1. Pamodi ki nos tudu nu meste pa algen konsola-nu?

NOS tudu nu meste pa algen konsola-nu. Talvês preokupason, diziluzon i prublémas, dja bira ta faze párti di nos vida. Tanbê, ten alguns kuza ki ta pô-nu sufri sima duénsa, bedjisa, ô mórti di un algen ki nu krê txeu. Otus algen pode trata-nu mariadu. Pa piora situason, nu sta vive na meiu di algen ki sta bira kada bês más violéntu. Nu ka ten dúvida ma nu sta ‘vive na ténpu konplikadu difísil di aguenta’. Kel-li ta mostra klaru ma nu sta na ‘ténpu di fin’ i ma kel mundu novu sta kuazi ta ben. (2 Tim. 3:1) Má simé, talvês dja nu ten txeu ténpu ta spéra pa Jeová kunpri se promésa. I timenti kel dia ka txiga nos prubléma pode fika más piór. Nton kuzê ki pode konsola-nu?

2, 3. (a) Kuzê ki nu sabe sobri Habacuque? (b) Modi ki livru di Habacuque pode djuda kada un di nos?

² Nu ta atxa respósta di kel pergunta li na livru di Habacuque. Talvês nómi Habacuque siginifika ‘brasa’. Kel-li pode mostra modi ki Jeová ta konsola-nu ô modi ki se sérvus ta kúnfia na el, sima un mininu ta brasa se pai riju. Bíblia ka ta fla-nu txeu kuza sobri vida di Abakuki, má se livru pode da-nu txeu konsolu. Abakuki pâpia ku Deus i el faze-l  alguns pergunta. Jeová responde se proféta i el manda-l skrebe sobri kuza ki es pâpia, pamodi el sabia ma kel-la ta ben djudaba nos. — Hab. 2:2.

³ Tudu ki Bíblia ta fla-nu sobri Abakuki, é kel konbérsu entri el ku Jeová, kantu el staba dizanimadu. Má se livru, ta faze párti di ‘tudu kes kuza ki skrebedu antis’ na Palavra di Deus, ‘asi, através di nos kapasidadi di aguenta firmi i através di konsolu ki nu ta resebe di Skrituras, pa nu pode ten speransa.’ (Rom. 15:4) Modi ki livru di Habacuque pode djuda kada un di nos? El pode djuda-nu ntende kuzê ki siginifika kúnfia na Jeová. Tanbê, profesias di Habacuque ta da-nu sertéza ma nu pode ten pas déntu nos, mésmu óras ki nu ta pasa pa prublémas. Nu ben odja otus informason inportanti sobri livru di Habacuque.

4. Pamodi ki Abakuki staba dizanimadu?

⁴ Lé Habacuque 1:2, 3. Abakuki vive na un ténpu txeu difísil. El ta viveba na meiu di pesoas ki éra mau i violéntu. Pamodi kel-li el fika txeu dizanimadu. Pa tudu ladu ki el odjaba, judeus staba ta maltrata kunpanheru. Pur isu, Abakuki pergunta: ‘Ki ténpu ki kes maldadi li ta kaba? Pamodi ki Jeová sta dura ki aji?’ Abakuki pidi Jeová pa faze algun kuza pamodi el staba na un situason difísil. Talvês el kumesa ta pensa ma Jeová ka sta preokupa más ku se povu, ô ma el sta ta dura ki aji. Dja bu kustuma xinti mésmu kuza?

5. Ki lison inportanti nu ta prende na livru di Habacuque? (Odja fotu na komésu di studu.)

⁵ Pamodi ki Abakuki faze kes pergunta? El perde kunfiansa na Jeová i fé na se promésas? Nau! Abakuki pidi Jeová pa djuda-l ntende se prublémas. Kel-li ta mostra ma el ka perde speransa i ma el ta kunfiaba na El. Abakuki staba preokupadu i el ka sta ntendeba pamodi ki Jeová ka sta ajiba. I tanbê pamodi ki el staba ta dexa-l sufri. Má, Jeová manda Abakuki pa skrebe sobri se prublémas. Kel-li ta inxina-nu un lison inportanti: nu ka meste xinti medu di konta Jeová nos preokupasons ô algun kuza ki nu ka sta ntende. Pur isu, el ta konvida-nu pa nu faze orason i pa nu fla-l modi ki nu sta xinti. (Sal. 50:15; 62:8) Provérbios 3:5 tanbê ta insentiva-nu pa nu ‘kúnfia na Jeová di tudu nos korason’ i pa nu ka ‘kúnfia na nos própi ntendimentu.’ Talvês Abakuki konxeba kes palavra li, i el sigi kel konsedju li na se vida.

