu odja pamodi ki é bon pensa sima Jeová. Tanbê nu ta ben prende ma nu ka ta perde liberdadi si nu faze kel-li. I nu ta ben odja kuzê ki nu meste faze pa mundu ka muda nos manera di pensa. Na kel otu artigu, nu ta ben odja modi ki nu ta sabe kuzê ki Jeová ta pensa sobri un asuntu i kuzê ki nu pode faze pa nu pensa sima el.

5. Pamodi ki alguns algen ka krê pa ningen muda ses manera di pensa?

⁵ Alguns algen ta atxa ma ningen ka ta muda ses manera di pensa ô pô-s ta faze algun kuza. Es ta fla: “Ningen ka ta fla-m kuzê ki N debe faze”. Óras ki es ta fla si, es ta mostra ma es krê disidi pa ses kabésa i ma es ten direitu di faze-l. Es ka krê pa otus algen kontrola-s ô obriga-s ser sima tudu algen. *

6. (a) Ki liberdadi Jeová da-nu? (b) Nos liberdadi ka ten limiti? Splika.

⁶ É bon nu sabe ma sikrê nu pensa sima Jeová sobri un asuntu, nu ka sta dexa di ser kel ki nos é ô dexa di ten nos opinion. 2 Coríntios 3:17 ta fla: ‘Undi spritu di Jeová sta, la ten liberdadi.’ Nu dadu liberdadi pa nu ser kel tipu di algen ki nu krê ser. Nu pode skodje kuzê ki nu gosta i kuzê ki nu krê faze. É si ki Jeová faze-nu. Má, kel-li ka krê fla ma nos liberdadi ka ten limiti. (Lé 1 Pedro 2:16.) Pamodi óras ki nu meste disidi si un kuza é dretu ô mariadu, Jeová ta krê pa nu uza se Palavra pa djuda-nu toma bon disizon. Faze si ta tra-nu nos liberdadi ô el ta djuda-nu?

7, 8. Si nu pensa sima Jeová nu ta perde nos liberdadi? Da un izénplu.

⁷ Odja un izénplu ki ta djuda-nu ntende kel-li. Pai ku mai ta sforsa pa da ses fidju bon idukason. Es ta inxina-s ma es debe ser onéstu, trabadjador i ruspeta otus algen. Kel-li ka ta tra liberdadi di ses fidju. Má asi, es ta pripara ses fidju pa ser un bon algen na vida. Óras ki ses fidju ba ta kria i sai di kaza, es ta fika livri pa es faze kuzê ki es krê. Si es disidi vive sima ses pai ku ses mai iduka-s, é más faxi es toma bons disizon i es ta  ivita txeu prubléma, preokupasons i rapendimentu.

⁸ Jeová é sima un bon pai. El krê pa ses fidju ten kel midjór vida ki ten. (Isa. 48:17, 18) Pur isu, el ta inxina-nu modi ki nu debe konporta i modi ki nu debe trata otus algen. El ta konvida-nu pa nu prende kuzê ki el ta pensa sobri un asuntu i pa nu vive sima nu prende. Si nu faze kel-li, nu ka ta perde nos liberdadi. Má, el ta djuda-nu midjora nos manera di pensa i toma midjór disizons. (Sal. 92:5; Prov. 2:1-5; Isa. 55:9) Tanbê nu ta kontinua ta faze kuzas ki nu gosta i toma bons disizon ki ta pô-nu ser filís. (Sal. 1:2, 3) Óras ki nu ta pensa sima Jeová, sénpri é nos ki ta ganha!

9, 10. Kuzê ki ta mostra ma manera ki Jeová ta pensa é mutu más midjór ki di mundu?

⁹ Kal ki é otu razon ki nu ten pa nu krê pensa sima Jeová? É pamodi se manera di pensa é midjór di ki manera di pensa di mundu. Pesoas di mundu ta da konsedju sobri konportamentu, modi ki família pode ser filís, ten un bon trabadju i sobri otus kuza. Má txeu di kes konsedju é kóntra kel ki Jeová ta pensa. Pur izénplu, mundu ta poi algen pa djobe sô ses interesi. Tanbê el ta fla ma é normal faze konportamentu seksual mariadu. I ti el ta fla ma un maridu ku mudjer pode sipara ô divôrsia, si es atxa ma es ka sta filís. Kes konsedju li, é kóntra kel ki Bíblia ta fla. Má, konsedjus di mundu ta sirbi pa nos oji más di ki kes di Bíblia?