6. Pamodi ki é inportanti faze orason?

⁶ Abakuki ta kunfiaba na Jeová. Pur isu, el faze di tudu pa el ser más se amigu. Abakuki ka fika sô preokupadu ku se situason i nen el ka kúnfia na se ntendimentu. Má, el fla Jeová kuzê ki el staba ta xinti i ses preokupason. Kel-li é un bon izénplu pa nos. Jeová ki é Kel ki ta obi orason, ta konvida-nu pa nu pâpia ku el sobri nos prublémas. Asi nu ta mostra ma nu ta kúnfia na el. (Sal. 65:2) Óras ki nu ta faze si, nu ta odja ma Jeová ta responde nos orason. Nu ta xinti ma el ta gia-nu i ma el ta konsola-nu. É sima ki el ta da-nu un abrasu ku karinhu. (Sal. 73:23, 24) Ka ta nporta ki prubléma nu sta pasa pa el, Jeová ta djuda-nu ntende modi ki el ta odja nos situason. Asi nu ka ta fika  preokupadu dimás ku nos prublémas. Pâpia ku Jeová na orason é un di kes midjór manera di nu mostra ma nu ta kúnfia na el.

7. Modi ki Jeová reaji kantu Abakuki konta-l se preokupasons?

⁷ Lé Habacuque 1:5-7. Talvês, dipôs ki Abakuki konta Jeová se prublémas i preokupasons el pergunta: ‘Kuzê ki Jeová pode pensa di kuza ki N fla?’ Má, Jeová ki é un Pai xeiu di amor, ntende modi ki Abakuki staba ta xinti. El sabia ma Abakuki staba ta sufri i el mesteba se ajuda. Pur isu, el ka fika xatiadu ku Abakuki, má el fla-l kuzê ki el sta ben fazeba ku kes judeu disleal. Pode ser ki Abakuki foi kel primeru algen ki Jeová fla ma ka ta dura el ta trazeba distruison.

8. Kantu Jeová responde orason di Abakuki, kuzê ki el fla-l ki dexa-l preokupadu?

⁸ Jeová responde orason di Abakuki. El fla-l ma el staba prontu pa el aji. Kes algen mau i violéntu ta sérba kastigadu. I Jeová fla ma kel-li ta kontiseba na ‘ses ténpu’. Kel-li ta mostraba ma Abakuki ô kes judeu mau di se ténpu inda ta staba bibu óras ki distruison binha. Má, na respósta ki Jeová da Abakuki el fla-l un kuza ki dexa-l preokupadu. Jeová fla ma el ta ben uzaba kes algen di Babilónia pa kastigaba kes judeu. Talvês Abakuki pergunta: ‘Pamodi? Kes algen di Babilónia é más violéntu ki judeus. Peloménus judeus konxe Jeová. Pamodi ki Jeová sta ben uza un povu ki ta adora deus falsu? Kel-li ta ben traze más sufrimentu pa judeus.’ Si bu staba na lugar di Abakuki, kuzê ki bu ta atxaba di respósta di Jeová?

9. Talvês ki otus pergunta Abakuki faze?

⁹ Lé Habacuque 1:12-14, 17. Abakuki ntende ma Jeová sta ben uzaba Babilónia pa kastiga kes algen mau di Judá. Má inda el tinha alguns dúvida. El éra umildi i el kontinua ta kúnfia na Jeová. El fla ma Jeová é se ‘Rótxa’. (Deut. 32:4; Isa. 26:4) Abakuki sabia ma Jeová é un Deus di amor i ma el é bon. Pur isu, el ka xinti medu di faze Jeová otus pergunta sima: Pamodi ki Jeová dexa situason na Judá bira más piór? Pamodi ki el ka sta faze nada? Pamodi ki Deus Tudu-Poderozu ta ‘fika kaladu’ i ta dexa maldadi spadja pa tudu lugar? El é ‘Santu’ i se ‘odjus é puru dimás pa odja kel ki é mau.’

10. Pamodi ki alvês nu pode xinti sima Abakuki?

¹⁰ Alvês nu pode xinti sima Abakuki. Nu ta obi ku Jeová, nu ta kúnfia na el, nu ta lé i nu ta studa Bíblia, pa nos speransa fika más fórti. Tanbê nu ta obi sobri se promésas através di se organizason. Má simé, nu pode kontinua ta pergunta: ‘Ti ki ténpu ki sufrimentu ta kaba?’ Livru di Abakuki ta inxina-nu modi ki nu ta lida ku es situason.

11. Kuzê ki Abakuki disidi faze?

¹¹ Lé Habacuque 2:1. Dipôs ki Abakuki pâpia ku Jeová el xinti un pas déntu di el. El disidi kúnfia na Jeová i spéra pa el aji. Kel-li é ka sô un disizon ki el toma na kel momentu, pamodi más tardi el ripiti se disizon: ‘N ta spéra trankilu pa dia di frónta.’ (Hab. 3:16) Otus sérvu fiel di Deus kúnfia na El i spéra ku paxénxa. Ses izénplu ta da-nu  forsa pa nu ka dizisti i spéra pa Jeová aji. — Miq. 7:7; Tia. 5:7, 8.

12. Kuzê ki nu pode prende ku Abakuki?

¹² Kuzê ki nu ta prende ku disizon di Abakuki? Primeru, nunka nu ka debe dexa di faze orason i konta Jeová tudu nos prublémas. Sugundu, nu meste obi kuzê ki Jeová ta fla-nu através di se Palavra i di se organizason. Tirseru, nu meste spéra ku paxénxa i kúnfia ma Jeová ta aji na ténpu sértu pa kaba ku nos sufrimentu. Si nu faze sima Abakuki, nu ta xinti pas déntu nos i nu ta konsigi aguenta firmi. Nos speransa ta djuda-nu ten paxénxa i ser filís, mésmu ku prublémas. Speransa ta da-nu sertéza ma nos Pai na Séu ta ben aji. — Rom. 12:12.

13. Modi ki Jeová nkoraja Abakuki?

¹³ Lé Habacuque 2:3. Nu pode ten sertéza ma Jeová fika kontenti ku disizon ki Abakuki toma. El spéra pa Jeová aji. Jeová é Deus Tudu-Poderozu, el sabia ma Abakuki sta ta sufreba. Pur isu, el konsola-l ku amor i el promete-l ma ka ta dura el ta respondeba se perguntas. Éra sima si Jeová sta ta flaba Abakuki: ‘Ten paxénxa i kúnfia na mi. Pode parse ma sta ta dura. Má N ta responde bu orason!’ Jeová lenbra Abakuki ma dja el tene se dia markadu pa el kunpri Se promésas. Asi, Jeová nkoraja se proféta pa kontinua ta spéra. Óras ki Jeová kunpriba se promésa Abakuki ka ta fikaba diziludidu.

14. Kuzê ki nu debe kontinua ta faze óras ki nu sta pasa pa prublémas?

¹⁴ Nos tanbê nu debe spéra pa Jeová aji i obi ku atenson kuzê ki el ta fla-nu. Asi, nu ta kúnfia na el i nu ta xinti pas déntu nos, mésmu ku prublémas. Jizus fla-nu pa nu kúnfia na Jeová ki é Kel ki ta kontrola ténpu. Pur isu, nu ka meste fika preokupadu ku ‘ténpu ô dia’ ki Deus inda ka fla-nu. (Atus 1:7, BPK ) Nu meste kúnfia ma é Jeová ki sabe kal ki é midjór óra di aji. Pur isu, nu debe ser umildi i nu ka debe dizisti. Nu debe spéra ku paxénxa i ten fé na Deus. Timenti nu sta ta spéra, nu debe uza nos ténpu dretu pa sirbi Jeová di midjór manera ki nu pode. — Mar. 13:35-37; Gál. 6:9.