¹⁰ Jizus fla: ‘Sabedoria ta mostra ma el é justu pa se óbras.’ (Mat. 11:19) Mundu dja avansa txeu na tekinolojia, má es ka konsigi rezolve kes prubléma ki ka ta dexa-nu ser filís, sima géra, diskriminason i krimi. I tanbê txeu algen ta atxa ma é normal faze konportamentu seksual mariadu. Txeu algen sabe ma kes kuza li ta distrui família, ta traze duénsas i otus prubléma. Má kes algen ki ta pensa sima Jeová, ten un família filís i bon saúdi. I es ten bons amizadi ku tudu kes algen ki ta sirbi Jeová na mundu interu. (Isa. 2:4; Atos 10:34, 35; 1 Cor. 6:9-11) Kel-li ta mostra klaru ma manera ki Jeová ta pensa é mutu más midjór ki di mundu.

11. Kenha ki Muizes dexa pa muda se manera di pensa i kal ki foi rezultadu?

¹¹ Sérvus di Jeová na ténpu antigu, sabia ma manera di pensa di Jeová é mutu más midjór. Pur izénplu, ‘Muizes inxinadu tudu sabedoria di Ijitu’ , má el sabia ma é Jeová ki ta da sabedoria di verdadi. (Atos 7:22 ; Sal. 90:12) Tanbê el pidi Jeová: ‘Pô-m konxe bus kaminhu’. (Êxo. 33:13) Muizes dexa Jeová muda se manera di pensa. Pur isu Jeová uza Muizes di un manera spesial pa faze Se vontadi. I na Bíblia el txoma-l di un ómi di txeu fé. — Heb. 11:24-27.

12. Kuzê ki apóstlu Polu ta uzaba pa tomaba disizon?

¹² Apóstlu Polu tanbê éra un ómi intilijenti i el tinha txeu skóla. El ta papiaba peloménus dôs língua, ebraiku ku gregu. (Atos 5:34; 21:37, 39; 22:2, 3 ) Má óras ki el tinha ki disidiba kuzê ki éra dretu ô mariadu, el ka ta sigiba sabedoria di mundu. El ta uzaba Palavra di Deus pa el tomaba disizon. (Lé Atos 17:2; 1 Coríntios 2:6, 7, 13.) Pur isu, el tevi bons rezultadu na se pregason i el tinha speransa di ganha un rekonpénsa ki ta dura pa tudu ténpu. — 2 Tim. 4:8.

13. Kenha ki ten responsabilidadi di pô-nu pensa sima Jeová?

 ¹³ Nu pode odja klaru ma manera ki Jeová ta pensa é mutu más midjór ki manera ki mundu ta pensa. Si nu sigi konsedjus di Deus, nu ta ser filís di verdadi i nu ta ten bons rezultadu. Má, Jeová ka ta obriga ningen pa pensa sima el. Tanbê nen ‘skravu fiel i prudenti’ i nen ansions ka ta obriga-nu pensa sima es. (Mat. 24:45; 2 Cor. 1:24) Kada un di nos ten responsabilidadi di prende pensa sima Jeová. Modi ki nu pode faze kel-la?

14, 15. (a) Kuzê ki nu meste faze pa nu pensa sima Jeová? (b) Pamodi ki nu ka debe dexa ideias di mundu entra na nos kabésa? Da un izénplu.

¹⁴ Na Romanos 12:2 ta fla: ‘I nhos para di sigi kel mundu li, má nhos troka nhos manera di pensa pa nhos pode transforma, asi nhos ta prova nhos kabésa kal ki é kel vontadi di Deus, ki é dretu, ki é perfetu i ki el ta seta.’ Kel testu li ta inxina-nu ma ka nporta kuzê ki ta kontrolaba nos manera di pensa antis di nu konxe verdadi, nu pode muda i bira ta pensa sima Jeová. Pode ser ki nu ta pensaba di un manera diferenti pamodi tendénsias ki nu erda, ô kuzas ki nu pasa na vida, má nos menti pode kontinua ta muda. Kel-li ta kontise pamodi kuzas ki nu ta skodje pensa na el. Pur isu, óras ki nu tenta ntende pamodi ki Jeová ta pidi-nu pa nu faze un kuza ô pa nu ka faze, nu ta odja ma se manera di pensa é sénpri midjór. Asi nu ta krê faze kuzas sima Jeová ta pidi-nu.

¹⁵ Má, pa nu poi nos menti ta pensa sima Jeová, nu meste faze di tudu pa ka dexa mundu kontrola nos manera di pensa. Kel-li krê fla ma nu ten ki para di odja, lé i obi kalker kuza ki sta kóntra pensamentus di Deus. Pa djuda-nu ntende pamodi ki kel-li é inportanti, nu ben odja un izénplu di kumida. Un algen ki krê ten bon saúdi ta skodje kumida ki é bon pa saúdi. Má si tanbê el kume kumida stragadu, se sforsu ka ta sirbi pa nada. Pode kontise mésmu kuza ku nos. Si nu sforsa pa nu prende pensa sima Jeová, má nu dexa ideias di mundu entra na nos kabésa, nos sforsu ka ta sirbi pa nada.