15, 16. (a) Ki promésas nu ta atxa na livru di Habacuque? (b) Kuzê ki kes promésa ta inxina-nu?

¹⁵ Jeová promete ma ‘algen justu ta ben vive pamodi se lialdadi’, i ma ‘Téra ta ben intxi di konhisimentu di glória di Jeová’. (Hab. 2:4, 14) Jeová promete ma el ta da vida pa tudu ténpu, pa kes algen ki ta kúnfia na el i ki ta spéra ku paxénxa.

¹⁶ Pensa na kel promésa ki sta na Habacuque 2:4. El pode parse un kuza sinplis. Má, el é txeu inportanti ki apóstlu Polu pâpia di el três bês na se kartas! (Rom. 1:17; Gál. 3:11; Heb. 10:38) Ka ta nporta sufrimentu ki nu sta ta pasa, nu pode ten sertéza ma si nu kontinua lial i ku fé na Jeová, nu ta ben odja se promésas ta kunpri. Jeová krê pa nu mante konsentradu na nos speransa pa futuru.

17. Ki sertéza Jeová ta da pa kes algen ki ta kúnfia na el?

¹⁷ Livru di Habacuque ten txeu lison inportanti pa nos ki sta vive na ténpu di fin. Jeová promete ma el ta da vida pa tudu ténpu, pa kalker algen ki  kúnfia na el. Pur isu, ka ta nporta ki prublémas ô preokupasons ki nu tene, nu kontinua ta omenta nos kunfiansa na Deus. Kuza ki Jeová fla Abakuki ta da-nu sertéza ma el ta ben djuda-nu i el ta ben salva-nu. El ta pidi-nu ku amor pa nu kúnfia i pa nu spéra ku paxénxa ti ki txiga kel dia ki el tene markadu pa traze se Reinu pa governa Téra. Na kel ténpu, Téra ta ben sta xeiu di algen filís, ki gosta di pas i ki ta adora sô Jeová. — Mat. 5:5; Heb. 10:36-39.

18. Modi ki palavras di Jeová toka korason di Abakuki?

¹⁸ Lé Habacuque 3:16-19. Kuza ki Jeová fla Abakuki toka-l se korason. Abakuki pensa na kuzas grandi ki Jeová dja fazeba pa se povu na ténpu antigu. Kel-li pô-l ta kúnfia na Jeová más txeu. El tinha sertéza ma faltaba poku pa Jeová ajiba. Kel-li konsola-l, mésmu ki el sabia ma inda el ta sufreba. Dúvidas di Abakuki kaba, i el pasa ta ten sertéza ma Jeová ta salvaba el. Kuza ki el fla na versíklu 18 ta mostra se grandi kunfiansa na Deus. Kel-li pode ser un di kes palavra di kunfiansa más fórti ki nu ta atxa na Bíblia. Alguns di kes studiozu di Bíblia ta fla ma kes palavra siginifika: “N ta salta di alegria pamodi Sinhor; N ta badja di alegria pamodi Deus.” Kel-li é un grandi lison pa nos! Jeová promete-nu un futuru sábi, má tanbê el da-nu sertéza ma el sta trabadja désdi gósi pa kunpri kes promésa.

19. Sima Abakuki, kuzê ki nu ten ki faze pa Jeová konsola-nu?

¹⁹ Un lison inportanti ki nu ta prende na livru di Habacuque é kúnfia na Jeová. (Hab. 2:4) Pa nu kontinua ta kúnfia na Jeová, nu meste ten un amizadi fórti ku el. Pa kel-li, nu meste (1) kontinua ta faze orason i fla Jeová tudu nos preokupasons i prublémas. (2) Obi ku atenson kel ki Jeová ta fla-nu na se Palavra i sigi orientasons ki el ta da-nu através di se organizason. (3) Ser fiel i ten paxénxa timenti nu sta spéra pa Jeová kunpri se promésas. É kel-li ki Abakuki faze. Kantu el kumesa ta pâpia ku Jeová el staba txeu dizanimadu. Má na fin, el xinti animadu i konsoladu. Si nu faze sima Abakuki, Jeová tanbê ta anima-nu i el ta brasa-nu ku amor. Na undi ki nu pode atxa konsolu midjór ki kel-li?