16. Di kuzê ki nu debe proteje nos kabésa?

¹⁶ Nu ta konsigi fika lonji di tudu pensamentus di mundu? Nau, ideias di mundu sta pa tudu lugar i nu ka ta pode sai di mundu. (1 Cor. 5:9, 10) Mésmu óras ki nu bai pregason, nu ta obi pesoas ta pâpia sobri ses ideia mariadu i ses krénsa falsu. Sikrê nu ka pode ivita tudu ideias di mundu, nu ka meste fika ta pensa na es ô seta kes ideia. Nu debe ser sima Jizus. Nu ta nega lógu kalker ideia ki Satanás krê poi na nos kabésa. Tanbê nu debe proteje nos kabésa pa nu ka sta ta obi, odja ô lé ideias di mundu sen nisisidadi. — Lé Provérbios 4:23.

17. Kuzê ki nu debe faze pa nu ka sta ta obi, odja ô lé ideias di mundu sen nisisidadi?

¹⁷ Pur izénplu, nu debe skodje nos amigus ku kuidadu. Bíblia ta fla ma si nu ser amigu di kes algen ki ka ta adora Jeová, nu ta kumesa ta pensa sima es. (Prov. 13:20; 1 Cor. 15:12, 32, 33) Tanbê nu debe ten kuidadu óras ki nu ta skodje nos diverson. Óras ki nu ta ivita diversons ki ta pâpia sobri ensinus di evoluson, violénsia ô konportamentu seksual mariadu, nu sta ivita poi na nos  kabésa ideias ki é ‘kóntra konhisimentu di Deus’. — 2 Cor. 10:5.

18, 19. (a) Pamodi ki nu debe toma kuidadu ku kes ideia di mundu ki ka ta parse klaru? Da alguns izénplu. (b) Ki perguntas nu debe faze nos kabésa i pamodi?

¹⁸ Ten óras ki ideias di mundu ka ta parse klaru. Pur isu, nu meste sabe modi ki nu ta konxe-s i ivita-s. Pur izénplu, alguns notísia na jornal ta mostradu di un manera ki ta apoia opinion di un partidu pulítiku. Ô es ta konta stória di un algen ki mundu ta fla ma el subi na vida. Alguns filmi i livrus ta insentiva pesoas pa ten kes ideia li: ‘Primeru é mi’, i ‘primeru é nha família’. Ta parse ma é ka mariadu pensa si, i é un direitu ki tudu algen ten. Má, pensa di kel manera li ta mostra ma kes algen ka ta sigi kel ki Bíblia ta fla. Bíblia ta fla ma nu ta ser filís djuntu ku nos família sô si nu ama Jeová primeru. (Mat. 22:36-39) Tanbê, nu debe toma kuidadu ku alguns stória pa kriansas i dizenhus animadu. Txeu di es é dretu, má alguns é prigozu. Es ta poi kriansas ta pensa ma konportamentu seksual mariadu é normal, sen es da kónta.

¹⁹ É klaru ki tudu diverson é ka mariadu. Má nu debe pergunta nos kabésa: ‘N ta konsigi da kónta di kes ideia di mundu sikrê es ka ta parse klaru? N sta proteje nhas fidju i nha kabésa di alguns prugrama di tilivizon i di lé informasons ki ten ideias di mundu? N sta ta djuda nhas fidju pensa sima Jeová, asi pa es ka dexa ideias di mundu ki es ta obi i ki es ta odja, muda ses manera di pensa? Pa nu ka dexa kel mundu li kontrola nos manera di pensa, nu ten ki konsigi odja diferénsa entri pensamentus di Jeová i di mundu.

20. Modi ki nu ta sabe si nu sta pensa sima mundu ô sima Jeová?

²⁰ Nu ka debe skese ma ten sô dôs fonti di informason. Un é Jeová i kel otu é mundu di Satanás. Modi ki nu ta sabe si nu sta pensa sima mundu ô sima Jeová? Respósta ta dipende di ki fonti nu sta ta buska informasons. Si nu seta ideias di mundu, nu ta fika ta pensa i ta konporta sima algen di mundu. Pur isu é txeu inportanti nu toma kuidadu ku kuzê ki nu ta skodje odja, lé, obi i pensa na el.

21. Kuzê ki nu sta ben odja na kel otu studu?

²¹ Na kel studu li, nu odja kuzê ki nu meste faze pa nu pensa sima Jeová. Nu meste ivita kes kuza ki ta pô-nu faze kuzas mariadu. Má sô kel-li ka ta txiga. Tanbê nu meste intxi nos menti ku pensamentus di Deus. Asi nu ta konsigi pensa sima el ta krê. Na kel otu studu nu ta ben odja modi ki nu ta konsigi faze kel-li.